មន្ត្រីសិទ្ធិមនុស្សអាដហុក (ADHOC) លោក ស៊ឹង សែនករុណា អះអាងថា បេសកកម្ម សកម្មភាព និងការផ្តល់បទសម្ភាសន៍របស់លោកទៅកាន់សារព័ត៌មាន ក្នុងបំណងពង្រឹងការគោរពសិទ្ធិមនុស្ស ច្បាប់ យុត្តិធម៌សង្គម និងប្រជាធិបតេយ្យ ដោយមិនបម្រើបក្សនយោបាយណាមួយនោះទេ។
លោក ស៊ឹង សែនករុណា សរសេរនៅលើទំព័រហ្វេសប៊ុកនៅថ្ងៃទី៥ កុម្ភៈ ថា រាល់ការសម្រង់សម្ដីរបស់លោក ទៅបន្ថែមបន្ថយបញ្ចេញបញ្ចូលវាយប្រហារចំៗលើឈ្មោះបក្សនយោបាយណាមួយ នោះវាមិនមែនជាចេតនា និងគោលបំណងរបស់លោកនោះទេ ដូច្នេះលោកមិនទទួលស្គាល់ឡើយ។
លោកបញ្ជាក់ថា បេសកកម្ម សកម្មភាព និងការផ្តល់បទសម្ភាសន៍របស់លោក ក្នុងបំណងពង្រឹងការគោរពសិទ្ធិមនុស្ស ច្បាប់ យុត្តិធម៌សង្គម និងប្រជាធិបតេយ្យ ដោយមិនបម្រើបក្សនយោបាយណាមួយនោះទេ ហើយក៏គ្មានចេតនាណាមួយ វាយប្រហារបក្សនយោបាយណាមួយឡើយ។
លោក ស៊ឹង សែនករុណា៖ «សូមអរគុណច្រើននូវទឹកចិត្តផ្ញើសារសួរសុខទុក្ខ និងព្រួយ បារម្ភពីខាងគ្រួសារ បងប្អូន មិត្តភក្ដិ បងប្អូនខាងសារព័ត៌មាន បងប្អូនខាងអង្គការសង្គមស៊ីវិល ជាដៃគូជាតិអន្តរជាតិ បងប្អូនមិត្តភក្ដិទូតបរទេសមួយចំនួន ចំពោះសុវត្ថិភាពរបស់ខ្ញុំ។ ខ្ញុំបាទមិនអីនោះទេ»។
កាលពីថ្ងៃទី៤ កុម្ភៈ អតីតនាយករដ្ឋមន្ត្រី និងជាប្រធានគណបក្សប្រជាជនកម្ពុជា លោក ហ៊ុន សែន បានបញ្ជាឱ្យមេធាវីគណបក្សសិក្សាផ្លូវច្បាប់ ប្ដឹងមន្ត្រីសិទ្ធិមនុស្សអាដហុក លោក ស៊ឹង សែនករុណា ចំពោះការអត្ថាធិប្បាយ លើសំណុំរឿងបក្សកាន់អំណាចប្ដឹងអតីតអនុប្រធានគណបក្សភ្លើងទៀន លោក សុន ឆ័យ។
ទោះជាយ៉ាងណាក៏ដោយ លោក ហ៊ុន សែន មិនបានបង្ហាញទេថា តើលោកចង់ប្ដឹង លោក ស៊ឹង សែនករុណា នោះ ដោយសំអាងលើការអត្ថាធិប្បាយរបស់មន្ត្រីសិទ្ធិមនុស្សរូបនេះ នៅស្ថាប័នសារព័ត៌មានមួយណា ឬនៅទីណា និងមានខ្លឹមសារយ៉ាងដូចម្ដេចនោះឡើយ?
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត ប្រាប់វិទ្យុអាស៊ីសេរី កាលពីថ្ងៃទី៤ កុម្ភៈ ដោយកត់សម្គាល់ថា លោក ស៊ឹង សែនករុណា ដែលមានបទពិសោធន៍ជាង ២០ឆ្នាំ ខាងវិស័យសិទ្ធិមនុស្ស តែងតែផ្ដល់យោបល់ចង់ឃើញប្រទេសកម្ពុជា មាននីតិរដ្ឋ ដែលទទួលស្គាល់ដោយសហគមន៍អន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។