អាជ្ញាធរ៖ ក្រុមហ៊ុន​ចម្ការ​អំពៅ​នៅ​ព្រះវិហារ​លួច​លាក់​ជួល​កុមារ​ធ្វើ​ការ​ខុស​ច្បាប់

ដោយ ទេព សុរ៉ាវី
2014.03.25
អំពៅ ព្រះវិហារ ៦១០ ១៥-មីនា-២០១៤៖ គ្រឿងចក្រ​របស់​ក្រុមហ៊ុន​អភិវឌ្ឍន៍​ចិន ឈ្មោះ ឡាន ហ្វេង កំពុង​ដាំ​ដើម​អំពៅ​នៅ​លើ​ដី​សម្បទាន​សេដ្ឋកិច្ច​​នៅ​ស្រុក​ត្បែងមានជ័យ ខេត្ត​ព្រះវិហារ។
RFA/Tep Soravy

អាជ្ញាធរ​ខេត្ត​ព្រះវិហារ និង​មន្ត្រី​អង្គការ​សង្គម​ស៊ីវិល កំពុង​ស៊ើប​អង្កេត​ក្រុមហ៊ុន អ៊ី ហេង ដែល​គ្រប់គ្រង​ចម្ការ​អំពៅ​ឲ្យ​ក្រុមហ៊ុន​ចិន ឡាន ហ្វេង ដែល​វិនិយោគ​ដាំ​អំពៅ​នៅ​ក្នុង​ឃុំ​ប្រមេរ ស្រុក​ត្បែងមានជ័យ បន្ទាប់​ពី​មាន​សាក្សី​ម្នាក់​ធ្វើ​ការ​នៅ​ក្នុង​ចម្ការ​នោះ​ដាក់​ពាក្យ​បណ្ដឹង ថា​ក្រុមហ៊ុន​បាន​ជួល​កម្មករ​ជា​កុមារ​ក្រោម​អាយុ ១៥​ឆ្នាំ ចាប់​តាំង​ពី​ខែ​ធ្នូ ឆ្នាំ​២០១៣។

ក្រុមហ៊ុន​ចម្ការ​អំពៅ អ៊ី ហេង កំពុង​ស្ថិត​ក្រោម​ការ​ស៊ើប​អង្កេត ថា​កំពុង​ជួល​កម្មករ​ជា​កុមារ​ជាង ២០​នាក់​ធ្វើ​ការ​ខុស​ច្បាប់។

កាល​ពី​ថ្ងៃ​ទី​២៤ មីនា មន្ត្រី​ការិយាល័យ​ប្រឆាំង​ការ​ជួញ​ដូរ​មនុស្ស និង​ការពារ​អនីតិជន​នៃ​ស្នងការដ្ឋាន​នគរបាល​ខេត្ត​ព្រះវិហារ មន្ត្រី​មន្ទីរ​កិច្ចការ​នារី និង​នគរបាល​ស្រុក​ត្បែងមានជ័យ ជាច្រើន​នាក់ បាន​ចុះ​ទៅ​ចម្ការ​ក្រុមហ៊ុន អ៊ី ហេង និង​បាន​រក​ឃើញ​កុមារ ៥​នាក់ ដែល​មាន​អាយុ​ពី ១៤​ឆ្នាំ ដល់ ១៧​ឆ្នាំ កំពុង​ធ្វើ​ការ​នៅ​ទីនោះ។

ប្រធាន​ការិយាល័យ​ប្រឆាំង​ការ​ជួញ​ដូរ​មនុស្ស និង​ការពារ​អនីតិជន​នៃ​ស្នងការ​នគរបាល​ខេត្ត លោកស្រី ប្រាំង ធីតា បញ្ជាក់​ថា ករណី​នេះ​ជា​អំពើ​ខុស​ច្បាប់ ហើយ​លោកស្រី​នឹង​ធ្វើ​ការ​ស៊ើប​អង្កេត​ករណី​នេះ​បន្ថែម​ទៀត មុន​នឹង​កសាង​សំណុំ​រឿង​ទៅ​តុលាការ៖ «ក្នុង​ច្បាប់​ការងារ​មិន​ឲ្យ​កុមារ​ទៅ​ធ្វើ​ពលកម្ម​នៅ​តាម​ក្រុមហ៊ុន​រោងចក្រ​អី​អ៊ីចឹង​ទេ ហើយ​បាន​កម្រៃ​ដូច​មនុស្ស​ពេញ​វ័យ»

លោកស្រី​បន្ត​ថា តាម​ការ​បញ្ជាក់​ពី​អ្នក​ម៉ៅការ​កម្មករ​ប្រាប់​ថា កុមារ​ទាំង​នោះ​មក​ស្នាក់​នៅ​ជាមួយ​ឪពុក​ម្តាយ​ដែល​ស៊ី​ឈ្នួល​នៅ​ក្នុង​ចម្ការ ហើយ​ពួក​គេ​បាន​ស្ម័គ្រ​ចិត្ត​ធ្វើ​ការ​ដោយ​ខ្លួន​ឯង ដោយ​គ្មាន​ការ​បង្ខំ​ពី​ក្រុមហ៊ុន​ទេ។ ការ​ចុះ​ទៅ​ស៊ើប​អង្កេត​នេះ ធ្វើ​ឡើង​ឆ្លើយ​តប​តាម​ការ​បញ្ជា​ពី​ព្រះរាជ​អាជ្ញា​តុលាការ​ខេត្ត​ព្រះវិហារ លោក លី លន់ បន្ទាប់​ពី​ទទួល​ព័ត៌មាន​ពី​ស្ត្រី​ម្នាក់​ដែល​ធ្វើ​ការ​នៅ​ក្នុង​ចម្ការ​អំពៅ ប្ដឹង​ថា ក្រុមហ៊ុន​កំពុង​ជួល​កុមារ​ធ្វើ​ជា​កម្មករ​តាំង​ពី​ដើម​ខែ​ធ្នូ ឆ្នាំ​២០១៣។

លោកស្រី អឿ ប៊ុនថានី អាយុ ៥៤​ឆ្នាំ ដែល​បាន​រាយការណ៍​ទៅ​កម្លាំង​ប៉ូលិស និង​តុលាការ ពី​ការ​ជួល​កុមារ​ឲ្យ​ធ្វើ​ការ​នោះ ប្រាប់​ថា កម្លាំង​សមត្ថកិច្ច​ចុះ​ទៅ​ស៊ើប​អង្កេត​ខុស​ពេល គឺ​ចុះ​នៅ​ពេល​ដែល​កុមារ​ទាំង​នោះ​ចេញ​ទៅ​ធ្វើ​ការ​នៅ​ចម្ការ​អំពៅ​បាត់ ទើប​មិន​ឃើញ​ពួក​គេ។ ប្រសិន​បើ​មន្ត្រី​ជំនាញ​ទាំង​នោះ​ចុះ​ទៅ​ពិនិត្យ​នៅ​ពេល​បាយ ឬ​ពេល​យប់ កុមារ​ពី ១០​ឆ្នាំ ទៅ ១៥​ឆ្នាំ នឹង​នៅ​ជុំ​គ្នា​ក្នុង​កន្លែង​ស្នាក់​នៅ​របស់​ក្រុមហ៊ុន។

លោកស្រី អឿ ប៊ុនថានី ត្រូវ​បាន​ក្រុមហ៊ុន អ៊ី ហេង បណ្ដេញ​ចេញ​កាល​ពី​ថ្ងៃ​សុក្រ សប្ដាហ៍​មុន បន្ទាប់​ពី​គាត់​ប្ដឹង​ទៅ​ប៉ូលិស​ប៉ុស្តិ៍​ថា មាន​កុមារ ១៩​នាក់​កំពុង​ធ្វើ​ការ​នៅ​ចម្ការ​តាំង​ពី​ខែ​ធ្នូ។ ប៉ុន្តែ លោកស្រី​បដិសេធ​មិន​ចាក​ចេញ និង​នៅ​តែ​ក្រាញ​រស់​នៅ​ជាមួយ​ប្ដី​របស់​គាត់​ជា​ជនជាតិ​ថៃ ដែល​ធ្វើ​ការ​នៅ​ទី​នោះ​ទៀត។

តាម​ការ​អះអាង​កាល​ពី​យប់​ម៉ោង​៨ ថ្ងៃ​ទី​២៤ មីនា គាត់​ឃើញ​កុមារ​សរុប ២២​នាក់ គឺ​កើន​ពី​លើស​លើក​មុន​ថែម ៣​នាក់​ទៀត ហើយ​មាន​អាយុ​ចន្លោះ​ពី ១០​ឆ្នាំ​ទៅ ១៥​ឆ្នាំ។ ពួក​គេ​ត្រូវ​បំបែក​គ្នា​ឲ្យ​ទៅ​ធ្វើ​ការ​នៅ​ចម្ការ​អំពៅ​នៅ​ពេល​ថ្ងៃ ហើយ​មេការ​កម្មករ​បញ្ជា​ឲ្យ​ពួក​គេ​ហូប​បាយ​នៅ​ទី​នោះ ដោយ​មិន​ចាំបាច់​មក​ហូប​នៅ​រោង​ដូច​មុន ទំនង​គេចវេស​ពី​ការ​ស៊ើប​អង្កេត​របស់​សមត្ថកិច្ច៖ «ម្សិលមិញ ប៉ូលិស​ខេត្ត​គាត់​មក​ធ្វើ​ការ​ស៊ើប​អង្កេត​ក្រុមហ៊ុន​និយាយ​ថា កូន​ក្មេង​ត្រូវ​បាន​បញ្ជូន​ទៅ​ផ្ទះ​វិញ​ហើយ គឺ​មាន​តែ ៥​នាក់​ទេ។ ឥឡូវ​ភូត​ស្ថាប័ន​គេ កូន​ក្មេង​នៅ​ទាំងអស់ ២២​នាក់»

ស្ត្រី​រូប​នេះ​ប្រាប់​ថា កុមារ​ទាំង​នោះ​ទទួល​បាន​ប្រាក់ ១​ម៉ឺន ៦​ពាន់​រៀល​ក្នុង​មួយ​ថ្ងៃ ខណៈ​មនុស្ស​ចាស់​ធ្វើ​ការ​បាន ២​ម៉ឺន​រៀល។ លោកស្រី​ប្រាប់​ថា មេការ​ជនជាតិ​ថៃ ម្នាក់​បាន​ឲ្យ​មេការ​កម្មករ​ខ្មែរ​ម្នាក់​ដើរ​ប្រមូល​កុមារ​តូចៗ​ពី​តាម​ភូមិ ទៅ​ធ្វើ​ការ​នៅ​ចម្ការ។ មេការ​ខ្មែរ​ម្នាក់​នោះ​នឹង​ទទួល​ប្រាក់ ១​ពាន់​រៀល​ក្នុង​ថ្ងៃ​ទៅ​លើ​កុមារ​ម្នាក់​ដែល​ធ្វើ​ការ​នៅ​ទី​នោះ។

អ្នក​សម្រប​សម្រួល​អង្គការ​សិទ្ធិ​មនុស្ស​អាដហុក (Adhoc) ប្រចាំ​ខេត្ត​ព្រះវិហារ លោក ឡោ ចាន់ ឲ្យ​ដឹង​ថា លោក​បាន​ទទួល​ពាក្យ​បណ្ដឹង​ពី លោកស្រី ប៊ុនថានី រួច​ហើយ កាល​ពី​ថ្ងៃ​ទី​២៤ មីនា ក្នុង​កិច្ចការ​ជួយ​កុមារ​ទាំង​នោះ។ លោក​ថា ករណី​នេះ​ជា​ការ​កេង​ប្រវ័ញ្ច​ពលកម្ម​កុមារ និង​ផ្ទុយ​ពី​អនុសញ្ញា​អន្តរជាតិ ច្បាប់​ប្រឆាំង​ការ​ជួញ​ដូរ​កុមារ និង​ច្បាប់​ការងារ៖ «សង្ឃឹម​តិចតួច​ចំពោះ​ចំណាត់​ការ​របស់​អាជ្ញាធរ ត្រង់​ថា អាជ្ញាធរ​ទទួល​បាន​ព័ត៌មាន​នេះ​ហើយ បែរ​ជា​ខាង​ប៉ូលិស​ប៉ុស្តិ៍​ទៅ​ប្រាប់​ក្រុមហ៊ុន​ទៅ​វិញ ហើយ​ក្រុមហ៊ុន​បាន​ដឹង​ជា​មុន។ ដូច្នេះ ក្រុមហ៊ុន​មាន​វិធាន​ការ គឺ​បាន​បណ្ដោះ​ក្មេងៗ​ទាំង​នោះ​ឲ្យ​បាន​ចេញ​ពី​កន្លែង​ហ្នឹង​សិន ហើយ​ខណៈ​ប៉ូលិស​ចុះ​ទៅ​ស៊ើប​អង្កេត»

មេ​បញ្ជាការ​ស្តីទី​កង​រាជ​អាវុធហត្ថ​ស្រុក​ត្បែងមានជ័យ លោក ឈឹម អយ បញ្ជាក់​ថា ពិត​ជា​មាន​ការ​កេង​ប្រវ័ញ្ច​ពលកម្ម​កុមារ​មែន​នៅ​ក្នុង​ចម្ការ​អំពៅ​ចិន នោះ ហើយ​លោក​នឹង​ដឹក​នាំ​កម្លាំង​ចុះ​ទៅ​ស៊ើប​អង្កេត​នៅ​ទី​នោះ​ក្នុង​ពេល​ឆាប់ៗ។

វិទ្យុ​អាស៊ីសេរី មិន​អាច​ទាក់ទង​តំណាង​ក្រុមហ៊ុន អ៊ី ហេង បាន​ទេ​នៅ​ថ្ងៃ​ទី​២៥ មីនា។ តែ​បើ​តាម​ការ​អះអាង​ពី​មន្ត្រី​ប្រឆាំង​ការ​ជួញ​ដូរ​មនុស្ស និង​ការពារ​អនីតិជន​ខេត្ត មេ​ក្រុម​កម្មករ​បាន​ប្រាប់​ថា កុមារ​ទាំង​នោះ​ធ្វើ​ការ​ស្រាលៗ ដើម្បី​បាន​ប្រាក់​បន្ថែម​សម្រាប់​ឪពុក​ម្តាយ​របស់​ពួក​គេ ក្រោយ​សម្រាក​ពី​ការ​សិក្សា។

ក្រុមហ៊ុន អ៊ី ហេង បាន​គ្រប់គ្រង​ចម្ការ​អំពៅ​ឲ្យ​ក្រុមហ៊ុន​ចិន មួយ​ឈ្មោះ ឡាន ហ្វេង។ ក្រុមហ៊ុន​នេះ​ទទួល​ដី​សម្បទាន​សេដ្ឋកិច្ច​ពី​រដ្ឋាភិបាល​ជាង ៩​ពាន់​ហិកតារ នៅ​ឃុំ​ប្រមេរ ក្នុង​ស្រុក​ត្បែងមានជ័យ កាល​ពី​ខែ​វិច្ឆិកា ឆ្នាំ​២០១១ ហើយ​បាន​ធ្វើ​សកម្មភាព​ឈូស​ឆាយ​ដី​ព្រៃ​ដាំ​អំពៅ កាល​ពី​ខែ​មេសា ឆ្នាំ​២០១២ ធ្វើ​ឲ្យ​ប៉ះពាល់​ដល់​ដី​សហគមន៍​ជនជាតិ​ដើម​ភាគ​តិច​កួយ ជាង ៣០០​គ្រួសារ ប្រកប​របរ​កសិកម្ម​ប្រពៃណី ព្រៃ​ជំនឿ និង​ធនធាន​ធម្មជាតិ ដែល​ធ្លាប់​អាស្រ័យ​ផល និង​តំបន់​ប្រាសាទ​មួយ​ចំនួន​ទៀត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។