រដ្ឋាភិបាល​ដាក់​ចេញ​វិធានការ​ទប់​ស្កាត់​ជំងឺ​កូវីដ១៩ បន្ថែម​ ក្រោយ​ពេល​មានអ្នក​ឆ្លង​ជំងឺ​នេះ​កាន់​តែ​ច្រើន ឯ​មន្ត្រី​បក្ស​ប្រឆាំង​ថា វិធានការ​នេះ​យឺត​ពេល

ដោយ ហេង រស្មី
2021-03-09
Share
រដ្ឋាភិបាល​ដាក់​ចេញ​វិធានការ​ទប់​ស្កាត់​ជំងឺ​កូវីដ១៩ បន្ថែម​ ក្រោយ​ពេល​មានអ្នក​ឆ្លង​ជំងឺ​នេះ​កាន់​តែ​ច្រើន ឯ​មន្ត្រី​បក្ស​ប្រឆាំង​ថា វិធានការ​នេះ​យឺត​ពេល រូបសញ្ញាព្រឹទ្ធសភា
រូប៖ ហ្វេសប៊ុកព្រឹទ្ធសភា

រដ្ឋាភិបាល​បាន​ដាក់​ចេញ​វិធានការ​ទប់​ស្កាត់​ជំងឺ​កូវីដ១៩ បន្ថែម​ទៀត​ ក្រោយ​ពេល​អ្នក​ឆ្លង​ជំងឺ​នេះ កាន់​តែ​ច្រើន​ឡើង​។ វិធានការ​ទាំង​នោះ រួម​មាន​ទាំង​ការ​ស្នើសុំ​ស្ថាប័ន​នីតិប្បញ្ញត្តិ ឱ្យ​ពន្លឿន​អនុម័តិ​សេចក្ដី​ព្រាង​ច្បាប់​​​ទប់​ស្កាត់​ជំងឺ​កូវីដ១៩ (Covid-19) ជាដើម។ ​ប៉ុន្តែ​មន្ត្រី​បក្ស​ប្រឆាំង​ថា វិធានការ​នេះ យឺត​ពេល ​និង​​ មាន​ចេតនា ដាក់​បន្ទុក​លើ​ពលរដ្ឋ​។

វិធានការ​ទប់ស្កាត់ការ​ឆ្លង​រាល​ដាល​ជំងឺ​កូវីដ១៩ រួម​មាន​ការ​រឹត​បន្តឹងការ​ចេញ​ចូលតំបន់​ ការ​បិទ​ទីតាំង ដែល​កំពុង​ផ្ទុះ​ជំងឺ​នេះ និង​ការ​កាត់​បន្ថយ​ចំនួន​មន្ត្រី និង​បុគ្គលិក ទៅ​ធ្វើការ​ដល់​ស្ថាប័ន និង​ក្រុមហ៊ុន ជាដើម។ ជាមួយ​គ្នា​នេះ​ គណៈកម្មាធិការ​អចិន្ត្រៃយ៍​ព្រឹទ្ធសភា បាន​បើក​កិច្ច​ប្រជុំ​ជា​បន្ទាន់​ នៅ​ព្រឹក​ថ្ងៃ​ទី​០៩ មីនា ដើម្បី​ពិភាក្សា​​សេចក្ដី​ព្រាង​ច្បាប់​ស្ដីពី​វិធានការ​ទប់ស្កាត់​ការ​ឆ្លង​រាល​ដាល​ជំងឺ​កូវីដ-១៩ និង​ជំងឺ​ឆ្លង​កាច​សាហាវ​ប្រកប​ដោយ​គ្រោះថ្នាក់​ធ្ងន់ធ្ងរ និង​បាន​សម្រេច​ បញ្ជូន ទៅ​គណៈកម្មការ​ជំនាញ​រួច​រាល់​ហើយ។

អ្នក​នាំ​ពាក្យ​ព្រឹទ្ធសភា លោក ម៉ម ប៊ុននាង ប្រាប់​សារ​ព័ត៌មាន​ក្នុង​ស្រុក (Thmeythmey) ថា ព្រឹទ្ធ​សភា នឹង​បើក​កិច្ច​ប្រជុំ​ពេញ​អង្គ​អនុម័ត​សេចក្តីព្រាងច្បាប់​នេះ នៅ​ថ្ងៃ​ទី​១១ មីនា ​ហើយ​​​ក្រោយ​កិច្ច​ប្រជុំ ព្រឹទ្ធ​សភា​នឹង​សម្រេច​ថា សេចក្តីព្រាង​ច្បាប់​មាន​លក្ខណៈ​ប្រញាប់​​មួយ​នេះ គួរ​​​ត្រូវ​បញ្ជូន ឬ​រម្លង​​ក្រុម​ប្រឹក្សា​រដ្ឋធម្មនុញ្ញ ដើម្បី​ដាក់​ជូន​ប្រមុខ​រដ្ឋ​ស្ដីទី ចុះ​ហត្ថលេខា​ ប្រកាស​ឲ្យ​ប្រើ​ភ្លាមៗ។

អាស៊ី​សេរី​មិន​អាច​សុំ​ការ​បញ្ជាក់​បន្ថែម​ពី​អ្នក​នាំ​ពាក្យ​ព្រឹទ្ធ​សភា លោក ម៉ម ប៊ុននាង និង អគ្គលេខាធិការ លោក អ៊ុំ សារឹទ្ធ បាន​ទេ នៅ​ថ្ងៃ​ទី៩ មីនា។ តែ​យ៉ាង​ណា ប្រមុខ​រដ្ឋាភិបាល លោក​ ហ៊ុន សែន បាន​បញ្ជាក់​តាម​សារ​ជា​សំឡេង កាល​ពី​ថ្ងៃ​ទី៨ មីនា ស្នើសុំ​ឲ្យ​ប្រធាន​ព្រឹទ្ធ​សភា​ស្ដីទី លោក ស៊ឹម កា រក​វិធី​យ៉ាង​ណា ត្រូវ​ពិនិត្យ និង​អនុម័ត​សេចក្ដី​ព្រាង​ច្បាប់នេះ​ឱ្យ​បាន​លឿន

សេចក្ដី​ព្រាង​ច្បាប់​នេះ មាន​គោល​បំណង​ទប់ស្កាត់​ការ​រាល​ដាល​ជំងឺ​កូវីដ-១៩ ហាម​ឃាត់​សកម្មភាព​ពលរដ្ឋ​មួយ​ចំនួន និង​ដាក់​ទោស​ទណ្ឌ​ ដល់​អ្នក​ល្មើស​ការ​ធ្វើ​ចត្តាឡីស័ក និងបិទ​តំបន់​ណា​មួយ ដែល​មាន​ជំងឺ​កូវីដ-១៩ ឆ្លង​រាល​ដាល​ផង​ដែរ។ សម្រាប់ទោសទណ្ឌវិញ អ្នក​គេចវេះ​មិន​ធ្វើ​ចត្តាឡីស័ក ត្រូវ​ជាប់​ពន្ធនាគារ​ពី ៦ខែ ដល់ ៣ឆ្នាំ។ ឯ​អ្នក​គេចវេះ​ពី​ការ​ព្យាបាល ​ឬ​លួច​រត់​ចេញ​ពី​កន្លែង​ព្យាបាល​ជំងឺ​នេះ​ ក៏​ត្រូវ​ជាប់​ពន្ធនាគារ​ដែរ ហើយ​បើ​អ្នក​​​​ជំងឺ​នោះ លួច​រត់​បណ្ដាល​ឲ្យ​ឆ្លង​ដល់​អ្នក​ដទៃ នឹង​ត្រូវ​មាន​ទោស​កាន់​តែ​ធ្ងន់ គឺ​អាច​ជាប់​ពន្ធនាគារ​អតិបរមា​រយៈ​ពេល ១០ឆ្នាំ។ អ្នក​មាន​ចេតនា​ចម្លង​ជំងឺ​កូវីដ-១៩ ដល់​អ្នក​ដទៃ ត្រូវ​ដាក់​ពន្ធនាគារ​ពី ៥ឆ្នាំ ទៅ​១០ឆ្នាំ ហើយ​បើ​ចេតនា​នេះ ធ្វើ​ឡើង​ដោយ​មាន​ការ​រៀបចំ ជា​ក្រុម ឬ​មាន​អង្គការ​ចាត់តាំង អ្នក​នោះ នឹង​ត្រូវ​ជាប់​ពន្ធនាគារ​ពី ១០ឆ្នាំ ទៅ ២០ឆ្នាំ។

លោក ហ៊ុន សែន ក៏​បាន​បញ្ជា​ឲ្យ​ស្ថាប័ន​ជាតិ ចំនួន៣ កាត់​បន្ថយ​មន្ត្រី​ទៅ​ធ្វើ​ការ​ឲ្យ​នៅ​សល់​ត្រឹម ១០ភាគ​រយ នៃ​ចំនួន​សរុប រយៈ​ពេល ៧ថ្ងៃ ដើម្បី​កាត់​បន្ថយ​ហានិភ័យ​ការ​​រាល​ដាល​ជំងឺ​កូវីដ​១៩។ លោក​នាយក​រដ្ឋមន្ត្រី ក៏​បាន​ស្នើសុំ​ឲ្យ​​វិស័យ​ឯកជន​ កាត់​បន្ថយ​បុគ្គលិក​ ហើយ​ធ្វើ​ការ​ផ្លាស់​ប្ដូរ​វេន​គ្នា​ ដើម្បី​បញ្ចៀស​​បញ្ហា​មនុស្ស​កក​កុញ​ នៅ​កន្លែង​ធ្វើ​ការ និង​​តាម​ផ្លូវ និង​ត្រូវ​ផ្អាក ឬ​លើក​ពេល​កម្មវិធី​ជួបជុំ​ ដែល​មិន​ចាំ​បាច់​ទាំង​អស់​​។ តែ​ លោក មិន​​ទាន់​មាន​ឱ្យ​មាន​ការ​បិទ ឬ ផ្អាក​ដំណើរ​ការ​រោងចក្រ ផ្សារ និង​កន្លែង​ប្រកប​អាជីវកម្ម​ទេ ដោយ​គ្រាន់​តែ​តម្រូវ​​ឲ្យ​អនុវត្ត​វិធានការ​អនាម័យ និង​រក្សា​គម្លាត​សុវត្ថិភាព។

នៅ​ថ្ងៃ​ទី៩ មីនា​ដែរ លោក ហ៊ុន សែន បាន​ចេញ​សារ​សំឡេង​បទ​បញ្ជា​មួយ​ទៀត តម្រូវ​​ឲ្យ​អភិបាល​រាជធានី ខេត្ត​ទាំង​អស់ ពិនិត្យ​ឲ្យ​ច្បាស់លាស់​អំពី​ការ​បិទ និង​ការ​បើក ទីតាំង​ជាប់​ពាក់ព័ន្ធ​ជំងឺ​កូវីដ​១៩«ក្នុង​ករណី​ ដែល​ធ្វើតេស្ត​ឃើញ​អវិជ្ជមាន ក៏​សុំ​ឲ្យ​គេ​បើក​ដំណើរ​ការ​នៅ​ទី​កន្លែង​នោះ ដើម្បី​ជៀស​វាង​ការ​បិទ​ដោយ​គ្មាន​ទី​បញ្ចប់​ ហើយ​អ្នក​ដែល​ចេញ​ទៅ​ធ្វើការ ក៏​ចេញ​មិន​បាន ត្រូវ​ជាប់​ចត្តាឡីស័ក។ យើង​មិន​ត្រូវ​មើល​ស្រាល​ពេល​វេលា​នោះ​ទេ។ ការ​ខាត​បង់​​​ពេល​វេលា​របស់​អ្នក​ធ្វើការ​ នៅ​តំបន់​ដែល​ត្រូវ​បិទ ឬ​អាជីវកម្ម ដែល​យើង​ត្រូវ​បិទ​។ តំបន់​ដែល​យើង​ត្រូវ​បិទ គឺ​មិន​មែន​ជា​រឿង​តូចតាច​ទេ សម្រាប់​ជីវភាព​របស់​ប្រជាពលរដ្ឋ​ និង​ដំណើរ​ការ​ជា​ប្រក្រតី​ នៃ​បញ្ហា​សង្គម»

មន្ត្រី​បក្ស​ប្រឆាំង និង​អ្នក​ឃ្លាំមើល​វិញ​ថា វិធានការ​បន្តបន្ទាប់​របស់​រដ្ឋាភិបាល ក្នុង​ការ​ទប់​ស្កាត់​ការ​រាល​ដាល​ជំងឺ​កូវីដ​១៩ ក្នុង​ព្រឹត្តិការណ៍​សហគមន៍ ២០ កុម្ភៈ រាង​យឺត​ពេល និង​មិន​បាន​គិតគូរ​ដល់​ពលរដ្ឋ​ក្រីក្រ ​ដែល​រង​ផល​ប៉ះពាល់​ខ្លាំង ជា​មន្ត្រី​រាជការ។

តំណាង​រាស្ត្រ​ជាប់​ឆ្នោត នៃ​គណបក្ស​សង្គ្រោះ​ជាតិ លោក ងឹម ញ៉េង សោក​ស្ដាយ ចំពោះ​របប​ក្រុង​ភ្នំពេញ ក្នុង​ការ​ដាក់​ចេញ​វិធានការ​ទប់​ស្កាត់​ជំងឺ​កូវីដ​១៩ យឺត​យ៉ាវ និង ​បាន​បណ្ដាល​ឲ្យ​ប៉ះពាល់​ធ្ងន់ធ្ងរ ដល់​ពលរដ្ឋ​ក្រីក្រ។ តំណាង​រាស្ត្រ​រូប​នេះ បន្ទោស​ថា មេដឹកនាំ​របប​ក្រុង​ភ្នំពេញ បាន​ប្រមាថ​ ព្រោះ មិន​យល់​ដឹង​ពី​ហានិភ័យ​នៃ​ជំងឺ​កូវីដ១៩។ លោក​ជំរុញ​ដល់​លោក ហ៊ុន សែន ឱ្យ​គិត​គូរ​ពី​ការ​ទទួល​ខុស​ត្រូវ ចំពោះ​ជីវភាព​របស់​ពលរដ្ឋ ជា​ជាង​ឆក់​ឱកាស​បង្ខំ​បង្កើត​ច្បាប់ ក្នុង​ចេតនា​បំបិទ​សេរីភាព និង​ដាក់​កំណត់​ទោស​ទណ្ឌ​ធ្ងន់ធ្ងរ​ពេល​លើ​ពលរដ្ឋ៖ «អ៊ីចឹង យើង​គិត​មើល​​គេ គេ​គិត​ថា ធ្វើ​យ៉ាង​ម្ដេច​ ជួយ​ប្រជាជន​គេ​ ឲ្យ​រស់​នៅ​បាន​ស្រួល មិន​មែន​គិត​រឿង​បង្កើត​ច្បាប់ ដើម្បី​ដាក់​ទោស​ទណ្ឌ​ប្រជាជន​គេ​ទេ ហើយ​ ហ៊ុន សែន គឺ​ធ្វើ​អ្វី​ផ្ទុយ​ពី​គេ អត់​គិត​អំពី​ភាព​រស់​នៅ​ អត់​គិត​អំពី​ជីវិត​រស់​នៅ​របស់​ប្រជាជន​ក្រោម​ការ​ដឹកនាំ​របស់​ខ្លួន ហើយ​គិត​តែ​បង្កើត​ច្បាប់ ដាក់​ទោស​ទណ្ឌ​​ប្រជាជន​ខ្លួន​ឯង​ទៅ​វិញ។ អា​ហ្នឹង គឺ​ជា​រឿង​គួរ​ឲ្យ​អស់​សំណើច និង​គួរ​ឲ្យ​ឈឺ​ចាប់ សម្រាប់​ប្រជាជន​ខ្មែរ»

ចំណែក​តំណាង​កម្មករ​ធ្វើការ​ក្រៅ​ប្រព័ន្ធ​វិញ ចង់​ឲ្យ​រដ្ឋាភិបាល បន្ថែម​ការ​គិតគូរ ជួយ​ទំនុក​បម្រុង​ដល់​ពលរដ្ឋ​ក្រីក្រ ឲ្យ​ទទួល​បាន​ការ​ឧបត្ថម្ភ​ខ្លះ​ ដូច​មន្ត្រី​រាជការ ដែល​មាន​បៀវត្សរ៍​ប្រចាំ​ខែ​ដែរ។

ប្រធាន​សមាគម​ឯករាជ្យ​​នៃ​សេដ្ឋកិច្ច​ក្រៅ​ប្រព័ន្ធ លោក វ៉ន់ ពៅ អះអាង​ថា កម្មករ​ក្រៅ​ប្រព័ន្ធ មិន​អាច​​ឈប់​សម្រាក​ ឬ​ធ្វើការ​ពី​ផ្ទះ​ដូច​មន្ត្រី​រាជការ​ទេ។ ដូច្នេះ លោកយល់​ថា ដើម្បី​បញ្ចៀស​ហានិភ័យ​នៃ​​ការ​​ឆ្លង​រាល​ដាល​ជំងឺ​កូវីដ១៩ ក្នុង​សហគមន៍​សម្រាប់​ពលរដ្ឋ​ក្រីក្រ រដ្ឋាភិបាលគួរ​តែ​គិតគូរ​ពី​ការ​ឧបត្ថម្ភ​​ដល់​កម្មករ​ក្រៅ​ប្រព័ន្ធ​ផង។ លោក វ៉ន ពៅ សង្កេត​ឃើញ​ថា ​ចាប់​តាំង​ពី​មាន​ការ​ឆ្លង​រាល​ជំងឺ​កូវីដ​១៩ ក្នុង​សហគមន៍​​​ច្រើន​ដង​មក​នេះ រដ្ឋាភិបាល មិន​ទាន់​បាន​គិតគូរ​​ជា​ដុំ​កំភួន ​​ដល់​កម្មករ​ក្រៅ​ប្រព័ន្ធ​នៅ​ឡើយ​ទេ៖ «គួរ​តែ​មាន​កញ្ចប់​ថវិកា​មួយ ជួយ​ដូច​អ្នក​កាត់​ដេរ​អ៊ីចឹង មួយ​ខែ ៥០ ឬ​៦០​ដុល្លារ​ តាម​លទ្ធភាព​អ៊ីចឹង​ទៅ ឬ​ក៏​​អាច​ជួយ​អង្ករ​ជា​ប្រចាំ​ មួយ​ខែ តែ​៣០​គីឡូ ឬ​ក៏​២០​គីឡូ​អ៊ីចឹង​ទៅ ដើម្បី​ជួយ​កាត់​បន្ថយ​អ្វី ដែល​ជា​ការ​កង្វះ​ខាត​របស់​គាត់ ចំណុច​ទី​១។ ទី​២ រដ្ឋ​គួរ​តែ​ជួយ​ទាក់ទង​ទៅ​នឹង​សេវា​សុខភាព​។ ផ្ដល់​ឡើងវិញ​នូវ​ប្រព័ន្ធ​គាំពារ​សង្គម តាម​រយៈ​ប្រព័ន្ធ​ជំនួយ​សង្គម​​ ទៅ​ដល់​កម្មករ​ក្រៅ​ប្រព័ន្ធ​ទាំង​អស់​ហ្នឹង។ ក្នុង​ស្ថានភាព​កូវីដ១៩ ព្រោះ​កំពុង​តែ​អត់​ស្រាប់»

ក្រសួង​សុខាភិបាល បាន​រក​ឃើញ​អ្នក​ឆ្លង​ជំងឺ​កូវីដ១៩ ចំនួន ៤៩នាក់​ថែម​ទៀត នៅ​ថ្ងៃ​ទី៩ មីនា។ ក្នុង​នោះ អ្នក​ឆ្លង​ក្នុង​ព្រឹត្តិការណ៍​សហគមន៍ ចំនួន ៤៨នាក់ និង​ម្នាក់ជា​ជនជាតិ​លីប៊ី បាន​ធ្វើ​ដំណើរ​ពី​ប្រទេស​លីប៊ី មក​ដល់​កម្ពុជា កាល​ពី​ថ្ងៃ​ទី៧ មីនា។ ចំនួន​ថ្មី​នេះ បាន​ធ្វើ​ឲ្យ​កម្ពុជា​មាន​អ្នក​ឆ្លង​កូវីដ១៩ សរុប .០៦០នាក់មាន​អ្នក​ជា​សះ​ស្បើយ ចំនួន ៥៣៨នាក់ ហើយ​អ្នក​ជំងឺ​កំពុង​សម្រាក​ព្យាបាល​តាម​មន្ទីរ​ពេទ្យ ជាង​ប្រាំ​រយ ៥២១នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល