មន្រ្តី​សិទ្ធិមនុស្ស​និង​​សហជីព​​ស្នើ​ឲ្យ​អាជ្ញាធរ​ស៊ើប​អង្កេត​បនល្បែង​​អនឡា​ញ​​ដែល​​ឲ្យ​បុគ្គលិក​ធ្វើការ​​ទាំង​ផ្ទុះ​ជំងឺ​កូវីដ-១៩ ​ពេញ​កា​ស៊ី​ណូ

ដោយ មួង ណារ៉េត
2021-10-03
Share
មន្រ្តី​សិទ្ធិមនុស្ស​និង​​សហជីព​​ស្នើ​ឲ្យ​អាជ្ញាធរ​ស៊ើប​អង្កេត​បនល្បែង​​អនឡា​ញ​​ដែល​​ឲ្យ​បុគ្គលិក​ធ្វើការ​​ទាំង​ផ្ទុះ​ជំងឺ​កូវីដ-១៩ ​ពេញ​កា​ស៊ី​ណូ កាស៊ីណូ ឌឹ​សិនឆឺរី​ (​the​ ​Century​) ​នៅ​ខេត្ត​ព្រះ​សីហនុ ដែលបង្កប់ល្បែងអនឡាញ (Online) ខុសច្បាប់ ដែលមានបុគ្គលិកម្នាក់ស្លាប់ដោយសារជំងឺកូវីដ-១៩ កាលពីថ្ងៃទី៣០ ខែកញ្ញា ឆ្នាំ២០២១។
រូប៖ ហ្វេសប៊ុក Sreypov Nalin

មន្រ្តី​សិទ្ធិមនុស្ស​ ​និង​​សហជីព​ស្នើ​ឲ្យ​អាជ្ញាធរ​ស៊ើប​អង្កេត​ដោយ​​ឯករាជ្យ​ ​លើ​​បនល្បែង​អនឡា​ញ​ដែល​​ឲ្យ​បុគ្គលិក​ធ្វើការ​ទាំង​​ផ្ទុះ​រាលដាល​ជំងឺ​កូវីដ-១៩ ​ពេញ​កាស៊ីណូ​។​​ ​សារ​នេះ​​ធ្វើ​ឡើ​ក្រោយ​បន​ល្បែងស៊ីសង​​អនឡា​ញ​មួយ​​របស់​​ថៅកែ​​ចិន​ ​ឈ្មោះ​ ឌឹ​សិនឆឺរី​ (​the​ ​Century​) ​នៅ​ខេត្ត​ព្រះ​សីហនុ ​ផ្ទុះ​ករណី​​ឆ្លង​ជំងឺ​កូវីដ​-​១៩​ ​ដែល​ឆ្លង​​បុគ្គលិក​​ជាង​ ​៤០០​ ​នាក់​ ​និង​ស្លាប់​ម្នាក់​។​

មន្រ្តី​សិទ្ធិមនុស្ស​ ​និង​តំណាង​សហជីព​ដាក់​ការសង្ស័យ​ទៅលើ​អាជីវកម្ម​បន​ល្បែងស៊ីសង​អនឡា​ញ​ ​ដែល​នៅតែ​អាច​បើក​ដំណើរការ​បាន​​​បើ​ទោះបីជា​​រដ្ឋាភិបាល​បាន​​ប្រកាស​ឲ្យ​បិទ​ទម្រង់​​អាជីវកម្ម​ទាំងនេះ​ ​តាំងពី​ឆ្នាំ​ ​២០០៩​។​

បើ​តាម​សារាចរ​ណែនាំ​ ​ដែល​ចុះហត្ថលេខា​ដោយ​លោកនាយក​រដ្ឋ​មន្រ្តី ​ហ៊ុន​ ​សែន​ ​កាលពី​ថ្ងៃ​ទី​​១៧​ ​ខែ​​សីហា​ ​ឆ្នាំ​២០១៩​ ​រដ្ឋាភិបាល​ត្រូវ​បញ្ឈប់​ការ​​ផ្តល់​​គោលការណ៍​ ​និង​អាជ្ញាប័ណ្ណ​អនុញ្ញាត​ឲ្យ​ប្រកប​អាជីវកម្ម​ល្បែងភ្នាល់​តាម​​ម៉ាស៊ីន​អេ​ឡិចត្រូនិក​ ​តាម​អ៊ិនធើណិត​​អនឡា​ញ​ ​ក្នុង​នៅ​ក្រៅ​ប្រទេស​ ​នៅ​កម្ពុជា​ចាប់​​ថ្ងៃ​​ចុះហត្ថលេខា​​នោះ​​ត​ទៅ​។​

បន្ថែម​លើ​សារាចរ​ណែនាំ​នេះ​ ​ក្រោយ​ការ​ឆ្លង​រាលដាល​នៃ​ជំងឺ​កូវីដ-១៩​ ​ពីដើម​ឆ្នាំ​២០២០​ ​មក​ ​បន​ល្បែងកាស៊ីណូ​ជាច្រើន​ ​ត្រូវ​បាន​បញ្ជា​ឲ្យ​ផ្អាក​ដំណើរការ​។​ ​ប៉ុន្តែ​បុគ្គលិក​នៅ​បន​ល្បែងស៊ីសង​តាម​អនឡា​ញ​ ឌឹ​សិនឆឺរី​ (the​ ​Century​) ​នេះ​អះអាង​ថា​ ​បន​ល្បែងស៊ីសង​របស់​ថៅកែ​ចិន​នេះ​ ​មិនដែល​ផ្អាក​ដំណើរការ​ម្តងណា​ទេ​ ​ក្នុងរយៈពេល​ជាង​ ​៥​​ឆ្នាំ​ចុងក្រោយ​នេះ​។

Casino_in_Prah_Sihanouk_Staff_positive_of_COVID19_30_09_2021_by_Facebook_Sreypov_Nalin_01.jpg
កន្លែងស្នាក់នៅរបស់បុគ្គលិកកាស៊ីណូ អនឡា​ញ​ ឌឹ​សិនឆឺរី​ (the​ ​Century​) ដែលមានបុគ្គលិកម្នាក់ស្លាប់ និងជាង៤០០នាក់ឆ្លងជំងឺកូវីដ-១៩ កាលពីថ្ងៃទី៣០ ខែកញ្ញា ឆ្នាំ២០២១។ (រូប៖ បុគ្គលិកផ្តល់ឱ្យ)

ជាង​នេះ​ទៅទៀត​ជាង​ពីរ​ឆ្នាំ​​ចុងក្រោយ​នេះ​ ​ពោល​គឺ​តាំងពី​រដ្ឋាភិបាល​ចេញ​សារាចរ​ណែ​នាំឲ្យ​បិទ​បន​ល្បែងស៊ីសង​អនឡា​ញ​ ​កា​ស៊ី​ណូ ឌឹ​សិនឆឺរី​ ​នៅតែ​អាច​បើក​ដំណើរការ​ធម្មតា​ ​ថែមទាំង​បង្ខាំង​បុគ្គលិក​មិន​ឲ្យ​ចេញក្រៅ​ក្នុងរយៈពេល​នេះ​ទៀត​ផង​។​ ​តំណាង​បុគ្គលិក​ម្នាក់​ ​បាន​បង្ហោះ​សារ​វីដេអូ​ផ្សាយ​ផ្ទាល់​តាម​ហ្វេសប៊ុក​ឈ្មោះ​ ​ដួង​ ​ច័ន្ទ​​ស្រីពៅ​ ​កាលពី​ថ្ងៃ​ទី​៣០​ ​ខែ​​កញ្ញា​ ​រៀប​រាប់ទាំង​ទឹកភ្នែក​ ​អំពី​ការដែល​ត្រូវ​នៅ​ជាប់​គាំ​​​​​​​​​​​​​​​​​​​​​​​​​​​​​​​​​​​ង​ក្នុង​បនល្បែង​ ​មិន​អា​ចចេញ​ទៅក្រៅ​បាន​ ​សូម្បីតែ​ទៅ​ជួប​ឳពុក​ម្តាយ​អស់​រយៈពេល​ជាង​ ​២​ ​ឆ្នាំ​មកនេះ​។

ស្រ្តី​រូប​នេះ​បន្ថែម​ថា​ ​អ្វី​ដែល​គួរឲ្យ​ឈឺចាប់​ជាង​នេះ​នោះ​ ​គឺ​ភាពខ្វះការ​យកចិត្តទុកដាក់​ពី​ថៅកែ​កាស៊ីណូ ​និង​អាជ្ញាធរ​សុខាភិបាល​ ​ពេល​ពួកគាត់​ធ្លាក់ខ្លួន​ឈឺ​ដោយ​ជំងឺកូវីដ-១៩៖ «ពួក​ខ្ញុំ​ពីរ​ឆ្នាំ​ហើយ​ ​ដែល​ពួក​ខ្ញុំ​មិន​អាច​ទៅ​គ្រួសារ​ខ្ញុំ​បាន​។​ ​ឳពុក​ម្តាយ​បងប្អូន​សាច់ញាតិ​ ​ខ្ញុំ​ដែល​ឃើញ​មុខ​ពួកគាត់​ឬ​អត់​? ​ខ្ញុំ​មិនដែល​ឃើញ​មុខ​ពួកគាត់​ទេ​ ​ព្រោះអី​ពីរ​ឆ្នាំនេះ​ ​ខ្ញុំ​មិនដែល​បាន​ចេញ​ទៅក្រៅ​។​ ​ខ្ញុំ​ធ្វើតាម​អ្វី​ដែល​ក្រុមហ៊ុន​ ​បាន​ប្រាប់​ពួក​ខ្ញុំ​។​ ​តែ​ចុងក្រោយ​ពេល​ពួក​ខ្ញុំ​កើត​កូវីដ​ ​អត់មាន​ពេទ្យ​ប្រចាំការ​នៅ​ហ្នឹង​! ​ហើយ​ដល់​មាន​អ្នក​ស្លាប់​ទៀត​ ​គ្មាន​អ្នក​អើពើ​។​ ​តើ​រឿង​ហ្នឹង​វា​យ៉ាងម៉េច​?»។

មន្ត្រី​សម្របសម្រួល​សមាគម​អាដហុ​ក​ (​ADHOC) ​ប្រចាំ​ខេត្ត​ព្រះ​សីហនុអ្នកស្រី​ ​ជៀប​ ​សុធារី​ ​ក៏​ងឿងឆ្ងល់​ដែរ​ ​ថា​ហេតុ​ដូចម្តេច​ ​បានជា​បន​ល្បែងស៊ីសង​អន​ឡា​ញ​នេះ​ ​នៅតែ​អាច​បើក​ដំណើរការ​បាន​ ​បើ​ទោះបីជា​រដ្ឋាភិបាល​ឲ្យ​បិទ​យូ​រហើយ​។​

ម្យ៉ាងទៀត​អ្នកស្រី​​ឆ្ងល់​ដែរ​ថា​ ​តំបន់​កាស៊ីណូ ឌឹ​សិនឆឺរី​នេះ​ ​ធ្លាប់​ស្ថិត​ក្នុង​តំបន់​ក្រហម​ទៅទៀត​ ​ប៉ុន្តែ​ហេតុ​ដូចម្តេច​ក៏​នៅតែ​អាច​បើក​ដំណើរការ​បាន​រហូតមក​។​ ​អ្នកស្រី​ថា​ ​កា​របើក​បន​ល្បែងស៊ីសង​អនឡា​ញ​ ​គឺជា​ការ​បំពាន​សារាចរ​ណ៍​ណែនាំ​របស់​រដ្ឋាភិបាល​មួយ​ទៅ​ហើយ​ ​ចុះបើ​មានការ​បង្ខាំង​បុគ្គលិក​ ​ដូច​ការ​អះអាង​របស់​បុគ្គលិក​ទៅទៀត​នោះ​ ​វា​រឹត​តែ​ជា​ការ​បំពាន​មួយ​ជាន់​ទៀត​ទៅ​ហើយ​។​ ​នេះ​នៅ​មិនទាន់​គិតដល់​ការ​បំពានច្បាប់​ស្តីពី​វិធានការ​ទប់​ស្កាត់​ការ​ឆ្លង​រាលដាល​នៃ​ជំងឺ​កូវីដ-១៩​​ ​នោះ​ផង​ ​ព្រោះ​ក្រោយ​បុគ្គលិក​ឆ្លង​ជំងឺ​កូវីដ-១៩​ ​រាប់​រយ​នាក់​ទៅ​ហើយ​ ​កាស៊ីណូ​នេះ​នៅតែ​ឲ្យ​បុគ្គលិក​បន្ត​ធ្វើការ​តទៅទៀត​។​ ​អ្នកស្រី​ស្នើ​ឲ្យ​អាជ្ញាធរ​ ​ស៊ើប​អង្កេត​ករណី​ទាំងនេះ​ ​ឲ្យបាន​ស៊ី​ជម្រៅ​ ​និង​ចាប់​ជន​ដែល​ប្រព្រឹត្ត​ល្មើស​ ​និង​អ្នក​ពាក់ព័ន្ធ​ទាំងអស់​ ​ឲ្យ​ទទួលទោស​នៅចំពោះមុខ​ច្បាប់៖ «ខ្ញុំ​សំណូមពរ​ឲ្យ​អាជ្ញាធរ​ ​និង​សមត្ថកិច្ច​ហ្នឹង​មេត្តា​សិក្សាស្រាវជ្រាវ​អំពី​រឿង​នេះ​ ​ព្រោះ​សមត្ថកិច្ច​និង​អាជ្ញាធរ​លោក​​​មាន​សិទ្ធិ​គ្រប់គ្រាន់​ ​ក្នុង​ការ​ចុះទៅ​សិក្សាស្រាវជ្រាវ​ ​មើល​ថា​តើ​កាស៊ីណូ ឌឹ​សិនឆឺរី​នេះ​ ​ពិតជា​មានការ​បង្ខំឲ្យ​បុគ្គលិក​របស់​ខ្លួន​ ​បន្ត​ធ្វើការងារ​តទៅទៀត​ ​សម្រាប់​អ្នក​មិន​ផ្ទុក​នូវ​ជំងឺ​កូវីដ-១៩​»។​

មន្រ្តី​សហជីព​ក៏​ងឿងឆ្ងល់​អំពី​ការ​បណ្ដែត​បណ្តោយឲ្យ​បន​ល្បែងស៊ីសង​អនឡា​ញ​នេះ​ ​បើក​ដំណើរការ​បាន​នៅក្បែរ​ច្រមុះ​អភិបាល​ខេត្ត​ ​ទោះ​បំពាន​បម្រាម​របស់​រដ្ឋាភិបាល​។​ ​ប្រធាន​សហ​ព័ន្ធ​សហជីព​វិស័យ​ទេសចរណ៍​ ​និង​សេវាកម្ម​កម្ពុជា​លោក​ ​ម៉ម​ ​រិទ្ធី​ ​ថា​ខាង​បុគ្គលិក​កាស៊ីណូ ​បាន​ប្រាប់​លោក​ ​ថា​អ្នកគ្រប់គ្រង​កាស៊ីណូនេះ​ ​ដឹងខ្លួន​ថា​ ​បើក​អាជីវកម្ម​នេះ​ខុសច្បាប់​ដែរ​ ​ប៉ុន្តែ​នៅតែ​បើក​ទាំង​បំពាន​ ​និង​អាច​គេច​រួចពី​សំណាញ់​ច្បាប់​បាន​រហូត​ ​ព្រោះ​ថៅកែ​ដូចជា​បាន​ដឹងមុន​រហូត​ ​ឲ្យតែ​មាន​អាជ្ញាធរ​មានសមត្ថកិច្ច​ ​ចុះទៅ​ពិនិត្យមើល​ទីតាំង​នោះ​ម្តងៗ​៖ «ហើយ​រឿង​ផ្ទៃក្នុង​មួយទៀត​ ​ដែល​ពួកគាត់​ប្រាប់​ខ្ញុំ​ហ្នឹង​ ​ថា​មាន​ពេលខ្លះ​ ​ពេល​គេ​ចុះ​ឆែក​គាត់​រើ​តុ​រើ​អី​បិទ​ទុកចោល​ទៅ​។​ ​ម្ង៉ៃ​ហ្នឹង​ដូចជា​បិទ​កាស៊ីណូ​។​ ​ប៉ុន្តែ​បន្ទាប់ពី​គេ​ចេញទៅ​ផុត​ ​គាត់​បើក​វិញ​ហើយ​។​ ​អាហ្នឹង​អ្វី​ដែល​កម្មករ​ប្រាប់​ខ្ញុំ​។​ ​ដូច្នេះ​យើង​មើល​ចំណុច​ហ្នឹង​ ​វា​ចំណុច​មួយ​បំបាំង​ភ្នែក​ ​បានន័យ​ថា​តាំងពី​រ​ដើម​មក​ ​គាត់​បើក​រហូត​ ​៥​ទៅ​៦​ឆ្នាំ​មកនេះ​ ​គាត់​បើក​រហូត»។

មន្រ្តី​សហជីព​រូប​នេះ​​សង្ស័យ​ថា ​មាន​មន្រ្តី​ជាច្រើន​ពាក់ព័ន្ធ​ក្នុង​ការ​បិទបាំង​ព័ត៌មាន​នេះ​ ​ព្រោះ​បើ​ទោះបីជា​កាស៊ីណូ​នេះ​ ​បើក​ដោយ​ខុសច្បាប់​ឬ​យ៉ាងណាក្ដី​ ​ការណ៍​ដែល​មាន​បុគ្គលិក​បម្រើ​ការ​រហូត​ជាង​ ​៤​០​០​ ​នាក់​យ៉ាងនេះ​ ​ច្បាស់ជា​ខាង​មន្រ្តី​ក្រសួងការងារ​ ​ក៏​ត្រូវ​ដឹងរឿង​នេះ​ដែរហើយ៖ «ឥឡូវ​យើង​អត់​ដឹង​ថា​គាត់​បាន​ចុះ​ជាមួយ​មន្ទីរ​ការងារ​ ​ឬ​ក្រសួងការងារ​យ៉ាងម៉េច​ ​ហើយ​ប្រើ​លក្ខខណ្ឌ​ការងារ​យ៉ាងម៉េច​ ​យើង​អត់​ដឹង​ទាំងអស់!»។

បញ្ហា​សិទ្ធិ​ការងារ​នេះ​ ​កំពុង​ចោទ​ជា​បញ្ហា​មួយ​ជាន់​ទៀត​ ​ដោយសារតែ​បុគ្គលិក​ម្នាក់​បាន​ស្លាប់​។​ ​ប៉ុន្តែ​មិន​ដឹង​ខាងណា​ជា​អ្នកទទួលខុសត្រូវ​សម្រាប់​ការ​ផ្តល់​សំណង​ដល់​គាត់​ ​ដោយសារតែ​គាត់​ស្លាប់​ដោយសារ​កើតជំងឺកូវីដ-១៩​​ ​នៅ​កន្លែងធ្វើការ​។​

កាស៊ីណូអនឡា​ញ​ចិន​ ឌឹ​សិនឆឺរី​ ​មាន​ទីតាំងនៅ​ភូមិ​ ​៥​ ​សង្កាត់​លេខ​ ​៤​ ​ខេត្ត​ព្រះ​សីហនុ ​មាន​ចំនួន​កម្មករ​បុគ្គលិក​បម្រើ​ការ​សរុប​ ​៤​៣​៧​នាក់​។​ ​បុគ្គលិក​ក្រុមហ៊ុន​នេះ​ ​អះអាង​ថា​ ​កម្មករ​ទាំងអស់​ឆ្លង​ជំងឺ​នេះ​។​

ការ​ផ្ទុះ​រាលដាល​ជំងឺ​នេះ​ផ្តើម​ដំបូង​​ពី​ថ្ងៃ​ទី​​២៣​ ​ខែ​​កញ្ញា​ ​ក្រោយ​បុគ្គលិក​ម្នាក់​ទៅ​ភ្នំពេញ​ ​ធ្វើ​តេស្ត​រក​ឃើញ​ថា ​មាន​ផ្ទុក​ជំងឺ​នេះ​។​ ​ភ្លាម​នោះ​អ្នកគ្រប់គ្រង​កាស៊ីណូ ​បាន​ធ្វើតេ​ស្ត​រហ័ស​លើ​បុគ្គលិក​ ​និង​រក​ឃើញ​បុគ្គលិក​ជាច្រើន​ផ្ទុក​ជំងឺ​នេះ​។​ ​ប៉ុន្តែ​កាស៊ីណូ​នេះ​ ​នៅតែ​បន្ត​បើក​ដំណើរការ​រហូត​ ​និង​ឲ្យ​បុគ្គលិក​បន្ត​ធ្វើការ​ទាំង​ឈឺ​។​ ​រហូតដល់​ថ្ងៃ​ទី​៣​០​ ​ខែ​​កញ្ញា​ ​ក្រោយ​បុគ្គលិក​ម្នាក់​ស្លាប់​ដោយសារ​ជំងឺ​នេះ​ ​ទើប​បែក​រឿង​។​ ​ពេល​នោះ​គេ​ឃើញ​អាជ្ញាធរ​ចុះ​មក​បញ្ជា​ឲ្យ​ផ្អាក​អាជីវកម្ម​នេះ​សិន​។​

មន្រ្តី​សហជីព​មួយ​រូប​ទៀត​ ​ថា​លោក​ហួសចិត្ត​ ​ដែល​ចំនួន​បុគ្គលិក​ឆ្លង​ជំងឺ​នេះ​កើតឡើង​ទៅ​ហើយ​ ​ខាង​កាស៊ីណូ​នៅតែ​បើក​ដំណើរការ​ទៀត​។​ ​ប្រធាន​សហភាព​ការងារ​កម្ពុជា​លោក​ ​អាត់​ ​ធន់​ ​ថា​នេះ​ជា​ការ​បំពាន​ធ្ងន់ធ្ងរ​លើ​ច្បាប់​ស្តីពី​កូវីដ-១៩​​ ​និង​ប្រមាថ​សុខភាព​ ​សុវត្ថិភាព​ ​និង​អាយុជីវិត​បុគ្គលិក​កាស៊ីណូនោះ៖ «វា​មិនគួរ​ឲ្យ​ជឿ​ហ្នឹង​ ​គឺ​នៅ​ពេល​មាន​ចំនួន​ហ្នឹង​កើតឡើង​ហើយ​ ​ចំនួន​កូវីដ​កើត​ឡើយ​ហើយ​ ​នៅតែ​អនុញ្ញាត​ឲ្យ​ធ្វើការ​ទៀត​ ​បើ​តាមច្បាប់​កូវីដ​នេះ​ ​មិន​ត្រឹមតែ​រឿង​ថា​ដឹង​ហើយ​ ​មិន​ប្រាប់​គេ​ ​ឬក៏​ទៅ​ចម្លង​គេ​ហ្នឹង​មានទោស​ ​ហើយ​នេះ​មានន័យ​ថា​ដឹង​ហើយ​ឆ្លង​ហើយ​ឲ្យ​ធ្វើការ​ទៀត​ ​អា​ហ្នឹង​ចង់និយាយ​ថា​ត្រួត​លើ​ត្រួត​ហើយ»។

ច្បាប់​ស្តីពី​វិធានការ​ទប់​ស្កាត់​ការ​ឆ្លង​រាលដាល​នៃ​ជំងឺ​កូវីដ-១៩​​ ​មាត្រា​ ​៩​ ​និង​ ​១០​ ​ចែង​អំពី​បទល្មើស​ចម្លង​ដោយចេតនា​នូវ​ជំងឺ​កូវីដ-១៩​​ ​ដល់​អ្នកដទៃ​ ​និង​បទ​មិន​គោរព​វិធានការ​រដ្ឋបាល​ ​ដែល​ត្រូវ​ផ្តន្ទាទោស​ដាក់​ពន្ធ​នាគា​រ​ពី​ ​២​ឆ្នាំ​ ​ដល់​ ​២០​ឆ្នាំ​ ​និង​ពិន័យ​ជា​ប្រាក់​រហូតដល់​ ​២០​ ​លាន​រៀល​។​

វិទ្យុ​អាស៊ី​សេរី​ ​មិនទាន់​អាច​សុំ​ការ​បំភ្លឺ​ជុំវិញ​រឿង​នេះ​ ​ពី​អ្នកនាំពាក្យ​សាលាខេត្ត​ព្រះ​សីហនុ​លោក​ ​ឃាង​ ​ភិរម្យ​បាន​នៅឡើយ​ទេ​ ​មក​ត្រឹម​ការផ្សាយ​នេះ​ ​ដោយសារ​លោក​មិន​លើក​ទូរស័ព្ទ​។​

Casino_in_Prah_Sihanouk_Staff_positive_of_COVID19_30_09_2021_by_Facebook_Sreypov_Nalin_02.jpg
បុគ្គលិកកាស៊ីណូអនឡា​ញ​ ឌឹ​សិនឆឺរី​ (the​ ​Century​) ដែលស្លាប់ដោយសារជំងឺកូវីដ១៩ កាលពីថ្ងៃទី៣០ ខែកញ្ញា ឆ្នាំ២០២១។ (បុគ្គលិកផ្តល់ឱ្យ)

ទោះ​ជា​យ៉ាងនេះ​ក្ដី​ ​រដ្ឋបាល​ខេត្ត​ព្រះ​សីហនុ ​ចេញ​សេចក្តីជូនដំណឹង​កាលពី​ថ្ងៃ​ទី​២៧​ ​ខែ​​កញ្ញា​ ​ថា​នឹង​ចាត់វិធានការ​រដ្ឋបាល​ ​និង​ច្បាប់​ចំពោះ​ម្ចាស់​កាស៊ីណូ ​ដែល​មានការ​ពាក់ព័ន្ធ​ទោះ​ក្នុង​រូបភាព​ដោយប្រយោល​ ​ឬ​ដោយ​ផ្ទាល់​ក្ដី​ ​ទៅលើ​ការ​បង្ខំ​ឱ្យ​មនុស្ស​ធ្វើការ​ជាដើម​។​ ​រដ្ឋបាល​ខេត្ត​នេះ​បន្ត​ថា​ ​ក្នុង​ករណី​ម្ចាស់​ ​កាស៊ីណូ​ប្រព្រឹត្ត​បទល្មើស​ដូច​មាន​ចែង​ខាងលើ​ ​រដ្ឋបាល​ខេត្ត​នឹង​ចាត់វិធានការ​ផ្អាក​ទីតាំង​អាជីវកម្ម​ជា​បណ្តោះអាសន្ន​ ​និង​កសាង​សំណុំរឿង​បញ្ជូន​ទៅ​តុលាការ​ ​ដើម្បី​ផ្តន្ទាទោស​បុគ្គល​ ​ដែល​មានការ​ពាក់ព័ន្ធ​ ​ស្របតាម​ច្បាប់ជាធរមាន​ ​ព្រមទាំង​ស្នើសុំ​រដ្ឋាភិបាល​ដើម្បី​លុប​អាជ្ញាប័ណ្ណ​អាជីវកម្ម​ជាស្ថាពរ​។

ស្រប​ពេល​ដែល​អាជ្ញាធរ​ប្តេជ្ញា​ចិត្ត​បែប​នេះ​ ​បុគ្គលិក​កាស៊ីណូជាច្រើន​រង​ការ​គម្រាម​កំហែង​ ​ឲ្យ​លុប​វីដេអូ​ផ្សាយ​ផ្ទាល់​លើ​បណ្ដាញ​សង្គម​ហ្វេសប៊ុក​ ​ដែល​រាយការណ៍​អំពី​ការ​មិន​យកចិត្តទុកដាក់​របស់​អាជ្ញាធរ​លើ​បញ្ហា​ពួកគាត់​នោះ​។​

ទោះបីយ៉ាងណា ​បុគ្គលិក​ទាំងនោះ​ ​ប្រកាន់​ជំហរ​ថា​ ​មិន​លុប​វីដេអូ​នោះ​ទេ​ ​ព្រោះ​ពួកគាត់​និយាយ​តែ​ការពិត​។​ ​ក្រោយ​បុគ្គលិក​ទាំងនេះ​មិនព្រម​ធ្វើតាម​ការ​ចង់បាន​​របស់​អាជ្ញាធរ​ ​មាន​បុគ្គលិក​មួយ​ក្រុម​ផ្សេងទៀត​ ​ដែល​ស្ថិត​ក្នុង​ក្រុម​អ្នកគ្រប់គ្រង​ក្រុមហ៊ុន​ ​និង​ជា​អ្នកកាន់ជើង​ខាង​ថៅកែ​ ​បាន​បង្ហោះ​វីដេអូ​មួយ​ ​កាលពី​ថ្ងៃ​ទី​​៣​ ​ខែ​​តុលា​ ​ដើម្បី​បន្សាប​ព័ត៌មាន​របស់​ក្រុម​បុគ្គលិក​ដែល​រងគ្រោះ​ពិតប្រាកដ​។​ វីដេអូ​នោះ​ត្រូវ​បាន​រដ្ឋបាល​ខេត្ត​ព្រះ​សីហនុ​ ​យកមក​បង្ហោះ​លើ​ហ្វេសប៊ុក​របស់​ខ្លួន​។

យ៉ាងណាក៏ដោយ​ចុះ​ ​ក្រុម​សង្គម​ស៊ីវិល​ ​ទាមទារ​ឱ្យ​រដ្ឋាភិបាល​បើក​ការស៊ើបអង្កេត​បន​ល្បែងកាស៊ីណូ​ ឌឹ​សិនឆឺរី​ (the​ ​Century​) ​ជាបន្ទាន់​ដើម្បី​លាតត្រដាង​ការពិត​ដល់​ពលរដ្ឋ​ខ្មែរ​ពី​បញ្ហា​នានា​ដែល​បាន​លើកឡើង​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល