អ្នកវិភាគលើកឡើងថា សម្ភារ: និងបរិក្ខារវេជ្ជសាស្ត្ររបស់ចិន ដែលបានផ្តល់ជាជំនួយដល់កម្ពុជា ដើម្បីប្រយុទ្ធប្រឆាំងនឹង ជំងឺកូវីដ-១៩ (Covid-19) គ្រាន់តែបន្លំភ្នែកមតិសាធារណៈ ដើម្បីជាការលាក់បាំងកំហុសរបស់ខ្លួន ដែលដំបូងឡើយបានលាក់បាំងការពិត បណ្ដាលឱ្យពិភពលោកទាំងមូលជួបគ្រាះថ្នាក់ និងបណ្ដាលឱ្យមនុស្សរាប់ម៉ឺននាក់ស្លាប់។ អ្នកវិភាគថា បន្ថែមលើនេះទៅទៀត សម្ភារៈសុខាភិបាលមិនសូវមានប្រសិទ្ធភាពក្នុងការបង្ការវីរុសកូរ៉ូណា (Coronavirus)ទេ។ ប៉ុន្តែមន្ត្រីរដ្ឋាភិបាលអះអាងថា ចិនមានសមត្ថភាពគ្រប់គ្រាន់ក្នុងការទប់ស្កាត់និងព្យាបាលប្រជាពលរដ្ឋរបស់ខ្លួនដែលបានឆ្លងជំងឺកូវីដ-១៩ (Covid-19)។
អ្នកជំនាញខ្លះលើកឡើងថា ប្រទេសចិនអាចបង្កប់ហេតុផលនយោបាយ ក្នុងជំនួយមនុស្សធម៌ ដើម្បីលាងជម្រះរូបភាពមិនល្អរបស់ខ្លួន ពាក់ព័ន្ធនឹងជំងឺកូវីដ-១៩ (Covid-19) នេះ នៅលើឆាកអន្តរជាតិ។
អ្នកវិភាគ បណ្ឌិត មាស នី មានប្រសាសន៍ថា ចិនជួយកម្ពុជាក្នុងគោលបំណងនយោបាយ ហើយទំនាក់ទំនងជាមួយចិនកាន់តែស្អិតរមួតនេះ បង្កក្តីព្រួយបារម្ភដល់ប្រជាពលរដ្ឋខ្មែរ ព្រោះប្រទេសកុម្មុយនិស្តមួយនេះធ្លាប់គាំទ្ររបបខ្មែរក្រហម ដែលបានធ្វើឱ្យប្រជាពលរដ្ឋខ្មែរជិត ៣លាននាក់បាត់បង់ជីវិត ក្នុងកំឡុងឆ្នាំ១៩៧៥-១៩៧៩៖ «យើងដឹងហើយថា សម្រាប់វត្តមានចិននេះដូចជាពិបាកនៅក្នុងការលួងលោមពលរដ្ឋខ្មែរបន្តិច សម្រាប់យកចិនមកធ្វើទំនាក់ទំនងសំខាន់ជាមួយកម្ពុជាហ្នឹង គឺខ្ញុំគិតថា រដ្ឋាភិបាលមិនបានទទួលនូវការគាំទ្រពីពលរដ្ឋខ្មែរប៉ុន្មានទេ ហើយរឿងសំខាន់គឺបទពិសោធន៍ជាមួយខ្មែរក្រហមហ្នឹងតែម្ដងដែលធ្វើឱ្យខ្មែរឆ្អែតជាមួយនឹងចិន»។
ចំណែកអ្នកវិភាគនយោបាយនិងសង្គមលោក គឹម សុខ ដែលហ៊ានរិះគុណលោកនាយករដ្ឋមន្ត្រី ហ៊ុន សែន ឥតសំចៃមាត់ ប្រាប់អាស៊ីសេរីថា ប្រទេសចិនបានផ្តល់ជំនួយវេជ្ជសាស្ត្របន្តិចបន្តួចដល់កម្ពុជា ក្នុងស្ថានភាពការឆ្លងរីករាលដាលខ្លាំងនៃជំងឺកូវីដ-១៩ ហើយជំនួយនេះហាក់ដូចជា មិនបានបង្ហាញការពេញចិត្តរបស់ប្រជាពលរដ្ឋខ្មែរទេ។
លោកថា ចិនគ្រាន់តែចង់រក្សាទំនាក់ទំនងជាមួយលោក ហ៊ុន សែន ទាំងផ្នែកការទូត និងយោធាឱ្យនៅដដែលប៉ុណ្ណោះ ប៉ុន្តែចិនមាននយោបាយវែងឆ្ងាយ គឺការសម្លឹងឃើញប្រយោជន៍ពីប្រទេសកម្ពុជា ទៅថ្ងៃអនាគត៖ «ជាធម្មតាទំនាក់ទំនងចិនជាមួយប្រទេសណាក៏ដោយអត់ខ្វល់អំពីស្ថានភាពនៃជំហរនយោបាយរបស់មេដឹកនាំទេ។ ចិនខ្វល់តែអំពីប្រយោជន៍របស់ខ្លួនក្នុងទំនាក់ទំនងជាមួយប្រទេសនោះ ដូច្នេះហើយការព្យាយាមលួងចិត្តបន្តិចបន្តួច ដែលចិនបានផ្តល់ឱ្យទៅក្រុមលោក ហ៊ុន សែន នៅក្នុងខណៈនេះ វាគ្រាន់តែជាការលួងចិត្តដៃគូរបស់ខ្លួនតែប៉ុណ្ណឹងទេ»។
ចំណែកអ្នកជំនាញវិទ្យាសាស្ត្រនយោបាយ លោក ឯម សុវណ្ណារ៉ា មានប្រសាសន៍ថា ចិនបានផ្តល់ជំនួយជាសម្ភារៈ និងបរិក្ខារវេជ្ជសាស្ត្រ ដល់ប្រទេសទាំងឡាយណាដែលមានប្រវត្តិទំនាក់ទំនងល្អជាមួយខ្លួន មុននឹងឈានទៅផ្តល់ជំនួយសុខាភិបាលទាំងនេះ ដល់បណ្ដាប្រទេសផ្សេងៗដែលមានទំនាក់ទំនងធម្មតា។
លោកថា ចិនចង់បង្ហាញឱ្យឃើញពីទឹកចិត្ត សប្បុរសធម៌ ព្រមទាំងចង់បង្ហាញឱ្យឃើញពីសកម្មភាពរបស់ខ្លួនដើម្បីពង្រីកឥទ្ធិពល នៅលើឆាកអន្តរជាតិក្នុងពេលដែលពិភពលោកជួបហានិភ័យទាំងអស់គ្នា។
ក្រៅពីការផ្ដល់ជំនួយមិនស្មោះត្រង់ អ្នកវិភាគថា ជំនួយទាំងនោះគ្មានលុយទៀតផង។
លោកបណ្ឌិត មាស នី មានប្រសាសន៍ថា សម្ភារ:សុខាភិបាលដែលយកមកពីចិន មិនសូវមានគុណភាព ក្នុងការបង្ការ និងព្យាបាលអ្នកកើតជំងឺកូវីដ១៩ (Covid-19) នៅកម្ពុជា។
លោកបញ្ជាក់ថា មិនមែនតែកម្ពុជាមួយទេ សូម្បីប្រទេសមួយចំនួននៅក្នុងតំបន់ ដូចជាថៃ ឥណ្ឌូណេស៊ី ហ្វីលីពីន និងបណ្ដាប្រទេសកំពុងអភិវឌ្ឍន៍នានាក្នុងពិភពលោក ក៏ទទួលបានជំនួយវេជ្ជសាស្ត្រ របស់ចិនផងដែរ ហើយប្រទេសទាំងនេះ បានប្រមូលសម្ភារ:និងបរិក្ខារពេទ្យ ដែលទទួលបានពីចិនចូលទៅក្នុងឃ្លាំងវិញអស់ហើយ ដោយសារមិនទុកចិត្តគុណភាព៖ «ខ្ញុំក៍៏មិនដឹងថា តើរបស់ដែលយកមកហ្នឹងវាមានគុណភាពបានប៉ុណ្ណាអត់ដឹងដែរទេ យើងគ្រាន់តែឃើញប្រទេសមួយចំនួននៅប្រទេសអឺរ៉ុបហ្នឹង គេបានបដិសេធ និងប្រមូលសម្ភារ : ទាំងឡាយដែលទិញឬក៏ឱ្យជួយពីចិនហ្នឹងត្រឡប់មកចូលឃ្លាំងវិញ ដោយសារគេពិនិត្យទៅគឺវាអត់អាចការពារឱ្យបានមួយរយភាគរយ»។
លោកបណ្ឌិត មាស នី បានលើកឡើងបែបនេះ បន្ទាប់ពីចិនបានផ្តល់សម្ភារៈ និងបរិក្ខារវេជ្ជសាស្ត្រ ជាបន្តបន្ទាប់ដល់ប្រទេសកម្ពុជា ក្នុងនោះកាលពីថ្ងៃទី១ ខែមេសា កន្លងទៅនេះ ធនាគារចិន (Bank of China) បានផ្តល់សម្ភារ:បរិក្ខារវេជ្ជសាស្ត្រមួយចំនួនដល់ក្រសួងសុខាភិបាលកម្ពុជា ដើម្បីបង្ការជំងឺកូវីដ-១៩។
ប្រទេសចិនថ្មីៗនេះក៏បានបញ្ជូនក្រុមគ្រូពេទ្យជំនាញនៃតំបន់ស្វយ័តក្វាងស៊ី (Guangxi) ចំនួន ៧រូបមកកម្ពុជា ដើម្បីចែករំលែកបទពិសោធន៍ក្នុងការប្រយុទ្ធប្រឆាំងនឹងជំងឺកូវីដ១៩ (Covid-19) ផងដែរ ព្រោះ ប្រទេសកុម្មុយនិស្តមួយនេះ ជាប្រភពដើមនៃការចម្លងមេរោគដ៏កាចសាហាវនេះ។
គ្រូពេទ្យទាំងនេះបាននាំមកជាមួយនូវសម្ភារៈបរិក្ខារពេទ្យមួយចំនួន ដូចជា ស្រោមដៃចំនួន ៧ពាន់ ម៉ាស់វះកាត់ ជិត ៦ម៉ឺនម៉ាស់ ម៉ាសវេជ្ជសាស្ត្រ អិន៩៥ (N95) ចំនួន ៥ពាន់ សំលៀកបំពាក់សុវត្ថិភាពរបស់មន្ត្រីសុខាភិបាល របាំងមុខវេជ្ជសាស្ត្រ ជាច្រើនទៀត មកប្រគល់ឱ្យកម្ពុជា។
ឆ្លើយតបទៅនឹងការលើកឡើងបែបនេះ អ្នកនាំពាក្យរដ្ឋាភិបាលកម្ពុជាលោក ផៃ ស៊ីផាន មានប្រសាសន៍ថា អ្នកវិភាគទាំងនោះមាននិន្នាការនយោបាយ ហើយការលើកឡើងមិនស្គាល់ស្ថានភាពច្បាស់លាស់។
លោកថា ប្រទេសចិនមានសមត្ថភាពគ្រប់គ្រាន់ក្នុងការបញ្ឈប់ជំងឺកូវីដ១៩ (Covid-19) ហើយលោកថាប្រទេសកម្ពុជាក៍មិនទាន់មានអ្នកស្លាប់ដោយសារជំងឺកូវីដ១៩នេះនៅឡើយទេ គឺដោយសារតែការប្រើប្រាស់សម្ភារ:និងបរិក្ខារវេជ្ជសាស្ត្ររបស់ចិនដែលមានប្រសិទ្ធភាពខ្ពស់ មិនអន់ជាងប្រទេសមហាអំណាចឡើយ៖ «យើងអាចគ្រប់គ្រងបាន។ ដូច្នេះអ្វីដែលយើងទទួលបានសម្ភារៈ ទទួលបានបច្ចេកវិទ្យាពីចិន យើងឱ្យតម្លៃទៅចិន ពីព្រោះគេឱ្យយើង ជាជាងយើងអត់»។
លោកបន្តថា ទំនាក់ទំនងរវាងកម្ពុជា និងចិនក្នុងពេលបច្ចុប្បន្ន មិនដូចទៅនឹងរបបខ្មែរក្រហមដែលគ្រប់គ្រងដោយរដ្ឋាភិបាលចិននៅពេលនោះទេ។ លោកថា ពេលនេះជាវគ្គសម័យថ្មី មេដឹកនាំប្រទេសទាំងពីរបានបំភ្លេចចោលនូវស្រមោលអតីតកាលយូរមកហើយ ដូច្នេះការដឹកនាំរបស់រដ្ឋាភិបាលបច្ចុប្បន្នមិនអាចប្រៀបប្រដូចទៅនឹងរបបវាលពិឃាដបានទេ។
រដ្ឋាភិបាលទីក្រុងប៉េកាំងអះអាងថា អ្នកស្លាប់ដោយសារជំងឺកូវីដ១៩ (Covid-19) មានចំនួនជាង ៣.៣០០នាក់ និងមានអ្នកផ្ទុកមេរោគកូរ៉ូណាចំនួនជាង ៨ម៉ឺននាក់នៅទូទាំងប្រទេសចិន។ មកទល់ពេលនេះ ប្រទេសមួយចំនួនរួមមានអាមេរិកផងដែរ មិនទាន់ជឿជាក់ព័ត៌មាន អំពីតួលេខនៃចំនួនមនុស្សស្លាប់ និងអ្នកឈឺនៅចិននៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។