អ្នក​ស្លាប់​ដោយ​​​​​​ពុល​ស្រា​សនៅ​ខេត្ត​កំពតកើន​ដល់​១០​​នាក់​ខណៈ​សង្គម​ស៊ីវិល​​ជំរុញ​​ឲ្យ​រដ្ឋាភិបាល​​អនុម័ត​​ច្បាប់​​គ្រឿង​​ស្រវឹង​​

ដោយ ហេង រស្មី
2021-05-26
Share
អ្នក​ស្លាប់​ដោយ​​​​​​ពុល​ស្រា​សនៅ​ខេត្ត​កំពតកើន​ដល់​១០​​នាក់​ខណៈ​សង្គម​ស៊ីវិល​​ជំរុញ​​ឲ្យ​រដ្ឋាភិបាល​​អនុម័ត​​ច្បាប់​​គ្រឿង​​ស្រវឹង​​ ជនរងគ្រោះដោយសារពុលស្រាសនៅស្រុកកំពង់ត្រាចខេត្តកំពតត្រូវបានជួយសង្គ្រោះកាលពីថ្ងៃទី២១ ខែឧសភា ឆ្នាំ២០២១។
រូប៖ គេ​ផ្ដល់​ឱ្យ

អ្នក​ពុល​ស្រា​ស ​នៅ​ភូមិ​ធ្នង់ ឃុំ​ឫស្សីស្រុក​ខាងកើត និងនៅ​​ភូមិ​ក្ងាប ឃុំ​ស្វាយ​ទង​ខាង​ជើង ស្រុក​កំពង់ត្រាច ខេត្ត​កំពត​ បាន​កើនឡើង​ដល់​ចំនួន ​៥៥ ​នាក់ ​ក្នុង​នោះ​​ ​១០​នាក់​​បានស្លាប់​ជា​បន្ត​បន្ទាប់ចាប់ពី​ថ្ងៃ​ទី​២១ និង​ថ្ងៃ​ទី​២៥ ខែឧសភា កន្លងទៅ។

ជំទប់​ទី​១ ឃុំ​ឫស្សី​ស្រុក​ខាង​កើត ស្រុក​កំពង់ត្រាចលោក កែវ ខាត់ ប្រាប់​ថា ​អាជ្ញាធរ​បាន​បញ្ជូន​​​អ្នក​ពុល​ស្រា​ ២ នាក់ទៅ​សង្គ្រោះ​បន្ទាន់​នៅ​មន្ទីរ​ពេទ្យ​ខេត្ត​កំពត។ ឯ​​អ្នក​ជំងឺ​​ជាង ​៤០ ​នាក់ ផ្សេង​ទៀត កំពុង​សម្រាក​ព្យាបាល​នៅ​មន្ទីរ​ពេទ្យ​បង្អែក​ស្រុក។

លោកឲ្យ​ដឹង​ថា អ្នក​ភូមិនៅ​ទី​នោះ​ និយម​ពិសា​ស្រា​សជា​ក្រុមៗ តាំង​ពី​ដើម​មក ហើយ​មិន​​ធ្លាប់​ពុល​​​ទេ។ លោក​ថា ដើម​ហេតុ​នៃ​ការ​ពុល​ស្រា​ស​​នេះ គឺពលរដ្ឋបាន​នាំ​គ្នា ​ផឹក​ស្រា​ស​កំដរ​បុណ្យ​សព​មួយ កាល​ពី​ប៉ុន្មាន​ថ្ងៃ​មុន។ បន្ទាប់​ពី​​​ចប់​បុណ្យ​សព អ្នក​ភូមិ​ធ្នង់ និង​អ្នក​ភូមិ​ក្ងាប បាន​​រំលែក​ស្រា​សពី​កាន​ធំៗ ច្រក​ដាក់​ដប យក​​ទៅ​ផឹក​ជុំ​គ្នា​បន្ត​ទៀត​​តាម​ភូមិ និង​បណ្ដាល​ឲ្យ​កើត​ករណី​ពុល​ស្លាប់ជា​បន្ត​បន្ទាប់។ លោក កែវ ខាត់ ឲ្យ​ដឹង​ថា មក​ដល់​ពេល​នេះ នគរបាលបាន​យក​អ្នក​​ផលិត​​​ស្រា និង​អ្នក​លក់​ស្រាសរុប ​២ នាក់ ទៅ​ស្នងការដ្ឋាន​ខេត្ត។ អាជ្ញាធរក៏​បាន​ដើរ​ដក​ហូត​យក​ស្រា​ស និង​ស្រា​ថ្នាំ​​ទាំង​អស់នៅ​តាម​តូប​ និង​កន្លែង​ផលិត​ផ្សេង​​ទៀត​​ យក​មក​រក្សា​ទុក​ដែរ៖ «អ្នក​បិទ​ក្នុង​ភូមិ ហើយ​ប្រហែល​ដាក់​ជាតិ​មេតាណុល​ច្រើន​។ ប្រហែល​ជា​អ៊ីចឹង។ ស្រា​ហ្នឹង បើ​តាម​ស្ដាប់​ទៅ​អ្នក​បិទ​ហ្នឹង គឺ​លក់​ដាច់​ណាស់ ដាច់​ខ្លាំង។ អ្នក​ស្រុក​ភូមិ​ធ្នង់ គេ​និយម​យក​ស្រា​ហ្នឹង មក​ហូប​ណាស់។ ឥឡូវ​អាជ្ញាធរ​ភូមិ​ឃុំ អភិបាល​ស្រុក​អ្វី​ហ្នឹង ហាម​មិន​ឲ្យ​លក់​ មិន​ឲ្យ​ប្ដូរ ហាម​ទាំង​អស់​ហ្នឹង»។ 

អាស៊ី​សេរី មិន​អាច​សុំ​ការ​បញ្ជាក់​បន្ថែម​ពី​អធិការ​ស្រុក​កំពង់ត្រាចលោក សេង សុគន្ធ​ចាត់ និង​ស្នងការ​នគរបាល​ខេត្ត​កំពតលោក ម៉ៅ ច័ន្ទមធុរិទ្ធ ​បាន​ទេ នៅ​ថ្ងៃ​ទី​២៥ ខែឧសភា​។ តែ​លោក​ស្នងការ​ បាន​ប្រាប់​អាស៊ី​សេរី កាល​ពី​យប់​ថ្ងៃ​ទី​២៤ ខែឧសភាថា សមត្ថកិច្ច​កំពុង​សាក​សួរ​​អ្នក​ពាក់ព័ន្ធ​នឹង​ការ​លក់​​ស្រា​ទាំង​ពីរ​នាក់​​ មុន​នឹង​សម្រេច​​ដោះលែង ឬ​បញ្ជូន​ទៅ​តុលាការ។  តែ​ទោះ​ជា​យ៉ាង​ណា លោកថា ករណី​បណ្ដាល​ឱ្យ​មាន​មនុស្ស​ស្លាប់​ គឺ​​ជា​បទ​ល្មើស​ព្រហ្មទណ្ឌ​។

កាល​ពី​​ប៉ុន្មាន​ថ្ងៃ​មុន ​(ថ្ងៃ​​១៩ ឧសភា) ​ក៏​​មាន​មនុស្ស​ចំនួន​ ១២ នាក់​ បានស្លាប់ ​ដោយ​​​​ការ​ពុល​​ស្រា​ស​ និង​ស្រា​ថ្នាំ​ ​ក្នុង​ពិធី​បុណ្យ​សព​ នៅ​ស្រុក​ល្វាឯម ខេត្ត​កណ្ដាល​ដែរ​។ ក្នុង​ករណី​នោះ តុលាការខេត្តកណ្តាល បាន​សម្រេចឃុំខ្លួនអ្នកផលិត​ស្រា និង​អ្នក​​លក់​ស្រា​ស សរុប​ចំនួន ​​១៣ ​នាក់​ ក្នុងពន្ធនាគារខេត្តនេះ។

ពាក់ព័ន្ធ​ករណី​នេះអ្នក​ឃ្លាំមើល​ស្នើ​សុំ​អាជ្ញាធរ​​​ដក​ហូត​​យក​ស្រា​ស ស្រា​ថ្នាំ នៅ​តាម​មូលដ្ឋាន​កុំ​ឲ្យ​លក់​បន្ត​ទៀត និង​ស្នើសុំ​រដ្ឋាភិបាល​អនុម័ត​ច្បាប់​ស្ដីពី​ការ​គ្រប់គ្រង​គ្រឿង​ស្រវឹងឲ្យ​បាន​លឿនដើម្បី​​ទប់​ស្កាត់​ការ​ពុល​ស្រា​ស​​ ស្រា​ថ្នាំ​ ជាដើម​។

បណ្ឌិត ឡៅ ម៉ុងហៃ ស្នើ​តាម​ហ្វេសប៊ុក​(Facebook) ឲ្យ​​​គណ:រដ្ឋមន្ត្រី​ និង​សភា​ អនុម័ត​សេចក្ដី​ព្រាង​ច្បាប់​ស្ដីពី​ការ​ត្រួត​ពិនិត្យ​ផលិតផលគ្រឿង​​​ស្រវឹង ដែល​តាក់​តែង​​តាំង​​ពី​ឆ្នាំ​២០១៥ ឲ្យ​បាន​​លឿន​ ដើម្បី​​ទប់​ស្កាត់កុំឲ្យមាននិង​កាត់​បន្ថយ​អ្នកស្លាប់ អ្នកជំងឺ អ្នក​រង​របួស​ពី​អំពើ​ហិង្សា និង​អ្នក​រង​ផល​ប៉ះពាល់​ពី​ការ​ផឹក​ស្រា​ឲ្យ​មាន​ប្រសិទ្ធភាព។

ស្រដៀងគ្នានេះ ប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍ និង​សន្តិភាពលោក យង់ គឹមអេង ក៏គាំទ្រ និង​​​ស្នើសុំ​ឲ្យរដ្ឋាភិបាល​​ប្រញាប់​​អនុម័ត​សេចក្តីព្រាង​ច្បាប់ត្រួតពិនិត្យគ្រឿងស្រវឹង​នេះដែរ។​ ទន្ទឹមគ្នានេះលោក យង់ គឹមអេង ជំរុញ​ឲ្យ​​រដ្ឋាភិបាលដាក់​បញ្ជា​ឲ្យ​អាជ្ញាធរ​មូលដ្ឋានដើរ​ប្រមូល​ ដកហូត​យក​ស្រា​ស និង​ស្រា​ថ្នាំ​ទាំង​អស់កុំ​ឲ្យ​មាន​ការ​ជួប​ជុំ​គ្នា​ពិសា​គ្រឿង​ស្រវឹង​ទៀត ដើម្បី​កាត់​បន្ថយ​ការ​ពុលនិង​ហានិភ័យ​ឆ្លង​ជំងឺ​កូវីដ​១៩ ​(Covid-19)៖ «មែនទែន គឺ​នៅ​ឆ្នាំ​២០១៧ គឺ​ក្រសួង​​មហាផ្ទៃ គេ​បាន​ចែង​សេចក្ដី​ណែនាំ​មួយឲ្យ​បង្កើត​ដីកាដើម្បី​គ្រប់​គ្រង ធ្វើ​សមាហរណកម្ម​ឃុំ​សង្កាត់។ អ៊ីចឹង គាត់​អាច​ប្រើ​​ឯកសារ​គោល​ហ្នឹង ដើម្បី​ធ្វើ​ដីកា​របស់​ឃុំ​សង្កាត់​បាន នៅ​ក្នុង​ការ​ទប់ស្កាត់​បណ្ដោះ​អាសន្ន​នេះ ហើយ​ក៏​​អាច​ចេញ​វិធាន​ការ​ផ្សេងៗ​ដែរ​ ក្នុង​ការ​ទប់ស្កាត់​នៅ​ក្នុង​ខេត្ត ​ក្រុង​នីមួយៗ គួរ​តែ​មាន​វិធាន​ការ​ កុំ​ឲ្យ​កើត​មាន​ដដែល​ៗ»។​​

ជុំវិញ​សំណើ​​នេះ អាស៊ី​សេរី មិន​អាច​សុំ​ការ​បញ្ជាក់​ពី​អ្នក​នាំ​ពាក្យ​រដ្ឋាភិបាលលោក ផៃ ស៊ីផាន បាន​ទេ នៅ​ថ្ងៃ​ទី​២៥ ខែឧសភា។

រយៈ​ពេល ​៥ ឆ្នាំ (២០១៦ ដល់​បច្ចុប្បន្ន) ​ចុង​ក្រោយ​ យ៉ាង​ហោច​ណាស់ មាន​មនុស្ស​ប្រមាណ​ ៥០ នាក់ ស្លាប់​ និង​​​​ជិត​ប្រាំ​រយ ​(៥០០) ​នាក់​ ​​ត្រូវ​បាន​សង្គ្រោះ​បន្ទាន់​ដោយ​សារការ​​ពុល​ស្រា​ស ​ស្រា​ថ្នាំ និង​ស្រា​ថ្នាំ​ចិន​សែ។ ហេតុ​ការណ៍​ពុល​ស្រា​​ស​​នេះ កើត​ឡើង​សឹង​តែ​គ្រប់​ខេត្ត​ទៅ​ហើយ ហើយ​ការ​ពុល​កន្លង​មក​នេះ អាជ្ញាធររក​ឃើញ​​ថា ដោយ​សារស្រា​​ទាំង​នោះ ​​ផ្ទុក​សារធាតុ​​មេតាណុលក្នុង​កំហាប់​ខ្ពស់ ​​(មេតាណុល​កម្រិត ១៤.១៥%។ តាម​កម្រិត​ធម្មតា គឺ​ ​តិច​ជាង​០.០៥%)។​

ទោះជាយ៉ាងណា អាជ្ញាធររដ្ឋាភិបាល ពុំបាន​ចាត់វិធានការដោះស្រាយបញ្ហានេះឲ្យមានប្រសិទ្ធភាពនោះទេ ហើយវិធានការចុះដកហូតស្រា និងត្រួតពិនិត្យការផលិត​ស្រា គឺធ្វើឡើងតែរយៈពេលខ្លីប៉ុណ្ណោះ ក្រោយ​មាន​ករណី​ពុល​ស្លាប់​មនុស្ស៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល