អាជ្ញាធរក្រុងភ្នំពេញសម្រេចបិទផ្សារបឹងកេងកងរយៈពេល១៤ថ្ងៃក្រោយរកឃើញអ្នកឆ្លងជំងឺកូវីដ-១៩ ជាច្រើន ក្នុងចំណោមបុគ្គលិក-កម្មករ និងអាជីវករផ្សារនេះ។ តាម សេចក្តីសម្រេចរបស់រដ្ឋបាលក្រុងភ្នំពេញនៅថ្ងៃទី២៨ ខែមិថុនា ផ្សារបឹងកេងកង ត្រូវផ្អាកដំណើរការជាបណ្ដោះអាសន្ន ពីថ្ងៃទី២៩ ខែមិថុនា រហូតដល់ថ្ងៃទី១២ ខែកក្កដា។
ទោះជាយ៉ាងនេះក្ដីអាជ្ញាធររាជធានីភ្នំពេញមិនបានបញ្ជាក់ចំនួនអ្នកឆ្លងនៅក្នុងផ្សារនោះឡើយ។
តាំងពីផ្ទុះព្រឹត្តិការណ៍សហគមន៍ ២០ កុម្ភៈ អាជីវករ អ្នកដើរផ្សារ និងបុគ្គលិក-កម្មករ រួមទាំងសន្តិសុខផ្សារជាច្រើន ឆ្លងជំងឺកូវីដ-១៩នេះ។
តំណាងអង្គការសុខភាពពិភពលោកប្រចាំនៅកម្ពុជា អ្នកស្រី លី អៃឡែន (Li Ailan) ធ្លាប់ព្រមានថាកម្ពុជាដើរដល់មាត់ជ្រោះមរណៈនៃមហន្តរាយដោយសារតែវិបត្តិនៃជំងឺកូវីដ-១៩។ អ្នកស្រីថាកន្លែងដែលងាយឆ្លងជំងឺនេះបំផុតគឺទីប្រជុំជនដែលមានមនុស្សកុះករ ដូចជាផ្សារ និងរោងចក្រជាដើម។
គិតត្រឹមព្រឹកថ្ងៃទី២៨ ខែមិថុនាម្សិលមិញ កម្ពុជាមានអ្នកកើតជំងឺកូវីដ-១៩ មាន ៤៨.៥៣២នាក់ ក្នុងនោះ អ្នកជាសះស្បើយមាន ៤២.៧៦៤នាក់ ស្លាប់កើនឡើងដល់ ៥៥៦នាក់ ខណៈអ្នកជំងឺរាប់ពាន់នាក់ទៀត កំពុងសម្រាកព្យាបាលនៅតាមមន្ទីរពេទ្យ និងនៅតាមផ្ទះរបស់ខ្លួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។