ប្រជាពលរដ្ឋ ព្រួយបារម្ភពីផលប៉ះពាល់សុខភាព ដោយសារការទទួលទានចំណីអាហារដែលនាំចូលមានផ្ទុកសារគីមីដើម្បីរក្សាទុកបានយូរ និងអាហារខូចគុណភាពលក់តាមទីផ្សារ។ ពួកគាត់ស្នើដល់រដ្ឋាភិបាល និងក្រសួងជំនាញ ចុះត្រួតពិនិត្យចំណីអាហារដែលគ្មានគុណភាពលក់នៅតាមទីផ្សារ និងអាហារផ្ទុកសារធាតុគីមីហួសកម្រិតដែលបណ្តាលឱ្យប៉ះពាល់ដល់សុខភាពមនុស្ស។
ប្រជាពលរដ្ឋព្រួយបារម្ភពីផលប៉ះសុខភាពចំពោះចំណីអាហារដែលលក់តាមទីផ្សារកម្ពុជា ដោយគ្មានការត្រួតពិនិត្យគុណភាព និងសិក្សាពីការផ្ទុកសារធាតុគីមីពីអាជ្ញាធរជំនាញ។ ពួកគាត់សម្គាល់ឃើញថា ទំនិញភាគច្រើនជាពិសេសបន្លែ សាច់ ភាគច្រើននាំចូលតាមច្រកព្រំដែនវៀតណាម មានផ្ទុកសារធាតុគីមី ដែលពលរដ្ឋទទួលទានប្រឈមប៉ះពាល់សុខភាព។
ពលរដ្ឋម្នាក់រស់នៅខេត្តកណ្កាលលោក យូ សិលា លើកឡើងថា គ្រប់មុខទំនិញបរិភោគភាគច្រើននាំចូលពីប្រទេសវៀតណាម ដោយមានរថយន្តធំៗដឹកទម្លាក់នៅតាមច្រកព្រំដែនជ្រៃធំ ខេត្តកណ្តាល។ លោកអះអាងថា ទំនិញដូចជាបន្លែផ្លែឈើដែលនាំចូលពីប្រទេសវៀតណាមអាចមានប្រើប្រាស់សារធាតុគីមីដើម្បីរក្សាបានយូរ។ លោកបន្តថា ផលប៉ះពាល់ក្នុងការទទួលទានអាហារដែលមានសារធាតុគីមីហួសកម្រិតនោះ តាមបទពិសោធន៍លោក គឺមានអាការៈរាករូស ក្អួតចង្អោរ និងអស់កម្លាំងល្ហិតល្ហៃជាដើម៖ «ប៉ះពាល់ដល់យើងអាចកើតជំងឺមហារីកទៀត។ ខ្លួនខ្ញុំផ្ទាល់ធ្វើឡុកឡាក់ហូបយកបន្លែអីហ្នឹងមកហូបវាប៉ះពាល់ដូចជាល្ហិតល្ហៃ ហើយក្អួត»។
ស្រដៀងគ្នានេះដែរ ពលរដ្ឋម្នាក់ទៀតរស់នៅក្រុងភ្នំពេញកញ្ញា ឆវី និយាយថា បញ្ហាទំនិញដែលផ្ទុកសារធាតុគីមីហួសកម្រិតជាក្ដីបារម្ភមួយសម្រាប់ប្រជាពលរដ្ឋក្នុងការទិញមកបរិភោគ ឬប្រើប្រាស់ប៉ះពាល់សុខភាពដោយពួកគាត់មិនបានដឹងមុន។ កញ្ញាស្នើដល់អាជ្ញាធរជំនាញ ត្រួតពិនិត្យអាហារដែលពលរដ្ឋត្រូវការជាប្រចាំ ដូចជា បន្លែ ត្រី សាច់ អាហារកំប៉ុងខូចគុណភាព និងចំណីអាហារដែលផ្ទុកសារធាតុគីមីនាំចូលពីក្រៅប្រទេស៖ «អាហារខ្លះដាក់សារធាតុគីមីច្រើនពេកមិនថា បន្លែ ផ្លែឈើ ឧទាហរណ៍ជាក់ស្ដែងដូចជាគ្រឿងសមុទ្រគេចាប់បានច្រើន សុទ្ធតែប្រើសារធាតុគីមីទាំងអស់ដើម្បីរក្សាគុណភាព។ ពលរដ្ឋខាតបង់ទាំងលុយកាក់មើលជំងឺ ពេលវេលារកស៊ី »។
ដោយឡែកពលរដ្ឋម្នាក់ទៀតរស់ខេត្តស្វាយរៀងលោក យន់ ភក្តី និយាយថា លោកដឹងច្បាស់បន្លែភាគច្រើននាំចូលពីវៀតណាមផ្ទុកដោយសារធាតុគីមី ប៉ុន្តែលោកថា ពលរដ្ឋទូទៅចៀសមិនផុតក្នុងការចំណាយលើមុខទំនិញទាំងនោះឡើយ។ លោកក៍ព្រួយបារម្ភពីផលប៉ះពាល់សុខភាពធ្ងន់ធ្ងរក្រោយហូបចំណីអាហារ ដែលគ្មានការត្រួតពិនិត្យគុណភាពឱ្យបានច្បាស់លាស់ពីអាជ្ញាធរពាក់ព័ន្ធ៖ «ភាគច្រើនមកពីយួនចូលតាមច្រកព្រំដែន អ្នកខាងក្នុងមិនដឹងចេះតែទិញទៅ។ ព្រួយបារម្ភថា យើងដឹងមិនសូវញាំតែកូនចៅយើងវាមិនដឹងចេះតែឃើញឆ្ងាញ់។ អ្នកមើលគេមិនពិនិត្យឱ្យយើង គ្មានអីសំណូមពរទេ ហើយក៍គ្មានប្រយោជន៍អីដែរ ព្រោះវាអាស្រ័យលើឆន្ទៈអ្នកមើលខុសត្រូវ »។
ជុំវិញក្តីបារម្ភប្រជាពលរដ្ឋពីចំណីអាហារគីមីនេះ លោកនាយករដ្ឋមន្ត្រី ហ៊ុន សែន ក៍ធ្លាប់បានជេរស្ដីបន្ទោសប្រជាពលរដ្ឋថា ទិញអាហារមានសារធាតុគីមីទាំងនោះ មិនចេះមើលដោយខ្លួនឯងពេលទទួលទានមានបញ្ហាបែរថាមកពីរដ្ឋាភិបាលមិនចេះគិតគូរ៖ «បើកុំទិញទៅវាចប់ហើយ អ្នកដែលលក់បន្លែបង្ការដែលមានសារធាតុគីមីលក់លែងដាច់ហើយ។ នាំគ្នាធ្វើពហិការកុំទិញបន្លែបង្ការ ឬសាច់ដែលមានសារធាតុគីមីទៅ វាចប់រឿងហើយ ចាំបាច់មកជេររដ្ឋាភិបាលធ្វើអី។ តែខ្លួនឯងទិញអាហ្នឹងយកមកស៊ី ស៊ីហើយជំងឺជេររដ្ឋាភិបាល។ ស៊ីខ្លួនឯងសោះជេរគេដែរ? »។
ទោះជាយ៉ាងណាពលរដ្ឋនៅសៀមរាប រិះគន់ថា ការលើកឡើងរបស់មេដឹកនាំបែរនេះ ឆ្លុះបញ្ចាំឱ្យឃើញថា រដ្ឋាភិបាលគ្មានឆន្ទៈក្នុងការពារសុខុមាលភាពប្រជាពលរដ្ឋឱ្យទទួលបានភាពល្អប្រសើរនោះទេ។ លោកបន្តថា ស្របពេលគ្រប់មុខទំនិញសុទ្ធសឹងតែនាំចូលផ្ទុកសារធាតុគីមីបង្កផលប៉ះពាល់ដល់ពលរដ្ឋ ហើយរដ្ឋាភិបាលតែងតែព្យាយាមគេចវេស បង្ហាញឱ្យឃើញថា គឺជាភាពកម្សោយមួយនៃប្រព័ន្ធដឹកនាំរបស់លោកហ៊ុន សែន៖ «ករណីនេះមិនមែនកើតឡើងឥឡូវៗទេរាប់ឆ្នាំមកហើយ ដែលប្រជាពលរដ្ឋខ្មែរបរិភោគបន្លែផ្លែឈើដែលមានជាតិពុលហ្នឹង។ ទន្ទឹមគ្នានេះ ពលរដ្ឋប្រជាកសិករខ្មែរក៍អាចផលិតបានដែរ ចាំអីនាំចូលពីក្រៅទេ »។
វិទ្យុអាស៊ីសេរីមិនទាន់អាចសុំការឆ្លើយតបជុំវិញរឿងនេះពីគណៈកម្មាធិការប្រយុទ្ធប្រឆាំងផលិតផលក្លែងក្លាយលោក មៀច សុផាន់ណា បានទេនៅថ្ងៃទី២ ខែកុម្ភៈ។
កាលពីថ្ងៃទី២៥ ខែមករា រដ្ឋមន្ត្រីក្រសួងមហាផ្ទៃ លោក ខ ខេង សម្តែងក្ដីបារម្ភពីការនាំចូលសារធាតុផ្សំទៅជាគ្រឿងញៀនរាបសិនតោនចូលមកកម្ពុជា និងធាតុគីមីនៅម្ហូបអាហារប៉ះពាល់ដល់ប្រជាពលរដ្ឋ។ លោក ខ ខេង ក៍បានដាស់តឿនដល់មន្រ្តីតាមច្រកព្រំដែនត្រូវតែត្រួតពិនិត្យឱ្យបានល្អិតល្អន់លើសារធាតុគីមីផ្សំផ្សេងៗដែលប្រើប្រាស់លើចំណីអាហារដើម្បីបញ្ចៀសពីផលដល់ប្រជាពលរដ្ឋ។ របាយការណ៍របស់អគ្គនាយកដ្ឋាន ក.ប.ប. នេះ កាលពីឆ្នាំ២០២១ កន្លងទៅ ទំនិញប៉ះពាល់សុខភាពអ្នកប្រើប្រាស់ចំនួនជិត ៣៦.៥ តោន ត្រូវបានរកឃើញនៅតាមទីផ្សារនៅទូទាំងប្រទេស។ ទំនិញខូចគុណភាព រកឃើញនៅក្រុងភ្នំពេញ ខេត្តកណ្តាល ត្បូងឃ្មុំ កំពង់ឆ្នាំង កំពង់ស្ពឺ កោះកុង ក្រចេះ បាត់ដំបង ឧត្តរមានជ័យ និងរតនគិរីជាដើម។
ជុំវិញរឿងនេះ ប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ (IDEA) លោក វ៉ន់ ពៅ មានប្រសាសន៍ថា ពលរដ្ឋភាគច្រើនគាត់គ្មានលទ្ធភាពទើបពួកគាត់ចំណាយទាំងដឹងថា មុខទំនិញទាំងនោះផ្ទុកសារធាតុគីមីប៉ះពាល់សុខភាពក្ដី។ លោកបន្តថា នេះជាការទទួលខុសត្រូវចំពោះអាជ្ញាធរដែលបានអនុញ្ញាតឱ្យមានការនាំចូលមុខទំនិញគ្មានគុណភាពចូលមកកម្ពុជាដោយគ្មានការត្រួតពិនិត្យឱ្យបានច្បាស់លាស់៖ «កម្ពុជាហាក់ដូចជាធូររលុងក្នុងការពិនិត្យលើចំណីអាហារដែលនាំចូលពីក្រៅប្រទេសច្រើនពីគុណភាពនៃការនាំចូល។ មួយទៀត ដោយសារពលរដ្ឋក្រីក្របង្ខំចិត្តទទួលទានរបស់ថោកៗដែលពោរពេញជាតិគីមីនេះ »។
ប្រជាពលរដ្ឋ និងសង្គមស៊ីវិលស្នើដល់អាជ្ញាធរគួរតែមានវិធានប្រកបដោយប្រសិទ្ធភាពដោយចុះត្រួតពិនិត្យអាហារគ្រប់មុខទំនិញផ្ទុកមានធាតុគីមី នឹងចាត់វិធានការលើអ្នកដែលបាននាំចូលទំនិញគ្មានគុណភាពទាំងនោះ ដើម្បីទប់ស្កាត់លើចំណីអាហារមានសារធាតុគីមី នាំចូលពីក្រៅប្រទេសដែលធ្វើឱ្យប៉ះពាល់ដល់សុខភាពរបស់ពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។