អាជ្ញាធរ​ជំរុញ​អ្នក​ភ្នំពេញ​ព្យាបាល​ជំងឺ​កូវីដ១៩ ស្រាល​នៅ​ផ្ទះ ដោយ​សន្យា​ផ្ដល់​ថ្នាំ និង​អាហារ​សម្រាប់​អ្នក​ខ្វះខាត

ដោយ ជាតិ ចំណាន
2021-07-12
Share
អាជ្ញាធរ​ជំរុញ​អ្នក​ភ្នំពេញ​ព្យាបាល​ជំងឺ​កូវីដ១៩ ស្រាល​នៅ​ផ្ទះ ដោយ​សន្យា​ផ្ដល់​ថ្នាំ និង​អាហារ​សម្រាប់​អ្នក​ខ្វះខាត ពលរដ្ឋ​នៅ​សង្កាត់​ស្ទឹង​មាន​ជ័យ រាជ​ធានី​ភ្នំពេញ​ នាំ​គ្នា​ធ្វើតេស្ត​រក​មេរោគ​នៃ​ជំងឺ​កូវីដ១៩ និង​បន្ទប់ព្យាបាល​ជំងឺកូវីដ១៩។
រូប៖ RFA និង​ក្រសួងសុខាភិបាល

អាជ្ញាធរ​រាជធានី​ភ្នំពេញ ជំរុញ​ឲ្យ​អ្នក​ជំងឺ​កូវីដ១៩ (Covid-19) នៅ​ភ្នំពេញ ដែល​ឈឺ​ស្រាលៗ និង​មាន​ទីតាំង​ទូលាយ​ស្ម័គ្រ​ចិត្ត​ព្យាបាល​ជំងឺ​នៅ​ផ្ទះ​រៀងៗ ខ្លួន ដោយ​មាន​ការ​ប្រឹក្សា ផ្ដល់​ថ្នាំ និង​អាហារ​សម្រាប់​អ្នក​មាន​ជីវភាព​ខ្វះខាត។ សង្គម​ស៊ីវិល​ជំរុញ​ឲ្យ​អាជ្ញាធរ​មាន​ការ​ទទួល​ខុស​ត្រូវ​ខ្ពស់​ទើប​ការ​ព្យាបាល​តាម​ផ្ទះ​មាន​ប្រសិទ្ធភាព។

ការ​ព្យាបាល​ជំងឺ​កូវីដ១៩ តាម​ផ្ទះ​រៀង​ខ្លួន នឹង​ធ្វើ​ឡើង​ដោយ​គោលការណ៍​ស្ម័គ្រ​ចិត្ត ការ​វាយ​តម្លៃ​ស្ថានភាព​ជំងឺ និង​ទីតាំង​រស់​នៅ​ជាក់ស្ដែង។

អភិបាល​រង​រាជធានី​ភ្នំពេញ លោក កើត ឆែ ថ្លែង​ក្នុង​សន្និសីទ​សារព័ត៌មាន​នៅ​ថ្ងៃ​ទី១២ កក្កដា ដោយ​សន្យា​ថា អាជ្ញាធរ​នឹង​ឧបត្ថម្ភ​អាហារ​ចំពោះ​អ្នក​ខ្វះ​ខាត ក្នុង​ពេល​ព្យាបាល​ជំងឺ​នៅ​ផ្ទះ។ លោក​លើក​ទឹក​ចិត្ត​ឲ្យ​ពលរដ្ឋ​ដែល​មាន​ទីតាំង​សមរម្យ​និង​ឈឺ​ស្រាល ព្យាបាល​នៅ​ផ្ទះ ឬ​បន្ទប់​ជួល ដើម្បី​ទុក​កន្លែង​ព្យាបាល​នៅ​តាម​មណ្ឌល​ព្យាបាល ឬ​មន្ទីរ​ពេទ្យ​ឲ្យ​អ្នក​ខ្វះ​លទ្ធភាព៖ «អ៊ីចឹង​ចំពោះ​បង​ប្អូន​ប្រជាពលរដ្ឋ ដែល​មាន​ការ​ខ្វះ​ខាត​ជីវភាព សូម​ជូន​ដំណឹង​ទៅ​អាជ្ញាធរ​មូលដ្ឋាន។ យើង​នឹង​មាន​ការ​ផ្គត់ផ្គង់​ជួយ​ជា​ស្បៀង​ជួយ​ពួកគាត់​ក្នុង​អំឡុង​ពេល​ព្យាបាល។ ខ្ញុំ​បញ្ជាក់​ជូន​អ៊ីចឹង​ណា»

ថ្លែង​ក្នុង​សន្និសីទ​សារព័ត៌មាន​នេះ​ដែរ រដ្ឋលេខាធិការ​ក្រសួង​សុខាភិបាល លោក ង៉ូវ កាង ពន្យល់​ថា ការ​ដាក់​ឲ្យ​ព្យាបាល​នៅ​តាម​ផ្ទះ​​គឺ​ដើម្បី​ទុក​មណ្ឌល​ព្យាបាល​ដាក់​អ្នក​ជំងឺ​ធ្ងន់ និង​មធ្យម​ហើយ​ការ​ព្យាបាល​នៅ​តាម​ផ្ទះ​មាន​ប្រសិទ្ធិ​ភាព​ល្អ​ដូច​គ្នា។ លោក​បន្ត​ថា គ្រូ​ពេទ្យ​នឹង​អនុញ្ញាត​អ្នក​ជំងឺ​ស្រាលៗ ដែល​ជា​មនុស្ស​ពេញ​កម្លាំង និង​កុមារ ចាប់​ពី ៣០គីឡូ​ឡើង​ប៉ុណ្ណោះ​ទទួល​ការ​ព្យាបាល​នៅ​ផ្ទះ។ ឯ​ទារក ស្ត្រី​មាន​ផ្ទៃ​ពោះ ចាស់​ជរា​និង​អ្នក​មាន​អាការៈ​ធ្ងន់ធ្ងរ​នឹង​​ត្រូវ​​ដឹក​យក​ទៅ​ព្យាបាល​នៅ​តាម​មណ្ឌល ឬ​មន្ទីរ​ពេទ្យ​ដដែល។

លោក​បន្ត​ថា ក្រៅពី​នេះ​អាជ្ញាធរ​មូលដ្ឋាន ក៏​នឹង​ចុះ​ទៅ​ពិនិត្យ​ដល់​ទីតាំង​ជាក់​ស្ដែង ហើយ​លុះ​ត្រា​តែ​លំនៅឋាន​នោះ​ជា​បន្ទប់​ជួល​ដែល​ស្នាក់​នៅ​តែ​ឯង ឬ​ផ្ទះ​ដែល​មាន​ទីតាំង​ដាច់​ដោយ​ឡែក និង​បន្ទប់​ទឹក​ដាច់​ដោយ​ឡែក​ជាដើម​ទើប​ត្រូវ​អនុញ្ញាត​ឲ្យ​សម្រាក​ព្យាបាល​នៅ​ផ្ទះ។ ក្នុង​ពេល​សម្រាក​ព្យាបាល​នៅ​ផ្ទះ​គ្រូ​ពេទ្យ​នឹង​ផ្ដល់​ថ្នាំ​មួយ​ចំនួន​ចំពោះ​អ្នក​គ្មាន​លទ្ធ​ភាព​ទិញ ហើយ​គ្រូពេទ្យ​នឹង​ទំនាក់ទំនង​តាម​ទូរស័ព្ទ​ទៅ​សួរ​នាំ​ពី​អាការៈ។ អ្នក​ជំងឺ​ក៏​អាច​ទូរស័ព្ទ​ទៅ​គ្រូពេទ្យ​វិញ​​ដែរ។ ក្នុង​ករណី​​​ស្ថានភាព​ជំងឺ​វិវត្តន៍​ទៅ​រក​សភាព​ភាព​ធ្ងន់​គ្រូ​ពេទ្យ​នឹង​ទទួល​យក​ទៅ​ព្យាបាល​នៅ​មន្ទីរពេទ្យ។

លោក ង៉ូវ កាង អះអាង​ថា ការ​ព្យាបាល​ជំងឺ​កូវីដ១៩ មិន​ពឹង​លើ​ថ្នាំ​ពេទ្យ​ទាំង​ស្រុង​ទេ គឺ​អាស្រ័យ​លើ​បរិស្ថាន​ជុំវិញ​ខ្លួន កន្លែង​ស្នាក់នៅ​មាន​អនាម័យ ការ​បរិភោគ​អាហារ​មាន​ជីវជាតិ​គ្រប់គ្រាន់ ការ​ធ្វើ​អារម្មណ៍​ឲ្យ​ស្រស់ស្រាយ មិន​តក់​ស្លុត ចំពោះ​ស្ថានភាព​ជំងឺ និង​ការ​ហាត់ប្រាណ​ជាដើម។ លោក​ក៏​លើក​ទឹក​ចិត្ត​ឲ្យ​អ្នក​ជំងឺ​កូវីដ១៩ ពិសា​ទឹក​ឲ្យ​បាន​ច្រើន​ដែរ៖ «មាន​ស្រាប់​នៅ​ផ្ទះ​ហ្នឹង​ឱសថ​អស់​ហ្នឹង​គឺ​គាត់​អាច​រក​បាន​ហើយ។ គាត់​ចង់​បាន​មែនទែន​ហ្នឹង គឺ​គាត់​ចង់​បាន​អន្តរាគមន៍​ផ្នែក​​អប់រំ​ផ្លូវ​ចិត្ត​និង​វិធីសាស្ត្រ​​ធ្វើ​ម្ដេច​ឲ្យ​ខ្លួន​គាត់​ឆាប់​ជា​តាម​រយៈ​ការ​អប់រំ​ចិត្តសាស្ត្រ​និង​វិធាន​សុខាភិបាល​ច្រើន​ជាង​អ្វី​ដែល​ឱសថ​សាមញ្ញ​នៅ​ក្នុង​គ្រួសារ»

ជាមួយ​គ្នា​នេះ អាជ្ញាធរ​ក៏​តម្រូវ​ឲ្យ​អ្នក​ជំងឺ​កូវីដ១៩ ធ្វើ​កិច្ច​សន្យា​​​នៅ​ពេល​ស្ម័គ្រ​ចិត្ត​ព្យាបាល​នៅ​ផ្ទះ​ដោយ​ត្រូវ​អនុវត្ត​តាម​វិធានការ​នានា។ ចំពោះ​សមាជិក​គ្រួសារ​ដែល​​ពាក់ព័ន្ធ​ជាមួយ​អ្នក​ជំងឺ​កូវីដ១៩ ក៏​នឹង​ត្រូវ​ហាម​ឃាត់​ចេញ​ក្រៅ​ផ្ទះ​រយៈ​ពេល ១៤ថ្ងៃ​ដែរ ដើម្បី​ការពារ​ការ​ចម្លង​ជំងឺ​កូវីដ១៩។ ក្នុង​ករណី​ល្មើស​អាជ្ញាធរ​ព្រមាន​ដាក់​ពិន័យ និង​ប្រើ​ទោស​ទណ្ឌ ដើម្បី​បង្ការ​កុំ​ឲ្យ​មាន​ការ​ចម្លង​ជំងឺ​នេះ​ទៅ​អ្នក​ដទៃ។

វិធានការ​នេះ ទំនង​អនុវត្ត​បាន​តែ​អ្នក​មាន​ជីវភាព​ធូរធារ និង​មធ្យម​ប៉ុណ្ណោះ ព្រោះ​អ្នក​មាន​ជីវភាព​ក្រីក្រ​គ្មាន​ទីតាំង​ស្នាក់​នៅ​ទូលាយ ដែល​អាច​ដាក់​ខ្លួន​ព្យាបាល​ដាច់​ដោយ​ឡែក​ពី​គ្រួ​សារ​បាន​ឡើយ។ អ្នក​លក់​ដូរ​តាម​ដង​ផ្លូវ​ម្នាក់ លោកស្រី ណឹប សឿន ​នឹង​មិន​ទទួល​យក​ការ​ព្យាបាល​ជំងឺ​នៅ​ផ្ទះ​ទេ​ដោយសារ​លោកស្រី​មាន​សមាជិក​ច្រើន​កំពុង​ស្នាក់​នៅ​ក្នុង​បន្ទប់​ជួល​តួច​រួម​គ្នា​។​ ម្យ៉ាង​ទៀត​​លោកស្រី​មិន​ទាន់​ទុក​ចិត្ត​ថា ការ​ព្យាបាល​នៅ​ផ្ទះ​មាន​ប្រសិទ្ធភាព៖ «ចង់​នៅ​កន្លែង​​ព្រោះ​ផ្ទះ​​វា​អត់​មាន​កន្លែង​ព្យាបាល​វា​តូច​បន្ទប់​ហើយ​កូន​ផង​ចៅ​ផង​ច្រើន​ដែរ»

ចំណែក​សង្គម​ស៊ីវិល​គាំទ្រ ចំពោះ​វិធានការ​ដាក់​ឲ្យ​ព្យាបាល​អ្នក​ជំងឺ​ស្រាល​នៅ​តាម​ផ្ទះ និង​ជា​ការ​កាត់​បន្ថយ​ការ​ប្រមូល​ផ្ដុំ​គ្នា​នៅ​មណ្ឌល​ព្យាបាល ឬ​មន្ទីរ​ពេទ្យ។ ប្រធាន​សមាគម​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ លោក វ៉ន់ ពៅ ជំរុញ​ឲ្យ​អាជ្ញាធរ​ផ្ដល់​ថ្នាំ និង​អាហារ​ឲ្យ​ទាន់​ពេល​វេលា និង​ត្រូវ​មាន​ពេទ្យ​គ្រូពេទ្យ​គ្រប់គ្រាន់​ទើប​ការ​ព្យាបាល​នៅ​ផ្ទះ​មាន​ប្រសិទ្ធិ​ភាព៖ «សម្រាល​បន្ទុក​របស់​រដ្ឋាភិបាល​ក្នុង​ការ​ទទួល​អ្នក​ជំងឺ។ ទី​២ ជា​ចំណុច​មួយ​ដែល​ធ្វើ​ឲ្យ​អ្នក​ជំងឺ​ហ្នឹង​មាន​អារម្មណ៍​ល្អ​អាច​ឆាប់​ជា​ហើយ​ការ​ផ្គត់ផ្គង់​ពី​សំណាក់​អាជ្ញាធរ​រដ្ឋ​វា​ជា​កាតព្វកិច្ច។ នេះ​គឺជា​រឿង​មួយ ដែល​មិន​អាច​ជៀស​ផុត​បាន​ទេ ព្រោះ​កាល​ណា​ប្រជាពលរដ្ឋ​មាន​រឿង​អ្វី គឺ​គាត់​ត្រូវ​តែ​យក​ប្រព័ន្ធ​គាំពារ​សង្គម ហើយ​រដ្ឋ​ត្រូវ​តែ​ជួយ​គាត់​បែប​នេះ​ឯង»

បច្ចុប្បន្ន​ការ​ព្យាបាល​ជំងឺ​កូវីដ១៩ នៅ​តាម​ផ្ទះ​ធ្វើ​ឡើង​សម្រាប់​តែ​នៅ​រាជធានី​ភ្នំពេញ​ប៉ុណ្ណោះ ហើយ​ជំហាន​បន្ទាប់​គ្រោង​នឹង​អនុវត្ត​នៅ​ខេត្ត​កណ្ដាល។ ប្រធាន​មន្ទីរ​សុខាភិបាល​រាជធានី​ភ្នំពេញ លោក ងី ម៉េង បញ្ជាក់​ថា បច្ចុប្បន្ន​មាន​អ្នក​ជំងឺ​កូវីដ១៩ ស្រាល ១.០៣៣នាក់ កំពុង​ព្យាបាល​នៅ​តាម​ផ្ទះ។ ក្នុង​នោះ ២៦៨នាក់​បាន​ជា​សះ​ស្បើយ។ ជាមួយ​គ្នា​នេះ រដ្ឋ​លេខាធិការ​ក្រសួង​សុខាភិបាល លោក ង៉ូវ កាង បញ្ជាក់​ថា ក្នុង​ករណី​ខេត្ត​ផ្សេង​ទៀត មាន​ភាព​ចាំបាច់ ដែល​តម្រូវ​ឲ្យ​ទុក​មណ្ឌល​ព្យាបាល​សម្រាប់​អ្នក​ជំងឺ​ធ្ងន់ និង​មធ្យម​នោះ រដ្ឋមន្ត្រី​ក្រសួង​សុខាភិបាល​នឹង​ពិភាក្សា​ជាមួយ​អាជ្ញាធរ​ខេត្ត ដើម្បី​អនុញ្ញាត​ឲ្យ​មាន​ការ​ព្យាបាល​នៅ​តាម​ផ្ទះ​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល