បើលោកអ្នកស្ថិតនៅទីសាធារណៈចង់ពាក់ម៉ាស់ ឬមិនពាក់ម៉ាស់ជាសិទ្ធិសម្រេចរបស់លោកអ្នក។ នេះជាការណែនាំថ្មីរបស់លោកនាយករដ្ឋមន្ត្រី ហ៊ុន សែន។ ទោះយ៉ាងណាក្ដី មន្ត្រីសង្គមស៊ីវិលយល់ថា ពលរដ្ឋគួរកុំប្រហែសរឿងពាក់ម៉ាស់ និងត្រូវបរិភោគអាហារដែលជួយការពាររាងកាយដើម្បីបង្ការជំងឺកូវីដ១៩។
ចាប់ពីថ្ងៃទី២៦ ខែមេសាតទៅ ពលរដ្ឋដែលនៅកន្លែងចំហ ឬនៅទីសាធារណៈ ពលរដ្ឋអាចជ្រើសរើសពាក់ម៉ាស់ ឬមិនពាក់ម៉ាស់ ប៉ុន្តែនៅទីកន្លែងបិទជិត ពលរដ្ឋបន្តពាក់ម៉ាស់ដដែល។ សារសំឡេងលោក ហ៊ុន សែន ថ្ងៃទី២៦ ខែមេសា លោកចង់ឃើញពលរដ្ឋបង្វែរលុយទិញម៉ាស់ យកទៅទិញម្ហូបអាហារសំលៀកបំពាក់ ឬតម្រូវការប្រចាំថ្ងៃវិញ ដែលលោកយល់ថា អាចចំណេញដល់សេដ្ឋកិច្ចជាតិ។ បទបញ្ជារបស់លោក ហ៊ុន សែន បែបនេះ ដោយលោកអះអាងដែរថា ពលរដ្ឋបានចាក់សាំងគ្រប់គ្នាអស់ហើយ៖ «អត្ថន័យដែលកន្លែងបិទជិតដែលខ្ញុំករុណាខ្ញុំចង់និយាយ គឺសំដៅបន្ទប់នៃការប្រជុំ ដែលមានការបិទជិតហើយប្រើម៉ាស៊ីនត្រជាក់ ឬក៏នៅក្នុងរោងភាពយន្ត ដែលមានមនុស្សនៅទីនោះ ហើយមានការបិទជិត ហើយម៉ាស៊ីនត្រជាក់ ប៉ុន្តែក្នុងករណីមានលំហ ដូចជាក្នុងអគារដដែលប៉ុន្តែមានលំហខាងក្រៅគឺអាចដោះម៉ាស់ចេញ »។
លោក ហ៊ុន សែន ក៏ជំរុញឲ្យពលរដ្ឋ ទៅចាក់សាំងឲ្យបាន ៣ដូស និងគ្រោងចាក់វ៉ាក់សាំងដូសទី៥ ដល់មន្ត្រីជួរមុខ។
ទាក់ទងបទបញ្ជារបស់លោក ហ៊ុន សែន បែបនេះ មន្ត្រីសង្គមស៊ីវិលរំលឹកថា ពលរដ្ឋគួរកុំប្រហែសរឿងពាក់ម៉ាស់ ហើយបើពួកគេកំពុងស្ថិតនៅកន្លែងប្រឈមនឹងឆ្លងជំងឺកូវីដ១៩ គួរកុំចោលម៉ាស់។
មន្ត្រីសម្របសម្រួលគម្រោងការផ្តល់សិទ្ធិអំណាចដល់យុវជននិងអ្នកតស៊ូមតិ លោក ម៉ើ ចាន់ដារ៉ា សាទរការសម្រេចបែបនេះរបស់លោក ហ៊ុន សែន ប៉ុន្តែ លោកជំរុញទៅរដ្ឋាភិបាលនៅតែបន្តប្រុងប្រយ័ត្នលើបញ្ហាជំងឺកូវីដ១៩។ លោកបន្តថា បើហេតុការណ៍អ្វីមួយ ដែលកើតចេញពីការធ្វេសប្រហែសនេះ នឹងធ្វើឲ្យរដ្ឋខាតបង់ថវិកា ប៉ះពាល់សេដ្ឋកិច្ចកម្ពុជា និងប៉ះពាល់ដល់សុខភាពពលរដ្ឋជាថ្មី៖ «ក្រើនរំលឹកប្រជាពលរដ្ឋឲ្យធ្វើការគោរពកាតព្វកិច្ចរបស់ខ្លួនឯងឲ្យទៀងទាត់ ផ្ដល់សេវាសាធារណៈសម្រាប់ការព្យាបាលបន្ថែមទៀត ជាពិសេស ប្រជាពលរដ្ឋនៅតាមទីជនបទឲ្យគាត់យល់ដឹងកាន់តែល្អទៀតជាពិសេសគឺការសហការគ្នារវៀងពលរដ្ឋនិងអាជ្ញាធរមូលដ្ឋាន »។
ចំណែកប្រធានអង្គការសម្ពន្ធភាពការពារសិទ្ធិមនុស្សកម្ពុជា ហៅកាត់ថា ច្រាក់ (CHRAC) លោក រស់ សុដ្ឋា យល់ថា ការពាក់ម៉ាស់មិនមែនត្រឹមតែអាចជួយបង្ការជំងឺកូវីដ១៩ តែមួយមុខនោះទេ ប៉ុន្តែជួយការពារនៃការឆ្លងជំងឺមួយចំនួនទៀត។ លោកថា ពលរដ្ឋគួរបន្តការប្រុងប្រយ័ត្ន និងគួរតែមានម៉ាស់ជាប់ខ្លួនដដែល ដោយចេះពិចារណាថា កន្លែងណាគួរពាក់ និងកន្លែងមិនគួរពាក់។ លោកបន្តថា ពលរដ្ឋត្រូវបរិភោគអាហារដែលជួយការពារសុខភាព កុំបរិភោគសាច់ច្រើនជាតិផ្អែមច្រើនពេក និងជៀសវាងពិសាគ្រឿងស្រវឹងជាដើម៖ «សំខាន់ជាការយោបល់របស់ខ្ញុំ ប្រជាពលរដ្ឋកុំភ្លេចការការពារកុំប្រហែសណា ម៉ាស់ហ្នឹងមិនមែនត្រឹមការពារមេរោគទេ ការពារធូលី ការពារមេរោគផ្សេងៗ ទៀតថែមទៀតដែរ »។
ការដែលមេដឹកនាំរដ្ឋាភិបាលឯកបក្សមិនតម្រូវឲ្យពលរដ្ឋពាក់ម៉ាស់នៅទីសាធារណៈពេលនេះ គឺក្រោយពីរដ្ឋាភិបាលបានអនុញ្ញាតឲ្យពលរដ្ឋខេត្តរតនគិរី មណ្ឌលគិរី ស្ទឹងត្រែង និងព្រះវិហារ មិនតម្រូវឲ្យពាក់ម៉ាស់ កាលពីថ្ងៃទី១០ មេសាកន្លងទៅ និងមិនមានការឆ្លងជំងឺកូវីដទ្រង់ទ្រាយធំក្រោយពីបុណ្យចូលឆ្នាំខ្មែរ។
ទោះមានការប្រកាសមិនតម្រូវឲ្យពលរដ្ឋពាក់ម៉ាស់នៅទីសាធារណៈពេលនេះក្ដី ក៏លោក ហ៊ុន សែន រំលឹកថា ប្រសិនកម្ពុជា និងសកលលោកជួបហានិភ័យជំងឺកូវីដ១៩ ផ្ទុះឡើងជាថ្មី រដ្ឋាភិបាលនឹងតម្រូវឲ្យពលរដ្ឋពាក់ម៉ាស់ឡើងវិញ ឬការចេញវិធានការណែនាំថ្មី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។