ក្រុមគ្រួសារ និងអ្នកគាំទ្រលោក រ៉ាត់ រត្នមុនី មួយចំនួន បាននាំគ្នាទៅតវ៉ានៅមុខស្ថានទូតរុស្ស៊ីជាលើកទី១១ នៅថ្ងៃទី២៧ មីនានេះ ដើម្បីសុំអន្តាគមន៍ឱ្យមានការដោះលែងរូបលោក។
ភរិយាលោក រ៉ាត់ រត្នមុនី អ្នកស្រី ឡុង គីមហ៊ាង ថ្លែងថា អ្នកស្រី និងអ្នកតវ៉ាផ្សេងទៀត មិនត្រូវបានអនុញ្ញាតឱ្យឈរលើកបដានៅមុខស្ថានទូតរុស្ស៊ីឡើយ ដោយអាជ្ញាធរតម្រូវឱ្យទៅឈរនៅម្ខាងផ្លូវវិញ ហើយការស្រែកទាមទារដោយប្រើមេក្រូ ក៏មិនត្រូវបានអនុញ្ញាតផងដែរ។ អ្នកស្រីបន្តថា ដូចលើកមុនៗដែរ មន្ត្រីស្ថានទូតរុស្ស៊ីមិនបានចេញមកជួបក្រុមអ្នកតវ៉ានោះឡើយ។
ទោះជាយ៉ាងណា អ្នកស្រីអះអាងថា ប្រសិនបើការតវ៉ានៅសប្ដាហ៍ក្រោយនៅតែគ្មានលទ្ធផលបែបនេះទៀត អ្នកស្រីគ្រោងនឹងប្រមូលផ្តុំគ្នាតវ៉ានៅមុខស្ថានទូតរុស្ស៊ីជារៀងរាល់ថ្ងៃធ្វើការតែម្ដង ពោលគឺរយៈពេល៥ ថ្ងៃក្នុងមួយសប្ដាហ៍ ចាប់ពីថ្ងៃច័ន្ទ ដល់ថ្ងៃសុក្រ៖ «ក្រោយពីជជែកគ្នាទៅ យើងសម្រេច ទាមទារតែរុស្ស៊ីមួយទេ ព្រោះដើម្បីឱ្យរុស្ស៊ីទទួលខុសត្រូវការងាររបស់ពួកគេ រឿងរបស់ពួកគេ។ ហើយយើងនៅតែជំរុញឱ្យតុលាការស៊ើបអង្កេតដោយមានការកោះហៅ Russia Today ឬក៏រុស្ស៊ីហ្នឹង មកឆ្លើយបំភ្លឺ ហើយដោះលែងប្តីខ្ញុំ»។
ប្រធានសហព័ន្ធសហជីពកម្មករសំណង់កម្ពុជា លោក រ៉ាត់ រត្នមុនី ត្រូវបានតុលាការក្រុងភ្នំពេញចោទប្រកាន់ពីបទ “ញុះញង់ឱ្យមានការរើសអើង” ដែលប្រឈមនឹងការជាប់ពន្ធនាគាររហូតដល់ ៣ ឆ្នាំ ប្រសិនបើតុលាការសម្រេចឱ្យលោកមានទោសមែននោះ។
អាជ្ញាធររបបក្រុងភ្នំពេញបានចោទសកម្មជនសិទ្ធិការងាររូបនេះថា បានឱ្យលុយប្រភព ដើម្បីនិយាយប្រឌិតសាច់រឿងក្នុងភាពយន្តឯកសារជួញដូរផ្លូវភេទ ដែលមានចំណងជើងថា “ម្តាយខ្ញុំ លក់ខ្ញុំ” ដែលលោកបានជួយផលិតឱ្យសារព័ត៌មាន RT (Russia Today) របស់រុស្ស៊ី។
ទោះជាយ៉ាងណា ក្រៅពីការចោទប្រកាន់នេះ អាជ្ញាធររបបក្រុងភ្នំពេញមិនបានបង្ហាញភស្តុតាងដែលបង្ហាញពីពិរុទ្ធភាពរបស់លោកនោះទេ ខណៈតួអង្គម្នាក់ក្នុងភាពយន្តឯកសារធ្លាប់បានអះអាងថា នាងមិនដែលបានទទួលលុយកាក់ពីលោក រ៉ាត់ រត្នមុនី ដើម្បីនិយាយកុហកនោះឡើយ។
ប្រធានសហភាពសហជីពកម្ពុជា លោក រ៉ុង ឈុន ជឿជាក់ថា លោក រ៉ាត់ រត្នមុនី មិនបានប្រព្រឹត្តកំហុសដូចការចោទប្រកាន់របស់អាជ្ញាធរនោះឡើយ ព្រោះលោកត្រឹមតែជាអ្នកបកប្រែឱ្យសារព័ត៌មានរុស្ស៊ីប៉ុណ្ណោះ។ លោកស្នើដល់តុលាការឱ្យពិនិត្យមើលករណីនេះឱ្យបានច្បាស់លាស់ និងស្នើឱ្យមានការកោះហៅភាគីពាក់ព័ន្ធមកបំភ្លឺ ដើម្បីផ្ដល់យុត្តិធម៌ដល់លោក រ៉ាត់ រត្នមុនី វិញ៖ «យើងនឹងបន្តស្វះស្វែងរកអន្តរាគមន៍ធ្វើយ៉ាងម៉េចឱ្យគាត់បានស្ថិតនៅក្រៅឃុំ មានសេរីភាពឡើងវិញ ព្រោះយើងមើលឃើញមិនខុសការអះអាងរបស់គ្រួសារគាត់ទេ។ គាត់គ្រាន់តែជាអ្នកបកប្រែឱ្យកាសែតរុស្ស៊ី ហើយត្រូវបានអាជ្ញាធរចោទប្រកាន់ ចាប់គាត់ដាក់ពន្ធនាគារ វាជារឿងមួយអយុត្តិធម៌សម្រាប់លោក រ៉ាត់ រត្នមុនី»។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានថ្លែងថា សំណុំរឿងនេះកំពុងស្ថិតក្នុងដៃតុលាការ ដូច្នេះគ្មានភាគីណាមួយអាចដាច់សម្ពាធ ឬអន្តរាគមន៍ឱ្យមានការដោះលែងលោក រ៉ាត់ រត្នមុនី ឡើយ។ លោកអះអាងថា ប្រសិនបើតុលាការរកមិនឃើញពីពិរុទ្ធភាពអ្វីទេនោះ តុលាការនឹងដោះលែងសកម្មជនសិទ្ធិការងាររូបនេះវិញជាក់ជាមិនខាន។
ទោះជាយ៉ាងណា អ្នកស្រី ឡុង គីមហ៊ាង ស្នើយ៉ាងទទូចដល់តុលាការ អនុញ្ញាតឱ្យស្វាមីរបស់អ្នកស្រីបាននៅក្រៅឃុំបណ្ដោះអាសន្ន មុននឹងបន្តនីតិវិធីផ្សេងទៀត។ មូលហេតុគឺដោយសារលោក រ៉ាត់ រត្នមុនី ជាអ្នករកចំណូលសំខាន់សម្រាប់ផ្គត់ផ្គង់គ្រួសារ ហើយម្យ៉ាងកូនប្រុសតូចរបស់អ្នកស្រីត្រូវការឪពុកមើលថែទាំ។
គិតត្រឹមចុងខែមីនានេះ សកម្មជនសិទ្ធិការងារលោក រ៉ាត់ រត្នមុនី បានជាប់ឃុំក្នុងពន្ធនាគារ អស់រយៈពេលជាង ៣ខែមកហើយ ខណៈបណ្តឹងសុំនៅក្រៅឃុំរបស់លោកបានទៅដល់ដៃតុលាការកំពូលរួចហើយ កាលពី២ សប្ដាហ៍មុន។ ទាំងក្រុមគ្រួសារ និងមេធាវី សុទ្ធតែសង្ឃឹមថា តុលាការកំពូលនឹងអនុញ្ញាតឱ្យលោក រ៉ាត់ រត្នមុនី បាននៅក្រៅឃុំបណ្ដោះអាសន្ន ដើម្បីឱ្យលោកអាចវិលទៅជួបជុំក្រុមគ្រួសារឡើងវិញ៕
