ក្រសួង​សុខាភិបាល​ថា មិន​ទាន់​រក​ឃើញ​ករណី​វីរុស​កូរ៉ូណា​ថ្មី​នៅ​កម្ពុជា​ទេ ត្រឹម​ថ្ងៃ​ទី២ កុម្ភៈ

ដោយ ទីន ហ្សាការីយ៉ា
2020-02-02
អ៊ីម៉ែល
មតិ
Share
បោះពុម្ព
រដ្ឋមន្ត្រី​ក្រសួង​សុខាភិបាល លោក ម៉ម ប៊ុនហេង ថ្លែង​ក្នុង​ទិវា​ពិភពលោក​នៃ​អ្នក​បរិច្ចាគ​ឈាម ថ្ងៃ​ទី​១៤ មិថុនា ឆ្នាំ​២០១៥ នា​រាជធានី​ភ្នំពេញ។
រដ្ឋមន្ត្រី​ក្រសួង​សុខាភិបាល លោក ម៉ម ប៊ុនហេង ថ្លែង​ក្នុង​ទិវា​ពិភពលោក​នៃ​អ្នក​បរិច្ចាគ​ឈាម ថ្ងៃ​ទី​១៤ មិថុនា ឆ្នាំ​២០១៥ នា​រាជធានី​ភ្នំពេញ។
RFA

ក្រសួង​សុខាភិបាល​អះអាង​ថា គិត​ត្រឹម​ល្ងាច​ថ្ងៃ​ទី​២ ខែ​កុម្ភៈ ក្រសួង​ពុំ​ទាន់​រក​ឃើញ​ករណី​វីរុស​កូរ៉ូណា​ថ្មី​ទៀត​នោះ​ទេ ក្រៅពី​បុរស ជនជាតិ​ចិន​ម្នាក់​ដែល​កំពុង​សម្រាក​ព្យាបាល នៅ​ក្នុង​មន្ទីរពេទ្យ​ខេត្ត​ព្រះសីហនុ។នាយកដ្ឋាន​ប្រយុទ្ធ​នឹង​ជំងឺឆ្លង​របស់​ក្រសួង​សុខាភិបាល ប្រកាស​ថា សម្រាប់​អ្នកជំងឺ​ជនជាតិ​ចិន​ដែល ផ្ទុក​វីរុស​កូរ៉ូណា​នោះ បន្ត​មាន​សុខភាព​ល្អ គ្មាន​រោគសញ្ញា​ផ្លូវ​ដង្ហើម​គួរ​ឱ្យ​កត់​សំគាល់​នោះ​ទេ។

ចំណែក​អ្នក​ប៉ះពាល់ និង​ប្រាស្រ័យ​ទាក់ទង​ជាមួយ​អ្នកជំងឺ និង​អ្នក​ជិះ​យន្តហោះ​ជាមួយ​អ្នកជំងឺ រហូតមកដល់​ពេលនេះ ក៏​ពុំ​មាន​អ្នកណា​ចេញ​រោគសញ្ញា​អ្វី​នៅឡើយ​ដែរ។ នាយកដ្ឋាន​មួយ​នេះ​អះអាង​ថា មន្ត្រី​ជំនាញ នឹង​បន្ត​តាមដាន​សុខភាព​អ្នក​ទាំងអស់​នោះ​ជា​រៀងរាល់ថ្ងៃ។

ជំងឺ​រលាក​ប្រព័ន្ធ​ដង្ហើម ដែល​បង្ក​ដោយ​វីរុស​កូរ៉ូណា​ថ្មី​នេះ បាន​ផ្ទុះឡើង​នៅ​ទីក្រុង​វូហាន ខេត្ត​ហ៊ូបេ (Hubei) ប្រទេស​ចិន ចាប់​តាំងពី​ចុងខែ​ធ្នូ ឆ្នាំ​២០១៩។ គិត​ត្រឹម​ថ្ងៃ​ទី​២ ខែ​កុម្ភៈ វីរុស​កូរ៉ូណា បាន​សម្លាប់​មនុស្ស ៣០៤​នាក់​ក្នុង​ប្រទេស​ចិន និង​ម្នាក់ទៀត​នៅ​ប្រទេស​ហ្វីលីពីន ហើយ​អ្នក​ឆ្លង​វីរុស​នេះ បាន​កើន​ដល់​ជិត ១​ម៉ឺន ៥​ពាន់​នាក់​ហើយ ។ ករណី​ឆ្លង​មេរោគ​នេះ បាន​រីក​រាលដាល ដល់​ប្រទេស​ចំនួន២៦ នៅ​លើ​ពិភពលោក រួម​ទាំង​ប្រទេស​ចិន​ផង​ដែរ។

រដ្ឋាភិបាល​លោក ហ៊ុន សែន ពុំ​មាន​វិធានការ​បិទ​ជើង​ហោះហើរ និង​ជម្លៀស​និស្សិត​ខ្មែរ​ពី​ប្រទេស​ចិន ដូច​អ្វី​ដែល​រដ្ឋាភិបាល​ប្រទេស​នានា ​កំពុង​​ធ្វើ​នោះ​ទេ ទោះបីជា​អង្គការ​សុខភាព​ពិភព​លោក ប្រកាស​ដាក់​ករណី​ផ្ទុះ​រីក​រាលដាល​នៃ​ជំងឺ​រលាក​ផ្លូវ​ដង្ហើម​បង្កឡើង​ដោយ​វីរុស​កូរ៉ូណា​ប្រភេទ​ថ្មី ជា​បញ្ហា​អាសន្ន​សាកល​ផ្នែក​សុខភាព​ក៏ដោយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល