តំណាងរដ្ឋាភិបាលចោទក្រុមអ្នកជំនាញសិទ្ធិមនុស្ស អ.ស.ប ថា កំពុង «បង្អាក់» បេសកកម្មសង្គ្រោះជីវិត និងការទប់ស្កាត់ការឆ្លងរីករាលដាលនៃជំងឺកូវីដ១៩
ស្ថានបេសកកម្មអចិន្ត្រៃយ៍កម្ពុជានៅទីក្រុងហ្សឺណែវ (Geneva) ប្រទេសស្វីស (Switzerland) ចោទក្រុមអ្នកជំនាញសិទ្ធិមនុស្ស អង្គការសហប្រជាជាតិថា កំពុង «បង្អាក់» ដល់បេសកកម្មសង្គ្រោះជីវិត និងទប់ស្កាត់ការឆ្លងរីករាលដាលនៃជំងឺកូវីដ១៩។ ការចោទប្រកាន់នេះ ធ្វើឡើងក្រោយក្រុម អ្នកជំនាញសិទ្ធិមនុស្សរបស់អង្គការសហប្រជាជាតិ ចំនួន ៤រូប ជំរុញឲ្យរដ្ឋាភិបាលពិនិត្យមើលឡើងវិញនូវវិធានការឆ្លើយតបនឹងជំងឺកូវីដ១៩ ដោយសារតែពួកគេយល់ឃើញថា វិធានការដែលរដ្ឋាភិបាលបានដាក់ចេញជាបន្តបន្ទាប់នារយៈពេលចុងក្រោយនេះ មានលក្ខណៈតឹងរ៉ឹងជ្រុលហួសហេតុពេក មិនមានសមាមាត្រ និងមិនចាំបាច់។
តំណាងរដ្ឋាភិបាលហៅការជំរុញរបស់ក្រុមអ្នកជំនាញសិទ្ធិមនុស្សរបស់អង្គការសហប្រជាជាតិទាំងនោះថា ជា «គំនិតសាកល្បង» ហើយក្នុងករណីថ្លោះធ្លោយ ពួកគេទាំងនោះពុំមានការទទួលខុសត្រូវអ្វីឡើយ តែរដ្ឋាភិបាលទៅវិញទេ គឺជាអ្នកទទួលខុសត្រូវ។
ទោះជាយ៉ាងណាក្ដី ក្រុមអ្នកជំនាញសិទ្ធិមនុស្សអង្គការសហប្រជាជាតិទាំង ៤រូប កាលពីថ្ងៃទី១២ មេសា បានសម្ដែងកង្វល់ជាខ្លាំង ចំពោះការដាក់ចេញវិធានការរបស់រដ្ឋាភិបាល ទាំងវិធានការច្បាប់ និងវិធានការរដ្ឋបាលក្នុងការឆ្លើយតបទៅនឹងការរាលដាលនៃជំងឺកូវីដ១៩។ លើសពីនេះទៀត ក្រុមអ្នកជំនាញសិទ្ធិមនុស្សទាំងនោះគូសបញ្ជាក់ថា ទិន្នន័យសុខភាពអ្នកកើតជំងឺកូវីដ១៩ គួរតែស្ថិតក្នុងការការពារយ៉ាងតឹងរ៉ឹងនូវសិទ្ធិឯកជន ព្រោះថា ការលាតត្រដាងទិន្នន័យបុគ្គលទាំងនេះ គឺជាការបំពានធ្ងន់ធ្ងរលើសិទ្ធិឯកជន ដែលអាចនាំឱ្យមានការរើសអើង និងការមាក់ងាយ។ ក៏ប៉ុន្តែ តំណាងរដ្ឋាភិបាលបកស្រាយវិញថា ការបង្ហាញអត្តសញ្ញាណដូច្នេះ គឺជាការលើកទឹកចិត្ត និងជំរុញឲ្យមានការតាមរុករក ការធ្វើតេស្ត និងធ្វើចត្តាឡីស័ក បានលឿន និងទាន់ពេលវេលា សំដៅរួមចំណែកទប់ស្កាត់ការឆ្លងជំងឺកូវីដ១៩ ក្នុងសហគមន៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។