មន្ត្រីជំនាញជួបពលរដ្ឋពិភាក្សាពីសំណងប៉ះពាល់គម្រោងសង់ទំនប់ទឹកស្ទឹងសង្កែនៅខេត្តបាត់ដំបង
2017.02.02
មន្ត្រីជំនាញមកពីក្រសួងពាក់ព័ន្ធ និងអាជ្ញាធរស្រុកឯកភ្នំ ជួបពិភាក្សាជាមួយពលរដ្ឋនៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង អំពីសំណងប៉ះពាល់គម្រោងសង់ទំនប់ទឹកស្ទឹងសង្កែ នៅថ្ងៃទី២ ខែកុម្ភៈ ឆ្នាំ២០១៧។ RFA/Hum Chamrouen
RFA/Hum Chamrouen
ប្រជាពលរដ្ឋប្រមាណ ៥០នាក់ ដែលរងផលប៉ះពាល់ពីគម្រោងសង់ទំនប់ទឹកស្ទឹងសង្កែ នៅស្រុកឯកភ្នំ ខេត្តបាត់ដំបង នៅព្រឹកថ្ងៃទី២ ខែកុម្ភៈ ចូលរួមពិភាក្សាជាមួយអាជ្ញាធរស្រុកឯកភ្នំ និងមន្ត្រីមកក្រសួងពាក់ព័ន្ធ ដើម្បីសិក្សាអំពីសំណងប៉ះពាល់ដែលត្រូវដោះស្រាយជូនពួកគាត់។
នៅក្នុងកិច្ចពិភាក្សានោះ ប្រជាពលរដ្ឋភាគច្រើនព្រួយបារម្ភខ្លាចអាជ្ញាធរពាក់ព័ន្ធផ្ដល់សំណងជូនពួកគាត់មិនបានសមរម្យដូចការសន្យា។
តំណាងពលរដ្ឋម្នាក់រស់នៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ លោក ឌី ខុន ផ្ដល់សម្ភាសន៍ឲ្យអាស៊ីសេរី នៅខាងមុខផ្ទះព្រឹកថ្ងៃទី២ ខែកុម្ភៈ ថា គម្រោងសង់ទំនប់ទឹកស្ទឹងសង្កែ នៅចំណុចសាលាតាអន ប៉ះពាល់ដីលំនៅឋានមានដំណាំហូបផ្លែ រួមមានដើមដូង ស្វាយ និងចេក ជាដើម ទទឹងជាង ២០ម៉ែត្រ និងបណ្ដោយប្រហែល ៧០ម៉ែត្រ។
លោកបន្ថែមថា ផលដំណាំទាំងអស់នេះជាចំណូលសំខាន់ប្រចាំថ្ងៃដោះស្រាយជីវភាពក្នុងគ្រួសាររបស់លោក។ លោកព្រួយបារម្ភខ្លាចអាជ្ញាធរសង់ទំនប់ទឹក ហើយមិនផ្ដល់ប្រាក់សំណងជូនពួកគាត់ទៅតាមតម្លៃដីទីផ្សារ៖ «ខ្ញុំព្រួយបារម្ភខ្លាំងតែម្ដង មិនដឹងថាចេញពីនេះទៅកូនចៅទៅរៀនសូត្រយ៉ាងណាទេ។ ហើយពេលរុះរើផ្ទះ ទាល់តែដោះស្រាយឲ្យហើយ បើមិនដោះស្រាយទេ ខ្ញុំមិនដឹងបានប្រាក់ពីណារើផ្ទះទេ»។
ឆ្លើយតបនឹងបញ្ហានេះ អភិបាលស្រុកឯកភ្នំ លោក ឡុង សុភឺន មានប្រសាសន៍នៅកិច្ចពិភាក្សានោះថា មន្ត្រីជំនាញមកពីក្រសួងពាក់ព័ន្ធចុះមកសិក្សាសំណងផលប៉ះពាល់អំពីគម្រោងសង់ទំនប់ទឹកនេះ ដើម្បីដាក់ទៅរដ្ឋាភិបាលអនុប័ត្រសម្រេចនៅពេលខាងមុខ។ លោកបន្ថែមថា អាជ្ញាធរនឹងផ្ដល់សំណងប៉ះពាល់ជូនពលរដ្ឋទៅតាមតម្លៃជាក់ស្ដែងនៅលើទីផ្សារ៖ «អ៊ីចឹងមានន័យថា ដោះស្រាយផលប៉ះពាល់ គឺជាគោលនយោបាយរបស់រាជរដ្ឋាភិបាលផ្ដល់ជូនពលរដ្ឋមិនឲ្យខាតទេ។ ទំនប់នេះមានប្រយោជន៍សំខាន់៣។ ទី១ បម្រើផ្នែកកសិកម្មសម្រាប់ស្រោចស្រព។ ទី២ បម្រើវិស័យទេសចរណ៍។ យើងអាចទាញប្រយោជន៍ដូចនៅអាងកំពីងពួយដែរ។ ទី៣ បម្រើវិស័យគមនាគមន៍ មានផ្លូវនៅលើស្ពាននោះ»។
ទោះយ៉ាងនេះក្ដី អាជ្ញាធរពុំទាន់កំណត់តម្លៃជាក់លាក់ដែលត្រូវសងឲ្យពលរដ្ឋក្នុងដីមួយម៉ែត្រការ៉េតម្លៃប៉ុន្មាននៅឡើយ។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបាត់ដំបង លោក យិន ម៉េងលី មានប្រសាសន៍ថា អាជ្ញាធរពាក់ព័ន្ធត្រូវផ្ដល់សំណងជូនពលរដ្ឋឲ្យបានមុនពេលសាងសង់ទំនប់ទឹក ដើម្បីពួកគាត់យកប្រាក់ទៅសង់ទីលំនៅថ្មីបានទាន់ពេលវេលា៖ «ខ្ញុំចង់សំណូមពរថា ការអភិវឌ្ឍធ្វើឡើងដើម្បីផលប្រយោជន៍ទាំងអស់គ្នា គឺមិនមែនសម្រាប់បក្សពួក ឬក្រុមណាមួយនោះទេ។ អ៊ីចឹងធ្វើយ៉ាងម៉េចឲ្យការអភិវឌ្ឍនេះ ប្រជាពលរដ្ឋទទួលបានផលប្រយោជន៍ទាំងអស់គ្នា»។
ទំនប់ទឹកមួយនេះមានទីតាំងនៅក្នុងស្រុកឯកភ្នំ ខេត្តបាត់ដំបង និងមានពលរដ្ឋប៉ះពាល់ពីសំណង់ប្រមាណជិត ៥០០គ្រួសារ នៅក្នុងឃុំចំនួន៣ គឺឃុំព្រែកនរិន្ទ ព្រែកខ្ពប និងឃុំសំរោងក្នុង។ គម្រោងមួយនេះ អាជ្ញាធរគ្រោងសង់ប្រឡាយពង្វាងទឹកប្រវែងជាង ៧០០ម៉ែត្រ នឹងទទឹងប្រមាណ ៧០ម៉ែត្រ ដើម្បីឲ្យទឹកស្ទឹងសង្កែ ហូរឆ្លងកាត់នៅពេលដែលអាជ្ញាធរសង់ទំនប់ទឹក។
អភិបាលស្រុកឯកភ្នំ អះអាងថា ទំនប់នេះចាប់ផ្ដើមសាងសង់បណ្ដើរៗហើយ ដោយជំហានដំបូងសង់ប្រឡាយពង្វាងទឹក។ ជំហានបន្ទាប់ សង់ទំនប់ទឹកស្ទឹងសង្កែ ដោយមានទ្វារបង្ហូរទឹកចំនួន ៦កន្លែង និងមានផ្លូវសម្រាប់ត្រីធ្វើចរាចរណ៍ទាំងរដូវប្រាំង និងរដូវវស្សា។ លោកបន្ថែមថា ថវិកាសម្រាប់សាងសង់ទំនប់នេះ ជារបស់រាជរដ្ឋាភិបាលកម្ពុជា ចំណាយអស់ជាង ៣០លានដុល្លារអាមេរិក ហើយគ្រោងញ្ចប់នៅដំណាច់ឆ្នាំ២០១៩៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ
