ស្ទឹងសៀមរាបក្លាយជាកន្លែងស្រូបទាញទេសចរ ក្រោយពីយុវជនមាតាធម្មជាតិផ្សាយវីដេអូបង្ហូរទឹកកខ្វក់ចូល
2024.09.10
ទិដ្ឋភាពសិស្សនិស្សិតអង្គុយលេងកម្សាន្តនៅមាត់ស្ទឹង ខេត្តសៀមរាប នៅដើមខែកញ្ញា ២០២៤។
រូប៖ ពលរដ្ឋផ្ដល់ឱ្យ
ស្ទឹងសៀមរាបបានក្លាយជាកន្លែងទាក់ទាញភ្ញៀវទេសចរយ៉ាងសំខាន់មួយដែលភ្ញៀវទេសចរតែងតែអង្គុយកម្សាន្តតាមមាត់ស្ទឹងដោយមិនមានក្លិនស្អុយ និងទឹកកខ្វក់ដូនមុននោះឡើយ។
បញ្ហានេះ មន្ត្រីសង្គមស៊ីវិល និងយុវជននឹកឃើញដល់ការលះបង់និងការតស៊ូមតិរបស់ក្រុមយុវជនចលនាមាតាធម្មជាតិ ដែលតែងតែទាមទារឱ្យអាជ្ញាធរដោះស្រាយ វិបត្តិបរិស្ថានក្នុងតំបន់នោះ តែបែរជាត្រូវជាប់គុក។
បច្ចុប្បន្នស្ថានភាពស្ទឹងសៀមរាប ឋិតនៅចំកណ្តាលអតីតរាជធានីបុរាណ បានក្លាយជាទីចាប់អារម្មណ៍យ៉ាងខ្លាំងពីភ្ញៀវទេសចរ ដោយសារវិបត្តិបរិស្ថាន នៅតំបន់នោះ ត្រូវបានអាជ្ញាធរដោះស្រាយ និងកែលម្អសោភ័ណភាព ដោយសារក្រោយមានការទាមទាររបស់ក្រុមយុវជនចលនាមាតាធម្មជាតិ។
ទោះជាយ៉ាងណា មន្ត្រីសង្គមស៊ីវិល និងក្រុមយុវជនមើលឃើញថា កន្លងទៅស្ទឹងបុរាណមួយនេះមានការបង្ហូរទឹកកខ្វក់ និងចោលសំរាម ជះក្លិនស្អុយ ប៉ះពាល់សោភ័ណភាព និងជីវចម្រុះ រហូតដល់បឹងទន្លេសាប។
ក៏ប៉ុន្តែក្រោយពី ក្រុមយុវជនចលនាមាតាធម្មជាតិបានតស៊ូមតិគ្រប់ទម្រង់រួមមាន ផលិតវីដេអូ និងការដាក់ញត្តិជាដើម បង្ហាញពីភាពមិនប្រក្រតី របស់អាជ្ញាធរខេត្តសៀមរាប មិនយកចិត្តទុកដាក់ ថែរក្សាបរិស្ថានទឹកស្ទឹងនេះ ធ្វើឱ្យវិបត្តិបរិស្ថានស្ទឹងសៀមរាប ត្រូវបានដោះស្រាយ។
យុវជនរស់នៅខេត្តសៀមរាប លោក ចៅ ភេត្រា សង្កេតឃើញថា ទឹកស្ទឹងសៀមរាប មានភាពស្រស់ស្អាតដូច្នេះ ជាការរួមចំណែកយ៉ាងសំខាន់ របស់ក្រុមយុវជនចលនាមាតាធម្មជាតិ ដែលអាជ្ញាធរគួរតែលើកទឹកចិត្ត និងផ្តល់ឱកាសឱ្យពួកគាត់បំពេញការងារឱ្យបានពេញលេញ វាជារឿងល្អសម្រាប់បរិស្ថាន មិនគួររឹតត្បិតនោះទេ។
លោក ចៅ ភេត្រា៖ «យើងគួរតែផ្ដល់សិទ្ធិក្នុងការការពារធនធានធម្មជាតិ ការពារបរិស្ថាន ឬក៏ជួយសម្អាតបរិស្ថាន និងបង្កើតបម្រាមផ្សេងៗ ឲ្យយុវជនមានតួនាទីចូលរួមយ៉ាងសំខាន់បំផុតនៅក្នុងប្រទេសយើង ព្រោះយុវជនគឺជាកម្លាំងមួយដែលរដ្ឋាភិបាលត្រូវយល់ចិត្តទុកដាក់»។
ក្នុងរយៈពេលជាង ២ ឆ្នាំកន្លងទៅនេះ ស្ថានភាពស្ទឹងសៀមរាបមានការកែលម្អច្រើន ដោយកន្លែងខ្លះជីកស្ដារ សាងសង់កន្លែងកម្សាន្ត និងដាំស្មៅតាមបណ្តោយដងស្ទឹង មានភ្ញៀវទេសចរ និងសិស្សនិស្សិតអង្គុយកម្សាន្ត។ រីឯម្ចាស់សណ្ឋាគារ ម្ចាស់គេហដ្ឋាន និង ផ្ទះសំណាក់ មួយចំនួនបានរៀបចំកែលម្អប្រព័ន្ធលូបង្ហូរទឹកស្អុយបានខ្លះ ហើយអាជ្ញាធរបានស្ថាបនាលូសាធារណៈជាច្រើនកន្លែង ដើម្បីចម្រុះទឹកកខ្វក់ មុននឹងហូរចុះស្ទឹង។
កន្លងទៅក្រុមចលនាមាតាធម្មជាតិ បានផ្សាយវីដេអូ បង្ហាញពីទឹកកខ្វក់ហូរចូលស្ទឹងសៀមរាប មានប្រភពចេញពីមន្ទីរពេទ្យ ផ្សារ សណ្ឋាគារ ផ្ទះសំណាក់ ភោជនីយដ្ឋាន និងផ្ទះប្រជាពលរដ្ឋ។ ជាមួយគ្នានេះពួកគេរកឃើញថា អាងចម្រោះទឹកកខ្វក់ក្រុងសៀមរាបមួយកន្លែងមានទំហំ១២ហិកតារ ចំណាយលុយសាងសង់អស់១៤លានដុល្លារ និងដាក់ឱ្យប្រើប្រាស់នៅឆ្នាំ២០១០ បានក្លាយជាអាងចិញ្ចឹមត្រីទៅវិញ។
ក្រុមយុវជនចលនាតាមធម្មជាតិ លោក ថុន រដ្ឋា ធ្លាប់ប្រាប់វិទ្យុអាស៊ីសេរីមុនពេលជាប់ពន្ធនាគារលើកទី០២ថា ទឹកស្អុយដែលបង្ហូរចូលស្ទឹងនេះ នឹងបន្តហូរចូលបឹងទន្លេសាប ដោយមិនបានចម្រោះត្រឹមត្រូវធ្វើឱ្យប៉ះពាល់ជីវចម្រុះនៅក្នុងទឹក។ លោកថា ទឹកនេះពលរដ្ឋបានប្រើប្រាស់ដើម្បីស្រោចដំណាំ ដាំបន្លែ ចិញ្ចឹមត្រី និងនេសាទ។
លោក ថុន រដ្ឋា៖ «សម្ដីរបស់អាជ្ញាធរមួយចំនួន នៅពេលមានក្រុមណា ហ៊ានលើកឡើងនូវបញ្ហាកើតមាន តែងតែចោទក្រុមយុវជន កេងចំណេញនយោបាយ ។ សំណួរថា តើយើងកេងចំណេញនយោបាយដាក់បក្សកន្លែងណា បើយើងអ្នកស្រឡាញ់ធនធានធម្មជាតិ»។
វិទ្យុអាស៊ីសេរីមិនទាន់អាចទាក់ទង សុំការបំភ្លឺរឿងនេះ ពីអ្នកនាំពាក្យសាលាខេត្តសៀមរាប លោក លី វណ្ណៈ បាននៅឡើយទេនៅថ្ងៃទី៩ កញ្ញា ដោយទូរស័ព្ទហៅចូលតែគ្មានអ្នកលើក។
កាលពីដើមខែកក្កដាកន្លងទៅ អាជ្ញាធរបានចាប់ខ្លួនយុវជនចលនាមាតាធម្មជាតិ ០៥នាក់ ដាក់ពន្ធនាគាររួមមាន លោក ថុន រដ្ឋា លោក លី ចាន់ដារ៉ាវុធ កញ្ញា ភួន កែវរស្មី កញ្ញា ឡុង គន្ធា និងលោក យីម លាងហ៊ី ក្រោយពីតុលាការបានផ្ដន្ទាទោសសកម្មជនបរិស្ថានចំនួន ១០នាក់ ឱ្យជាប់ពន្ធនាគារ ចន្លោះពី ៦ ទៅ ៨ឆ្នាំ ពីបទ «រួមគំនិតក្បត់ និងប្រមាថព្រះមហាក្សត្រ» ដោយសារពួកគេចេញមុខការពារបរិស្ថាន។
អ្នកសម្របសម្រួលផ្នែកឃ្លាំមើលការរំលោភសិទ្ធិមនុស្សនៃអង្គការលីកាដូប្រចាំខេត្តបន្ទាយមានជ័យ និងខេត្តសៀមរាប លោក អ៊ិន គង់ជិត យល់ថា យុវជនលះបង់ពេលវេលា និងធនធានផ្ទាល់ខ្លួន រួមចំណែកលើកកម្ពស់បរិស្ថាន និងសង្គម អាជ្ញាធរគួរតែលើកទឹកចិត្ត មិនគួរដាក់ទោសទណ្ឌនោះទេ។
លោក អ៊ិន គង់ជិត៖ «យើងគួរតែផ្ដល់សិទ្ធិក្នុងការការពារធនធានធម្មជាតិ ការពារបរិស្ថាន ឬក៏ជួយសម្អាតបរិស្ថាន និងបង្កើតបម្រាមផ្សេងៗ ឲ្យយុវជនមានតួនាទីចូលរួមយ៉ាងសំខាន់បំផុតនៅក្នុងប្រទេសយើង ព្រោះយុវជនគឺជាកម្លាំងមួយដែលរដ្ឋាភិបាលត្រូវយល់ចិត្តទុកដាក់»។
ស្ទឹងសៀមរាប ឬហៅម្យ៉ាងទៀតថា ប្រឡាយបុរាណសៀមរាប មានប្រភពទឹកហូរចុះពីភ្នំគូលែន ឆ្ពោះទៅបឹងទន្លេសាប ឆ្លងកាត់ក្រុងសៀមរាប ហើយក៏មានប្រភពទឹកផ្សេងទៀត ហូរចេញពីរមណីយដ្ឋានក្នុងតំបន់អង្គរ។
ស្ទឹងប្រវត្តិសាស្ត្រមួយនេះ ត្រូវបានការពារដោយព្រះរាជក្រឹត្យដោយកំណត់ជាតំបន់អភិរក្ស ការពារទេសភាពវប្បធម៌ ឋិតក្នុងតំបន់ ០៣មានប្រវែងជាង ៨០ គីឡូម៉ែត្រ។ ស្ទឹងបុរាណនេះ មានពលរដ្ឋជាច្រើនពាន់គ្រួសារប្រើប្រាស់ទឹកសម្រាប់ធ្វើកសិកម្ម និងនេសាទត្រីជាដើម។
យុវជន និងមន្ត្រីសង្គមស៊ីវិល ស្នើឱ្យរដ្ឋាភិបាលដោះលែង និងលើកលែងបទចោទប្រកាន់ លើសកម្មជនការពារបរិស្ថាន ១០រូប និងយុវជនសង្គមផ្សេងៗទៀត ដើម្បីឱ្យពួកគាត់មានឱកាសចូលរួមជួយសង្គម និងបរិស្ថាន ឱ្យបានពេញលេញ ស្របតាមច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា