មេរោគ​ឆ្លង​ខ្លាំង អាជ្ញាធរ​ចិន​មិន​ឱ្យ​ពលរដ្ឋ​ចេញ​ពី​ផ្ទះ និង​ដាក់​ទណ្ឌកម្ម​អ្នក​ល្មើស

ដោយ មួង ណារ៉េត
2020-02-14
អ៊ីម៉ែល
មតិ
Share
បោះពុម្ព
មេរោគ​​វីរុស កូរ៉ូណា (Coonavirus)
មេរោគ​​វីរុស កូរ៉ូណា (Coonavirus)
Photo: RFA

នៅ​ក្នុង​ពេល​ដែល​ប្រមុខ​ដឹក​នាំ​កម្ពុជា បង្ហាញ​ពី​ការ​មិន​សូវ​បារម្ភ​អំពី​ការ​ឆ្លង​រាល​ដាល​មេរោគ​វីរុស​កូរ៉ូណា ឬ​ហៅ​តាម​ឈ្មោះ​ថ្មី​ថា សារស៍-ស៊ីអូវី-(SARS-Cov-2) នៅ​ឯ​ប្រទេស​ចិន​​ណោះ​វិញ សន្ទុះ​នៃ​ការ​ឆ្លង​មេរោគ​នេះ កាន់​តែ​​ហក់​ឡើង​ខ្លាំង។

ការ​​ឆ្លង​រាលដាល​មេរោគ​វីរុស​កាន់​តែ​ខ្លាំង​នេះ ធ្វើ​ឱ្យ​អាជ្ញាធរ​ចិន​សម្រេច​ដាក់​ទីក្រុង​នានា នៃ​ខេត្ត​ហ៊ូបេ (Hubei) ទៅ​ក្នុង​វិធានការ​បែប​អាជ្ញាសឹក​មួយ ដែល​ហាម​ពលរដ្ឋ​គ្រប់​រូប​មិន​ឱ្យ​ចេញ​ក្រៅ​ផ្ទះ ហើយ​ថែម​ទាំង​គំរាម​ថា នឹង​ដាក់​ទោស​ជន​ណា ដែល​រំលោភ​បទ​បញ្ជា​នេះ។

អាជ្ញាធរ​ចិន ក៏​បាន​រឹត​បន្តឹង​ការ​ធ្វើ​ដំណើរ​ចេញ​ចូល​របស់​ពលរដ្ឋ ដោយ​បង្កើត​កម្មវិធី​កុំព្យូទ័រ ឬ​ទូរស័ព្ទ ដែល​ហៅ​ថា អ៊ែបស៍ (Apps) សម្រាប់​ឱ្យ​អាជ្ញាធរ​អាច​ប្រមូល​ព័ត៌មាន​ជា​ច្រើន និង​តាមដាន​ការ​ធ្វើ​ដំណើរ​របស់​ពលរដ្ឋ។ ពលរដ្ឋ​ត្រូវ​ផ្ដល់​ព័ត៌មាន​ដល់​អាជ្ញាធរ មុន​នឹង​ចេញ ឬ​ចូល​ទីក្រុង​សំខាន់ៗ។

ជំងឺ​ផ្លូវ​ដង្ហើម​ថ្មី ដែល​បង្ក​ឡើង​ដោយ​មេរោគ​វីរុស កូរ៉ូណា ឬ​ហៅ​ថា មេរោគ សារស៍-ស៊ីអូវី-(SARS-Cov-2) ត្រូវ​បាន​​អង្គការ​សុខភាព​ពិភពលោក​ដាក់​ឈ្មោះ​ឱ្យ​ថ្មី​ថា ជំងឺ កូវីដ-១៩ (Covid-19)

គណៈកម្មការ​សុខាភិបាល​ជាតិ​របស់​ប្រទេស​ចិន​ឱ្យ​ដឹង​ថា បុគ្គលិក​ពេទ្យ​ចិន​ចំនួន ១.៧០០​នាក់ បាន​ឆ្លង​មេរោគ សារស៍-ស៊ីអូវី-(SARS-Cov-2) នេះ ហើយ​ក្នុង​នោះ ស្លាប់ ៦នាក់ គិត​ត្រឹម​ថ្ងៃ​ទី១១ កុម្ភៈ។

តារាង​ក្រាហ្វិក​ស្ថិតិ​សម្រាប់​ថ្ងៃ​សុក្រ ទី១៤ កុម្ភៈ បង្ហាញ​គំនូស​សញ្ញា​អ្នក​ឆ្លង​មេរោគ​វីរុស​ សារ-ស៊ីអូវី-(SARS-Cov-2) ហក់​ឡើង​ខ្ពស់​ជា​លំដាប់ គ្មាន​សញ្ញា​ស្រាកស្រាន្ត​ឡើយ។

ក្រៅ​ពី​ប្រទេស​ចិន​ដី​គោក ប្រទេស​មួយ​ចំនួន​ទៀត ក៏​មាន​វិបត្តិ​មេរោគ​វីរុស​នេះ​ដែរ គឺ​ប្រទេស​សិង្ហបុរី​ឈរ​លំដាប់​ទី២ ហុងកុង​ទី៣ ថៃ​ទី៤ ជប៉ុន​ទី៥ និង​កូរ៉េខាង​ត្បូង​ទី៦៕


ព័ត៌មាន (0)
Share
គេហទំព័រ​ទាំងមូល