អ្នកជំងឺកូវីដ-១៩ ម្នាក់ទៀតបានស្លាប់ ដោយក្រសួងសុខាភិបាលបញ្ជាក់ថា គាត់មិនបានចាក់វ៉ាក់សាំងបង្ការជំងឺកូវីដ-១៩ នោះទេ។
ចំណែកករណីឆ្លងថ្មីវិញ ក្រសួងឱ្យដឹងថា មានចំនួន ១៤នាក់ដែលជាលទ្ធផលបញ្ជាក់ដោយម៉ាស៊ីនពិសោធន៍ភីស៊ីអា (PCR)។ ករណីឆ្លងថ្មីទាំង ១៤ នាក់នេះ គឺសុទ្ធតែជាករណីនាំចូលពីក្រៅប្រទេស និងជាប្រភេទមេរោគបំប្លែងថ្មីអូមីក្រុង (Omicron)ទាំងអស់។
គិតត្រឹមព្រឹកថ្ងៃទី៣០ ខែធ្នូ កម្ពុជាមានអ្នកកើតជំងឺកូវីដ-១៩ ប្រមាណ ១សែន ២ម៉ឺននាក់ (១២០.៤៨៧) ក្នុងនោះអ្នកជាសះស្បើយមានជាង ១ សែន ១ម៉ឺននាក់ (១១៦.៩០៧) និងអ្នកស្លាប់មានចំនួន៣ពាន់ ១២នាក់ (៣.០១២)។
ក្រសួងសុខាភិបាលប្រកាសថា គិតត្រឹមថ្ងៃទី២៨ ខែធ្នូ រដ្ឋាភិបាលកម្ពុជាចាក់វ៉ាក់សាំងជូនពលរដ្ឋដែលមានអាយុពី ៥ ឆ្នាំឡើងទៅបានជាង ១៣លាន ៦សែន នាក់សម្រាប់ដូសទីពីរ ក្នុងចំណោមប្រជាពលរដ្ឋដែលត្រូវចាក់ជាង ១៤ លាននាក់និងដូសទី៣ ចាក់វ៉ាក់សាំងបានជាង ៣លាន ៤សែននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។