ការវាយតម្លៃសុខភាពកុមារ និងបរិស្ថាននៅកម្ពុជាជាលើកដំបូង បានរកឃើញហានិភ័យសំខាន់ៗមួយចំនួន ទាមទារដោះស្រាយរួមគ្នាជាបន្ទាន់ជួយដល់កុមារ។ ការបង្ហាញពីរបកគំហើញនេះ ធ្វើឡើងនៅក្នុងសិក្ខាសាលារយៈពេលមួយថ្ងៃ កាលពីថ្ងៃទី ២៥ ខែសីហា ដោយមានការចូលរួមពីក្រសួង-ស្ថាប័នចំនួន ២៩ ទាំងនៅថ្នាក់ជាតិ និងថ្នាក់ក្រោមជាតិ។
នាយកអង្គការយូនីសេហ្វ (Unicef) ប្រចាំប្រទេសកម្ពុជា លោកបណ្ឌិត វីល ផាកស៍ (Dr. Will Parks) លើកឡើង កាលពីថ្ងៃទី២៦ ខែសីហា ថា វិបត្តិអាកាសធាតុ គឺជាវិបត្តិសិទ្ធិកុមារ។ កុមារកម្ពុជាបច្ចុប្បន្នកំពុងប្រឈម គ្រោះថ្នាក់បរិស្ថាន និងបណ្តាលឲ្យប៉ះពាល់ធ្ងន់ធ្ងរ ដល់សិទ្ធិជាមូលដ្ឋានរបស់ពួកគេ រួមទាំងសិទ្ធិរស់រានមានជីវិត និងលូតលាស់ផងដែរ។ កុមារអាយុក្រោម ៥ឆ្នាំ ជិតមួយនាក់ក្នុងចំណោមប្រាំនាក់ ស្លាប់ដោយសារការបំពុលខ្យល់។ អង្គការសុខភាពពិភពលោកប៉ាន់ប្រមាណថា ជាងមួយភាគបួន (១/៤) នៃករណីស្លាប់របស់កុមារអាយុក្រោម ៥ឆ្នាំ អាចបង្ការនិងទប់ស្កាត់បាន តាមរយៈការដោះស្រាយហានិភ័យបរិស្ថាន។
របកគំហើញដដែលបង្ហាញទៀតថា ការប្រែប្រួលអាកាសធាតុ និងការសឹករិចរិលបរិស្ថាន កំពុងគំរាមកំហែងយ៉ាងធ្ងន់ធ្ងរដល់ការរស់រានមានជីវិត សុខភាព ការអប់រំ កិច្ចគាំពារ និងសុខុមាលភាពរបស់កុមារ។ ការកើនឡើងនៃជំងឺមហារីក ជំងឺទឹកនោមផ្អែម វិបត្តិអភិវឌ្ឍន៍ផ្នែកប្រព័ន្ធប្រសាទ និងជំងឺហឺត ក៏កើតឡើងព្រមគ្នាផងដែរ ទៅនឹងការកើនឡើងយ៉ាងគំហុកនៃការបំពុលខ្យល់ ការបំពុលទឹក និងការប្រើប្រាស់សារធាតុគីមី នៅក្នុងផលិតផលប្រចាំថ្ងៃ ដូចជា ចំណីអាហារ និងថ្នាំសម្លាប់សត្វល្អិត ជាដើម។
អង្គការយូនីសេហ្វ អំពាវនាវដល់ភាគីពាក់ព័ន្ធទាំងអស់ រួមទាំងរដ្ឋាភិបាលកម្ពុជា ដៃគូអភិវឌ្ឍន៍ វិស័យឯកជន គ្រឹះស្ថានសិក្សា និងសង្គមស៊ីវិល ត្រូវធ្វើសកម្មភាពរួមគ្នា ដើម្បីកាត់បន្ថយហានិភ័យសុខភាពបរិស្ថាន ជាពិសេសចំពោះកុមារ។ សកម្មភាពទាំងនោះរួមមាន ពង្រឹងការអនុវត្តគោលនយោបាយ បទប្បញ្ញត្តិ គ្រប់គ្រងសារធាតុបំពុល សារធាតុកខ្វក់ ពង្រឹងសមត្ថភាពអ្នកផ្តល់សេវាថែទាំសុខភាព លើកកម្ពស់ការយល់ដឹងជាសាធារណៈ និងការចូលរួមរបស់សហគមន៍ ព្រមទាំងយុវជនក្នុងការដោះស្រាយបញ្ហាការប្រែប្រួលអាកាសធាតុ និងបរិស្ថាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។