ក្រសួង​សុខាភិបាល​កំពុង​ចាត់វិធានការ​ទប់ស្កាត់​ការ​រាលដាល​នៃ​ជំងឺ​រលាក​សួត​ថ្មី

ដោយ ម៉ៅ សុធានី
2020-01-26
អ៊ីម៉ែល
មតិ
Share
បោះពុម្ព
អ្នក​នាំ​ពាក្យ​ក្រសួង​សុខាភិបាល លោក​វេជ្ជបណ្ឌិត លី សូវ៉ាន់ ក្នុង​កម្មវិធី​វេទិកា​អ្នក​ស្ដាប់​វិទ្យុ​អាស៊ីសេរី កាល​ពី​ថ្ងៃ​ទី​២៩ ខែ​កញ្ញា ឆ្នាំ​២០១៥។
អ្នក​នាំ​ពាក្យ​ក្រសួង​សុខាភិបាល លោក​វេជ្ជបណ្ឌិត លី សូវ៉ាន់ ក្នុង​កម្មវិធី​វេទិកា​អ្នក​ស្ដាប់​វិទ្យុ​អាស៊ីសេរី កាល​ពី​ថ្ងៃ​ទី​២៩ ខែ​កញ្ញា ឆ្នាំ​២០១៥។
Photo: RFA

ការ​រាតត្បាត​ជំងឺ​រលាក​សួត បង្ក​ដោយ​វីរុស​កូរ៉ូណា ប្រភេទ​ថ្មី (nCoV-2019) កំពុង​បន្ត​រាតត្បាត​នៅ​ប្រទេស​ចិន និង​បន្ត​ឆ្លង​ទៅ​ប្រទេស​មួយ​ចំនួន ក្នុង​ពិភពលោក​។ ជំងឺ​វីរុស​កូរ៉ូណា ប្រភេទ​ថ្មី​នេះ បណ្ដាល​ឱ្យ​មនុស្ស​ស្លាប់​ជា​ច្រើន​នាក់ ក្នុងចំណោម​អ្នក​ឈឺ​ជាច្រើន​រយ​នាក់​ផ្សេងទៀត។

តើ​ជំងឺ​រលាក​សួត​ប្រភេទ​វីរុស​កូរ៉ូណា​ថ្មី​នេះ (CoronaVirus) មាន​រោគសញ្ញា​អ្វីខ្លះ ហើយ​គេ​អាច​ការពារ​ដោយ​វិធី​ណា?

ជំងឺ​រលាក​សួត បង្ក​ដោយ​វីរុស​កូរ៉ូណា​ប្រភេទ​ថ្មី​នេះ (nCoV-2019) បាន​ផ្ទុះ​រាលដាល​ជា​លើកដំបូង នៅ​ក្នុង​ក្រុង វ៉ូហាន (Wuhan) នៃ​ខេត្ត​ហ៊ូបេ ((Hubei)) ប្រទេស​ចិន កាល​ពី​ចុង​ខែ​ធ្នូ ឆ្នាំ​២០១៩​។ ជំងឺ​ប្រភេទ​ថ្មី​នេះ ក្រៅពី​រាតត្បាត​នៅ​ប្រទេស​ចិន បច្ចុប្បន្ន​នេះ អ្នក​កើត​ជំងឺ​ប្រភេទ​នេះ ត្រូវ​បាន​រក​ឃើញ នៅ​ក្នុង​សហរដ្ឋអាមេរិក និង​នៅ​ប្រទេស​មួយ​ចំនួន ក្នុង​តំបន់​អាស៊ី ដែល​អ្នក​ទាំងនោះ ទើបបាន​ធ្វើដំណើរ​ចេញពី​តំបន់​រាតត្បាត នៅ​ក្នុង​ខេត្ត​ហ៊ូបេ។

តើ​វីរុស​កូរ៉ូណា​ថ្មី​នេះ មាន​រោគសញ្ញា​អ្វីខ្លះ​? មជ្ឈមណ្ឌល​ការពារ​និង​ទប់ស្កាត់​ជំងឺឆ្លង​នៅ​សហរដ្ឋអាមេរិក (CDC) ឱ្យ​ដឹង​ថា រោគសញ្ញា​ដំបូង​នៃ​ប្រភេទ​វីរុស​មួយ​នេះ គឺ​បណ្ដាល​ឱ្យ​មាន​បញ្ហា​ផ្លូវ​ដកដង្ហើម គ្រុន​ផ្តាសាយ រួមមាន ហៀរ​សំបោរ ឈឺក្បាល ក្អក ឈឺ​បំពង់ក ឈឺ​ខ្លួន​ប្រាណ និង​គ្រុន​ក្តៅ ជាដើម​។ មាន​ករណី​ខ្លះ អ្នក​ឈឺ អាច​បណ្ដាល​ឱ្យ​កើត​ជំងឺ​រលាក​សួត (pneumonia)

បន្ថែម​ពី​នេះ អ្នកនាំពាក្យ​ក្រសួងសុខាភិបាល លោក វេជ្ជបណ្ឌិត លី សុវណ្ណ មាន​ប្រសាសន៍​ប្រាប់​អាស៊ីសេរី កាលពី​យប់មិញ​ថា ក្នុង​ករណី​សង្ស័យ​ថា មាន​រោគសញ្ញា​ណាមួយ ត្រូវ​ទាក់ទង​ទៅ​ក្រសួង​សុខាភិបាល ជាបន្ទាន់ លេខ ១១៥ ដើម្បី ពិនិត្យ​មើល​ថា​តើ​មាន​ជំងឺ​រលាក​សួត បង្ក​ដោយ​វីរុស​កូរ៉ូណា​ប្រភេទ​ថ្មី​នេះ​ឬក៏​អត់​។ លោក​វេជ្ជបណ្ឌិត បន្ត​ថា ទោះបី​នៅ​ទីកន្លែង​ណា​ក៏​ដោយ អាច​ទាក់ទង​មក​បាន​ដែរ ពិ​ព្រោះ​ក្រសួង​សុខាភិបាល​បាន​ហ្វឹកហាត់​បុគ្គលិក​ពេទ្យ ជាង​២​ពាន់​នាក់ និង​មាន​ឧបករណ៍​គ្រប់គ្រាន់ ដើម្បី​ធ្វើតេស្ត​ដឹង មិន​លើស​ពី​២៤​ម៉ោង​នោះ​ទេ៖ «បងប្អូន​ដែល​មាន​រោគសញ្ញា​ដូចជា​គ្រុនក្តៅ លើស​ពី​៣៨​អង្សា​សេ​ឡើង​ទៅ ឬ​ក្អក ឬមួយ​ឈឺ​ក ឬក៏​ហត់​។ ហើយ​មាន​ប្រវត្តិ​ទើប​ធ្វើដំណើរ​មកពី​ប្រទេស​ចិន​។ យើង​ចាត់​ទុក​ករណី​សង្ស័យ សូម​ទាក់ទង​មក​យើង យើង​នឹង​អាច​យក​វត្ថុ​តាង​ដើម្បី​ធ្វើការ​ពិសោធន៍ យើង​មាន​មន្ទីរ​ពិសោធន៍​ថ្នាក់​ជាតិ អាច​រក​ឃើញ​រក​សញ្ញា​នេះ​បាន»

លោក​វេជ្ជបណ្ឌិត លី សុវណ្ណ អះអាង​ផង​ដែរ​ថា ប្រទេស​កម្ពុជា នៅ​មិនទាន់​រក​ឃើញ​ករណី​ជំងឺ​រលាក​សួត​ប្រភេទ​ថ្មី​នេះ​ទេ​។ ទោះជា​យ៉ាងណា លោក​ថា ក្រសួង​សុខាភិបាល កំពុង​សហការ​ជាមួយ​សមត្ថកិច្ច​ពាក់ព័ន្ធ ត្រៀម​ចាត់វិធានការ​ជាបន្ទាន់​ដើម្បី​ជួយសង្គ្រោះ​អ្នកជំងឺ​និង​ទប់ស្កាត់​កាល​រីក​រាលដាល​៖ «ទោះបីយ៉ាងណា​ក៏ដោយ យើង​ប្រឹងប្រែង​បង្ការ ទប់ស្កាត់ យើង​មាន​ដាក់​មន្ត្រី​តាម​ចំណត​យន្តហោះ​ទាំង​បី យើង​មាន​ដាក់​ម៉ាស៊ីន​ពិនិត្យ​កម្ដៅ​។ មន្ទីរពេទ្យ​រដ្ឋ​និង​ឯកជន យើង​បាន​ផ្សព្វផ្សាយ​ហើយ​។ រហូតមកដល់​ពេលនេះ យើង​អត់​ឃើញ​មាន​ឆ្លង​ជំងឺ​នេះ​នៅ​ឡើយ​ទេ»

តើ​វីរុស​កូរ៉ូណា​ថ្មី​នេះ ឆ្លង​ដោយ​របៀប​ណា ហើយ​គេ​អាច​ព្យាបាល​តាម​វិធី​ណាខ្លះ?

 

គេហទំព័រ​មជ្ឈមណ្ឌល​ការពារ​និង​ទប់ស្កាត់​ជំងឺឆ្លង​នៅ​សហរដ្ឋអាមេរិក (CDC) ឱ្យ​ដឹង​ទៀត​ថា វីរុស​កូរ៉ូណា​ប្រភេទ​ថ្មី​នេះ ភាគច្រើន​គឺ​ឆ្លង​ពី​មនុស្ស​ម្នាក់​ទៅ​មនុស្ស​ម្នាក់ទៀត តាមរយៈ​អ្នក​កើត​ជំងឺ​នេះ ដែល​ក្អក និង​កណ្ដាស់ មនុស្ស​នោះ​នៅ​ជាប់​ស្និទ្ធស្នាល ជាមួយ​អ្នកជំងឺ ដូចជា​ស្ទាបអង្អែល ថើប​និង​ប៉ះ​ដៃជើង ជាដើម ហើយ​មាន​ករណី​កម្រ​ខ្លះ គឺ​ឆ្លង​តាមរយៈ​លាមក​មនុស្ស​។ ចំពោះ​វិធី​ការពារ​ការឆ្លង​វិញ លោកអ្នក​ត្រូវ​នៅ​ឱ្យ​ឆ្ងាយ​ពី​អ្នកជំងឺ ប្រើ​ម៉ាស​ការពារ លាងដៃ​នឹង​សាប៊ូ រៀងរាល់​២០​វិនាទី ជៀសវាង​ការ​ប៉ះ​ភ្នែក ច្រមុះ​និង​មាត់ នៅ​ពេល​មិនទាន់​លាងដៃ​។ ហើយ​ប្រសិនបើ​អ្នកជំងឺ​ក្អក​ឬ​កណ្ដាស់ ត្រូវ​ខ្ទប់​មាត់​ច្រមុះ​នឹង​ក្រដាស​ជូត​មាត់ រួចហើយ​បោះចោល​ក្នុង​ធុង​សម្រាម និង​លាងដៃ​ភ្លាម។

ចំពោះ​វិធី​ព្យាបាល​វិញ CDC ឱ្យ​ដឹង​ទៀត​ថា រហូតមកដល់​ពេលនេះ គេ​គ្មាន​ថ្នាំ​ឬ​វ៉ាក់សាំង ដើម្បី​ការពារ​ឬ​ព្យាបាល​អ្នក​កើត​ជំងឺ​រលាក​សួត បង្ក​ដោយ​វីរុស​កូរ៉ូណា​ប្រភេទ​ថ្មី (nCoV-2019) នេះ​ទេ​។ ប្រសិនបើ​មាន​រោគសញ្ញា​ណាមួយ អ្នកជំងឺ​ត្រូវ​ទៅ​ជួប​គ្រូពេទ្យ​ជាបន្ទាន់ ដើម្បី​ធ្វើតេស្ត​មើល​ឈាម​។ ប្រភព​ដដែល​បន្ត​ថា ភាគច្រើន​អ្នកជំងឺ​អាច​ជា​សះស្បើយ​ដោយ​ខ្លួនឯង តាមរយៈ​វិធី​ព្យាបាល​ដោយ​លេប​ថ្នាំ​គ្រុន​ក្តៅ ដូចជា acetaminophen ibuprofen ដើម្បី​កាត់​បន្ថយ​កម្ដៅ​ក្នុង​ខ្លួន ងូតទឹក​ក្តៅ​អ៊ុនៗ ដើម្បី​ជួយ​សម្រួលការ​ឈឺ​បំពង់ក និង​ក្អក ញ៉ាំ​ទឹក​ឱ្យ​បាន​ច្រើន នៅផ្ទះ​និង​គេង​សម្រាក​ឱ្យ​បាន​ច្រើន​។ បន្ថែម​ពី​នេះ ត្រូវ​ជៀសវាង​ការ​ជក់បារី និង​កុំ​នៅ​ក្បែរ​តំបន់​ដែល​មាន​ការ​បំពុល​ខ្យល់។

តើ​មូល​ហេតុអ្វី​បណ្ដាល​ឱ្យ​កើត​ជំងឺ​រលាក​សួត​ដោយ​វីរុស​កូរ៉ូណា ប្រភេទ​ថ្មី​នេះ​? តាម​ការចុះផ្សាយ​អត្ថបទ​របស់​ទូរទស្សន៍​ស៊ីអិនអិន (CNN) នៅ​សហរដ្ឋអាមេរិក កាលពី​ថ្ងៃ​ទី២៣ ខែ​មករា ឱ្យ​ដឹង​ថា ប្រជាពលរដ្ឋ​ចិន ចូលចិត្ត​បរិភោគ​សាច់​ពស់វែក (Cobra) ដែល​នេះ​គឺ​វា​អាច​ជា​ប្រភព​បណ្ដាល​ឱ្យ​កើត​ជំងឺ​រលាក​សួត​ប្រភេទ​នេះ​។ អង្គការ​សុខភាព​ពិភពលោក (WHO) បញ្ជាក់​ថា​ជំងឺ​រលាក​សួត បង្ក​ដោយ​វីរុស​កូរ៉ូណា​ប្រភេទ​ថ្មី នេះ (2019-nCoV) គឺ​ស្រដៀង​គ្នា​ទៅ​នឹង​ជំងឺ​រលាក​សួត MERS-CoV និង SARS-CoV ដែល​បាន​ផ្ទុះ​រាលដាល​នា​ពេល​កន្លង​មក​នេះ។

ចំណែក​រោគសញ្ញា​នៃ​ជំងឺ​រលាក​សួត ប្រភេទ (MERS-CoV) វិញ ភាគច្រើន​បណ្តាល​ឱ្យ​មាន​រោគសញ្ញា​ធ្ងន់ធ្ងរ ក្នុង​នោះ​រួមមាន ក្តៅ​ខ្លួន​ខ្លាំង ក្អក ដកដង្ហើម​ផុតៗ និង​វិវត្ត​ឱ្យ​រលាក​សួត​ធ្ងន់ធ្ងរ​។ ស្ថិតិ​អង្គការ​សុខភាព​ពិភពលោក ឱ្យ​ដឹង​ថា ជំងឺ​រលាក​សួត បណ្តាល​មក​ពី​វីរុស​MERS ដែល​បាន​ផ្ទុះ​រីក​រាលដាល កាលពី​ឆ្នាំ ២០១២ គឺ​មាន​មនុស្ស​ស្លាប់ ចំនួន ៤៧៥​នាក់ ក្នុងចំណោម​អ្នក​ឆ្លង​និង​កើត​ចំនួន ជិត ១​ពាន់​៤​រយ​នាក់ (1,338 cases)​។ ក៏ប៉ុន្តែ​អ្នក​កើត​ជំងឺ (SARS-CoV) ដែល​បាន​ផ្ទុះ​រាលដាល កាលពី​ឆ្នាំ ២០០៣ គឺ​មាន​ចំនួន ១​ពាន់ ៧​រយ ៥៥​ករណី គឺ​មាន​អ្នក​ស្លាប់​ចំនួន ២៩៩​នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល