ស្វាមីជនរងគ្រោះដោយការវាយប្រហារទឹកអាស៊ីតកាលពី ២ឆ្នាំកន្លងមក គឺលោក អ៊ួង វិបុល បានសម្ដែងការព្រួយបារម្ភម្ដងទៀត នៅពេលដែលទស្សនាវដ្ដីក្នុងស្រុកបានផ្សាយនៅពេលថ្មីៗនេះ ថា ទណ្ឌិត ជា រដ្ឋា កំពុងរស់នៅដោយមានសេរីភាពនៅប្រទេសថៃ ដោយគ្មានការភ័យព្រួយពីការចាប់ខ្លួនឡើយ។
លោក អ៊ួង វិបុល ស្វាមីរបស់លោកស្រី យ៉ា សុខនីម បានមានប្រសាសន៍នៅថ្ងៃសៅរ៍ ទី១២ ខែមិថុនានេះ ថា លោក និងក្រុមគ្រួសាររបស់លោកមានការព្រួយបារម្ភពីសុវត្ថិភាពបន្ថែមទៀតចំពោះព័ត៌មាននេះ។
ទណ្ឌិត ជា រដ្ឋា ជាអតីតអគ្គសេនាធិការរងរបស់កងរាជអាវុធហត្ថផ្ទៃប្រទេស និងក្រុមបក្សពួកចំនួន ៥នាក់ទៀត ត្រូវបានតុលាការឧទ្ធរណ៍កាត់ឲ្យជាប់ទោស កាលពីខែវិច្ឆិកា ឆ្នាំ២០០៩ ឲ្យជាប់ពន្ធនាគាររយៈពេលពី ១៥ឆ្នាំ ទៅដល់ ១៨ឆ្នាំ ផ្សេងៗគ្នា ចំពោះការវាយប្រហារទឹកអាស៊ីតទៅលើលោកស្រី យ៉ា សុខនីម ពីខែឧសភា ឆ្នាំ២០០៨។ លោកស្រី ជា រដ្ឋា ត្រូវបានតុលាការរកឃើញថា ជាអ្នកបញ្ជាការវាយប្រហារទឹកអាស៊ីតនេះ បន្ទាប់ពីដៃគូស្នេហារបស់គាត់ គឺកញ្ញា អ៊ិន សុខលីដា ត្រូវជាក្មួយស្រីរបស់ជនរងគ្រោះបានបែកចិត្តចេញពីគាត់។
បច្ចុប្បន្ននេះ កញ្ញា អ៊ិន សុខលីដា និងក្រុមគ្រួសាររបស់នាងចំនួន ១៧នាក់ កំពុងស្នាក់នៅប្រទេស ម៉ាឡេស៊ី ដើម្បីស្វែងរកសិទ្ធិជ្រកកោននយោបាយនៅប្រទេសទី៣ ដោយមានការភ័យខ្លាចពីសុវត្ថិភាពរបស់ពួកគេ។
លោក អ៊ួង វិបុល មានប្រសាសន៍ថា ៖ «បញ្ហាហ្នឹង ខ្ញុំមិនយល់ត្រង់ថា នៅពេលដែលជនល្មើសត្រូវនៅក្រៅឃុំ ហើយត្រូវបានដើរហើរ មានសិទ្ធិសេរីភាពចេញចូល ពីព្រោះខ្ញុំមើលទស្សនាវដ្ដីប៉ុន្មានថ្ងៃចុងក្រោយនេះ ខ្ញុំទិញមើល ពេលខ្ញុំមកវិញ ធ្វើឲ្យខ្ញុំព្រួយបារម្ភមែនទែន! ព្រោះគេបានសរសេរថា ជនល្មើសចេញចូលនៅព្រំប្រទល់ខ្មែរថៃហ្នឹង គឺថា ដូចជាអត់មានទោសពៃរ៍អ្វីទាំងអស់»។
លោកឧត្ដមសេនីយ៍ឯក គៀត ច័ន្ទថារិទ្ធ ជាមន្ត្រីអ្នកនាំពាក្យនៃអគ្គស្នងការដ្ឋាននគរបាលជាតិប្រទេសកម្ពុជា មានប្រសាសន៍នៅថ្ងៃច័ន្ទ ទី១៤ ខែមិថុនានេះ ថា ប៉ូលិសនៅមិនទាន់បានចាប់ខ្លួនទណ្ឌិតម្នាក់ណាឡើយ ទាក់ទងនឹងករណីជះទឹកអាស៊ីតនេះ ដោយសារជនល្មើសបានភៀសខ្លួនទៅក្រៅប្រទេស។
ប៉ូលិសអ៊ិនធើប៉ូល (INTERPOL) បានដាក់ការតាមចាប់លោកស្រី ជា រដ្ឋា ពីឆ្នាំ២០០៨ អំពីឧក្រិដ្ឋកម្មប្រឆាំងជីវិត និងសុខភាពនៅក្នុងគេហទំព័ររបស់ខ្លួន។ លោកស្រី ជា រដ្ឋា មានអាយុ ៤៥ឆ្នាំ កម្ពស់ ១,៥៧ម៉ែត្រ និងទម្ងន់ ៥២គីឡូក្រាម។
លោកថា ទោះបីប៉ូលិសអ៊ិនធើប៉ូលរបស់កម្ពុជាបានផ្ញើដីកាចាប់ខ្លួនលោកស្រី ជា រដ្ឋា ទៅប្រទេសថៃ ជាកន្លែងដែលប៉ូលិសសង្ស័យថា គាត់កំពុងលាក់ខ្លួននោះក៏ដោយ ក៏នៅតែមិនទាន់មានការចាប់ខ្លួន ពីព្រោះកម្ពុជា និងថៃមិនមានកិច្ចសហការល្អជាមួយគ្នា។
លោក គៀត ច័ន្ទថារិទ្ធ បានបញ្ជាក់ថា ៖ «គឺយើងមានការឈឺចាប់ណាស់ អ្នកណាក៏ដោយដែលធ្វើបាបប្រជាពលរដ្ឋយើង ជាពិសេសអ្នកដែលមានដីកាតុលាការអីតាមចាប់អ៊ីចឹងទៀត គឺថា យើងអត់មានព្រងើយកន្តើយទេ ប៉ុន្តែគ្រាន់តែជម្រាបថា លទ្ធភាពរបស់សមត្ថកិច្ច វាអាស្រ័យលើរឿងជាក់ស្ដែងនីមួយៗ មិនមែនថា នៅកម្ពុជាយើងទេ ដូចខ្ញុំធ្លាប់បញ្ជាក់ នៅអាមេរិកក៏នៅមានមុខសញ្ញាសេសសល់មួយចំនួនដែលរត់គេច ហើយអាមេរិកចាប់មិនទាន់បានដូចគ្នាហ្នឹង!»។
លោក គៀត ច័ន្ទថារិទ្ធ បន្ថែមថា សមត្ថកិច្ចប៉ូលិសនឹងយកចិត្តទុកដាក់ផ្ដល់សុវត្ថិភាពជូនគ្រួសារជនរងគ្រោះ និងបន្តការស្វែងរកចាប់ខ្លួនជនល្មើស។
លោក អ៊ួង វិបុល បន្ថែមថា ភរិយារបស់គាត់កំពុងព្យាបាលនៅប្រទេសវៀតណាមបន្តទៀត ហើយបន្ទាប់ពីការព្យាបាល លោកស្រីនឹងទៅប្រទេសម៉ាឡេស៊ី រួមជាមួយក្រុមគ្រួសាររបស់គាត់ ដោយគាត់មិនហ៊ានរស់នៅប្រទេសកម្ពុជាទេ។
លោក អ៊ួង វិបុល បានឲ្យដឹងថា ៖ «បើតាមខ្ញុំគិតមើល ពីព្រោះអ្នកទាំង ១៨ហ្នឹង ទោះបីគាត់មកស្រុកខ្មែរវិញ គាត់ក៏មិនហ៊ានរកស៊ីអី ធ្វើអី ពីព្រោះនៅតែក្នុងផ្ទះ ហើយការដើរហើរ គេហៅថា ដូចភ្នែកនៅកញ្ចឹងក។ ការដែលគាត់មិនមកវិញ ហើយគាត់ជ្រកកោននៅទីនោះ គឺបើប្រៀបធៀបទៅ គាត់នៅទីនោះវាមានការលំបាក ប៉ុន្តែខាងផ្លូវចិត្តគាត់មិនសូវជាភ័យប៉ុន្មានទេ បើសិនជាគាត់មកស្រុកខ្មែរវិញ ជនល្មើសនៅក្រៅឃុំដដែល ហើយដើរហើរដោយសេរី អ៊ីចឹងគឺគាត់លំបាកទាំងផ្លូវចិត្ត និងផ្លូវកាយ»។
ប្រធានកម្មវិធីអង្កេតសិទ្ធិមនុស្សរបស់សមាគមសិទ្ធិមនុស្ស អាដហុក លោក ចាន់ សុវ៉េត មានប្រសាសន៍នៅថៃ្ងច័ន្ទ ទី១៤ ខែមិថុនានេះ ថា ប្រសិនបើរដ្ឋាភិបាលមានបំណងចាប់ខ្លួនលោកស្រី ជា រដ្ឋា រដ្ឋាភិបាលពិតជាអាចចាប់ខ្លួនបាន ប៉ុន្តែកន្លងមកជនល្មើសជាមន្ត្រីរាជការមានអំណាចច្រើនតែរួចផុតពីសំណាញ់ច្បាប់។
លោក ចាន់ សុវ៉េត បានអះអាងថា ៖ «កន្លងមកយើងឃើញថា ករណីដែលលេចធ្លោក្នុងការដែលរដ្ឋាភិបាលកម្ពុជាចាត់វិធានការ គឺយើងឃើញតែករណី ហេង ពៅ មួយទេ ដែលយើងឃើញថា មានការចាត់វិធានការទាំងពីថ្នាក់ជាតិ រហូតដល់ថ្នាក់តំបន់ ស្វែងរកជននោះមកផ្ដន្ទាទោសតាមច្បាប់ ហើយអ្នកប្រព្រឹត្តបទល្មើសជាមន្ត្រីរាជការ ពីមុនមកមានឋានៈ មានលុយមានកាក់បែបនេះ យើងគិតថា កន្លងមកនេះ វាពិបាកក្នុងការចាត់វិធានការតាមផ្លូវច្បាប់ណាស់ ដោយសារតែអ្នកទាំងអស់នោះមានបក្សពួក មានខ្នង បើទោះបីជានៅក្នុងកម្ពុជា ក៏យើងមិនទាន់ដឹងថា តើយើងមានលទ្ធភាពចាប់ដែរ ព្រោះករណីនិទ្ទណ្ឌភាពដូចអ៊ីចឹងគឺមានច្រើននៅក្នុងស្រុកយើង»។
ក្រសួងមហាផ្ទៃកម្ពុជាកំពុងធ្វើសេចក្ដីព្រាងច្បាប់ប្រឆាំងការវាយប្រហារទឹកអាស៊ីត ដោយជនល្មើសអាចនឹងជាប់ពន្ធនាគារអស់មួយជីវិត ចំពោះការវាយប្រហារទឹកអាស៊ីត៕