ចូលឆ្នាំ គឺជាពិធីបុណ្យធំមួយរបស់ជាតិ ជាឱកាសដែលពលរដ្ឋឈប់សម្រាកពីការងារ ជួបគ្រួសារ និងធ្វើដំណើរទៅកន្លែងកម្សាន្តផ្សេងៗ ហើយក៏ជាឱកាស ពេញនិយមក្នុងការទទួលទានគ្រឿងស្រវឹង។ ករណីនេះអ្នកជំនាញសុខភាពរំឭកដល់ ពលរដ្ឋកុំឱ្យទទួលទានគ្រឿងស្រវឹងច្រើនពេក នាំឲ្យប៉ះពាល់សុខភាពខូចខាតទ្រព្យសម្បត្តិ និងជួបគ្រោះថ្នាក់ផ្សេងៗ។
អ្នកជំនាញផ្នែកសុខភាពក្រើនរំឭកដល់សាធារណជនឱ្យពិចារណាថ្លឹងថ្លែងកុំទទួលគ្រឿងស្រវឹងច្រើនហួសហេតុពេកក្នុងឱកាសពិធីបុណ្យចូលឆ្នាំថ្មី ព្រោះអាចបង្កគ្រោះថ្នាក់ទាំងបច្ចុប្បន្ន និងថ្ងៃអនាគ។
វេជ្ជបណ្ឌិត គួច ម៉េងលី ចាត់ទុកការទទួលទានគ្រឿងស្រវឹង គឺជាការចំណាយលុយឱ្យអ្នកដទៃមានបាន ហើយធ្វើឱ្យខ្លួនឯងធ្លាក់ខ្លួនឈឺ។
វេជ្ជបណ្ឌិត គួច ម៉េងលី៖«ខ្ញុំសង្ឃឹមថា ប្រជាពលរដ្ឋយើងកុំចំណាយលុយឱ្យគេមានដោយសារគ្រឿងស្រវឹងហ្នឹងទី១ធ្វើឱ្យគេមានហើយយើងក្រខ្លួនជារឿងមួយប៉ុន្តែធ្វើឱ្យយើងមានជំងឺរ៉ាំរ៉ៃ»។សំឡេងទី១
លោក គួច ម៉េងលី បន្តថា ឥទ្ធិពលនៃគ្រឿងស្រវឹងក្រៅពីប៉ះពាល់ នៅពេលបច្ចុប្បន្ន ក៏ធ្វើឱ្យកូនចៅជំនាន់ក្រោយក្រលំបាកវេទនាទៀតផង។
វេជ្ជបណ្ឌិត គួច ម៉េងលី៖ « ពិបាកដល់កូនចៅជំនាន់ក្រោយ ព្រោះភាគច្រើនស្លាប់ដោយសារជំងឺក្រលៀន ជំងឺថ្លើម ដែលជាទូទៅ ជំងឺហ្នឹងធ្វើឱ្យយើងរ៉ាំរ៉ៃមុនស្លាប់។ វេទនាអ៊ីចឹងធ្វើឱ្យបងប្អូនកូនចៅយើងលក់ដីធ្លីអស់ ហើយថ្ងៃក្រោយកំព្រាឪពុកម្ដាយគួរឱ្យសោកស្ដាយ គួរឱ្យអភ័ព្វណាស់ » ។
ពិធីបុណ្យចូលឆ្នាំថ្មីសម័យបច្ចុប្បន្ននេះ ត្រូវបានអ្នកជំនាញផ្នែកសុខភាព និងសង្គម មើលឃើញថា ហាក់កំពុងត្រូវបានគេប្រារព្ធឡើងក្នុងន័យគ្រាន់តែជាពិធីកម្សាន្ត សប្បាយទៅតាមការនឹកឃើញរៀងៗ ខ្លួនច្រើនជាងការប្រារព្ធពិធីផ្សេងៗ តាម ប្រពៃណីជាតិ។ទិដ្ឋភាពជាក់ស្ដែង ទាំងនៅទីប្រជុំជន និងជនបទ ពលរដ្ឋខ្មែរភាគច្រើន ពុំសូវទៅជួបជុំធ្វើបុណ្យទាន និងលេងល្បែងប្រជាប្រិយ រួមទាំងរាំលេងតាមចង្វាក់ប្រពៃណីជាតិ នៅតាមទីវត្តអារាមទេ គឺភាគច្រើនប្រជាពលរដ្ឋ តែងតែជួបជុំទទួលទានសាច់ក្លែម និងផឹកគ្រឿងស្រវឹងតាមផ្ទះរៀងៗ ខ្លួន ឬតាមកន្លែងកម្សាន្តនានា។
អ្នកជំនាញផ្នែកសុខភាព និងសង្គម ចាត់ទុកថា ឥរិយាបថអវិជ្ជមានបែបនេះ អាចធ្វើឲ្យប៉ះពាល់ដល់អត្តសញ្ញាណសម្គាល់បុណ្យចូលឆ្នាំខ្មែរ និង ទំនៀមទម្លាប់ វប្បធម៌ដ៏ល្អរបស់ខ្មែរ ហើយនឹងធ្វើឲ្យពិធីកម្សាន្តសប្បាយ ច្រើនតែក្លាយជាជម្លោះ កាប់ចាក់គ្នា និងបណ្ដាលឲ្យមានគ្រោះថ្នាក់ចរាចរណ៍ ដែលក្លាយទៅជាថ្ងៃកាន់ទុក្ខ នាឱកាសពិធីបុណ្យចូលឆ្នាំថ្មីប្រពៃណីជាតិនេះ។
ចំណែកសាស្ត្រាចារ្យ សំបូរ មាណ្ណារ៉ា ជាអ្នកផ្សព្វផ្សាយអប់រំពីប្រវត្តិសាស្ត្រ និងសីលធម៌សង្គមចាត់ទុកថា ការទទួលគ្រឿងស្រវឹងក្នុងវត្តអារាម រួមទាំងសកម្មភាព មិនសមរម្យមួយចំនួនទៀត ដែលសាធារណជនចាត់ទុកជាការសប្បាយក្នុងពេលចូល ឆ្នាំនោះថា កំពុងបំផ្លាញវប្បធម៌បន្សល់ទុកពីដូនតា។
លោក សំបូរ មាណ្ណារ៉ា៖ « អារាំនៅក្នុងវត្តនោះផឹកប៊ីយែរនោះ វត្តនីមួយៗយើងឱ្យលេងល្បែងរបាំ ប៉ុន្តែមិនត្រូវឱ្យផឹកប៊ីយែរឱ្យរាំទេ។ អាហ្នឹងបំផ្លាញទេ ? បំផ្លាញសង្គមទេ ? យើងត្រូវពិនិត្យមើល។ អាជិះម៉ូតូដេញបាចទឹក ដេញប៉ាតម្សៅ ហើយកាប់ចាក់នោះអាហ្នឹងជាអំពើអាក្រក់ទេ ?» ។
ការទទួលទានគ្រឿងស្រវឹងច្រើនហួសកម្រិតឈានដល់បាត់ម្ចាស់ការលើខ្លួនឯងនោះ ក្រៅពីធ្វើឱ្យខូចសុខភាព និងការបង្កជម្លោះកើតជាអំពើហិង្សានោះ ការបង្កគ្រោះថ្នាក់ ចរាចរណ៍ក៏ជាមូលហេតុមួយ ដែលគួរឱ្យព្រួយបារម្ភ។
របាយការណ៍សិក្សារួមគ្នារវាងសកលវិទ្យាល័ Oxford របស់អង់គ្លេស និងសកលវិទ្យាល័យ Peking របស់ចិន ចេញផ្សាយនៅឆ្នាំ២០១៩ បង្ហាញថា ការទទួលទានគ្រឿងច្រើនអាចបង្កឱ្យកើតជំងឺជាង ២០០ប្រភេទ។ ក្នុងចំណោមជំងឺទាំងជាង ២០០ប្រភេទនោះ រួមមាន មហារីកមាត់ មហារីកដោះ និងមហារីកក្រពះពោះវៀនជាដើម។
រីឯរបាយការណ៍គណៈកម្មាធិការជាតិសុវត្ថិភាពចរាចរណ៍ផ្លូវគោកបង្ហាញថា ក្នុងឆ្នាំ២០២២ គ្រោះថ្នាក់ចរាចរណ៍កើតឡើងជិត ៣ពាន់ករណី បណ្ដាលឱ្យមានមនុស្ស ស្លាប់ជាង១ ៧០០នាក់។ មូលហេតុនៃគ្រោះថ្នាក់ចរាចរណ៍ គឺការបើកបរលើសល្បឿនកំណត់ ការវ៉ាប្រជែង មិនប្រកាន់ស្ដាំ និងការបើកបរក្នុងស្ថានភាពស្រវឹង។
ចំណែកពេលចូលឆ្នាំខ្មែរ៣ថ្ងៃក្នុងឆ្នាំ២០២២គ្រោះថ្នាក់ចរាចរណ៍បានបណ្តាលឱ្យមានអ្នកស្លាប់២៧នាក់និងរបួស៨០នាក់៕