រដ្ឋាភិបាលនៅតែរក្សាជំហរមិនជម្លៀសពលរដ្ឋខ្មែរដែលកំពុងជាប់នៅតំបន់ស្នូលនៃការផ្ទុះជំងឺរលាកផ្លូវដង្ហើមបង្កឡើងដោយវីរុសកូរ៉ូណាប្រភេទថ្មី នៅប្រទេសចិន។ ជំហររបស់កម្ពុជានេះ ផ្ទុយពីអ្វីដែលរដ្ឋាភិបាលនៃប្រទេសនានានៅលើពិភពលោក កំពុងខ្នះខ្នែងជម្លៀសពលរដ្ឋរបស់ខ្លួនចេញពីតំបន់នេះជាបន្តបន្ទាប់ និងដាក់ចេញនូវវិធានការណ៍បង្ការដើម្បីទប់ស្កាត់ការរីករាលដាលនៃការឆ្លងវីរុសថ្មីនេះដល់ពលរដ្ឋរបស់ខ្លួន។
អ្នកនាំពាក្យក្រសួងការបរទេស លោក កុយ គួង ស្នើកុំឱ្យមានការព្រួយបារម្ភខ្លាំងពេកចំពោះករណីពលរដ្ឋខ្មែរ ជានិស្សិតចំនួន២៣រូប ដែលបច្ចុប្បន្នកំពុងជាប់នៅក្រុងវូហាន កន្លែងដើមចមនៃការផ្ទុះវីរុសដ៏កាចសាហាវមួយនេះ។ លោកថា និស្សិតខ្មែរទាំងនេះ មានសុខភាពល្អ ហើយអាជ្ញាធរចិនក៏បានសហការល្អក្នុងការយកចិត្តទុកដាក់លើពួកគេដែរ តាមរយៈការផ្គត់ផ្គង់ម្ហូបអាហារ និងចេញនូវសេចក្ដីណែនាំនានា ដូច្នេះហើយរដ្ឋាភិបាលពុំមានផែនការជម្លៀសពួកគេចេញនោះទេ៖ «ខ្ញុំសូមបញ្ជាក់ជាថ្មីថា មកដល់ពេលនេះ ជំហរយើងគឺនៅដដែលអំពីបញ្ហាស្ថានភាពនិស្សិតកម្ពុជាយើង ដែលមានចំនួន ២៣រូបនៅទីក្រុងវូហាននោះ គឺថាគាត់នៅសុខភាពល្អដដែល ហើយស្ថានទូតកម្ពុជានៅទីនោះ និងស្ថានអគ្គកុងស៊ុល យើងក៏មានទំនាក់ទំនងសួរសុខទុក្ខគាត់ជាប្រចាំ ហើយបានលើកទឹកចិត្តគាត់កុំឱ្យមានការភ័យខ្លាចពេក ហើយឱ្យគាត់គោរពតាមសេចក្ដីណែនាំរបស់អាជ្ញាធរចិន ក្នុងការការពារខ្លួន ហើយឱ្យគាត់ខិតខំធ្វើយ៉ាងណាប្រយ័ត្នប្រយែងថែរក្សាខ្លួនផង ហើយបើគាត់អនុវត្តទៅតាមសេចក្ដីណែនាំរបស់អាជ្ញាធរចិននោះ នោះខ្ញុំយល់ថា មិនជាបញ្ហានោះទេ»។
លោក កុយ គួង បដិសេធឆ្លើយសំណួរអាស៊ីសេរី ថាតើអ្នកណាជាអ្នកទទួលខុសត្រូវប្រសិនបើពលរដ្ឋខ្មែរជានិស្សិតទាំងនោះ ឆ្លងវីរុសថ្មីនេះ ដោយប្រការណាមួយនាពេលខាងមុខ ដោយសារកម្ពុជាមិនបានចាត់វិធានការណ៍ជម្លៀសពួកគេជាមុននោះ។
ព្រមជាមួយគ្នានេះ រដ្ឋាភិបាលក៏នៅមិនទាន់ដាក់ចេញវិធានការណ៍តឹងរ៉ឹងតាមរយៈការបិទ ឬផ្អាកជើងហោះហើរត្រង់ទាំងអស់ពីប្រទេសចិនមកកាន់កម្ពុជានៅឡើយទេ។ លោក ជា អូន អ្នកនាំពាក្យអាកាសចរណ៍ស៊ីវិលបញ្ជាក់ថា កម្ពុជាបានបិទជើងហោះហើរតែពីក្រុងវូហានពីប្រទេសចិន គឺតាំងពីថ្ងៃទី២៣ មករា មកម្ល៉េះ ក៏ប៉ុន្តែ ពុំបានបិទជើងហោះហើរពីតំបន់ដទៃនៅចិននោះទេ៖ «ចំណុចដទៃទៀតដែលមានហានិភ័យទាប យើងនៅមានការហោះហើរ ប៉ុន្តែការហោះហើរនេះគឺគោរពតាមការការពារដោយអនុវត្តតាមការណែនាំរបស់ក្រសួងសុខាភិបាលផង និងស្របតាមស្តង់ដាររបស់អង្គការសុខភាពពិភពលោក និងអង្គការអាកាសចរណ៍ស៊ីវិល [ អន្តរជាតិ ] ផងដែរ។ អ៊ីចឹង អ្វីៗគឺបានការពារត្រឹមត្រូវទៅតាមវិធានដែលមានចែងជាការណែនាំដែលយើងបានបង្កើតតាំងពីមុនឆ្នាំ២០០២មកម្ល៉េះ»។
លោក ជា អូន បន្ថែមថា ចំពោះករណីអ្នកដំណើរដែលចូលមកកម្ពុជាពីចិននៅមុនថ្ងៃទី២៣ មករា ក្រុមហ៊ុនអាកាសចរណ៍ក្នុងស្រុកបានដឹកពួកគេត្រលប់ទៅកន្លែងដើមវិញអស់ហើយ៖ «ពីម្សិលម្ង៉ៃនេះ គឺចុងក្រោយនៅសល់ភ្ញៀវ អ្នកដំណើរ ២៤នាក់ ដោយសារបិទទីក្រុងនោះហើយ គឺដឹកទៅដាក់នៅទីក្រុងស៊ិនជិន។ អ៊ីចឹង ភ្ញៀវដែលមកពីវូហាន មកក្រុងព្រះសីហនុនេះ គឺយើងបានដឹកទៅវិញអស់ហើយ»។
យ៉ាងណាក៏ដោយ ចំណាត់ការមិនជម្លៀសពលរដ្ឋខ្មែរពីចិន និងការមិនបិទជើងហោះហើរពីចិននេះ ហាក់ផ្ទុយពីអ្វីដែលរដ្ឋាភិបាលប្រទេសនានាកំពុងខ្នះខ្នែងយកចិត្តទុកដាក់ទៅលើពលរដ្ឋខ្លួន ដែលកំពុងជាប់នៅចិននេះ។ ជប៉ុន និងសហរដ្ឋអាមេរិក គឺជាប្រទេសពីរដំបូងគេបង្អស់ ដែលបានចាប់ផ្តើមជម្លៀសពលរដ្ឋខ្លួនចេញពីតំបន់ស្នូលនៃការផ្ទុះជំងឺរលាកផ្លូវដង្ហើមបង្កមកពីវីរុសកូរ៉ូណាប្រភេទថ្មី នៅក្រុងវូហាន ប្រទេសចិន។ ការជម្លៀសនេះ ធ្វើឡើងកាលពីថ្ងៃពុធ ទី២៩ មករា។ រីឯសហរដ្ឋអាមេរិកវិញ ក៏បានបញ្ជូនយន្តហោះពិសេសទៅដឹកពលរដ្ឋរបស់ខ្លួន ដែលជាបុគ្គលិកកុងស៊ុល និងពលរដ្ឋអាមេរិកាំងដទៃទៀត មកត្រួតពិនិត្យនៅក្រុងមួយនៅរដ្ឋអាឡាស្កា (Alaska) មុននឹងបញ្ជូនពួកគេបន្តមករដ្ឋកាលីហ្វ័រញ៉ា (California) នៅថ្ងៃទី២៩ មករា។
ក្រៅពីជប៉ុន និងសហរដ្ឋអាមេរិក រដ្ឋាភិបាលអូស្ត្រាលី និងនូវែលហ្សេឡង់ ក៏កំពុងធ្វើការរួមគ្នាដើម្បីជម្លៀសពលរដ្ឋខ្លួនចេញពីតំបន់នោះដែរ ហើយពលរដ្ឋដែលត្រូវជម្លៀសនោះ ត្រូវយកទៅដាក់ឱ្យនៅដាច់ពីគេរយៈពេល ១៤ ថ្ងៃ នៅលើកោះមួយ (Christmas Island) មុននឹងអនុញ្ញាតឱ្យចូលមកប្រទេសកំណើតរបស់ពួកគេវិញ។ ដោយឡែក សហភាពអឺរ៉ុបវិញ ក៏មានគម្រោងជម្លៀសពលរដ្ឋតាមយន្តហោះបារាំងពីរ នៅចុងសប្ដាហ៍នេះដែរ។ កូរ៉េខាងត្បូង និងម៉ុងហ្គោលីឯណោះ ក៏ផែនការជម្លៀសពលរដ្ឋខ្លួនស្រដៀងគ្នានេះដែរ ខណៈអាជ្ញាធរកាណាដា និងហ្វីលីពីន កំពុងតាមដាន និងថ្លឹងថ្លែងវិធានការណ៍នេះ។
ក្រៅពីវិធានការណ៍រដ្ឋាភិបាលទាំងនេះ ក្រុមហ៊ុនអាកាសចរណ៍ធំៗនៅទូទាំងពិភពលោក បានប្រកាសផ្អាកជើងហោះហើរត្រង់ទាំងអស់ ឬដោយផ្នែកទៅកាន់ និងមកពីប្រទេសចិន ឬតំបន់មួយចំនួននៃប្រទេសនេះ។ ក្រុមហ៊ុនអាកាសចរណ៍ទាំងនោះរួមមាន ក្រុមហ៊ុនអាកាសចរណ៍អង់គ្លេស (British Airways) ក្រុមហ៊ុនអាកាសចរណ៍អាល្លឺម៉ង់ (Lufthansa) ក្រុមហ៊ុនអាកាសចរណ៍អាមេរិក (American Airlines) ព្រមទាំងក្រុមហ៊ុនអាកាសមួយចំនួននៅអាស៊ី រួមមាន ឥណ្ឌា កូរ៉េខាងត្បូង ឥណ្ឌូណេស៊ី និងសិង្ហបុរីជាដើម ដែលក្រុមហ៊ុនខ្លះបានកាត់បន្ថយជើងហោះហើរ។
បច្ចុប្បន្ន មានមនុស្សជាង ៥០លាននាក់ កំពុងនៅជាប់នៅតំបន់ផ្ទុះជំងឺ និងតំបន់ជុំវិញនោះ នៅប្រទេសចិន ខណៈអាជ្ញាធរចិនកំពុងព្យាយាមបិទតំបន់ទាំងនោះ ដើម្បីទប់ស្កាត់ការរីករាលដាលនៃជំងឺនេះ ទៅកន្លែងដទៃទៀត។
ការសម្រេចរក្សាជំហរមិនជម្លៀសពលរដ្ឋខ្មែរពីចិននេះ រងការរិះគន់ខ្លាំងពីសំណាក់ក្រុមអ្នកប្រើប្រាស់បណ្ដាញសង្គម។ អ្នកប្រើប្រាស់ហ្វេសប៊ុកម្នាក់ ដាក់គណនីឈ្មោះ «គ្រូបង្រៀន ព្រំដែន» សរសេរឌឺដងថា «កម្ពុជាកំពុងដុតដៃដុតជើងជម្លៀសពលរដ្ឋចិនចូលមកកម្ពុជាដែរ»។ អ្នកប្រើប្រាស់ហ្វេសប៊ុកម្នាក់ទៀតដាក់គណនីឈ្មោះ «បុប្ផា គីង (Bophar King)» សរសេរថា៖ «នៅក្នុងប្រទេសខ្មែរវិញ បើមានពលរដ្ឋខ្មែរណាឆ្លងជំងឺនេះហើយ មិនសង្ឃឹមថារស់នោះទេ ពីព្រោះរដ្ឋាភិបាលខ្មែរគ្មានពេទ្យពូកែៗ»។ ម្ចាស់គណនីហ្វេសប៊ុករូបនេះ សរសេរបន្តថា «ពេទ្យខ្មែរជំនាញតែខាងសម្ដីអាក្រក់ គ្មានជំនាញច្បាស់លាស់ ទារឱ្យបង់លុយមុនព្យាបាល តម្លៃថ្លៃកប់ពពក កោរមិនដាក់ទឹក ឯការព្យាបាលវិញ ឮតែស្លាប់ ហើយមិនទទួលខុសត្រូវ»៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។