របាយការណ៍ UNHCR: កម្ពុជា​ឈរ​នៅ​លំដាប់​ទី៣ ជា​ប្រទេស​មាន​ជន​ភៀស​ខ្លួន​ច្រើន​ជាង​គេ​ក្នុង​តំបន់

ដោយ មាន ឫទ្ធិ
2020-06-19
អ៊ីម៉ែល
មតិ
Share
បោះពុម្ព
ក្របមុខ​នៃ​បាយការណ៍ស្តីពី​និន្នាការ​ជា​សកល​នៃ​ការផ្លាស់​ទី​កន្លែងដោយបង្ខំក្នុងឆ្នាំ២០១៩ (Global Trends, Forced Displacement in 2019) របស់​អង្គការ​ UNHCR។
ក្របមុខ​នៃ​បាយការណ៍ស្តីពី​និន្នាការ​ជា​សកល​នៃ​ការផ្លាស់​ទី​កន្លែងដោយបង្ខំក្នុងឆ្នាំ២០១៩ (Global Trends, Forced Displacement in 2019) របស់​អង្គការ​ UNHCR។
UNHCR

របាយការណ៍ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន ហៅកាត់ថា UNHCR រកឃើញថា គិតត្រឹមដំណាច់ឆ្នាំ២០១៩ កម្ពុជា មានជនភៀសខ្លួនច្រើនជាងគេទី៣ នៅក្នុងតំបន់ បន្ទាប់ពីប្រទេសមីយ៉ាន់ម៉ា (Myanmar) ឬភូមា និងវៀតណាម។ មន្ត្រីរដ្ឋាភិបាលប្រតិកម្មថា ចំនួន​ច្រើននៃជនភៀសខ្លួនមកពីកម្ពុជានេះ គឺដោយសារតែគណបក្សប្រឆាំងយកបញ្ហាសុំសិទ្ធិជ្រកកោន ដើម្បីបានទៅរស់នៅប្រទេសទីបី ធ្វើជាជំនួញនយោបាយ។ ក៏ប៉ុន្តែ មន្ត្រីសិទ្ធិមនុស្សយល់ថា បញ្ហា​នេះគឺជារឿងរ៉ាវគួរឲ្យ ព្រួយបារម្ភ ដោយសារតែមានការកើនឡើង​ករណីនៃការធ្វើ​ទុក្ខ​បុក​ម្នេញ​ផ្នែក​នយោបាយ ឥត​ស្រាកស្រាន្ត​នៅ​ក្នុង​ប្រទេស​កម្ពុជា​ពី​សំណាក់​អាជ្ញាធរ​របប​លោក ហ៊ុន សែន។

មនុស្សចំនួនជិត ១ម៉ឺន២ពាន់នាក់ (១១.៩៣១) មកពីកម្ពុជាទទួលបានឋានៈការពារ និងសិទ្ធិជាជន​ភៀស​ខ្លួន​ដោយ​ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន ហៅកាត់ថា UNHCR គិត​ត្រឹម​ដំណាច់ឆ្នាំ២០១៩។ នេះបើយោងតាមរបាយការណ៍ចុងក្រោយ ស្តីពី​និន្នាការ​ជា​សកល​នៃ​ការផ្លាស់​ទី​កន្លែងដោយបង្ខំក្នុងឆ្នាំ២០១៩ (Global Trends, Forced Displacement in 2019) ទើប​នឹង​ចេញ​ផ្សាយ​កាល​ពី​ថ្ងៃ​ទី១៨ មិថុនា ដោយអង្គការ UNHCR នៅពីរថ្ងៃមុនពិភព​លោក​ប្រារព្វ​ទិវា​ជន​ភៀសខ្លួនពិភពលោក ថ្ងៃទី២០ មិថុនា។

របាយការណ៍ដដែលឲ្យដឹងដែរថាបច្ចុប្បន្ន មានសំណុំរឿងសុំសិទ្ធិជ្រកកោនពីសំណាក់ ពលរដ្ឋមកពី​ប្រទេស​កម្ពុជាសរុបចំនួនជិត៨៥០ករណី ដែលអង្គការ UNHCR កំពុងពិចារណាថាតើគួរត្រូវផ្តល់​សិទ្ធិ​ជា​ជនភៀសខ្លួនដល់ពួកគេ ឬយ៉ាងណា។ ជារួម តួលេខនេះ ធ្វើឲ្យកម្ពុជាឈរនៅលំដាប់ទី៣ ក្លាយជាប្រទេសដែលមានជនភៀសខ្លួនច្រើនជាងគេបង្អស់ ក្នុងតំបន់ បន្ទាប់ពីប្រទេសមីយ៉ាន់ម៉ា ឬ​ភូមា និងវៀតណាម។

អនុប្រធានគណៈកម្មាធិការសិទ្ធិមនុស្សរបស់រដ្ឋាភិបាល លោក ជិន ម៉ាលីន សុំមិនធ្វើ អត្ថាធិប្បាយ​ពី​តួលេខ​នេះទេ តែលោកចោទថា គណបក្សប្រឆាំងបានយកបញ្ហា សុំសិទ្ធិជ្រកកោននេះធ្វើជា​ជំនួញ​នយោបាយ ដើម្បីឲ្យអ្នកគាំទ្រខ្លួន បានទៅរស់​នៅ​ប្រទេសទីបី៖ «ខ្ញុំមិនទាន់អាចធ្វើការ​អត្ថាធិប្បាយ​បានទេ ពីព្រោះអីត្រូវការ ដើម្បីសិក្សាមើល​ពី​យន្តការនៃ​ការវាយតម្លៃរបស់គេ។ គេ​គិត​តាំង​ពី​ឆ្នាំ​ណា​ម៉ោ? ហើយ​យន្តការហ្នុង គេផ្អែកទៅលើ​មូលដ្ឋានស្អីខ្លះ? ក៏ប៉ុន្តែ គ្រាន់តែទាញការ​ចាប់​អារម្មណ៍​ពាក់ព័ន្ធ​នឹង​អ្នក​សុំ​សិទ្ធិ​ជ្រក​កោន​ហ្នុង»

ផ្ទុយពីការអះអាងរបស់លោក ជិន ម៉ាលីន នេះ សម្រាប់នាយករងទទួលបន្ទុកផ្នែកឃ្លាំមើល សិទ្ធិ​មនុស្ស​នៃ​អង្គការ​លីកាដូ លោក អំ សំអាត មើលឃើញថា ចំនួនច្រើននៃ ជន​ភៀស​​​​​​​​​​​​​​​​​​​​​​​​​​​​​​​​​​ខ្លួនមកពីកម្ពុជា​នេះ គឺដោយសារតែមានការកើនឡើងករណីធ្វើទុក្ខបុកម្នេញ ឥតស្រាកស្រានផ្នែកនយោបាយពី​សំណាក់អាជ្ញាធររបបលោក ហ៊ុន សែន។ លោកថា បញ្ហានេះគឺជារឿងរ៉ាវគួរឲ្យព្រួយបារម្ភ ព្រោះ​គ្មាន​ពលរដ្ឋ​ណា​ម្នាក់ ចង់ទៅរស់នៅប្រទេសទីបី ប្រសិន​បើគ្មានការគំរាម​កំហែង​ណា​មួយ​នៅ​ក្នុង​ស្រុក​នោះ​ទេ៖ «ចំនួនទាំងអស់នេះ ប្រហែលជាកើតឡើងច្រើនក្រោយឆ្នាំ២០១៧ ក្រោយពីមានការ​រម្លាយ​នៃ​អតីតៈ​គណបក្សប្រឆាំង។ យើង​ឃើញ​ថាសហគមន៍អន្តរជាតិ រួម​ទាំង​អង្គការ​សហប្រជាជាតិ ក៏​មានការលើកឡើងអំពីការឲ្យបញ្ឈប់ការចាប់ខ្លួន ឬក៏ការធ្វើ​ទុក្ខ​បុក​ម្នេញ​នៃ​អតីតៈ​សកម្មជន​នៃ​គណបក្សប្រឆាំងអីជាដើម។ ដោយសារ​តែ​បញ្ហា​ទាំង​អស់​នេះ​ហើយ​ដែល​យើង​ឃើញ​ថា អ្នកនយោបាយ សកម្មជន​នយោបាយ​គណបក្ស​ប្រឆាំង​ជា​ច្រើន​បាន​សុំ​សិទ្ធិ​ជ្រកកោន​នៅ​ក្រៅ»

លោក អំ សំអាត ស្នើឲ្យអ្នកនយោបាយខ្មែរទាំងអស់គួរតែគិតគូរពិចារណាឡើងវិញ ដើម្បីកុំឲ្យ​ពលរដ្ឋ​ខ្មែរ ជួបផលលំបាក ឬប៉ះពាល់ទៅដល់សិទ្ធិជាពលរដ្ឋរបស់ពួកគេ ជាពិសេស​ចំពោះ​អ្នក​ដែល​មាន​និន្នាការប្រឆាំងនឹងរដ្ឋាភិបាល។ លោកថា កម្ពុជានៅមិនទាន់អនុវត្តបានពេញលេញ​ស្រប​តាម​បទ​ប្បញ្ញត្តិ​ដូចមានចែងក្នុងអនុសញ្ញា អន្តរជាតិឆ្នាំ១៩៥១ ស្តីពីឋានៈជនភៀសខ្លួន នៅឡើយ​ទេ។

ក្រាហ្វិកព័ត៌មាន៖ ជនភៀសខ្លួន និង​អ្នកសុំ​សិទ្ធិជ្រកកោន​នៅ​តំបន់​អាស៊ីអាគ្នេយ៍ គិតត្រឹមដំណាច់ឆ្នាំ២០១៩។ (ប្រភពទិន្នន័យ៖ UNHCR)
ក្រាហ្វិកព័ត៌មាន៖ ជនភៀសខ្លួន និង​អ្នកសុំ​សិទ្ធិជ្រកកោន​នៅ​តំបន់​អាស៊ីអាគ្នេយ៍ត្រឹមដំណាច់ឆ្នាំ២០១៩។ (ប្រភពទិន្នន័យ៖ UNHCR) RFA

របបលោក ហ៊ុន សែន រងការរិះគន់ និងថ្កោលទោសថាបានរំលោភបំពានអនុសញ្ញាអន្តរជាតិ ឆ្នាំ១៩៥១ ស្តីពីឋានៈជនភៀសខ្លួន ក្រោយពីមានករណីចាប់បញ្ជូនជនជាតិភាគតិច ម៉ុងតាញ៉ា​កាន់​សាសនាគ្រិស្តទៅឲ្យអាជ្ញាធរវៀតណាម ករណីចាប់ខ្លួនសកម្មជនបក្ស ប្រឆាំងអ្នកស្រី សំ សុខា និង​សកម្ម​ជនសិទ្ធិការងារ លោក រ៉ាត់ រ័ត្នមុន្នី ពីប្រទេសថៃឲ្យ មកទទួលទោសនៅកម្ពុជា បើទោះបីជា​អ្នក​ទាំង​នោះទទួលបានសិទ្ធិគាំពារជាជនភៀសខ្លួន ពីអង្គការ UNHCR ហើយក៏ដោយ។

ចាប់តាំងពីក្រោយការរម្លាយគណបក្ស​សង្គ្រោះ​ជាតិ​កាល​ពី​ចុងខែវិច្ឆិកា ឆ្នាំ២០១៧ រហូតមកទល់​បច្ចុប្បន្ន របបលោក ហ៊ុន សែន បាន​បង្កើន​យុទ្ធនាការ​កម្ចាត់ និងគាស់រម្លើង ប្រជាធិបតេយ្យ​នៅ​កម្ពុជា ដោយបន្តធ្វើទុក្ខបុកម្នេញ តាម​ចាប់​ខ្លួនសកម្មជន និងក្រុមអ្នកគាំទ្រគណបក្សប្រឆាំង ជាច្រើននាក់ ដាក់ពន្ធនាគារឥតស្រាកស្រាន។ ឧត្តមស្នងការ​អង្គការសហប្រជាជាតិ​ទទួលបន្ទុក​សិទ្ធិមនុស្ស ​គណៈកម្មាការ​អឺរ៉ុប សហរដ្ឋអាមេរិក និងអង្គការឃ្លាំមើលសិទ្ធិមនុស្សអន្តរជាតិ សុទ្ធតែ​រកឃើញ និងថ្កោលទោសរបបលោក ហ៊ុន​ សែន ថាបានរំលោភបំពានសិទ្ធិមនុស្សនៅកម្ពុជាធ្ងន់ធ្ងរ ជាពិសេសពាក់ព័ន្ធនឹងសិទ្ធិនយោបាយ និងសិទ្ធិពលរដ្ឋ។

បើតាមអង្គការ UNHCR នៅក្នុងតំបន់ ក្រៅតែពីមីយ៉ាន់ម៉ា វៀតណាម និងកម្ពុជាដែលរបប លោក ហ៊ុន សែន អួតអាងថាមានសន្តិភាពពេញលេញ តែមានជនភៀសខ្លួនច្រើនជាងគេនោះ ប្រទេសថៃ សិង្ហបុរី និងប្រ៊ុយណេ ជាប្រទេសដែលមានពលរដ្ឋភៀសខ្លួនតិចជាងគេ។ នៅទូទាំងពិភពលោក អង្គការ UNHCR ថា មនុស្សជិត ៨០លាននាក់ទទួលរងការផ្លាស់ទីលំនៅដោយបង្ខំគិត​ត្រឹមដំណាច់​ឆ្នាំ២០១៩ ដោយសារតែ ការធ្វើទុក្ខបុកម្នេញ ជម្លោះប្រដាប់អាវុធ អំពើហិង្សា និងអំពើរំលោភ​សិទ្ធិ​មនុស្ស​ ក្នុង​នោះ​មនុស្សជាង ២០លាន​នាក់​ទទួល​បាន​សិទ្ធិជាជនភៀសខ្លួន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល