មន្ត្រី​សិទ្ធិមនុស្ស​អន្តរជាតិ​ថា គួរ​ថ្កោលទោស​ទង្វើ​ធ្វេស​ប្រហែស​របស់​រដ្ឋាភិបាល ដែល​មិន​ព្រម​ទប់ស្កាត់​ជនជាតិ​ចិន​ឱ្យ​ចូល​កម្ពុជា

ដោយ ខែ សុណង
2020-01-29
អ៊ីម៉ែល
មតិ
Share
បោះពុម្ព
លោក​នាយក​រដ្ឋមន្ត្រី ហ៊ុន សែន ក្នុង​វេទិកា​ជាតិ​លើក​ទី​ពីរ​ស្ដីពី "ការ​ការពារ និង​អភិរក្ស​ធនធាន​ធម្មជាតិ" នៅ​វិមាន​សន្តិភាព រាជធានី​ភ្នំពេញ ថ្ងៃ​ទី​២២ ខែ​សីហា ឆ្នាំ​២០១៧។
លោក​នាយក​រដ្ឋមន្ត្រី ហ៊ុន សែន ក្នុង​វេទិកា​ជាតិ​លើក​ទី​ពីរ​ស្ដីពី "ការ​ការពារ និង​អភិរក្ស​ធនធាន​ធម្មជាតិ" នៅ​វិមាន​សន្តិភាព រាជធានី​ភ្នំពេញ ថ្ងៃ​ទី​២២ ខែ​សីហា ឆ្នាំ​២០១៧។
Photo courtesy of PM Hun Sen's Facebook Page

មន្ត្រី​ជាន់ខ្ពស់​ឃ្លាំមើល​សិទ្ធិមនុស្ស​អន្តរជាតិ​ថា រដ្ឋាភិបាល​កម្ពុជា​គួរតែ​ត្រូវ​គេ​ថ្កោលទោស ដែល​មិន​ព្រម​ទប់ស្កាត់​ជនជាតិ​ចិន មក​កម្ពុជា​។ ការ​លើក​ឡើង​នេះ ស្រប​ពេល​ដែល​ប្រជាពលរដ្ឋ​កម្ពុជា ក៏​ស្នើសុំ​ឱ្យ​រដ្ឋាភិបាល​ផ្អាក​ជើង​ហោះហើរ​ពី​ប្រទេស​ចិន​បណ្ដោះអាសន្ន ដោយ​កំពុង​បារម្ភ​អំពី ការ​ឆ្លង​រាតត្បាត​នូវ​វីរុស​កូរ៉ូណា​នេះ ប៉ុន្តែ​អាជ្ញាធរ​អាកាសចរណ៍​ស៊ីវិល​កម្ពុជា បញ្ជាក់​ថា គ្មាន​ផែនការ​ផ្អាក​ជើង​ហោះហើរ​នោះ​ទេ ព្រោះ​នឹង​ខាតបង់​ផ្នែក​សេដ្ឋកិច្ច​ជាតិ។

មន្ត្រី​ជាន់ខ្ពស់​ឃ្លាំមើល​សិទ្ធិមនុស្ស​អន្តរជាតិ សោកស្ដាយ​ចំពោះ​ទង្វើ​រដ្ឋាភិបាល​កម្ពុជា ដែល​នៅតែ បន្ត​អនុញ្ញាត​ឱ្យ​ជនជាតិ​ចិន ធ្វើដំណើរ​ចូល​មក​ប្រទេស​កម្ពុជា ពី​តំបន់​គ្រោះថ្នាក់​នៅ​ប្រទេស​ចិន ដែល​ពិភពលោក គេ​នាំគ្នា​ហាម​ការ​ធ្វើ​ដំណើរ​ទាំងនេះ​អស់​ទៅ​ហើយ។

នាយករង​នៃ​អង្គការ​ឃ្លាំមើល​សិទ្ធិមនុស្ស​អន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ហ្វីល រ៉ូប៊ើតសុន (Phil Robertson) ប្រាប់​អាស៊ីសេរី កាលពី​ថ្ងៃ​ទី២៨ ខែ​មករា ថា រដ្ឋាភិបាល​កម្ពុជា កំពុងតែ​មិន​អើពើ ចំពោះ​គ្រោះថ្នាក់​ដល់​អាយុជីវិត​របស់​ប្រជាពលរដ្ឋ​ខ្លួនឯង ដោយសារតែ​អនុញ្ញាត​ឱ្យ​ក្រុមហ៊ុន​យន្តហោះ ចិន​បន្ត​ដឹក​អ្នកដំណើរ ដោយ​ហោះ​ត្រង់​ពី​ក្រុង​វូហាន (Wuhan) មក​កម្ពុជា តាំងពី​ផ្ទុះ​ករណី​នេះ​ដំបូង រហូត​ដល់​ពេល​រដ្ឋាភិបាល​ចិន បិទ​ជើង​ហោះហើរ​ទាំងនេះ ដោយ​ខ្លួនឯង កាលពី​ថ្ងៃ​ទី២៣ ខែ​មករា៖ «រឿង​ដែល​សំខាន់​បំផុត​នោះ គឺ​រដ្ឋាភិបាល ត្រូវ​ទទួលស្គាល់​ថា ការ​ឆ្លង​រាលដាល​នៃ​មេរោគ​នេះ ប៉ះពាល់​មនុស្ស​គ្រប់គ្នា។ ដូច្នេះ​ការ​អនុញ្ញាត​ឱ្យ​មនុស្ស​ពី​តំបន់​ដែល​មាន​បញ្ហា ចូល​មក​ប្រទេស​កម្ពុជា​បាន និង​អាច​ចម្លង​មេរោគ​នេះ ទៅ​អ្នក​ដទៃ​ទៀត​ទៅ​ទូទាំង​ប្រទេស​កម្ពុជា គឺជា​ការ​ធ្វេស​ប្រហែស មិន​យកចិត្តទុកដាក់​ចំពោះ​បញ្ហា​អាយុជីវិត​ពលរដ្ឋ​ខ្លួនឯង ដែល​ត្រូវតែ​ថ្កោលទោស​”​។ ម្យ៉ាងទៀត វា​ជា​រឿង​អកុសល​មួយ​ដែរ ដែល​លោកនាយក​រដ្ឋមន្ត្រី ហ៊ុន សែន ហ៊ាន​ប្រថុយធ្វើ​អ្វី​គ្រប់យ៉ាង ដើម្បី​ប្រយោជន៍​ចិន ទោះ​ខូចប្រយោជន៍​ខ្មែរ​ក៏ដោយ»

លោក ហ្វីល រ៉ូប៊ឺតសុន (Phil Robertson) នាយក​រង​នៃ​អង្គការ​ឃ្លាំ​មើល​សិទ្ធិ​មនុស្ស​អន្តរជាតិ យូមែន រ៉ៃត៍ វ៉ច្ឆ (Human Rights Watch) ប្រចាំ​អាស៊ី ផ្ដល់​បទសម្ភាសន៍​ដល់​វិទ្យុ​អាស៊ីសេរី កាល​ពី​អំឡុង​ខែ​​​មីនា ឆ្នាំ​២០១៥។
លោក ហ្វីល រ៉ូប៊ឺតសុន (Phil Robertson) នាយក​រង​នៃ​អង្គការ​ឃ្លាំ​មើល​សិទ្ធិ​មនុស្ស​អន្តរជាតិ យូមែន រ៉ៃត៍ វ៉ច្ឆ (Human Rights Watch) ប្រចាំ​អាស៊ី ផ្ដល់​បទសម្ភាសន៍​ដល់​វិទ្យុ​អាស៊ីសេរី កាល​ពី​អំឡុង​ខែ​​​មីនា ឆ្នាំ​២០១៥។ RFA Photo: RFA

ប្រតិកម្ម​របស់​មន្ត្រី​ជាន់ខ្ពស់​ឃ្លាំមើល​សិទ្ធិមនុស្ស​អន្តរជាតិ​រូប​នេះ ស្រប​ពេល​ដែល​រដ្ឋាភិបាល​កម្ពុជា មិន​ចាត់វិធានការ​ផ្អាក​ជើង​ហោះហើរ​ពី​តំបន់​វូហាន ភ្លាមៗ ក្រោយ​ការ​ផ្ទុះ​មេរោគ​រលាក​ផ្លូវ​ដង្ហើម ដ៏​កាច​សាហាវ ឈ្មោះ​វីរុស​កូរ៉ូណា​ថ្មី ដែល​កើតឡើង​នៅ​ទីក្រុង​វូហាន ប្រទេស​ចិន តាំង​ពី​ថ្ងៃ​ទី៣១ ខែ ធ្នូ ឆ្នាំ​២០១៩ មក​ម្ល៉េះ​។ គិត​ត្រឹម​ថ្ងៃ​ទី​២៨ ខែ​មករា វីរុស​ថ្មី​នេះ បាន​សម្លាប់​មនុស្ស ១០៧ នាក់ និង​បាន​ឆ្លង​ដល់​មនុស្ស​ជិត​៥​ពាន់​នាក់។ ករណី​វីរុស​ថ្មី​នេះ កំពុង​រីក​រាលដាល​ដល់​ប្រទេស​ជាច្រើន ក្នុង​ពិភពលោក​ដោយសារតែ​ជន​ជាតិ​ចិន​ធ្វើដំណើរ​ទៅ​ប្រទេស​ទាំង នោះ រួមមាន កោះ​តៃវ៉ាន់ ថៃ វៀតណាម សិង្ហ​បុរី ម៉ាឡេស៊ី ជប៉ុន នេប៉ាល់ កូរ៉េខាងត្បូង បារាំង អូស្ត្រាលី កាណាដា អារ៉ាប់ប៊ី សាអូឌីត និង​សហរដ្ឋអាមេរិក​។ ប្រទេស​ជាច្រើន បាន​ផ្អាក​ជើង​យន្តហោះ មកពី​តំបន់​នោះ​។ ប៉ុន្តែ រដ្ឋាភិបាល​កម្ពុជា នៅតែ​បន្ត​ឱ្យ​យន្តហោះ ដឹក​អ្នកដំណើរ​ពី​តំបន់​មាន​បញ្ហា​នោះ ហោះ​មកកាន់​កម្ពុជា។ ចំណែក​ឯ ប្រជាពលរដ្ឋ​កម្ពុជា កាន់តែ​ព្រួយបារម្ភ​អំពី​សុខភាព និង​នាំគ្នា​ពាក់​ម៉ាស់​ក្នុង​ពេល​ធ្វើ​ដំណើរ និង​ពេល​ធ្វើ​ការ បន្ទាប់ពី​ក្រសួងសុខាភិបាល រក​ឃើញ​មាន​បុរស​ជនជាតិ​ចិន​ម្នាក់​ដែល ធ្វើដំណើរ ពី​ទីក្រុង​វូហាន មក​ក្រុងព្រះសីហនុ កាលពី​ថ្ងៃ​ទី២៣ ខែ​មករា មាន​ផ្ទុក​វីរុស​នេះ។

បុគ្គលិក​កាស៊ីណូ ណាហ្គាវើលដ៍ លោកស្រី រ៉េត ធារ៉ាត់ ប្រាប់​ថា មុន​ពេល​ចូល​ធ្វើ​ការ​គឺ​ក្រុមហ៊ុន បាន​ពិនិត្យ​កម្ដៅ​បុគ្គលិក និង​បាន​ចែក​ម៉ាស់​ការពារ ប៉ុន្តែ​លោកស្រី និង​បុគ្គលិក​ដទៃ​ទៀត នៅតែ​ភ័យខ្លាច​ឆ្លង​មេរោគ​កូរ៉ូណា​នេះ ដោយសារ​ក្នុង​មួយ​ថ្ងៃៗ មាន​ជនជាតិ​ចិន​ជាច្រើន ចូល​លែង​ល្បែង​ក្នុង​កាស៊ីណូ៖ «ភ្ញៀវ​ចូល​ទៅ​ក៏​គេ​ស្កែន និង​ចែក​ម៉ាស់​ឱ្យ​ពាក់​ដែរ តែ​ភាគច្រើន​ភ្ញៀវ​ខ្មែរ​ពាក់ តែ​ភ្ញៀវ​ចិន​ភាគច្រើន អត់​ពាក់​ទេ​។​ខ្ញុំ​បារម្ភ​ណាស់​ព្រោះ​អី​ធ្វើការ​ក្នុង​កាស៊ីណូ​នេះ ចម្រុះ​ជាតិ​សាសន៍​ចូល​ទៅ ហើយ​យើង​ធ្វើការ​ផ្ទាល់​ជាមួយ​ភ្ញៀវ​ទៀត​។​ពួក​ខ្ញុំ​ចង់​ឱ្យ​កន្លែង​ដាក់​ទឹក​អាកុល​លាងដៃ​តាម​តុ​ល្បែង ដើម្បី​លាង​មេរោគ​បាន​គ្រប់​ពេល»

អគារ​ថ្មី​នៃ​ក្រុមហ៊ុន​កាស៊ីណូ ណាហ្គា វើលដ៍ (Naga World) នា​រាជធានី​ភ្នំពេញ ឆ្នាំ​២០១៩។
អគារ​ថ្មី​នៃ​ក្រុមហ៊ុន​កាស៊ីណូ ណាហ្គា វើលដ៍ (Naga World) នា​រាជធានី​ភ្នំពេញ ឆ្នាំ​២០១៩។ RFA

បន្ថែម​ពី​នេះ លោកស្រី រ៉េត ធារ៉ាត់ ស្នើសុំ​ឱ្យ​រដ្ឋាភិបាល​ផ្អាក​ជើង​ហោះ​ហើរ​ពី​ប្រទេស​ចិន​ជា​បណ្ដោះអាសន្ន ដើម្បី​បង្ការ​និង​ការពារ​កុំ​ឱ្យ​ជនជាតិ​ចិន​នាំ​មេរោគ​ប្រភេទ​ថ្មី​នេះ ចូល​កម្ពុជា​កាន់តែ ច្រើន​ដែល​ធ្វើ​ឱ្យ​ពិបាក​ទប់ស្កាត់៖ «ខ្ញុំ​ចង់​ឱ្យ​រដ្ឋាភិបាល​ផ្អាក​ជើង​ហោះហើរ ពី​ស្រុក​ខ្មែរ និង​សុំ​ឱ្យ​ផ្អាក​សាលារៀន​កូនក្មេង ព្រោះ​ដោយសារ​កូនក្មេង អត់​ចេះ​ថែរក្សា​សុខភាព​ពាក់​ម៉ាស់​អី​ទេ»

ពលរដ្ឋ​រស់នៅ​ក្នុង​ក្រុងភ្នំពេញ​ម្នាក់ទៀត លោក ចាន់ ធឿន មាន​ក្ដី​បារម្ភ​អំពី​សុខភាព​ដូចគ្នា ដោយសារ​លោក បាន​ដឹង​ថា មាន​ជនជាតិ​ចិន​ជាច្រើន​បាន​ចូល​មក​កម្ពុជា ជាពិសេស​មាន​ជនជាតិ​ចិន ៣ ពាន់​នាក់​ដែល​មកពី​ទីក្រុង​វូហាន់ ប្រទេស​ចិន​ដែល​ជា​តំបន់​ផ្ទុះ​វីរុស​ថ្មី​នេះ​។ លោក​បន្ត​ថា រដ្ឋាភិបាល​កម្ពុជា មិន​គួរ​មើលស្រាល​ស្ថានការណ៍​នោះ​ទេ គួរតែ​គិត​អំពី​សុខទុក្ខ​ប្រជាពលរដ្ឋ ដោយ​ផ្អាក​ជើង​យន្តហោះ​ពី​ប្រទេស​ចិន​ទាំងអស់​ជា​បណ្ដោះអាសន្ន៖ «ហេតុ​មិន​បិទ ខ្ញុំ​ឆ្ងល់​ដែរ។ ប្រទេស​ខ្លះ​គេ​គិត​អំពី​ពលរដ្ឋ​របស់​គេ​គឺ​គេ​បិទ​ជើង​យន្តហោះ​ដែរ មានតែ​ខ្មែរ​ហេតុ​អី​មិន​បិទ»

ចំណែក​បុគ្គលិក​កាស៊ីណូ​នៅ​ខេត្ត​ព្រះសីហនុ លោក សាំង វីន រៀបរាប់​ថា ពលរដ្ឋ​ក្នុង​ខេត្ត​ដែល​មាន ជនជាតិ​ចិន​រស់នៅ​ច្រើន​នេះ ជ្រួល​ច្របល់​ខ្លាំង បន្ទាប់ពី​ដឹង​ថា នៅ​ខេត្ត​នេះ មាន​បុរស​ជនជាតិ​ចិន ម្នាក់​ផ្ទុក​មេរោគ​កូរ៉ូណា​ថ្មី។ លោក ថា ពលរដ្ឋ​ពាក់​ម៉ាស់​ស្ទើរ​គ្រប់គ្នា ហើយ​នៅ​ថ្ងៃ​ទី២៨ ខែ​មករា គឺ លោក និង​ពលរដ្ឋ​ខ្លះ​ទៀត សម្រេច​ចាកចេញ​ពី​ខេត្ត​ព្រះសីហនុ​បណ្ដោះអាសន្ន​។ បុគ្គលិក​កាស៊ីណូ រូប​នេះ ព្រួយបារម្ភ​ថា ប្រសិនបើ​រដ្ឋាភិបាល​កម្ពុជា នៅតែ​មិន​ផ្អាក​ជើង​ហោះហើរ​ពី​ប្រទេស​ចិន ដោយ​បណ្ដោយ​ឱ្យ​ជនជាតិ​ចិន​ច្រើន​នៅតែ​ចូល​មក​កម្ពុជា គឺ​អាច​នឹង​មាន​ករណី​វីរុស​កូរ៉ូណា​ជា​បន្ត បន្ទាប់​ទៀត៖ «ខ្លាច​ជនជាតិ​មាន​ផ្ទុក​ជំងឺ​នេះ​ហើយ​មក​ប្រទេស​នេះ​មក​កម្ពុជា ដូច្នេះ​ធ្វើ​ឱ្យ​ពិបាក​ខ្លាំង​ក្នុង​ការ​គ្រប់គ្រង សភាពការណ៍​ព្រោះ​យើង​ដឹង​ហើយ​ថា វិស័យ​សុខាភិបាល យើង​មិនទាន់​ជឿនលឿន​ទេ សូម្បីតែ​ចិន​គេ​ជឿនលឿន​ផង នៅតែ​ទប់​មិន​ចង់​ជាប់​មាន​អ្នក​ស្លាប់​និង​ឆ្លង​ច្រើន»

អ្នកនាំពាក្យ​រដ្ឋលេខាធិការដ្ឋាន​នៃ​អាកាសចរ​ស៊ីវិល​កម្ពុជា លោក ជា អូន ថ្លែងប្រាប់​អាស៊ីសេរី​ថា នរណា​ក៏​ព្រួយបារម្ភ​អំពី​មេរោគ​ថ្មី​នេះ​ដែរ ប៉ុន្តែ​កម្ពុជា គ្មាន​គម្រោង​បិទ​ជើង​ហោះហើរ​ប្រទេស​ចិន ឡើយ ដោយសារ​ខ្លាច​ប៉ះពាល់​ដល់​សេដ្ឋកិច្ច​ជាតិ​ទាំងមូល​។ ទោះជា​យ៉ាងណា​លោក​បញ្ជាក់​ថា ចំពោះ​ជើង​ហោះហើរ​ពី​ទីក្រុង​វូហាន និង​ខេត្ត​ហ៊បេ​(Hubei) ទាំងមូល គឺ​រដ្ឋាភិបាល​ចិន បាន​បិទ តាំងពី​ថ្ងៃ​ទី​២៣ ខែ​មករា មក​ម្ល៉េះ៖ «មធ្យោបាយ​ធ្វើដំណើរ​ប្រៀប​ដូចជា​សរសៃ​ឈាម​របស់​យើង​អ៊ីចឹង បើ​យើង​បិទ​សរសៃឈាម​ទៅ body ឬ​ខ្លួន របស់​យើង​នឹង​ស្លាប់។ ទោះបីជា​មានការ​បារម្ភ ក៏​រដ្ឋាភិបាល​យើង​កំពុង​ដុតដៃដុតជើង​ដែរ​ដើម្បី​ធ្វើ​ការងារ​នេះ»

អ្នក​នាំ​ពាក្យ​ក្រសួង​សុខាភិបាល លោក​វេជ្ជបណ្ឌិត លី សូវ៉ាន់ ក្នុង​កម្មវិធី​វេទិកា​អ្នក​ស្ដាប់​វិទ្យុ​អាស៊ីសេរី កាល​ពី​ថ្ងៃ​ទី​២៩ ខែ​កញ្ញា ឆ្នាំ​២០១៥។ RFA
អ្នក​នាំ​ពាក្យ​ក្រសួង​សុខាភិបាល លោក​វេជ្ជបណ្ឌិត លី សូវ៉ាន់ ក្នុង​កម្មវិធី​វេទិកា​អ្នក​ស្ដាប់​វិទ្យុ​អាស៊ីសេរី កាល​ពី​ថ្ងៃ​ទី​២៩ ខែ​កញ្ញា ឆ្នាំ​២០១៥។ Photo: RFA

រីឯ​អ្នកនាំពាក្យ​ក្រសួង​សុខាភិបាល លោក​វេជ្ជបណ្ឌិត លី សូវ៉ាន់ មាន​ប្រសាសន៍ថា គិត​ត្រឹម​ម៉ោង​៤​ល្ងាច​ថ្ងៃ ទី​២៨ មករា កម្ពុជា ពុំ​ទាន់​រក​ឃើញ​មាន​ករណី​វីរុស​កូរ៉ូណា លើ​មនុស្ស​ផ្សេងទៀត​នោះ​ទេ ក្រៅ​ពី​បុរស​ជនជាតិ​ចិន​ម្នាក់ នៅ​ខេត្ត​ព្រះសីហនុ​។ លោក​អះអាង​ថា បុរស​ជនជាតិ​ចិន​ដែល​ផ្ទុក​វីរុស​កូរ៉ូណា​នោះ ត្រូវ​បាន​ក្រុម​គ្រូពេទ្យ​កម្ពុជា ដាក់​ឱ្យ​ស្ថិត​ក្នុង​បន្ទប់​ព្យាបាល​ដាច់ដោយឡែក​ពី​គេ នៅ​ក្នុង មន្ទីរពេទ្យ​ខេត្ត​ព្រះសីហនុ ហើយ​ស្ថានភាព​របស់​គាត់​នៅ​ល្អ​ប្រសើរ​ធម្មតា​ដែល​សង្ឃឹមថា នឹង​ព្យាបាល​ជាសះស្បើយ​វិញ​។ លោក លី សូវ៉ាន់ បញ្ជាក់​ដែរ​ថា សមាជិក​គ្រួសារ​របស់​បុរស​ជនជាតិ​ចិន​ដែល​ផ្ទុក​មេរោគ​កូរ៉ូណា​នោះ រួម​ទាំង​អ្នក​ធ្វើ​ដំណើរ​តាម​យន្តហោះ​ជាមួយគ្នា គឺ​ពុំ​មាន​រោគ សញ្ញា អ្វី​ទេ​។ ប្រធាន​នាយកដ្ឋាន​ប្រយុទ្ធ​នឹង​ជំងឺឆ្លង​រូប​នេះ បន្ថែម​ថា អាជ្ញាធរ​ពាក់ព័ន្ធ​កម្ពុជា នឹង​បន្ត​ស្វែង រក​ជន​ជាតិ​ចិន​ផ្សេងទៀត​មក​ទីក្រុង​វូហាន ដើម្បី​ពិនិត្យ​រក​វីរុស​កូរ៉ូណា៖ «យើង​បាន​រក​ឃើញ​អ្នក​ប៉ះពាល់​មួយ​ចំនួន​ធំ ជាពិសេស​ដែល​ជិះ​យន្តហោះ​ជាមួយ​បុរស​ផ្ទុក​វីរុស​ថ្មី នេះ ដែល​គាត់​ធ្វើដំណើរ​ទៅ​ខេត្ត​នានា​នេះ គឺ​យើង​មិនទាន់​រក​ឃើញ​រោគសញ្ញា​អ្វី​ទេ​។ ទោះជា​យ៉ាងណា​អ្នក​ប៉ះពាល់ ទាំងអស់​នេះ យើង​នឹង​បន្ត​តាមដាន​សុខភាព​របស់​គាត់​ជា​រៀងរាល់ថ្ងៃ។ សំណូមពរ​ដល់​អ្នក​នាំ​ភ្ញៀវ និង​កន្លែង​គាត់​ស្នាក់​នៅ បើ​ឃើញ​គាត់​មាន​ករណី​សង្ស័យ សូម​ជួយ​រាយការណ៍ ១១៥»

អ្នក​សម្របសម្រួល​សមាគម​អាដហុក (Adhoc) ខេត្ត​ព្រះសីហនុ អ្នកស្រី ជៀប សុធា​រី ស្នើសុំ​ឱ្យ​រដ្ឋាភិបាល​ផ្សព្វផ្សាយ​ឱ្យ​បាន​ទូលំទូលាយ​នូវ​គ្រោះថ្នាក់​នៃ​មេរោគ​ថ្មី​នេះ និង​របៀប​ការពារ ជា​ពិសេស ត្រូវ​ទប់ស្កាត់​ឱ្យ​មាន​ប្រសិទ្ធភាព។ អ្នកស្រី​បារម្ភ​ថា ប្រជាពលរដ្ឋ​ខេត្ត​ព្រះសីហនុ អាច​នឹង​មាន​ហានិភ័យ​ខ្ពស់​ក្នុង​ការ​ឆ្លង​ជំងឺ​រលាក​ផ្លូវ​ដង្ហើម​ដែល​បង្ក​ដោយ​វីរុស​កូរ៉ូណា​ថ្មី​នេះ ព្រោះ​មាន​ជនជាតិ​ចិន​ច្រើន​បាន​វិល​ត្រឡប់​ពី​ប្រទេស​ចិន មក​ខេត្ត​ជាប់​សមុទ្រ​មួយ​នេះ បន្ទាប់​ពី​ពួកគេ​បាន​ទៅ​លេង​គ្រួសារ​ក្នុង​ពេល​ចូលឆ្នាំ​ចិន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

Every countries evacuating their pple and blocking flies from China,except Cambodia-China's puppet govm't won't do it

Look this ugliest sht always smiling and be happier all the time,despite Khmer pple are worrying what will happen next?but this moron doesn't care what everybody concerning about thousands of Chinese tourist traveling everyday to Cambodia ,especially from outbreak of virus corona at Wuhan city and worldwide that have taken more than hundred lives,most of them were Chinese pple+more than 4,500 pple infected+more than 100,000 pple are suspicious and routine checkup"this status will rise up repeatedly ahead".That why this stupid dictator didn't care anything at all,there except only care about his power.If,this case scenario happen quickly in Cambodia there would infect in among 16.4 million lives of pple will put in a dangerous situation.Because,this poor and weakest govm't can't do nothing with this deadly coronavirus like what i say.Otherwise,this puppet thugs govm't are depend on China's IV supply if no more Chinese tourism coming there its govm't will collpse immediately.That why this stupid thugs govm't can't blocking down the fly from China,and on the other hand this thugs govm't wants all khmer pple wipe out from the planet earth and let Chinese pple take over Cambodia by without bloodshed.

Jan 29, 2020 02:22 PM

គេហទំព័រ​ទាំងមូល