សង្គមស៊ីវិលស្នើរដ្ឋមន្ត្រីអាមេរិកសម្របសម្រួលបញ្ហារំលោភសិទ្ធិមនុស្សនៅកម្ពុជា
2016.01.24
បដាសរសេរអក្សរទាមទារឲ្យដោះលែងលោក ហុង សុខហួរ ដែលអ្នកគាំទ្រលោកលើកតវ៉ានៅខាងមុខសាលាដំបូងរាជធានីភ្នំពេញ កាលពីព្រឹកថ្ងៃទី២ តុលា ឆ្នាំ២០១៥។
អង្គការសង្គមស៊ីវិលកម្ពុជា ចំនួន ៥ នៅថ្ងៃទី២៤ ខែមករា នេះ ផ្ញើលិខិតមួយច្បាប់ជូនរដ្ឋមន្ត្រីក្រសួងការបរទេសសហរដ្ឋអាមេរិក លោក ចន ឃែរី (John Kerry) ដែលនឹងមកបំពេញទស្សនកិច្ចផ្លូវការនៅកម្ពុជា ចន្លោះពីថ្ងៃទី២៥ និងទី២៦ ខែមករា។ លិខិតនេះ ស្នើសុំបទអន្តរាគមន៍របស់សហរដ្ឋអាមេរិក តាមរយៈលោក ចន ឃែរី ឲ្យជួយសម្របសម្រួលភាពតានតឹងនៃការរំលោភបំពានសិទ្ធិមនុស្សនៅកម្ពុជា។
អង្គការសង្គមស៊ីវិលទាំង៥ នោះរួមមាន សហព័ន្ធសិទ្ធិមនុស្សអន្តរជាតិ (International Federation for Human Rights) អង្គការអាដហុក (ADHOC) អង្គការលីកាដូ (LICADHO) វេទិកាសិទ្ធិមនុស្ស និងការអភិវឌ្ឍអាស៊ី (Asian Forum for Human Rights and Development) និងមជ្ឈមណ្ឌលសិទ្ធិមនុស្សកម្ពុជា (Cambodian Center for Human Rights)។
ខ្លឹមសារក្នុងលិខិតនេះ បានរៀបរាប់ពីការធ្លាក់ចុះនៃការប្រតិបត្តិលទ្ធិប្រជាធិបតេយ្យ និងការគោរពសិទ្ធិមនុស្សនៅកម្ពុជា ក្នុងរយៈពេលចុងក្រោយ ដូចជាការឃុំខ្លួន ការវាយធ្វើបាប ការដកអភ័យឯកសិទ្ធិ និងការតាមចាប់សកម្មជន និងមេដឹកនាំគណបក្សប្រឆាំង។
លិខិតដដែលនេះ សង្គមស៊ីវិលស្នើលោក ចន ឃែរី លើកយកបញ្ហានេះទៅជជែកជាមួយលោកនាយករដ្ឋមន្ត្រី ហ៊ុន សែន ដើម្បីឲ្យលោក ហ៊ុន សែន ជ្រាបពីបញ្ហារំលោភសិទ្ធិមនុស្សនៅកម្ពុជា កាន់តែច្បាស់។
សង្គមស៊ីវិលអំពាវនាវឲ្យលោក ចន ឃែរី ដាក់សម្ពាធទៅលើរដ្ឋាភិបាលកម្ពុជា ឲ្យបញ្ចប់ការគំរាម ការរំលោភលើប្រព័ន្ធតុលាការ ការប្រើអំពើហិង្សាលើសកម្មជនបក្សប្រឆាំង និងដោះលែងអ្នកគាំទ្រ និងសមាជិកបក្សប្រឆាំងឲ្យមានសេរីភាពឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- តុលាការចោទប្រកាន់ជំនួយការផ្ទាល់លោក ហ៊ុន សែន គឺលោក ដួង តារា ពីបទ «ឆបោក»
- អ្នកឃ្លាំមើល ស្នើអាជ្ញាធរឱ្យបង្ហាញការស៊ើបអង្កេតលើទីប្រឹក្សាលោក ហ៊ុន សែន ពាក់ព័ន្ធករណីទទួលលុយរត់ការឡើងតំណែង
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
