ពលរដ្ឋត្អូញ​គ្មាន​​​​លទ្ធភាព​​បង់​ថ្លៃ​​ពិន័យ​ក្នុង​​ស្ថានភាព​​ជំងឺ​កូវីដ​​១៩​ ខណៈ​អាជ្ញាធរ​​ចាប់​​ផ្ដើម​​​ផាក​​អ្នក​​មិន​​ពាក់​ម៉ាស់​​

ដោយ ជិវីតា
2021-03-28
Share
ពលរដ្ឋត្អូញ​គ្មាន​​​​លទ្ធភាព​​បង់​ថ្លៃ​​ពិន័យ​ក្នុង​​ស្ថានភាព​​ជំងឺ​កូវីដ​​១៩​ ខណៈ​អាជ្ញាធរ​​ចាប់​​ផ្ដើម​​​ផាក​​អ្នក​​មិន​​ពាក់​ម៉ាស់​​ អាជ្ញាធររាជធានីភ្នំពេញចុះចែកម៉ាស់ដល់ប្រជាពលរដ្ឋ និងអ្នកដំណើរនៅក្នុងទីក្រុងភ្នំពេញ ដើម្បីទប់ស្កាត់ការឆ្លងជំងឺកូវីដ១៩ កាលពីថ្ងៃទី២ ខែធ្នូ ឆ្នាំ២០២០។
រូប៖ ហ្វេសប៊ុក រដ្ឋបាលរាជធានីភ្នំពេញ។

ពលរដ្ឋ​ចង់​ឲ្យ​អាជ្ញាធរ​បង្កើន​ការ​ផ្សព្វផ្សាយ​​ពី​ការ​ពាក់​ម៉ាស់ និង​​ព្រមាន​ ជា​ជាង​ពិន័យ ព្រោះ​បច្ចុប្បន្នពលរដ្ឋ​ភាគច្រើនបាត់​បង់​ប្រាក់​ចំណូល​ធ្ងន់ធ្ងរ ឯ​ពលរដ្ឋ​ខ្លះ បាត់​បង់​ប្រាក់​ចំណូល​ទាំងស្រុងដោយសារ​​តែ​វិបត្តិ​ជំងឺ​កូវីដ​១៩។

តំណាង​សហគមន៍​ក្រីក្រ​​មួយ​កន្លែង​នៅ​​ម្ដុំ​ផ្លូវ​រទេះ​ភ្លើង ខណ្ឌ​ទួលគោក រាជធានី​ភ្នំពេញ លោក​ស្រី​ នី​ សន្ដោស ឲ្យ​ដឹង​ថា ​អ្នក​ភ្នំពេញ​​ភាគច្រើន មិន​ហ៊ាន​ចេញ​ក្រៅ​ផ្ទះ ដោយ​មិន​ពាក់​ម៉ាស់​ទេ​ ព្រោះ​បារម្ភ​ពី​ការ​ឆ្លង​ជំងឺ​ផ្ទាល់​ខ្លួន។ តែ​យ៉ាង​ណា លោកស្រីបារម្ភ​ថា ពលរដ្ឋ​ក្រីក្រ​ក្នុង​សហគមន៍ នឹង​ប្រឈម​ការ​ពិន័យដោយសារពួកគាត់​មិន​សូវ​យល់​ដឹង​ពី​ការ​ពាក់​ម៉ាស់ និង​ភ្លេចភ្លាំង​ច្រើន ព្រោះ​ភ័យ​ព្រួយ​ពី​បញ្ហា​ជីវភាព​ជាង​សុខភាព។

តំណាង​សហគមន៍​រូប​នេះ ស្នើសុំ​ឲ្យ​អាជ្ញាធរ​បង្កើន​ការ​ផ្សព្វផ្សាយ ការ​ចែក​ម៉ាស់​ សាប៊ូ និង​អាល់កុល​លាង​សំអាត​ដៃ ក្នុង​សហគមន៍​ក្រីក្រ​ឲ្យ​បាន​ច្រើន និង​ស្នើសុំ​​ឲ្យ​​​​អប់រំ​​ពលរដ្ឋ​ក្រីក្រ ជា​ជាង​​ផាក​ពិន័យ ព្រោះ​អ្នក​រស់​ក្នុង​សហគមន៍​ក្រីក្រ​ជាច្រើន បាន​បាត់​បង់​ការងារ និង​ប្រាក់​ចំណូល​ទាំងស្រុង ក្នុង​វិបត្តិ​ជំងឺ​កូវីដ​១៩ លើក​នេះ៖ «ការ​ពិត​ចំណេះ​ដឹង​ហ្នឹង​ អ្នក​ខ្លះគាត់​អត់​ទាន់​ចេះ​ប្រើ​​ប្រាស់​ម៉ាស់ល្អ​ប្រសើរ​ទេ។ ជួន​កាល​គាត់​ប្រើ​អា​ឆ្អឹង​ម៉ាស់​ហ្នឹង គេ​ប្រើ​លើ​ខ្ទង់​ច្រមុះ​ តែ​ពេល​ខ្លះ គាត់​ពាក់​បញ្ច្រាស​អ្វី​ដែរ។ ភាគច្រើន​ សហគមន៍​គាត់​គិត​ថា ពាក់​ត្រឹមត្រូវ ឬ​មិន​ត្រឹមត្រូវ​ទេ សំខាន់គាត់​បាន​ពាក់​ហើយ​អ៊ីចឹង​ណា។ មួយ​ទៀត ម៉ាស់​ខ្លះ គាត់​ប្រើ​មិន​គិត​ទេ ម៉ាស់​គាត់​ប្រើ​យូរ​ពេក​ គុណភាព​ម៉ាស់​ហ្នឹង​អស់​។ ពេល​ខ្លះ ម៉ាស់​គេ​ប្រើ​តែ​មួយ​ថ្ងៃ​ទេ តែ​គាត់​ខ្វះ​លទ្ធភាព គាត់​ប្រើ​​ ២ ឬ​៣​ថ្ងៃ ប៉ះពាល់​ដល់​សុខភាព​គាត់​ខ្លះ​​ដែរ។ តែ​យើង​មិន​ដឹង​ធ្វើ​យ៉ាង​ម្ដេច?»​​។

រដ្ឋ​មន្ត្រី​ក្រសួង​មហាផ្ទៃលោក ស ខេង កាល​ពី​ថ្ងៃ​ទី​២៧ ខែមីនា​​ បាន​ណែនាំ​ឲ្យ​អាជ្ញាធរ​មូលដ្ឋាន​សហការ​ជាមួយ​អាជ្ញាធរ​សុខាភិបាល ដើម្បី​អនុវត្ត​ការ​ផាក​ពិន័យ​ប្រាក់ ចំពោះ​បុគ្គល​ដែល​មិន​ពាក់​ម៉ាស់ និង​មិន​រក្សា​គម្លាត​សុវត្ថិភាព (១ម៉ែត្រកន្លះ) នៅ​តាម​ភូមិសាស្ត្រ ដែល​ក្រសួង​សុខាភិបាលបាន​កំណត់។ ប៉ុន្តែអាជ្ញាធរ បាន​​លើក​លែង​​កាតព្វកិច្ច​ពាក់​ម៉ាស់​នេះ ចំពោះ​ក្មេងអាយុ​ក្រោម​ ៦​ឆ្នាំ បុគ្គល​ដែល​មាន​បញ្ហាសុខភាព​ដោយ​មាន​លិខិត​បញ្ជាក់​ពី​គ្រូពេទ្យ​ថា មិន​​​អាច​ពាក់​ម៉ាស់​បាន​ជាដើម។

ការ​កំណត់​​​អនុវត្ត​វិធានការ​ពាក់​ម៉ាស់​ និង​រក្សា​គម្លាត​សុវត្ថិភាពក្នុង​​រាជធានី​ខេត្ត​ទាំង ​៥​ នេះ ដោយសារ​ភូមិសាស្ត្រ​ទាំង​នេះបាន​ឆ្លង​ជំងឺ​កូវីដ​១៩ច្រើន​ជាង​គេ។ ចំណែក​ខេត្ត​ផ្សេង​ទៀត ​អាជ្ញាធរ មិន​ទាន់​ដាក់​កាតព្វកិច្ច​​ទេ តែ​​អំពាវនាវ​ឲ្យ​ពលរដ្ឋ​ពាក់​ម៉ាស់ និង​អនុវត្ត​វិធានការ​បង្ការ​របស់​ក្រសួង​សុខាភិបាល។

ជុំវិញ​ករណី​នេះ អាស៊ី​សេរី មិន​អាច​សុំ​ការ​បញ្ជាក់​បន្ថែម​អ្នក​នាំ​ពាក្យ​អគ្គ​ស្នងការ​នគរ​បាល​ជាតិលោក ឆាយ គឹមខឿន និង​អ្នក​នាំ​ពាក្យ​ក្រសួង​សុខាភិបាលអ្នកស្រី ឱ វណ្ណ​ឌីន បាន​ទេនៅ​ថ្ងៃ​ទី​២៨ ខែមីនា។

ទោះ​យ៉ាង​ណា ក្រសួង​សុខាភិបាល​ ធ្លាប់​បញ្ជាក់​ថា ​ជំហាន​ដំបូង​អាជ្ញាធរ នឹង​មិន​ទាន់​ពិន័យ​ភ្លាមៗ​ទេ តែ​មន្ត្រី​សុខាភិបាល​ ឬ​ អាជ្ញាធរ​មាន​សមត្ថកិច្ច​ នឹង​​​​​អប់រំ ណែនាំ ព្រមាន​ដល់​បុគ្គល​​​​​ដែល​មិន​អនុវត្ត​​តាម​កាតព្វកិច្ច​ពាក់​ម៉ាស់ និង​រក្សា​គម្លាត​សុវត្ថិភាព​។ ប៉ុន្តែ​ក្នុង​ករណី​នៅតែ​មិន​អនុវត្ត​ទៀត ​អាជ្ញាធរ​មាន​សមត្ថកិច្ច​នឹង​ពិន័យ​ជា​ទឹក​ប្រាក់​ចន្លោះ​ពី​ពីរ​សែន (២០០.​០០០) រៀល ទៅ មួយ​លាន​ (១.០០០.០០០)រៀល ជាកំហិត គឺ​ស្រប​តាម​ច្បាប់​ស្ដី​ពី​ការ​ទប់​ស្កាត់​ជំងឺ​កូវីដ​១៩ និង​ជំងឺ​ឆ្លង​កាច​សាហាវ​ផ្សេងៗ។

សង្គម​ស៊ីវិល​ស្វាគមន៍​ការ​តម្រូវ​ឲ្យ​ពាក់​ម៉ាស់នៅ​ទី​សាធារណៈ និង​វិធានការ​អប់រំ ណែនាំពលរដ្ឋ តែ​មិន​យល់​ស្របនឹង​វិធានការ​ពិន័យ​ទេ​ ព្រោះ​​ជា​បន្ទុក​ធ្ងន់ធ្ងរ​សម្រាប់​ពលរដ្ឋ​ក្រីក្រ។

ប្រធាន​សមាគម​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធលោក វ៉ន់ ពៅ​ យល់​ថា ស្ថានភាព​នេះ អាជ្ញាធរគួរ​តែ​​បង្កើន​ការ​​អប់រំ​ផ្សព្វផ្សាយឲ្យ​ទូលាយ និង​ជួយ​ឧបត្ថម្ភ​ទាំង​សម្ភារៈ និង​ថវិកា​ ដើម្បី​ឲ្យ​​ពលរដ្ឋ​ក្រី​ក្រ ​មាន​លទ្ធភាព​អនុវត្ត​ច្បាប់​បាន​។ លោកនៅ​តែ​ជំរុញ​ឲ្យ​រដ្ឋាភិបាល​ ជួយ​​អន្តរាគមន៍​ឲ្យ​​មាន​ការ​ពន្យារ​ពេល​សង​បំណុល​ធនាគារ​ទាំងស្រុង ដើម្បី​ពលរដ្ឋ​ក្រីក្រមាន​លទ្ធភាព​កាត់​បន្ថយ​ការ​ចេញ​ក្រៅ​ផ្ទះ តាម​ការ​អំពាវនាវ​របស់​រដ្ឋាភិបាល៖ «ក្រៅពី​ការ​ពិន័យ ខ្ញុំ​គិត​ថា គួរ​តែ​ជួយ​ចែក​ម៉ាស់ ចែក​អាកុល ចែក​ជែក​លាង​ដៃឲ្យ​​គាត់​បន្ថែម​ទៀត​ឲ្យ​បាន​ច្រើន ទី​១។ ទី​២ ត្រូវ​គិត​អំពី​សេដ្ឋកិច្ច​រស់​នៅ​ប្រចាំ​ថ្ងៃ​ របស់​គាត់​ផង។ មាន​ន័យ​ថា រដ្ឋ​អាច​ផ្ដល់​ជា​អាហារូបត្ថម្ភ​ ឬ​ក៏​អាហារ​ហូប​ចុក​ប្រចាំ​ថ្ងៃ​ ជា​អង្ករ​ ជា​អ្វី ប្រចាំ​ខែ ឬ​អ្វី​ ជា​សាច់​ប្រាក់ សម្ភារៈ ដើម្បី​ឲ្យ​គាត់​បាន​នៅ​សម្ងំ​នៅ​ក្នុង​ផ្ទះ​ដូច​​អ្នក​មានគេ​ដទៃ​ផង។ ម្យ៉ាង​ទៀត ក៏គួរ​តែ​អន្តរាគមន៍​​ទៅ​គ្រឹះស្ថាន​មីក្រូ​ហិរញ្ញ​វត្ថុ ដើម្បី​ឲ្យ​គាត់​មាន​ឱកាស​បាន​ស្នាក់នៅ​ផ្ទះ ដើម្បី​ការពារ​ជំងឺកូវីដ​១៩។ ដូច្នេះ​ទន្ទឹម​នឹង​ការ​ពិន័យ​ រដ្ឋ​ត្រូវ​គិតគូរ​ពី​សេដ្ឋកិច្ច​ពលរដ្ឋ​ជា​ធំ»។

មួយ​រយៈ​ចុង​ក្រោយ​នេះ អាជ្ញាធររដ្ឋាភិបាល  តែង​អំពាវនាវជា​រឿយៗ​ឲ្យ​ពលរដ្ឋ​ ចូលរួម​ពាក់​ម៉ាស់ និង​រក្សា​គម្លាត​ ឲ្យ​បាន​ត្រឹមត្រូវ​ទាំង​អស់​គ្នា​ ដើម្បី​បញ្ចៀស​ការ​ផាក​ពិន័យ​ និង​បញ្ចៀស​ការ​ឆ្លង​ជំងឺ​កូវីដ​១៩។ ទោះ​ជា​យ៉ាង​ណា មន្រ្តី​សង្គមស៊ីវិល និង​មេដឹកនាំសហជីព ព្រួយបារម្ភថា ពលរដ្ឋមិនសូវ​យល់ដឹងនិង​មិន​សូវ​ទទួល​បាន​ព័ត៌មាន​​គ្រប់​ជ្រុងជ្រោយ​ពាក់ព័ន្ធ​នឹង​វិធានការទប់ស្កាត់កូវីដ-១៩ របស់​រដ្ឋាភិបាល ហើយ​​បណ្តាល​ឲ្យ​ពួក​គាត់​អាច​ប្រឈម​នឹងការពិន័យ ឬដាក់ទោសទណ្ឌ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល