ក្រសួងអប់រំ យុវជន និងកីឡា ប្រកាសចាប់ផ្ដើមធ្វើយុទ្ធនាការផ្សព្វផ្សាយអំពីសុវត្ថិភាពចំណីអាហារនៅក្នុងសាលារៀន ដើម្បីទប់ស្កាត់ការលក់អាហារមានសារធាតុគីមីនិងអាហារដែលធ្វើឱ្យប៉ះពាល់ដល់សុខភាពសិស្សនៅតាមសាលារៀនទូទាំងប្រទេស។
ថ្លែងក្នុងពិធីប្រកាសបើកយុទ្ធនាការសុវត្ថិភាពចំណីអាហារ កាលពីថ្ងៃទី៦ ខែមករា រដ្ឋមន្ត្រីក្រសួងអប់រំ យុវជន និងកីឡាលោក ហង់ ជួនណារ៉ុន មានប្រសាសន៍ថាការផ្ដោតលើសុវត្ថិភាពចំណីអាហារ គឺមានសារៈសំខាន់សម្រាប់កុមារ ដែលអាចជួយឱ្យកុមារមានសុខភាពល្អនិងក្លាយជាធនធានល្អនៅក្នុងសង្គម។ លោក ហង់ ជួនណារ៉ុន បន្ថែមថាយុទ្ធនាការសុវត្ថិភាពចំណីអាហារនេះបានប្រកាសហាមឃាត់អាហារចំនួន៦ប្រភេទក្នុងនោះរួមមានអាហារដែលផុតកំណត់ប្រើប្រាស់គ្រឿងស្រវឹងអាហារគ្មានប្រភពច្បាស់លាស់និងអាហារប៉ូវកម្លាំងដែលមានជាតិផ្អែមខ្លាំងជាដើម៖ « មិនមែនហាមមិនឱ្យហូបអីផ្អែមទេ ប៉ុន្តែ ត្រូវមានតុល្យភាព មិនឱ្យផ្អែមខ្លាំង មិនឱ្យមានជាតិខ្លាញ់ខ្លាំងពេក ឬមួយមិនឱ្យប្រៃពេក។ ប្រៃពេកនាំឱ្យកើតជំងឺឡើងឈាម ខ្លាញ់ច្រើនពេក នាំឱ្យធាត់ខ្លាំងពេក ដែលអាចឈានទៅរកជំងឺបេះដូង។ ដូច្នេះ គឺចៀសវាងទាំងស្ករ ស្ករកៅស៊ូ ដែលប៉ះពាល់ដល់បរិស្ថានផងដែរ និងអ្វីដែលផ្អែមខ្លាំង ដូចជា ចាហួយ ដូណាត់ អីជាដើម។ ដូច្នេះអាហារទាំងនេះ ត្រូវហាមឃាត់»។
ក្រសួងអប់រំយុជន និងកីឡា នឹងសហការជាមួយនឹង ក្រុមហ៊ុនចំនួនបី គឺក្រុមហ៊ុន MSA, KBSK និងក្រុមហ៊ុន Kino Cambodia ដើម្បីផ្សព្វផ្សាយអំពីយុទ្ធនាការនេះរយៈពេលមួយខែដែលចាប់ផ្ដើមពីថ្ងៃទី១ ខែមករារហូតដល់ថ្ងៃទី៣១ ខែមករា។
យុទ្ធនាការផ្សព្វផ្សាយអំពីសុវត្ថិភាពចំណីអាហារជំហានដំបូងបានធ្វើឡើងកាលពីថ្ងៃទី៦ ខែមករានៅក្នុងសាលាបឋមសិក្សាព្រះនរោត្តមនៅរាជធានីភ្នំពេញនិងគ្រោងរៀបចំឡើងនៅក្នុងសាលាចំនួនបួនទៀតមានដូចជាសាលាបឋមសិក្សាអង្គរបាន ខេត្តកំពង់ចាម សាលាបឋមសិក្សាផ្សារ ខេត្តកំពង់ឆ្នាំង សាលាបឋមសិក្សាឃ្លាំងលើខេត្តព្រះសីហនុនិងសាលាបឋមសិក្សាបាគូរ ខេត្តកណ្តាល។
ក្រៅពីការអំពាវនាវមន្ទីរអប់រំ នាយកសាលា អ្នកលក់ដូរ និងមាតាបិតាសិស្ស ឱ្យចូលរួមយកចិត្តទុកដាក់លើសុវត្ថិភាពចំណីអាហាររបស់កុមារ លោក ហង់ ជួនណារ៉ុន ក៏ស្នើដល់នាយកសាលាឱ្យយកចិត្តទុកដាក់លើសុវត្ថិភាពផ្លូវកាយនិងផ្លូវចិត្តរបស់កុមារផងដែរ។លោកស្នើដល់នាយកសាលាត្រូវធ្វើការវាយតម្លៃជាប្រចាំលើស្ថានភាពអាគារសិក្សាដើម្បីចៀសវាងគ្រោះថ្នាក់ដល់រាងកាយរបស់សិស្សានុសិស្ស។ បន្ថែមពីលើនេះ លោក ហង់ ជួនណារ៉ុនក៏ស្នើដល់នាយកសាលា ឱ្យទប់ស្កាត់កុំអោយមានបងតូចបងធំនៅក្នុងសាលា ដែលកត្តានេះ ជាការគំរាមកំហែងដល់ផ្លូវចិត្តរបស់សិស្សានុសិស្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។