សមាជិកអង្គការសង្គមស៊ីវិលនៃសម្ព័ន្ធកំណែទម្រង់ការបោះឆ្នោត ហៅកាត់ថា អឺរ៉ា (ERA) អំពាវនាវដល់គណៈកម្មាធិការជាតិរៀបចំការបោះឆ្នោត (គ.ជ.ប) និងគណៈបញ្ជាការសន្តិសុខអចិន្ត្រៃយ៍សម្រាប់ការពារការចុះឈ្មោះបោះឆ្នោត ឲ្យជួយការពារសន្តិសុខ និងភាពសុខដុមនីយកម្មដល់ពលរដ្ឋទាំងអស់ធ្វើការចុះឈ្មោះបោះឆ្នោតដោយមិនមានការរំខាន និងភិតភ័យ។
ការអំពាវនាវនេះ ធ្វើឡើងតាមរយៈសេចក្តីថ្លែងការណ៍រួមស្ដីពីសន្តិសុខសម្រាប់ប្រជាពលរដ្ឋទៅចុះឈ្មោះបោះឆ្នោតឆ្នាំ២០១៦ ចេញផ្សាយនៅថ្ងៃទី៦ កញ្ញា។
ក្រុមអង្គការសង្គមស៊ីវិលយល់ឃើញថា ការចល័តកងកម្លាំងតាមរថយន្ត និងទូក ព្រមទាំងឧទ្ធម្ភាគចក្រជាច្រើនគ្រឿងនៅរាជធានីភ្នំពេញ មុនថ្ងៃចុះឈ្មោះបោះឆ្នោតមួយថ្ងៃ ដោយមិនមានការជូនដំណឹងជាមុន គឺជារូបភាពមួយដែលអាចប៉ះពាល់អារម្មណ៍ និងសេរីភាពក្នុងការធ្វើដំណើររបស់ពលរដ្ឋក្នុងការទៅចុះឈ្មោះបោះឆ្នោត ហើយការបិទកំណាត់ផ្លូវជាតិលេខ២ នៅសង្កាត់ចាក់អង្រែ កាលពីថ្ងៃទី៥ កញ្ញា កន្លងទៅ មិនត្រឹមតែរំខានដល់អ្នកធ្វើដំណើរនោះទេ ប៉ុន្តែថែមទាំងជាការរារាំងអ្នកដែលមានបំណងទៅធ្វើការចុះឈ្មោះបោះឆ្នោតទៀតផង។
អង្គការសង្គមស៊ីវិលទាំងនោះរួមមាន សមាគមអាដហុក (ADHOC) អង្គការលីកាដូ (LICADHO) អង្គការនិកហ្វិច (NICFEC) អង្គការខុមហ្វ្រែល (COMFREL) មជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព (PDP) ក្រុមការងារសិទ្ធិលំនៅឋាន សម្ព័ន្ធដើម្បីសុចរិតភាព និងគណនេយ្យភាពសង្គម (CISA) និងមជ្ឈមណ្ឌលសម្ព័ន្ធការងារ និងសិទ្ធិមនុស្ស (CENTRAL)។
សមាជិកអង្គការសង្គមស៊ីវិលនៃសម្ព័ន្ធកំណែទម្រង់ការបោះឆ្នោត ក៏អំពាវនាវដល់ពលរដ្ឋទាំងអស់ត្រូវមានទំនុកចិត្តចូលរួម និងអញ្ជើញទៅចុះឈ្មោះបោះឆ្នោតឲ្យបានគ្រប់ៗគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។