អ្នកស្លាប់ដោយសារជំងឺកូវីដ-១៩ កើនឡើងដល់ ១.៤៤២នាក់ហើយ គិតត្រឹមថ្ងៃទី២ ខែសីហា បន្ទាប់ពីអ្នកជំងឺ ២២នាក់ទៀតបានស្លាប់។ចំពោះករណីឆ្លងថ្មីវិញ មាន៥៦០នាក់ ក្នុងនោះ ១៦៩នាក់ ជាករណីនាំចូលពីក្រៅប្រទេស។ រីឯអ្នកជាសះស្បើយវិញ មាន ៧៦៣នាក់នៅថ្ងៃដដែលនេះ។
បើទោះបីជាចំនួនអ្នកឆ្លង ហាក់ថយចុះបន្តិចក្តី ក៏រដ្ឋាភិបាលកម្ពុជា និងអង្គការសុខភាពពិភពលោកប្រចាំកម្ពុជា (WHO Cambodia) កំពុងព្រួយបារម្ភពីការឆ្លងជំងឺកូវីដ-១៩ ដែលបំប្លែងខ្លួនថ្មីឈ្មោះ ឌែលតា (Delta Variant)។ វីរុសកូវីដ-១៩បំប្លែងថ្មីឌែលតា (Delta Variant) ត្រូវបានរកឃើញក្នុងចំណោមពលករចំណាកស្រុកដែលត្រឡប់មកកម្ពុជាវិញតាមច្រកព្រំដែន។ ក្រសួងសុខាភិបាល អះអាងថា គិតត្រឹមរយៈពេលពីរថ្ងៃចាប់ថ្ងៃទី៣១ ខែកក្កដា ដល់ថ្ងៃទី១ ខែសីហា កម្ពុជារកឃើញអ្នកកើតជំងឺកូវីដ-១៩ បំប្លែងថ្មី ឌែលតា ១០៩ករណី ក្នុងនោះ មានស្រី ៤៨នាក់។ ជំងឺកូវីដ-១៩ បំប្លែងថ្មីនេះ កំពុងរាលដាលតាមបណ្តាលខេត្តជាប់ព្រំដែនកម្ពុជា-ថៃ និងខេត្តត្បូងឃ្មុំ កំពង់ចាម ព្រៃវែង ព្រមទាំងបានរាលដាលដល់រាជធានីភ្នំពេញផងដែរ។
ដោយឡែក វ៉ាក់សាំងបង្ការជំងឺកូវីដ-១៩ ចនសុនអ៊ែនចនសុន (Johnson&Johnson) ដែលជាជំនួយរបស់សហរដ្ឋអាមេរិកជំហ៊ានទី២ បានមកដល់កម្ពុជាហើយ នៅយប់រំលងអាធ្រាត្រឈានចូលថ្ងៃទី២ ខែសីហា។ វ៉ាក់សាំងជំហានទី២ នេះ មានចំនួនជាង ៦សែន ៩ពាន់ដូស។ មកទល់ពេលនេះ កម្ពុជាបានទទួលជំនួយវ៉ាក់សាំងពីសហរដ្ឋអាមេរិកជាង ១លានដូស ហើយតាមរយៈយន្តការកូវ៉ាក់ (COVAX)។ ស្ថានទូតសហរដ្ឋអាមេរិកប្រចាំកម្ពុជា បង្ហោះសារលើទំព័រហ្វេសប៊ុក (Facebook)ថា អំណោយវ៉ាក់សាំងរបស់ប្រជាជនអាមេរិកនេះ នឹងការពារប្រជាជនកម្ពុជាបានជាង ១លាននាក់ ហើយបង្ហាញពីការប្តេជ្ញាចិត្តយូរអង្វែងរបស់អាមេរិក ចំពោះសុខភាព និងសុខុមាលភាពនៃប្រជាជនកម្ពុជា។ ចំណែកលោកនាយករដ្ឋមន្ត្រី ហ៊ុន សែន វិញ លោកបានបង្ហោះសារថា អំណោយនេះ គឺជាផ្នែកមួយនៃការគាំទ្រជាបន្តបន្ទាប់របស់សហរដ្ឋអាមេរិកចំពោះប្រជាពលរដ្ឋកម្ពុជា និងនៅក្នុងតំបន់ ក្នុងពេលកំពុងតែប្រឹងងើបចេញពីជំងឺរាតត្បាតយ៉ាងធ្ងន់ធ្ងរនេះ។
គិតត្រឹមព្រឹកថ្ងៃទី២ ខែសីហានេះ កម្ពុជាមានអ្នកកើតជំងឺកូវីដ-១៩ ចំនួន ៧៨.៤៧៤នាក់ ក្នុងនោះអ្នកជាសះស្បើយមាន ៧១.៥១៧នាក់។ ទាក់ទងនឹងយុទ្ធនាការចាក់វ៉ាក់សាំងបង្ការជំងឺកូវីដ-១៩ វិញ ក្រសួងសុខាភិបាលប្រកាសថា គិតត្រឹមថ្ងៃ១ ខែសីហា រដ្ឋាភិបាលចាក់ជូនពលរដ្ឋបានជាង ៧លាននាក់ស្មើនឹងជាង ៧៣% ហើយក្នុងចំណោមពលរដ្ឋគោលដៅដែលត្រូវចាក់វ៉ាក់សាំងចំនួន ១០លាននាក់។ ទន្ទឹមគ្នានេះ រដ្ឋាភិបាល បានចាក់វ៉ាក់សាំងសម្រាប់កុមារ-យុវវ័យអាយុពី ១២ឆ្នាំទៅក្រោម ១៨ឆ្នាំ បានចំនួន ១.៨៧% ក្នុងចំណោមកុមារ និងយុវវ័យដែលត្រូវចាក់វ៉ាក់សាំងជិត ២លាន នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។