RFA
ក្រសួងសុខាភិបាលប្រកាសហាមឃាត់ការនាំចូល លក់ ចែកចាយ និងផ្សព្វផ្សាយតាមបណ្ដាញសង្គមហ្វេសប៊ុក (Facebook) នូវផលិតផលឱសថមួយចំនួនដែលត្រូវបានរកឃើញថា ជាឱសថក្លែងក្លាយ ពុំបានចុះបញ្ជិកា និងគ្មានច្បាប់អនុញ្ញាតត្រឹមត្រូវ។ អ្នកឃ្លាំមើលសង្គមថ្លែងថា បញ្ហាចរាចរណ៍ទំនិញខូចគុណភាព ទំនិញក្លែងក្លាយ និងទំនិញគ្មានការត្រួតពិនិត្យត្រឹមត្រូវនេះ គឺជារឿងសំខាន់ដែលរដ្ឋាភិបាលត្រូវយកចិត្តទុកដាក់ដោះស្រាយ ដោយសារផលិតផលទាំងនោះអាចបង្កផលប៉ះពាល់ច្រើនយ៉ាងដល់សុខភាពអ្នកប្រើប្រាស់ និងប៉ះពាល់ដល់សេដ្ឋកិច្ចសង្គមធ្ងន់ធ្ងរ។
ផលិតផលឱសថដែលត្រូវបានក្រសួងសុខាភិបាលហាមឃាត់នោះ រួមមាន ឱសថសម្រកទម្ងន់ឈ្មោះ ការ៉ូលីន ខេបស៊ុល (Caroline Capsule) និងការ៉ូលីន កាហ្វេ (Caroline Coffee) និងប្រភេទឱសថព្យាបាលជំងឺសន្លាក់ឈ្មោះ អូស្តូ (OSTO) ដែលផលិតផលទាំងនេះត្រូវបានផ្សព្វផ្សាយលក់ដោយគណនីហ្វេសប៊ុកឈ្មោះ សុខភាពបៃតង។ ក្រសួងក៏បានហាមឃាត់ផលិតផលឱសថមួយចំនួនទៀតផងដែរ មានឈ្មោះដូចជា ហ្វូឃយឌេន (Fucoidan) អូមេហ្គា ស្រ៊ីអ៊ីភីអេ និងឌីអេចអេ (OMEGA 3 EPA & DHA) និងបាលីហ្ក្រាស (Barley grass) ព្រមទាំងផលិតផលឱសថមួយចំនួនទៀតដែលត្រូវបានផ្សព្វផ្សាយដោយគណនីហ្វេសប៊ុកឈ្មោះ ស្ពីរូលីណា ១០០% (SPIRULINA 100%)។
ក្រសួងសុខាភិបាលអះអាងនៅក្នុងសេចក្ដីជូនដំណឹងកាលពេលថ្មីៗនេះថា ផលិតផលឱសថទាំងនេះត្រូវបានដាក់លក់ដោយគ្មានការត្រួតពិនិត្យគុណភាព ពុំបានចុះបញ្ជិកា និងគ្មានច្បាប់អនុញ្ញាតពីក្រសួង ព្រមទាំងបានផ្សព្វផ្សាយដោយភូតកុហក និងបំផ្លើសហួសពីការពិត។
ស្របពេលជាមួយគ្នានេះ ក្រសួងក៏បានប្រកាសប្រមូលត្រឡប់មកវិញនូវផលិតផលឱសថឈ្មោះ ម៉ាឌូរ៉ា (MADURA) គ្រប់ពណ៌ គ្រប់ឡូតិ៍ និងគ្រប់ប្រភេទ ដើម្បីយកមកកម្ទេចចោលជាបន្ទាន់ បន្ទាប់ពីរកឃើញថា ឱសថបំប៉នសុខភាពប្រភេទនេះ មានផ្ទុកសារធាតុ សាយដេណាហ្វីល (Sidenafil) ដែលជាសារធាតុប្រើសម្រាប់បង្កើនតណ្ហាផ្លូវភេទបុរស ដែលអាចបង្កគ្រោះថ្នាក់ដល់អាយុជីវិតអ្នកប្រើប្រាស់។ ក្រសួងបានកំណត់ថា ផលិតផលឱសថឈ្មោះ ម៉ាឌូរ៉ា (MADURA) នេះជាប្រភេទឱសថក្លែងក្លាយ ផលិតនៅប្រទេសថៃ ហើយត្រូវបាននាំចូលមកកម្ពុជាដោយគ្មានប្រភពច្បាស់លាស់ និងត្រូវបានផ្សព្វផ្សាយ និងចែកចាយដោយគណនីហ្វេសប៊ុកឈ្មោះ សុខភាពបៃតង។
ក្រសួងសុខាភិបាលអំពាវនាវដល់ប្រជាពលរដ្ឋដែលកំពុងប្រើប្រាស់ផលិតផលឱសថទាំងនេះ ឱ្យបញ្ឈប់ការប្រើប្រាស់ជាបន្ទាន់ ដើម្បីជៀសវាងការខាតបង់ប្រាក់កាស និងប៉ះពាល់ដល់សុខភាព ឬអាចឈានដល់ការបាត់បង់អាយុជីវិតទៀតផង។ ក្រសួងក៏បានតម្រូវឱ្យម្ចាស់គណនីសុខភាពបៃតង បញ្ឈប់ការនាំចូល ផ្សព្វផ្សាយ លក់ ឬចែកចាយផលិតផលឱសថខុសច្បាប់ទាំងនេះជាបន្ទាន់ ហើយក្រសួងបានប្រកាសទៀតថា នឹងចាត់វិធានការតឹងរ៉ឹងតាមផ្លូវច្បាប់ចំពោះម្ចាស់គណនីសុខភាពបៃតងទៅតាមច្បាប់ស្ដីពីវិសោធនកម្មច្បាប់ស្ដីពីការគ្រប់គ្រងឱសថជាធរមាន។
ប្រធានអង្គការសម្ពន្ធគណនេយ្យភាពសង្គមកម្ពុជា លោក សន ជ័យ ថ្លែងថា ការចរាចរណ៍ទំនិញ ឬផលិតផលគ្មានការត្រួតពិនិត្យគុណភាពច្បាស់លាស់ ទំនិញក្លែងក្លាយ និងខូចគុណភាព គឺជាបញ្ហាធ្ងន់ធ្ងរមួយដែលកំពុងបង្កជាក្តីបារម្ភដល់ប្រជាពលរដ្ឋខ្មែរទូទៅទាក់ទងនឹងបញ្ហាសុខភាព។ ក្រៅពីនេះ វាក៏ជាបន្ទុកនៃភាពក្រីក្ររបស់ពលរដ្ឋផងដែរ ដ្បិតពលរដ្ឋត្រូវចំណាយលុយបន្ថែមទៀតទៅលើការព្យាបាលសុខភាព ឬជំងឺ បន្ទាប់ពីបានប្រើប្រាស់ផលិតផលក្លែងក្លាយទាំងនោះ៖ «ផលិតផលដែលលក់ដោយខុសច្បាប់ក្នុងប្រទេសហ្នឹង វាអាចមានប្រភពពីរ។ ទីមួយវាអាចជាការនាំចូលដោយមិនមានការអនុញ្ញាត ការនាំចូលមួយដែលការឃុបឃិតជាប្រព័ន្ធ ឬក៏ពុករលួយនៅតាមព្រំដែន។ ទីពីរផលិតផលខ្លះក្រៅពីឱសថហ្នឹង ក៏វាមានការផលិតនៅក្នុងស្រុកដែរ ដោយគេនាំចូលវត្ថុធាតុដើម រួចធ្វើដោយខ្លួនឯងជាលក្ខណៈឯកជន ហើយដោយសារតែខ្វះការត្រួតពិនិត្យ ធ្វើឱ្យផលិតផលទាំងអស់ហ្នឹង អាចដាក់លក់បានដោយសេរីនៅលើទីផ្សារ ឬនៅលើអនឡាញ។ កង្វះការត្រួតពិនិត្យ ឬក៏ការធ្វេសប្រហែសក្នុងការត្រួតពិនិត្យដែលធ្វើឱ្យប្រជាពលរដ្ឋមានឱកាសប្រើប្រាស់ផលិតផលក្លែងក្លាយនេះ មិនត្រឹមតែប៉ះពាល់ដល់សុខភាពតែមួយមុខទេ គឺវាអាចប៉ះពាល់ដល់សេដ្ឋកិច្ចរបស់ពលរដ្ឋខ្មែរទៀតផង។ អញ្ចឹងទាំងនេះវាជាអ្វីដែលកំពុងតែកើតឡើងនៅក្នុងប្រទេសយើង ហើយវាក៏ជាបន្ទុកនៃភាពក្រីក្រផងដែរ»។
អ្នកឃ្លាំមើលសង្គមរូបនេះ យល់ឃើញថា ដំណោះស្រាយរឿងនេះត្រូវធ្វើឡើងដោយមានការចូលរួមពីក្រសួងជំនាញដទៃទៀត ដូចជា ក្រសួងសេដ្ឋកិច្ច និងក្រសួងមហាផ្ទៃជាដើម។ បន្ថែមពីលើនេះ ការអប់រំផ្សព្វផ្សាយដល់ប្រជាពលរដ្ឋឱ្យយល់ដឹងផលវិបាកនៃផលិតផលផលក្លែងក្លាយ និងការចាត់វិធានការតាមផ្លូវច្បាប់ចំពោះជនពាក់ព័ន្ធនឹងការនាំចូលផលិតផលទាំងនោះ សុទ្ធសឹងតែជារឿងចាំបាច់ដែលរដ្ឋាភិបាលគួរធ្វើដើម្បីធានាថា ពលរដ្ឋរបស់ខ្លួននឹងមិនរងគ្រោះដោយសារផលិតផលក្លែងក្លាយទាំងនោះទៀតឡើយ៖ «កន្លងមកយើងឃើញមានការលក់យ៉ាងសម្បើម ហើយគេ Tag ឱ្យអ្នកប្រើហ្វេសប៊ុកជាច្រើនផ្សេងទៀត ដោយគ្មានការចាត់វិធានការតាមផ្លូវច្បាប់ណាមួយទេ។ ដូច្នេះវិធានការបន្ទាប់ គឺក្រសួងសុខាភិបាលត្រូវអប់រំផ្សព្វផ្សាយ ឬក៏មានប្រតិកម្មបន្ទាន់ទៅនឹងការផ្សព្វផ្សាយលក់ផលិតផលបំប៉នសុខភាពណាមួយដែលក្រសួងយល់ថា បានលក់ដោយខុសច្បាប់ មិនមានការអនុញ្ញាត ហើយរឿងទីពីរ ការផ្សព្វផ្សាយឱ្យមានការយល់ដឹងជូនមហាជនឱ្យបានទូលំទូលាយជាងមុន ដើម្បីកុំឱ្យពួកគេក្លាយជាអ្នករងគ្រោះនៃការប្រើប្រាស់ផលិតផលទាំងអស់នោះ»។
កម្ពុជា បានក្លាយជាទីផ្សារនៃទំនិញខូចគុណភាព ទំនិញក្លែងបន្លំម៉ាកយីហោ និងទំនិញក្លែងក្លាយជាច្រើនប្រភេទ ហើយជាញឹកញាប់អាជ្ញាធរជំនាញបានចុះទៅត្រួតពិនិត្យ និងរឹបអូសយកផលិតផលទាំងនោះទៅបំផ្លាញចោលចាប់ពីរាប់សិបតោន ដល់រាប់រយតោន។ ទោះបីជាយ៉ាងណា អ្នកនាំចូលផលិតផល ឬអាជ្ញាធរដែលបើកដៃឱ្យមានការនាំចូលផលិតផលទាំងនោះ មិនដែលត្រូវបាននាំយកមកកាត់ទោសតាមផ្លូវច្បាប់នោះឡើយ ជាហេតុនាំឱ្យបញ្ហានេះចេះតែបន្តកើតមាន។ អ្នកឃ្លាំមើលសង្គមអះអាងថា ជនរងគ្រោះនៃផលិតផលក្លែងក្លាយ ខូចគុណភាព និងផលិតផលមានផ្ទុកសារធាតុគីមីហាមឃាត់ទាំងនោះ មិនមានអ្នកណាផ្សេងក្រៅពីប្រជាពលរដ្ឋខ្មែរ អ្នកមានជីវភាពខ្សត់ខ្សោយ និងមធ្យមនោះឡើយ ព្រោះពួកគេជាអ្នកប្រើប្រាស់ផលិតផលទាំងនោះដោយខ្វះការយល់ដឹង ខណៈវិស័យសុខាភិបាលបន្តរងការរិះគន់ថា នៅមានកម្រិតទាប និងរើសអើងជនក្រីក្រនៅឡើយ៕
