ជប៉ុន ចិន និងកូរ៉េខាងត្បូង ជួយពង្រឹងវិស័យសុខាភិបាលកម្ពុជា។ ការជួយពង្រឹងវិស័យសុខាភិបាលនេះ គឺតាមរយៈកិច្ចសហប្រតិបត្តិការជាមួយក្រសួងសុខាភិបាល ដោយផ្ដោតលើវិស័យដោយឡែកពីគ្នា ដូចជា ការប្រយុទ្ធនឹងជំងឺគ្រុនចាញ់ ការវះកាត់ជំងឺបេះដូង និងការបណ្ដុះបណ្ដាលឆ្មប គិលានុបដ្ឋាក កម្មវិធីគាំពារសុខភាពមាតា និងកុមារ និងការកសាងហេដ្ឋារចនាសម្ព័ន្ធ សុខាភិបាលជាដើម។
ចេញសេចក្ដីប្រកាសព័ត៌មានរបស់ក្រសួងសុខាភិបាលចុះថ្ងៃទី៣១ ខែសីហា ឱ្យដឹងថា រដ្ឋមន្ដ្រីក្រសួងសុខាភិបាល លោក ម៉ម ប៊ុនហេង បានជួបដាច់ដោយឡែក ជាមួយមន្ត្រីជាន់ខ្ពស់របស់រដ្ឋាភិបាល ជប៉ុន ចិន និងកូរ៉េខាងត្បូង កាលពីថ្ងៃទី៣០ ខែសីហា ដែលជជែកពីការពង្រឹងគុណភាពសុខាភិបាលកម្ពុជានេះ។
ក្នុងជំនួបរវាង លោក ម៉ម ប៊ុនហេង និងអនុរដ្ឋមន្ដ្រីក្រសួងសុខាភិបាលប្រទេសជប៉ុន លោក យ៉ូហ្សីណូរី អូហ្គូឆិ (Yoshinori Oguchi) ភាគីទាំងពីរ ជជែកផ្ដោតសំខាន់ លើការបណ្ដុះបណ្ដាលឆ្មប គិលានុបដ្ឋាក កម្មវិធីគាំពារសុខភាពមាតា និងកុមារ និងការកសាងហេដ្ឋារចនាសម្ព័ន្ធសុខាភិបាល។
ប្រភពដដែលឱ្យដឹងទៀតថា បច្ចុប្បន្ននេះជំនួយរបស់ជប៉ុនតាមរយៈ អង្គការJICA កំពុងអនុវត្តគម្រោងធ្វើឱ្យមន្ទីរពេទ្យខេត្តបាត់ដំបងប្រសើរឡើង ដែលរួមមាន ការសាងសង់អគារមន្ទីរពេទ្យ ការបំពាក់ឧបករណ៍វេជ្ជសាស្ត្រ និងសម្ភារបរិក្ខារផ្សេងៗ។
រីឯក្នុងជំនួបជាមួយអនុរដ្ឋមន្ដ្រីក្រសួងសុខាភិបាលប្រទេសកូរ៉េខាងត្បូង លោក ហ្គាងលីភ គីម (Ganglip Kim) ភាគីកូរ៉េបានផ្ដល់ជំនួយឥតសំណង ដូចជា ការសាងសង់អគារចក្ខុរោគ នៃមន្ទីរពេទ្យព្រះអង្គឌួង និងកំពុងពង្រីកបន្ថែមជាបន្ដទៀតដល់កម្ពុជា។
មន្ត្រីជាន់ខ្ពស់សុខាភិបាលកូរ៉េ ក៏បានសន្យាថា នៅតែបន្តកិច្ចសហប្រតិបត្តិការផ្នែកពង្រឹងសមត្ថភាពទាំងមន្ត្រីសុខាភិបាល និងមូលដ្ឋានសុខាភិបាលនៅខេត្តបាត់ដំបង ពោធិ៍សាត់ និងខេត្តប៉ៃលិន ផងដែរ។
ក្នុងជំនួបអនុរដ្ឋមន្ដ្រី គណៈកម្មាធិការសុខាភិបាលជាតិចិន លោក វ៉ាង ហេសេង (Wang Hesheng) កាលពីថ្ងៃទី៣០ ខែសីហា ដដែល ភាគីទាំងពីរបានពិភាក្សាលើកិច្ចសហប្រតិបត្តិការផ្នែកប្រយុទ្ធនឹងជំងឺគ្រុនចាញ់ រួមមាន ការពង្រឹងសមត្ថភាពមន្ទីរពិសោធន៍ ការបណ្ដុះបណ្ដាលធនធានមនុស្ស ការទប់ស្កាត់ភាពស៊ាំនៃឱសថ និងការពង្រឹងប្រព័ន្ធតាមដានជំងឺគ្រុនចាញ់ នៅខេត្តស្ទឹងត្រែង។
ភាគីទាំងពីរក៏នឹងបន្តកិច្ចសហប្រតិបត្តិការលើផ្នែកជំងឺសរសៃឈាមបេះដូង ជាពិសេស ការវះកាត់បេះដូងចំហពីកំណើតរបស់កុមារ ការរួមបញ្ចូលផ្នែកជំងឺបេះដូងនេះ ក្នុងគម្រោងសាងសង់មន្ទីរពេទ្យមិត្តភាពកម្ពុជា-ចិន ព្រះកុសុមៈ ព្រមទាំងការបន្ដជួយគាំទ្រលើផ្នែកវះកាត់ជំងឺភ្នែកឡើងបាយផងដែរ៕