ពលករ​​ខ្មែរ​​​​​ឆ្លង​​ជំងឺ​កូវីដ​១៩ ​នៅ​ប្រទេស​ថៃ​​ជា​ច្រើន​នាក់​​​ បន្តខ្វះខាត​​​ស្បៀង​អាហារ​ និង​​ថ្នាំ​ព្យាបាល​​​ជំងឺ

ដោយ ជី វិតា
2021-07-12
Share
ពលករ​​ខ្មែរ​​​​​ឆ្លង​​ជំងឺ​កូវីដ​១៩ ​នៅ​ប្រទេស​ថៃ​​ជា​ច្រើន​នាក់​​​ បន្តខ្វះខាត​​​ស្បៀង​អាហារ​ និង​​ថ្នាំ​ព្យាបាល​​​ជំងឺ ពលករខ្មែរនៅទីក្រុងបាងកកប្រទេសថៃជា​ច្រើន​នាក់​​​នៅតែបន្តខ្វះខាត​​​ស្បៀង​អាហារ​ និង​​ថ្នាំសម្រាប់​ព្យាបាល​​​ជំងឺកូវីដ១៩។
រូប៖ ថតដោយពលករខ្មែរនៅប្រទេសថៃ។

ពលករ​ខ្មែរ​​ឆ្លង​​ជំងឺ​កូវីដ​១៩​ នៅ​​ប្រទេស​ថៃ​ទាំង​នោះថ្លែង​ថា ​​​​ចាប់​តាំង​ពី​រដ្ឋាភិបាល​ថៃ​បិទ​ខ្ទប់​ការដ្ឋាន​សំណង់​នៅ​ទីក្រុង​បាងកក​ និង​ខេត្ត​ចំនួន​ ៥​ ជុំ​វិញ​ ​ដើម្បី​ទប់​ស្កាត់​​ការ​រាតត្បាត​ជំងឺ​កូវីដ​១៩​មក ​បាន​ប៉ះពាល់​យ៉ាង​ខ្លាំង​ដល់​ការ​រស់​​នៅ​របស់​ពួកគាត់។

ពលការិនី​​​មាន​ស្រុក​កំណើត​នៅ​ខេត្ត​សៀម​រាបលោកស្រី ហុង សារ៉េត ប្រាប់​អាស៊ី​សេរី​នៅ​​ព្រឹក​ថ្ងៃ​ទី​១១ ខែ​កក្កដា​ថា លោក​ស្រី​និង​កូន​ស្រី​របស់​គាត់​អាយុ ​៧​ឆ្នាំ​បាន​ឆ្លង​​ជំងឺ​​កូវីដ​​១៩​​ ហើយ​ត្រូវ​​បាន​​ថៅកែ​​ថៃ​​បង្ខាំង​ឱ្យ​នៅ​ក្នុង​ការដ្ឋាន​សំណង់​នៅ​​កណ្ដាល​ទីក្រុង​​បាងកក​​​ចំនួន ​​២ ខែ​ហើយ ​ពុំ​​មាន​គ្រូពេទ្យ​ណា​មក​ព្យាបាល​ជំងឺ​របស់​​ពួកគាត់​នោះ​ទេ។ លោក​ស្រី​បញ្ជាក់​ថា ​ប្រមាណ ​២ សប្ដាហ៍​មក​នេះ​ពួក​លោក​ស្រី​គ្មាន​អាហារ​ហូប​​​គ្រប់គ្រាន់​ទេ ​ពោល​គឺ​ហូប​តែ​ត្រីខកំប៉ុង ​និង​មី​កញ្ចប់​ដែល​ថៅកែ​ថៃ​​​ផ្ដល់​ជូន​បន្តិចបន្តួច​ប៉ុណ្ណោះ៖ «ខ្លាំង​ទៅ​ខ្ញុំ​ចូល​បន្ទប់​ទឹក​បែក​ចិញ្ចើម​ ហើយ​នៅ​ពេល​ខ្ញុំ​ចេញ​មក​វិញ​បាន​ ក៏​ប្ដី​ជួយ​មើល​ កោស​ខ្យល់​ដូច​របៀប​ខ្មែរ​យើង​ វា​បាន​គ្រាន់​បើ​មក​វិញ​។ ​ហេតុ​ផល​មក​ពី​ហូប​ចុក​អត់​គ្រប់​​គ្រាន់​ ពេល​មាន​អាការ​អី​មិន​ស្រួល​អី​តិច​តួច​ចង់​តែ​ដួល​សន្លប់​ ខ្ញុំ​ខ្សោយ​ ម្សិល​មិញ​ក៏​មាន​អាការ​​ថប់ៗ​ណែន​ដូច​យើង​ខ្សោយ​អត់​មាន​កម្លាំង​»

ដូច​គ្នា​នេះ​ដែរ ​ពលការិនី​ខ្មែរ​ម្នាក់​ទៀតលោក​ស្រី សួន ច្រឹង ថ្លែង​ថា លោក​ស្រី​គ្មាន​លទ្ធភាព​ជួយ​ខ្លួន​ឯង​បាន​ទេ ពី​ព្រោះ​ចាប់​តាំង​ពី​​ថៅកែ​ថៃ​បាន​បង្ខាំង​ពួក​លោក​ស្រី​​ឱ្យ​នៅ​ក្នុង​ការដ្ឋាន​សំណង់​មក មិន​បាន​ធ្វើ​ការងារ​រក​ប្រាក់​ចំណូល​ឡើយ។ ​បន្ថែម​ពី​នេះលោក​ស្រី​ថា ​​អាជ្ញាធរ​ថៃ​បាន​ដាក់​ពង្រាយ​ប៉ូលិស​និង​ទាហាន​ជា​ច្រើន​​នាក់​​យាម​ការពារ​នៅ​ជុំ​វិញ​ការដ្ឋាន​សំណង់​​ដែល​លោក​ស្រី​ស្នាក់​នៅ​​ហាមឃាត់​មិន​ឱ្យ​ពួកគាត់​​ចេញ​ដើរ​ទៅ​ខាង​ក្រៅ​​បាន​នោះ​ទេ​។ ​​ស្ត្រី​វ័យ ​៣៩ ​ឆ្នាំ​រូប​នេះ​ បញ្ជាក់​​ទៀត​​ថា ​​ស្ថានការណ៍​បែប​នេះ​បាន​ប៉ះពាល់​យ៉ាង​ខ្លាំង​ដល់​​សុខភាព​ និង​ការ​រស់​នៅ​របស់​ពួកគាត់៖ «លំបាក​ណាស់​ពេល​បាយ​គេ​ឱ្យ​ហូប​តែ​មួយ​ពេល ឱ្យ​តែ​មី​ត្រី​ខ​មក​ហូប​អត់​មាន​កម្លាំង​​ទេ​ លុយ​ក៏​គ្មាន​ទិញ​អី​ហូប​ ហើយ​គេ​ហ៊ុំ អត់​មាន​ចេញ​ដើរ​ទៅ​ណា​បាន​ផង​។ យក​របស់​អី​ចូល​ក៏​អត់​បាន​ដែរ ពេទ្យ​គេ​អត់​​មក​យក​ផង​ គេ​ប្រាប់​ថា​ គ្រែ​ពេញ​អត់​បាន​មក​យក​ទេ​ មិន​ដឹង​គេ​មក​យក​ពេល​ណា​»។

​ពលករ​ខ្មែរ​​នៅ​កណ្ដាល​ទីក្រុង​បាងកក​មួយ​ក្រុម​នេះ​​​មាន​គ្នា​ប្រមាណ​ ៨០ ​នាក់​​ ពួកគេ​បាន​ឆ្លង​ជំងឺ​កូវីដ​១៩​​ទាំង​អស់​គ្នា​​ប្រមាណ​ ២​ ខែ​មក​ហើយ​ មិន​ទាន់​​មាន​គ្រូពេទ្យ​ណា​យក​ទៅ​ព្យាបាល​ជំងឺ​នៅ​ឡើយ​ទេ​។ សព្វ​ថ្ងៃ​ថៅកែ​ថៃ​បាន​ផ្ដល់​​ស្បៀង​អាហារ​បន្តិចបន្តួច​​ជូន​ដល់​ពួកគាត់​។

​ដោយសារជំងឺកូវីដ១៩ កាន់តែរីករាលដាលខ្លាំង អាជ្ញាធរ​ថៃ​នឹង​​បិទ​ទីក្រុង​បាងកក​ ​​និង​ខេត្ត​ចំនួន​ ៥​ នៅ​ជុំ​វិញ​ រយៈ​ពេល​១៤ថ្ងៃ​​​ ដោយ​គិត​ចាប់​ពី​ថ្ងៃ​ទី​១២ ខែ​កក្កដា​តទៅ ដើម្បី​ទប់ស្កាត់​ការ​រាតត្បាត​ជំងឺ​កូវីដ​១៩។ ​វិធាន​ការ​នេះ​​អាជ្ញាធរ​ថៃ​ហាម​ឃាត់​មនុស្ស​ធ្វើ​ដំណើរ​ចាប់​ពី​ម៉ោង​ ៩​ យប់​ដល់​ម៉ោង ​៤ ​ព្រឹក និង​​ហាម​ឃាត់​​ប្រជាពលរដ្ឋ​ប្រមូល​ផ្ដុំ​គ្នា​​លើស​ពី ​៥ ​នាក់។ ប្រសិន​បើ​ជន​ណា​ល្មើស​និង​បម្រាម​នេះ​អាចនឹងត្រូវផ្ដន្ទាទោស​ជាប់​ពន្ធនាគារ​ ១ ​ឆ្នាំ និង​ពិន័យ​ជា​ប្រាក់ ​​៤ម៉ឺន​បាត ​ឬ​ប្រមាណ​ ១ពាន់ ​៣០០​ដុល្លារ (១,៣០០) ​អាមេរិក។ វិធាន​ការ​របស់​អាជ្ញាធរ​ថៃ​នេះ​​ធ្វើ​ឡើង​​​ដោយសារ​មួយ​រយៈ​នេះ​​ជំងឺ​កូវីដ​បាន​ផ្ទុះ​រាលដាល​ខ្លាំង​​នៅ​ក្នុង​ប្រទេស​មួយ​នេះ​។​​​​

​អាស៊ី​សេរី​មិន​អាច​ទាក់​ទង​មន្ត្រី​ស្ថាន​ទូត​ខ្មែរ​ប្រចាំ​នៅ​ប្រទេស​ថៃ​ ដើម្បី​សុំ​អត្ថាធិប្បាយ​​ពី​ទុក្ខ​លំបាក​របស់​ពលករ​ទាំង​នេះ​បាន​ទេ​នៅ​ថ្ងៃ​ទី​១១ ខែ​កក្កដា។

​ប៉ុន្តែ​​មន្ត្រី​ស្ថាន​ទូត​​នៅ​ទីក្រុង​បាងកក​បាន​បង្ហោះ​សារ​និង​រូប​ថត​នៅ​ក្នុង​បណ្ដាញ​សង្គម​ហ្វេសប៊ុក​របស់​ស្ថាន​ទូត​ អំពី​ការ​ចុះ​ចែក​ស្បៀង​អាហារ​​ដល់​ពលករ​ខ្មែរ​​មួយ​ចំនួន​​នៅ​ទីក្រុង​បាងកក​។​ បន្ថែម​ពី​នេះ​ ស្ថានទូត​អំពាវនាវ​ឱ្យ​​ពលករ​ខ្មែរ​​រស់​នៅ​ប្រទេស​ថៃ​ទាំង​អស់​ត្រូវ​អនុវត្ត​តាម​ការ​ណែនាំ​របស់​អាជ្ញាធរ​ថៃ​ឱ្យ​បាន​ខ្ជាប់​ខ្ជួន ដើម្បី​ចូល​រួម​​ទប់​ស្កាត់​ការ​រាលដាល​ជំងឺ​កាច​សាហាវ​នេះ។​​​​​

​​ទោះ​ជា​យ៉ាង​ណា​ ​មន្ត្រី​សម្របសម្រួល​សមាគម​ការពារ​សិទ្ធិ​មនុស្ស​អាដហុក ​(Adhoc) ​លោក​ ស៊ុំ ច័ន្ទគា​ ​យល់​ថា ​ស្ថានការណ៍​បែប​នេះ​​រដ្ឋាភិបាល​ខ្មែរ​​គួរតែ​សហការ​​ជា​មួយ​រដ្ឋាភិបាល​ថៃ​ដោះស្រាយ​ពី​ទុក្ខ​លំបាក​របស់​ពលករ​ទាំង​នោះ​ជា​បន្ទាន់​។ លោក​បញ្ជាក់​ថា ​ការ​​ដែល​អាជ្ញាធរ​​ខ្មែរ​មិន​អើពើ​​ជួយ​ដល់​​ពលរដ្ឋ​​ដែល​កំពុង​មាន​ទុក្ខ​លំបាក​នេះ​ គឺ​ជា​ការ​មិន​ទទួល​ខុស​ត្រូវ​​​ដល់​ពលរដ្ឋ​​ខ្លួន​នៅ​ក្រៅ​ប្រទេស៖ «បើ​រដ្ឋាភិបាល​ល្អ​ទោះ​បី​ប្រជាពលរដ្ឋ​របស់​ខ្លួន​ដល់​កន្លែង​ណា​ ដល់​ទី​ណា​ក៏​ដោយ​ ជួប​បញ្ហា​ ត្រូវ​តែ​ខ្នះខ្នែង​ធ្វើ​យ៉ាង​ណា​ជួយ​​ដល់​ប្រជាពលរដ្ឋ​របស់​ខ្លួន​ ព្រោះ​ពលរដ្ឋ​ជា​មនុស្ស​។ ​អីចឹង​ត្រូវ​​ការ​ស្ថិត​នៅ​ក្រោម​ការ​គ្រប់គ្រង​របស់​រដ្ឋ​ ប្រទេស​មួយ​ៗ​ដែល​មាន​ទូត​មាន​អី​តំណាង​​គ្រប់​ប្រទេស​ឱ្យ​ធ្វើ​ការ​ទាក់ទង​នឹង​សេដ្ឋកិច្ច​ នយោបាយ​ទំនាក់ទំនង​​ផ្នែក​ខាង​សេដ្ឋកិច្ច​ឱ្យ​បាន​​រីក​ចំរើន​​ នៅ​ក្នុង​ហ្នឹង​ក៏​រួម​ទាំង​​ការ​ដោះស្រាយ​បញ្ហា​ផ្សេងៗ​ដល់​ប្រជាជាតិ​របស់​ខ្លួន​ដែរ​»។

​លោក​ ស៊ុំ ច័ន្ទគា​ បន្ត​​ថា ដើម្បី​ដោះស្រាយ​បញ្ហា​នេះ​ រដ្ឋាភិបាល​គួរតែផ្ដល់​ស្បៀង​អាហារ​ និង​ថ្នាំ​ពេទ្យ​​ព្យាបាល​ជំងឺ​ ដើម្បី​ជួយ​សង្គ្រោះ​អាយុ​ជីវិត​របស់​ពលករ​ខ្មែរ​​ឱ្យ​បាន​​ឆាប់​។ បន្ថែម​ពី​នេះ​លោក​ថា ​​ប្រសិន​បើ​រដ្ឋាភិបាល​មិន​​ជួយ​ដល់​ពលករ​ទាន់​ពេលវេលា​ទេ​នោះ​ ពលករ​មួយ​ចំនួន​អាច​នឹង​​ជួប​​គ្រោះ​ធំ​ និង​មួយ​ចំនួន​ទៀត​​មាន​បញ្ហា​ដល់​សុខភាព​នៅ​ពេល​ដ៏​ខ្លី​ខាង​មុខ​។

របាយការណ៍​របស់​អង្គការ​សង់​ត្រាល់ (Central) ​ឱ្យ​ដឹង​ថា បច្ចុប្បន្ន​មាន​ពលករ​ខ្មែរ​ធ្វើ​ការ​ស្របច្បាប់​និង​មិន​ស្រប​ច្បាប់​​ជិត ​២ លាន​នាក់​ធ្វើ​ការ​នៅ​ប្រទេស​ថៃ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល