កសិករ​ចិញ្ចឹម​ទា​នៅ​ខេត្ត​កំពង់ចាម​ព្រួយ​បារម្ភ​ខ្លាច​កើត​មាន​ជំងឺ​ផ្ដាសាយ​បក្សី

ដោយ សូត សុខប្រាថ្នា
2015-11-19
អ៊ីម៉ែល
មតិ
Share
បោះពុម្ព
សត្វ​ទា​របស់​កសិករ​នៅ​ស្រុក​ជើងព្រៃ ខេត្ត​កំពង់ចាម។ រូបថត​កាល​ពី​ខែ​ធ្នូ ឆ្នាំ​២០១៤
សត្វ​ទា​របស់​កសិករ​នៅ​ស្រុក​ជើងព្រៃ ខេត្ត​កំពង់ចាម។ រូបថត​កាល​ពី​ខែ​ធ្នូ ឆ្នាំ​២០១៤
RFA/Saut Sokprathna

ក្រោយ​ពេល​ជំងឺ​ផ្ដាសាយ​បក្សី​បាន​ផ្ទុះ​ឡើង​ជា​ថ្មី​ទៀត​នៅ​ពេល​ថ្មីៗ​នេះ ទៅ​លើ​សត្វ​ទា​របស់​កសិករ​នៅ​ខេត្ត​បាត់ដំបង និង​ខេត្ត​សៀមរាប ធ្វើ​ឲ្យ​ប្រជា​កសិករ​ចិញ្ចឹម​សត្វ​ទា​នៅ​ស្រុក​បាធាយ ខេត្ត​កំពង់ចាម កើត​មាន​ក្តី​បារម្ភ។ យ៉ាង​ណា ប្រធាន​មន្ទីរ​កសិកម្ម​ខេត្ត​កំពង់ចាម អះអាង​ថា ជំងឺ​ផ្ដាសាយ​បក្សី គឺ​មិន​មាន​កើត​ឡើង​ទេ ហើយ​មន្ត្រី​ជំនាញ​កំពុង​យក​ចិត្ត​ទុក​ដាក់​ចំពោះ​បញ្ហា​នេះ។

ប្រជា​កសិករ​មួយ​ចំនួន​ដែល​ចិញ្ចឹម​សត្វ​ទា​នៅ​ឃុំ​សណ្ដែក ស្រុក​បាធាយ បាន​ត្រៀម​ខ្លួន​ការពារ​សត្វ​ទា​របស់​ពួក​គេ​មិន​អាច​ឲ្យ​ឆ្លង​ជំងឺ​ផ្សេងៗ ពិសេស​ជំងឺ​ផ្ដាសាយ​បក្សី។ ពួក​គេ​បាន​ចាត់​វិធានការ​ដូចជា សម្អាត​ទ្រុង​ទា​ឲ្យ​ស្អាត បាញ់​ថ្នាំ​ការពារ និង​ត្រៀម​ថ្នាំ​ចាក់​វ៉ាក់សាំង ជាដើម។ កិច្ច​ការពារ​សត្វ​បក្សី​ចិញ្ចឹម​របស់​ខ្លួន​ពេល​នេះ គឺ​ស្រប​ពេល​ខាង​ក្រសួង​បាន​ប្រកាស​ថា ករណី​ជំងឺ​ផ្ដាសាយ​បក្សី អេច្ឆ.ហ្វាយ.អ៊ិន.វ័ន (H5N1) បាន​ផ្ទុះ​ឡើង​ជា​ថ្មី​ទៀត​នៅ​ខេត្ត​បាត់ដំបង និង​ខេត្ត​សៀមរាប។

ប្រជា​កសិករ​ម្នាក់​នៅ​ភូមិ​ស្វាយព្រៃ ឃុំ​សណ្ដែក លោក យឿន ស្រៀង មាន​ប្រសាសន៍​ថា លោក​បារម្ភ​នៅ​ពេល​ឮ​ដំណឹង​ថា ជំងឺ​ផ្ដាសាយ​បក្សី​បាន​កើត​ឡើង​លើ​សត្វ​ទា​ជា​ថ្មី​ទៀត​នោះ។ កសិករ​ចិញ្ចឹម​សត្វ​ទា​យក​ពង​ជិត ១​ពាន់​ក្បាល​រូប​នេះ​បន្ត​ថា ចាប់​តាំង​ពី​មាន​បញ្ហា​នេះ​មក គឺ​ឃើញ​មាន​ពេទ្យ​សត្វ​នៅ​ក្នុង​ភូមិ និង​មន្ត្រី​ជំនាញ តែង​មក​សាកសួរ​ប្រជាពលរដ្ឋ និង​បាន​ណែនាំ​ឲ្យ​កសិករ​ចេះ​ពី​របៀប​បង្ការ​កុំ​ឲ្យ​ឆ្លង​ជំងឺ​នេះ ឬ​ក៏​កើត​មាន​ជំងឺ​នេះ​ឡើង៖ «ធ្វើ​ម៉េច​ឲ្យ​មាន​ថ្នាំ​មាន​អី​សម្រាប់​គ្នា​អ្នក​ចិញ្ចឹម ដែល​គ្នា​ច្រើន​តែ​ប៉ះ​ជំងឺ​ហ្នឹង»

ភូមិ​ស្វាយព្រៃ ស្ថិត​នៅ​ក្នុង​ឃុំ​សណ្ដែក ជា​ភូមិ​ចុង​កាត់​មាត់​ញក​មួយ ហើយ​ប្រជាពលរដ្ឋ​ប្រមាណ ៧០​ភាគរយ​ជា​អ្នក​ប្រកប​របរ​ចិញ្ចឹម​ទា​យក​កូន និង​យក​ពង។ កាល​ពី​ឆ្នាំ​២០១៤ ជំងឺ​ផ្ដាសាយ H5N1 ធ្លាប់​ផ្ទុះ​ឡើង​នៅ​ក្នុង​ឃុំ​នេះ​ម្តង​រួច​មក​ហើយ។ កាល​ណោះ មន្ត្រី​ជំនាញ​សម្រេច​កម្ទេច​ចោល​សត្វ​ទា​ជាច្រើន​រយ​ក្បាល​ដែល​បាន​ឆ្លង និង​សង្ស័យ​ថា​មាន​ជំងឺ​ផ្ដាសាយ​បក្សី។

ស្រដៀង​គ្នា​នេះ កសិករ​ម្នាក់​ទៀត លោក ហ៊ិន ហាយ ក៏​កំពុង​មាន​ក្តី​បារម្ភ​ដែរ ត្បិត​អី​កាល​ពី​ឆ្នាំ​កន្លង​ទៅ ជំងឺ​ផ្ដាសាយ​បក្សី​បាន​កើត​ឡើង​ចំពោះ​សត្វ​ទា​របស់​លោក​ម្តង​រួច​មក​ហើយ ដែល​ធ្វើ​ឲ្យ​ទា​របស់​លោក​រាប់​រយ​ក្បាល​បាន​ងាប់។ លោក​ថា ប្រសិន​បើ​រឿង​នេះ​កើត​ឡើង​ម្តង​ទៀត ប្រជា​កសិករ​មាន​តែ​អង្គុយ​យំ​តែ​ប៉ុណ្ណោះ ពីព្រោះ​ដើម​ទុន​ដែល​ពលរដ្ឋ​យក​មក​ចិញ្ចឹម​ទា គឺ​ខ្ចី​បុល​ពី​គ្រឹះស្ថាន​ហិរញ្ញវត្ថុ៖ «ដល់​នាទី​នេះ ដល់​ឮ​ថា​មិន​សូវ​ស្រួល​ចេះ​តែ​ភ័យ​ទៀត​ហើយ»

ឆ្លើយ​តប​ក្តី​បារម្ភ​របស់​កសិករ ប្រធាន​មន្ទីរ​កសិកម្ម​ខេត្ត​កំពង់ចាម លោក គឹម សាវឿន មាន​ប្រសាសន៍​បញ្ជាក់​ថា ជំងឺ​ផ្ដាសាយ​បក្សី​ដែល​ផ្ទុះ​ឡើង​នៅ​ខេត្ត​ចំនួន​ពីរ​នោះ គឺ​គ្មាន​វត្តមាន​នៅ​ខេត្ត​កំពង់ចាម ឡើយ​មក​ទល់​ពេល​នេះ។ លោក​បន្ត​ថា ខាង​មន្ត្រី​ជំនាញ​កំពុង​យក​ចិត្ត​ទុក​ដាក់​បន្ត​ទៀត ដោយ​ចាត់​ឲ្យ​មន្ត្រី​ថ្នាក់​ក្រោម​តាម​ដាន​ជាប់​ជានិច្ច​ជាមួយ​ប្រជា​កសិករ។ បន្ថែម​ពី​លើ​នេះ ក៏​មាន​ភ្នាក់ងារ​បសុពេទ្យ​នៅ​តាម​មូលដ្ឋាន ដើម្បី​ណែនាំ​ប្រជាពលរដ្ឋ​ពី​របៀប​ការពារ​បក្សី រួម​នឹង​សុវត្ថិភាព​របស់​ពួក​គេ៖ «ឆ្នាំ​នេះ​អត់​មាន​កើត​ទេ ឆ្នាំ​មុន​កើត​នៅ​បាធាយ មែន តែ​ឆ្នាំ​នេះ​អត់​កើត​ទេ»

ជាមួយ​គ្នា​នេះ ប្រធាន​មន្ទីរ​កសិកម្ម​ដដែល ស្នើ​ឲ្យ​ប្រជាពលរដ្ឋ​សហការ​ជាមួយ​អាជ្ញាធរ ក្នុង​ការ​ផ្សព្វផ្សាយ​អំពី​របៀប​បង្ការ។ ម្យ៉ាង​ទៀត កសិករ​ត្រូវ​រាយការណ៍​មក​អាជ្ញាធរ ឬ​មន្ត្រី​ជំនាញ​គ្រប់​ពេល នៅ​ពេល​មាន​ហេតុការណ៍​អាក្រក់​កើត​ឡើង​ចំពោះ​បក្សី​ចិញ្ចឹម​របស់​ពួក​គាត់ ដើម្បី​ងាយ​ស្រួល​ខាង​លោក​ចាត់​វិធានការ។

សេចក្ដី​ប្រកាស​ស្ដីពី​ការ​កំណត់​តំបន់​ជំងឺ​ផ្ដាសាយ​បក្សី​នៃ​ក្រសួង​កសិកម្ម រុក្ខាប្រមាញ់ និង​នេសាទ កាល​ពី​ថ្ងៃ​ទី​១៤ ខែ​វិច្ឆិកា បាន​កំណត់​ថា ខេត្ត​ចំនួន​ពីរ គឺ​ខេត្ត​បាត់ដំបង និង​ខេត្ត​សៀមរាប មាន​ផ្ទុះ​ឡើង​វិញ​នូវ​ជំងឺ​ផ្ដាសាយ​បក្សី។ ក្រសួង​កសិកម្ម តម្រូវ​ឲ្យ​មន្ត្រី​ជំនាញ​ផ្នែក​សត្វ បំផ្លាញ​ចោល​នូវ​សត្វ​ឈឺ​នៅ​តាម​តំបន់​ដែល​មាន​ផ្ទុះ​ជំងឺ​ផ្ដាសាយ​បក្សី​តាម​វិធានការ និង​បច្ចេកទេស​បសុពេទ្យ និង​ត្រូវ​ត្រួត​ពិនិត្យ​ចំពោះ​ការ​ចរាចរ​សត្វ​នៅ​តំបន់​ដែល​មាន​ផ្ទុះ​ជំងឺ​ផ្ដាសាយ​បក្សី​ឲ្យ​បាន​ត្រឹមត្រូវ និង​មាន​ប្រសិទ្ធភាព។

ស្រប​គ្នា​នោះ មន្ត្រី​ជំនាញ​បសុសត្វ​របស់​មន្ទីរ​កសិកម្ម​ខេត្ត​សៀមរាប ក៏​បាន​ចុះ​ទៅ​សម្លាប់​សត្វ​ទា​ប្រមាណ​ជាង ៣.០០០​ក្បាល ដែល​កសិករ​ចិញ្ចឹម​នៅ​ឯ​ទី​វាល​មួយ​កន្លែង​ក្នុង​ភូមិ​ច្រនៀង ឃុំ​ព្រៃជ្រូក ចម្ងាយ​ប្រមាណ ៤០​គីឡូ​ម៉ែត្រ​ភាគ​ខាង​លិច​ពី​ទី​រួម​ខេត្ត​សៀមរាប កាល​ពី​ល្ងាច​ថ្ងៃ​ទី​១៧ ខែ​វិច្ឆិកា កន្លង​ទៅ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល