​អ្នក​ជំងឺកូវីដ៥​នាក់​ទៀតស្លាប់​ និង​រកឃើញ​អ្នកឆ្លងថ្មី​ជាង​ ៤រយ (៤៣១) នាក់

ដោយ អាស៊ីសេរី
2021-04-20
Share
​អ្នក​ជំងឺកូវីដ៥​នាក់​ទៀតស្លាប់​ និង​រកឃើញ​អ្នកឆ្លងថ្មី​ជាង​ ៤រយ (៤៣១) នាក់ ​អ្នក​ជំងឺកូវីដ៥​នាក់​ទៀតស្លាប់​ និង​រកឃើញ​អ្នកឆ្លងថ្មី​ជាង​ ៤រយ (៤៣១) នាក់ គិតត្រឹមថ្ងៃទី២០ ខែមេសា ឆ្នាំ២០២១។
រូប៖ RFA

អ្នកជំងឺកូវីដ​ជាជនជាតិខ្មែរ ​៥នាក់ទៀត​បាន​ស្លាប់ ​និង​អ្នកឆ្លងថ្មី​ ៤៣១នាក់ ​នៅថ្ងៃទី២០​ ខែមេសា។

ទោះជាយ៉ាងណា​ក្ដី ក្រសួងសុខាភិបាល​ប្រកាសថា មានអ្នកស្លាប់ដោយសារជំងឺកូវីដតែចំនួន ៤ នាក់ប៉ុណ្ណោះ គឺ​មានបុរស​ពីរនាក់ ​និង​ស្រី្តពីរនាក់។ ក្រសួង ​បញ្ជាក់​ថា​ អ្នក​ស្លាប់ទី១​ ជាបុរស ​អាយុ ៦៥ឆ្នាំ ​រស់នៅសង្កាត់​ភ្នំពេញថ្មី ​ខណ្ឌសែនសុខ​ ហើយ​អ្នកស្លាប់ទី២​ ជាបុរសអាយុ​ ៧២​ឆ្នាំ រស់នៅសង្កាត់ជើងឯក ខណ្ឌ​ដង្កោ។ អ្នកស្លាប់ទី៣​ ជាស្ត្រីអាយុ ​៤៨ឆ្នាំ​រស់នៅខេត្តព្រះសីហនុ ​និងអ្នកស្លាប់ទី៤ ​ជាស្ត្រី​អាយុ​ ៤០ឆ្នាំ​ រស់នៅ​សង្កាត់ស្រះចក ​ខណ្ឌដូនពេញ។ ​ពួកគាត់​ទាំង ៤នាក់ ​បាន​ស្លាប់កាលពី​ថ្ងៃទី​១៩ ​ខែមេសា ដោយសារ​វិបត្តិផ្លូវដង្ហើម ​និងរលាកសួត​ទាំងសងខាងធ្ងន់ធ្ងរ​បង្កឡើង​ដោយ​វីរុសកូវីដ-១៩។

ជាមួយគ្នានេះ​ ក្រសួងសុខាភិបាល ​ប្រកាស​បកស្រាយ​ពីករណី​ស្លាប់ស្ត្រី​ជនជាតិខ្មែរ​ម្នាក់ទៀត​អាយុ ​៥៧ឆ្នាំ ​រស់នៅស្រុកឱរ៉ាល់​ខេត្តកំពង់ស្ពឺថា ​គាត់​ស្លាប់​ដោយសារ​គ្រោះ​ថ្នាក់​ចរាចរ​ប៉ះទង្គិច​ក្បាល​ធ្ងន់ធ្ងរ ​មិនមែន​ដោយសារ​ជំងឺកូវីដ​នោះទេ។ ក្រសួង​អះអាងថា​ ស្ត្រីរូបនេះ​ បានជួបគ្រោះថ្នាក់​ចរាចរ​ត្រូវក្បាល​ធ្ងន់ធ្ងរ ​ហើយ​បានចូល​ព្យាបាល​នៅ​មន្ទីរពេទ្យ​​ព្រះកុសមៈ​ កាលពីថ្ងៃទី៣១ ខែ​មីនា។ ក្រោ​យមក​គ្រូពេទ្យបានពិនិត្យឃើញ​គាត់ឆ្លងជំងឺកូវីដ-១៩ ​ក៏​បាន​បញ្ចូន​ទៅព្យាបាល​បន្តនៅមណ្ឌលសុខ​ភាព​ចាក់អង្រែ​ នៅថ្ងៃទី១៦ ​ខែមេសា ​ប៉ុន្តែ​ដោយសារ​អ្នកជំងឺ​មានរបួសក្បាល​ធ្ងន់ធ្ងរ និង​មាន​ជំងឺ​ទឹក​នោមផ្អែម​ប្រចាំកាយ​ផងនោះ​ គាត់​បាន​ស្លាប់​នៅថ្ងៃទី១៩ ខែមេសា។

ដោយឡែក ករណីស្លាប់អ្នកជំងឺកូវីដម្នាក់ទៀតឈ្មោះ នូ ចុល ភេទប្រុស អាយុ ៥៧ឆ្នាំ រស់នៅឃុំជ្រៃបាក់ ស្រុករលាប្អៀរ  ខេត្តកំពង់ឆ្នាំង នោះ ក្រសួងសុខាភិបាល មិនទាន់ចេញប្រកាសព័ត៌មាននៅឡើយ។ បុរសរូបនេះ បានស្លាប់តាំងពីយប់ថ្ងៃទី១៨ ខែមេសា ហើយក្រុមគ្រួសារសាច់ញាតិ និងអ្នកភូមិនាំគ្នាធ្វើបុណ្យ​សពដោយ​មិនបានដឹងថា គាត់ឆ្លងជំងឺកូវីដនោះទេ។ ប្រធានមន្ទីរសុខាភិបាលខេត្តកំពង់ឆ្នាំងលោក ប្រាក់ វ៉ុន ប្រាប់កាសែតក្នុងស្រុកថា ក្រោយពេលបុរសនេះ បានស្លាប់ ហើយ​មានការសង្ស័យ ទើបគ្រូពេទ្យយកសំណាកទៅធ្វើតេស្ត កាលពីថ្ងៃទី១៩ ខែមេសា ហើយទទួលលទ្ធផលថា អ្នកស្លាប់វិជ្ជមានជំងឺកូវីដ-១៩ បណ្តាលឲ្យ​មានការភ្ញាក់ផ្អើល។ ជុំវិញករណីនេះ រដ្ឋបាលខេត្តកំពង់ឆ្នាំង សម្រេចបិទទីតាំងបីកន្លែងបណ្តោះអាសន្ន គឺមន្ទីរសម្រាកព្យាបាលផ្សារឆ្នាំង វត្តទួលសទ្ធាសត្ថារាម និងផ្សារព្រៃខ្មែរ ដែល​ពាក់​ព័ន្ធ​​ជាមួយនឹង​អ្នកជំងឺមុនពេលគាត់ស្លាប់។

ចំណែក​ករណី​អតីតប្រធានសាខាគយ​ និងរដ្ឋាករកំពង់ផែអន្តរជាតិ​ក្រុងព្រះ​សីហនុលោក​ គិន លី ​បានស្លាប់​ដោយសារ​ជំងឺកូវីដ-១៩​ កាលពីថ្ងៃទី​១៩ ខែ​មេសានោះ ​ក្រសួង​សុខាភិបាល ​មិនបានបញ្ចូល​ក្នុងសេចក្តីប្រកាសព័ត៌មាន​របស់ខ្លួន​ទេ។ ទោះជាយ៉ាងណា ​អគ្គនាយកដ្ឋានគយ ​និងរដ្ឋាករកម្ពុជា ​កាលពី​ល្ងាចថ្ងៃទី១៩​ ខែមេសា ​បានចេញ​សេចក្តី​ជូនដំណឹងថា លោក គិន លី ​បានស្លាប់​ដោយសារ​ជំងឺកូវីដ-19​ កាលពី​ម៉ោង​៨ព្រឹកថ្ងៃទី​១៩ ខែ​មេសា។

ចំពោះ​ករណីឆ្លងថ្មី ៤៣១នាក់វិញ ​ក្រសួងបញ្ជាក់ថា ​មានពីរនាក់​ជាករណីនាំចូល ​ហើយក្រៅពីនេះ ​សុទ្ធតែ​ជាករណី​ឆ្លងក្នុង​សហគមន៍ ​ដែលភាគច្រើន​រកឃើញនៅក្នុងរាជធានីភ្នំពេញ ​ខេត្តព្រះសីហនុ​ និងខេត្តកណ្តាល។ ​នៅថ្ងៃ​ដដែលនេះ​ អ្នកជំងឺចំនួន ៣១នាក់ បានជាសះស្បើយ។

គិតត្រឹមព្រឹក​ ថ្ងៃទី២០​ ខែមេសា ​កម្ពុជាបានរកឃើញ​អ្នកឆ្លង​ជំងឺកូវីដ ៧.៤៤៤នាក់ ​ក្នុងនោះ​ករណីឆ្លងក្នុង​សហគមន៍ ​២០ កុម្ភៈ​ ៦.៨៩៩នាក់ ហើយ​អ្នក​កំពុង​សម្រាក​ព្យាបាល​៤.៨៣៥នាក់។ រីឯអ្នកស្លាប់​ដោយសារ​ជំងឺកូវីដ ក្រសួងសុខាភិបាល​ ប្រកាស​ទទួលស្គាល់ថា​ មានចំនួន ​៤៩នាក់​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល