អង្គការយូនីសេហ្វកម្ពុជា (UNICEF) ប្រកាសចាប់ផ្តើមយុទ្ធនាការថ្មីមួយរួមគ្នាជាមួយយុវជន ដើម្បីលើកកម្ពស់ការយល់ដឹងអំពីសុខភាពផ្លូវចិត្ត។ យុទ្ធនាការនេះ ទទួលបានមូលនិធិគាំទ្រ ពីទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិ (USAID) ប្រចាំកម្ពុជា សហការជាមួយអង្គការចិត្តសង្គម អន្តរវប្បធម៌កម្ពុជា (TPO) និងបណ្ដាញទូរស័ព្ទជំនួយកុមារកម្ពុជា។
សេចក្តីប្រកាសព័ត៌មានរបស់យូនីសេហ្វ នៅថ្ងៃទី១៥ ខែមិថុនា ឲ្យដឹងថា ការចាប់ផ្តើមយុទ្ធនាការនេះ ធ្វើឡើងក្រោយពីយូនីសេហ្វ រកឃើញថា ជំងឺរាតត្បាតសកលកូវីដ-១៩ បានធ្វើឲ្យវិបត្តិសុខភាពផ្លូវចិត្តដែលកំពុងមានស្រាប់ហើយនោះ កាន់តែមានសភាពធ្ងន់ធ្ងរ ប៉ះពាល់ដល់យុវជននៅទូទាំងពិភពលោក រួមទាំងនៅកម្ពុជាផងដែរ។ របាយការណ៍យូនីសេហ្វស្ដីពីស្ថានភាពពិភពលោកនៅឆ្នាំ២០២១ រកឃើញថា យុវវ័យម្នាក់ក្នុងចំណោម ៧នាក់ នៅទូទាំងសកលលោក ត្រូវបានគេរកឃើញថា កំពុងរស់នៅជាមួយវិបត្តិផ្លូវចិត្ត។
ចំណែកនៅប្រទេសកម្ពុជាវិញ របាយការណ៍រកឃើញថា យុវវ័យចំនួន៤៥% ព្រួយបារម្ភអំពីសុវត្ថិភាពរបស់ខ្លួន ក្នុងអំឡុងការរាតត្បាតនៃជំងឺកូវីដ១៩ និង ១៦% មានអារម្មណ៍ថប់បារម្ភ ឬធ្លាក់ទឹកចិត្ត ចាប់តាំងពីពេលចាប់ផ្ដើមនៃវិបត្តិជំងឺនេះ។ បន្ថែមពីនេះ ការវាយតម្លៃស្ដីពីតម្រូវការអប់រំ ក៏បានរកឃើញថា ៥៨% នៃសិស្សមធ្យមសិក្សា យ៉ាងហោចណាស់ក៏ ជួបបញ្ហាផ្លូវចិត្តម្តងដែរ។ យុវជនកម្ពុជាមានការយល់ដឹងតិចតួចអំពីសុខភាពផ្លូវចិត្ត និងវិធីសាស្ត្រពង្រឹងស្មារតី និងអារម្មណ៍ផ្លូវចិត្តរបស់ពួកគេ។
អង្គការយូនីសេហ្វ រកឃើញដែរថា ភាពក្រីក្រ និងការខ្វះការថែទាំពីឪពុកម្ដាយ គឺជាមូលហេតុនាំមុខគេដែលបង្កឲ្យមានសុខភាពផ្លូវចិត្តទន់ខ្សោយ ហើយការនិយាយជាមួយមិត្តភក្ដិ គឺជាវិធីល្អមួយ ដើម្បីដោះស្រាយភាពតានតឹងក្នុងចិត្ត។ ក៏ប៉ុន្តែ ពួកគេភ័យខ្លាច ចំពោះការនិយាយជាមួយមិត្តភ័ក្ដិ ដោយសារបារម្ភពីការមាក់ងាយ និងការរើសអើងជាដើម។
យុទ្ធនាការនេះ បង្ហាញវីដេអូរបស់យុវជន កំពុងប្រើប្រាស់យន្តការដោះស្រាយបែបវិជ្ជមានដូចជា “ខ្ញុំធូរចិត្ត នៅពេលលេងកីឡា និយាយជាមួយមិត្រភ័ក្ត្រ និងសកម្មភាពច្នៃប្រឌិតអ្វីមួយ ដើម្បីពង្រឹងសុខភាពផ្លូវចិត្តរបស់ពួកគេ និងបន្តរយៈពេល៣ខែ ជាមួយនឹងសកម្មភាពអនទ្បាញជាប្រចាំ ដើម្បីលើកកម្ពស់ការយល់ដឹង ផ្ដល់គន្លឹះ និងណែនាំដល់យុវជន។
អង្គការយូនីសេហ្វ ស្នើដល់សាលារៀន សមាគម និងអង្គការទាំងអស់នៅកម្ពុជា ដែលមានការព្រួយបារម្ភអំពីសុខភាពផ្លូវចិត្តរបស់យុវជន អាចប្រើប្រាស់សម្ភារៈនានា ដែលបានផលិតទាំងនេះ សម្រាប់ផ្តល់ការអប់រំ និងផ្សព្វផ្សាយពីវិធីសាស្ត្រ ដើម្បីដោះស្រាយវិបត្តិសុខភាពផ្លូវចិត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។