អង្គការសហប្រជាជាតិនៅកម្ពុជា គាំទ្រយុទ្ធនាការថ្នាក់ជាតិរបស់រដ្ឋាភិបាលកម្ពុជា ក្នុងការចាក់វ៉ាកសាំងជូនប្រជាពលរដ្ឋ។ ប៉ុន្តែអង្គការនេះ ផ្ដល់អនុសាសន៍ថា កម្ពុជាគួរចាក់វ៉ាក់សាំងជូនមនុស្សពេញវ័យឲ្យអស់សិន មុននឹងគិតគូរចាក់ជូនកុមារ និងយុវវ័យ។ ក្រសួងសុខាភិបាលថា កុមារ និងយុវវ័យ ក្នុងក្រុមគោលដៅដែលត្រូវទទួលបានវ៉ាក់សាំង មានចំនួនជិត ២ លាននាក់។
តាមរយៈ ឯកសារព័ត៌មាន នៅថ្ងៃទី៣ ខែសីហា អង្គការសហប្រជាជាតិ យោងគោលការណ៍ណែនាំរបស់អង្គការសុខភាពពិភពលោក (WHO) ដើម្បីធ្វើជាសម្អាង បានរម្លឹករដ្ឋាភិបាលកម្ពុជាថា ក្នុងស្ថានភាពដែលពិភពលោកកំពុងខ្វះវ៉ាក់សាំង កម្ពុជាគួរបន្តផ្តល់អាទិភាព ក្នុងការចាក់វ៉ាក់សាំងជូនមនុស្សពេញវ័យ និងអ្នកមានហានិភ័យខ្ពស់ក្នុងការឆ្លងជំងឺនេះ រួមមានបុគ្គលិកសង្គម និងសុខាភិបាលនៅជួរមុខ ជនចាស់ជរា និងអ្នកដែលងាយរងគ្រោះបំផុត។
អង្គការសហប្រជាជាតិបន្តថា ទៅថ្ងៃអនាគតទើបមានតម្រូវការចាំបាច់ក្នុងការចាក់វ៉ាក់សាំងជូនកុមារនិងយុវវ័យទាំងនេះ។
ទោះជាយ៉ាងនេះក្ដីអង្គការនេះថាកុមារដែលគួរយកចិត្តទុកដាក់ខ្ពស់និងគួរទទួលបានវ៉ាក់សាំងបង្ការជំងឺកូវីដ-១៩ ជាបន្ទាន់គឺកុមារដែលមានបញ្ហាជំងឺរ៉ាំរ៉ៃនិងងាយឈឺធ្ងន់បើឆ្លងជំងឺនេះហើយពួកគាត់គួរទទួលបានវ៉ាក់សាំងក្រោយមនុស្សពេញវ័យដែលមានស្ថានភាពដូចគ្នានេះ។
សាររបស់អង្គការសហប្រជាជាតិនេះធ្វើឡើងក្រោយពេលដែល «យុទ្ធសាស្រ្តផ្ការីក» របស់រដ្ឋាភិបាលកម្ពុជាក្នុងការចាក់វ៉ាក់សាំងចិនស៊ីណូវ៉ាក់ (Sinovac) ជូនកុមារ និងយុវវ័យចាប់ពីអាយុ ១២ឆ្នាំ ដល់ ១៧ឆ្នាំ បានចាប់ផ្តើមកាលពីថ្ងៃទី១ ខែសីហា។ ក្រសួងសុខាភិបាលថា កុមារនិងយុវវ័យក្នុងក្រុមគោលដៅដែលត្រូវទទួលបានវ៉ាក់សាំងមានចំនួន១.៩៦៦.៩៣១នាក់ ក្នុងនោះ ៤ភាគរយ ឬប្រមាណ ៨ម៉ឺននាក់ បានទទួលវ៉ាក់សាំងនេះរួចហើយក្នុងរយៈពេល ៣ថ្ងៃដើមខែនេះ។
រហូតមកដល់ពេលនេះ អង្គការសុខភាពពិភពលោកបានទទួលស្គាល់វ៉ាក់សាំងបង្ការជំងឺកូវីដ-១៩ ចំនួន ៦មុខហើយរួមទាំងវ៉ាក់សាំងចិនស៊ីណូហ្វាម (Sinopharm) និងស៊ីណូវ៉ាក់ផង។ ប៉ុន្តែ វ៉ាក់សាំងទាំងនេះគឺសម្រាប់ចាក់ជូនមនុស្សពេញវ័យប៉ុណ្ណោះមិនមែនសម្រាប់កុមារនោះទេ។
ទោះជាយ៉ាងនេះក្ដី អង្គការសហប្រជាជាតិថា វ៉ាក់សាំងទាំងអស់ដែលអង្គការសុខភាពពិភពលោកទទួលស្គាល់ឲ្យប្រើប្រាស់ក្នុងគ្រាអាសន្ន និងជាបន្ទាន់នេះបានបង្ហាញថាអាចទប់ទល់នឹងមេរោគបំប្លែងថ្មីឈ្មោះ ដែលតា (Delta) និងមេរោគបំប្លែងថ្មីឯទៀតបានយ៉ាងល្អបំផុតដោយការពារកុំឲ្យមនុស្សឈឺធ្ងន់និងចូលសម្រាកនៅពេទ្យ។
ប៉ុន្តែ កន្លងមក មានប្រទេសមួយចំនួន ត្អូញត្អែរអំពីប្រសិទ្ធភាពទាបនៃវ៉ាក់សាំងរបស់ចិន។ មន្រ្តីជាន់ខ្ពស់ផ្នែកសុខាភិបាលរបស់ចិនក៏ទទួលស្គាល់បែបនេះដែរ។ នៅកម្ពុជា ក្នុងខែកក្កដាកន្លងទៅចំនួនអ្នកឆ្លងថ្មីនៅតែមានជាមធ្យមជិត ៩០០នាក់ និងស្លាប់ ២៥នាក់ជាមធ្យមប្រចាំថ្ងៃ ទោះកម្ពុជាចាក់វ៉ាក់សាំងជូនពលរដ្ឋក្រុមគោលដៅ បានជាង ៧០ភាគរយក្តី។ ភាគច្រើនលើសលុបនៃវ៉ាក់សាំងដែលកម្ពុជាចាក់ជូនពលរដ្ឋខ្មែរគឺជាវ៉ាក់សាំងចិន។ កាលពីថ្ងៃទី១ ខែសីហា លោកនាយករដ្ឋមន្រ្តី ហ៊ុន សែន បានប្រកាសឲ្យចាក់វ៉ាក់សាំងអង់គ្លេសអាស្រ្តាហ្សេណេកា (AstraZeneca) ជាដូសទី៣ បន្ថែមលើវ៉ាក់សាំងចិន ដែលបានចាក់ ២ដូសរួច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។