ស្ថាប័នពាក់ព័ន្ធ រួមមាន រដ្ឋបាលជលផល អង្គការមូលនិធិសកលសម្រាប់អភិរក្សធនធានធម្មជាតិ (WWF) និងក្រុមអ្នកជំនាញមកពីសហរដ្ឋអាមេរិក បានរួមគ្នាចុះកំណត់អត្តសញ្ញាណសត្វផ្សោតលើកទីមួយនៃឆ្នាំ ២០២៣ នេះ កាលពីថ្ងៃទី ១២ មករាដល់ទី ១៧ មករា ដើម្បីតាមដាន និងស្ថានភាពសត្វផ្សោតក្នុងទន្លេមេគង្គ។ ទិន្នន័យនេះនឹងត្រូវដាក់បញ្ចូលជាមួយទិន្នន័យដែលគេគ្រោងចុះសិក្សាចំនួនពីរលើកទៀតនៅក្នុងឆ្នាំនេះ ដើម្បីឈានដល់ការបូកសរុប និងចងក្រងរបាយការណ៍អំពីចំនួនសត្វផ្សោតក្នុងឆ្នាំ ២០២៣។
អង្គការ WWF បញ្ជាក់លើទំព័រហ្វេសប៊ុកថា របាយការណ៍នេះមានសារៈសំខាន់ក្នុងការផ្ដល់បច្ចុប្បន្នភាពនៃចំនួនសត្វផ្សោត ព្រមទាំងគាំទ្រដល់ភ្នាក់ងាររដ្ឋាភិបាល អង្គការដៃគូ និងអ្នកអភិរក្ស ស្វែងរកយុទ្ធសាស្ត្រថ្មីៗបន្ថែមទៀត ដើម្បីពង្រឹងការការពារសត្វផ្សោតទន្លេមេគង្គកុំឱ្យបាត់បង់។
ជំរឿនសត្វផ្សោតឆ្នាំ២០២០ បង្ហាញថា មានសត្វផ្សោតត្រឹមតែ ៨៩ក្បាលប៉ុណ្ណោះ ដែលរស់នៅក្នុងទន្លេមេគង្គ ចាប់ពីខេត្តក្រចេះ ដល់ខេត្តស្ទឹងត្រែង។ ការគំរាមកំហែងរបស់សត្វផ្សោត រួមមានការនេសាទខុសច្បាប់ និងការសាងសង់ទំនប់វារីអគ្គិសនីនៅផ្នែកខាងលើនៃទន្លេមេគង្គ។
ទាក់ទងនឹងការងារអភិរក្សនេះដែរ លទ្ធផលបឋមនៃជំរឿនសត្វស្លាបទឹកអាស៊ីបង្ហាញថា តំបន់ការពារទេសភាពបឹងព្រែកល្ពៅនៅខេត្តតាកែវ មានសត្វស្លាបចំនួន ៩១ ប្រភេទ ខណៈតំបន់ការពារទេសភាពអន្លង់ព្រីងនៅខេត្តកំពត មានសត្វស្លាបចំនួន ៣៤ ប្រភេទ។ ជំរឿនសត្វស្លាបទឹកអាស៊ី (Asian Water Bird Census) នេះ ធ្វើឡើងដោយអង្គការជីវិតធម្មជាតិនៅកម្ពុជា (NatureLife Cambodia) សហការជាមួយមន្ត្រីឧទ្យានុរក្សនៃតំបន់ការពារទេសភាពទាំងពីរនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។