អ្នកស្រុកកំពង់ត្រាច ខេត្តកំពត ៩នាក់ទៀតស្លាប់ ដោយសារពុលស្រាស។ នេះជាលើកទីពីរហើយក្នុងរយៈពេលជាង ១ខែ ដែលអ្នកស្រុកកំពង់ត្រាច ពុលស្រាសស្លាប់ជាច្រើននាក់បែបនេះ។
មន្ត្រីអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែងនិងបង្ក្រាបការក្លែងបន្លំ (ក.ប.ប)ឲ្យដឹងតាមបណ្តាញសង្គមហ្វេសប៊ុកផ្លូវការរបស់ខ្លួន កាលពីថ្ងៃទី៤ ខែកក្កដាថា អ្នកពុលស្រាទាំងអស់មាន ២១ នាក់ ក្នុងនោះ ១២ នាក់កំពុងសម្រាកព្យាបាលនៅមន្ទីរពេទ្យដំណាក់ចង្អើរនិងមន្ទីរបង្អែកស្រុកកំពង់ត្រាច។
អគ្គនាយកដ្ឋាននេះអះអាងថាស្រាសនិងស្រាថ្នាំដែលជនរងគ្រោះទាំងនេះបានផឹកគឺទិញពីកន្លែងលក់ស្រាមួយកន្លែងដែលមានទីតាំងនៅក្នុងភូមិជាមួយគ្នា គឺភូមិកោះឈ្វាំងឃុំស្វាយទងខាងត្បូងស្រុកកំពង់ត្រាច ខេត្តកំពត។ មន្រ្តីអគ្គនាយកដ្ឋានដដែលបន្ថែមថាអ្នកពុលស្រាទាំងអស់រួមទាំងអ្នកស្លាប់ទាំង ៩ នាក់នោះផងសុទ្ធតែមានអាការៈក្អួតចង្អោរនិងទន់ដៃជើងក្រោយពិសាស្រានោះ។
ទោះជាយ៉ាងនេះក្ដីអាជ្ញាធរមានសមត្ថកិច្ចនៅមិនទាន់អាចសន្និដ្ឋានថាតើស្រានោះមានកម្រិតសារធាតុមេតាណុលប៉ុន្មានរហូតដល់ធ្វើឲ្យមនុស្សពុល និងស្លាប់ជាច្រើននាក់បែបនេះនៅឡើយទេដោយត្រូវរង់ចាំលទ្ធផលវិភាគសំណាកស្រាទាំងនេះសិន។
នេះជាលើកទីពីរហើយក្នុងរយៈពេលជាង ១ខែ ដែល អ្នកស្រុកកំពង់ត្រាច ពុលស្រាសស្លាប់ជាច្រើននាក់បែបនេះ។ កាលពីចុងខែឧសភា ពលរដ្ឋនៅភូមិធ្នង់ ឃុំឫស្សីស្រុកខាងកើត និងនៅភូមិក្ងាប ឃុំស្វាយទងខាងជើង ស្រុកកំពង់ត្រាចដែរ ចំនួន ៥៥ នាក់ពុលស្រា ក្នុងនោះ ១០នាក់បានស្លាប់។
ករណីពុលស្រាស្លាប់នេះមានកើតឡើងនៅតាមបណ្តាខេត្តជាច្រើនផ្សេងទៀតដូចជា ខេត្ត កណ្ដាល កំពង់ឆ្នាំ ក្រចេះ ពោធិ៍សាត់ និងបន្ទាយមានជ័យជាដើម។ រយៈពេល ៥ ឆ្នាំចុងក្រោយនេះ យ៉ាងហោចណាស់ មានមនុស្សប្រមាណ ៦០ នាក់ស្លាប់ និងជាងប្រាំរយ (៥០០) នាក់ ត្រូវបានសង្គ្រោះបន្ទាន់ ដោយសារការពុលស្រាស ស្រាថ្នាំ និងស្រាថ្នាំចិនសែ។ អាជ្ញាធររកឃើញថា ស្រាដែលពុលនោះ គឺផ្ទុកសារធាតុមេតាណុលក្នុងកំហាប់ខ្ពស់ហួសក្រម្រិត (មេតាណុលកម្រិត ១៤.១៥%) ដែលតាមកម្រិតធម្មតា គឺគួរតិចជាង០.០៥%)។
អ្នកឃ្លាំមើលសង្គមថា ការពុលស្រាជាបញ្ហាដដែលៗដោយសារតែរបៀបដដែលៗក្នុងការដឹកនាំគ្រប់គ្រងវិស័យសិប្បកម្មស្រាតាមមូលដ្ឋាន។
ទោះជាយ៉ាងនេះក្ដីមន្រ្តីអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែងនិងបង្ក្រាបការក្លែងបន្លំអំពាវនាវឲ្យពលរដ្ឋប្រុងប្រយ័ត្ននិងសូមកុំជាវស្រាសឬស្រាថ្នាំណាដែលគ្មានស្លាកសញ្ញានិងប្រភពត្រឹមត្រូវច្បាស់លាស់យកមកប្រើប្រាស់ឬបរិភោគជាដាច់ខាត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។