សាច់ញាតិយុវជនខ្មែរថាវរៈមួយរូប ស្នើសុំអាជ្ញាធរឲ្យផ្លាស់បន្ទប់ឃុំបងស្រីរបស់ខ្លួនដែលមានសភាពតូចចង្អៀតខ្លាំង ពោរពេញដោយផ្សែងបារី និងខ្វះអនាម័យ ឲ្យទៅបន្ទប់ដែលមានមនុស្សតិច និងមានកន្លែងគេងសមរម្យជាងនេះ។ មន្ត្រីសង្គមស៊ីវិលថា មន្ត្រីពន្ធនាគារគួរតែបង្កលក្ខណៈ និងបរិយាកាសឲ្យអ្នកទោសមនសិការដែលជាប់ឃុំក្នុងពន្ធនាគារមានផាសុខភាព មិនគួរដាក់ពួកគេក្នុងបន្ទប់ចង្អៀតណែនបែបនេះទេ។
ប្អូនស្រីកញ្ញា សូ មេត្តា គឺកញ្ញា អេង វ៉ាន់ឌី ដែលបានទៅសួរសុខទុក្ខបងស្រីរបស់ខ្លួន នៅព្រឹកថ្ងៃទី២ ខែតុលា រៀបរាប់ថា កញ្ញា សូ មេត្តា កំពុងជួបការលំបាកក្នុងពន្ធនាគារដោយសម្រាន្តមិនសូវលក់ដោយសារតែបន្ទប់ដែលឃុំខ្លួននោះ គឺជាបន្ទប់តូចចង្អៀតហើយដាក់អ្នកទោសដល់ទៅប្រមាណ ១៦០នាក់។ កញ្ញាឱ្យដឹងទៀតថា បន្ទប់ឃុំឃាំងនោះទៀតសោត គឺមានលាយឡំនឹងអ្នកទោសកាចសាហាវដែលជាឧក្រិដ្ឋជនជួញដូរគ្រឿងញៀនឆ្លងប្រទេស អ្នកទោសសម្លាប់មនុស្ស និងអ្នកជួញដូរមនុស្សជាដើម ហើយអ្នកទោសទាំងនោះតែងជក់បារីបង្ហុយផ្សែងពេញបន្ទប់ និងនិយាយគ្នាទាំងយប់ទាំងថ្ងៃ បង្កសំឡេងរំខានធ្វើឲ្យកញ្ញា សូ មេត្តា ពិបាកគេង។
កញ្ញាអះអាងទៀតថា បងស្រីប្រាប់ថា នៅក្នុងបន្ទប់នោះ ពុំមានអនាម័យនោះទេ ដោយសារបន្ទប់មានអ្នកទោសចំនួនច្រើន ដែលពិបាកសូម្បីតែអង្គុយ និងមិនមានអ្នកជួយសំអាតបន្ទប់នោះទេ។ ក្រៅពីនេះ កញ្ញា សូ មេត្តា កំពុងប្រឈមនឹងបញ្ហានោមទាស់ ដោយសារពុំមានទឹកប្រើប្រាស់គ្រប់គ្រាន់នៅពេលបន្ទោរបង់ និងសូម្បីពេលងូតទឹកជាដើម។ កញ្ញា អេង វ៉ាន់ឌី ថ្លែងទៀតថា បងស្រីត្រូវបានគេដាក់ឲ្យនៅដាច់ដោយឡែកពីអ្នកទោសមនសិការដទៃទៀត ដូចជាស្ត្រី ឈឿន ដារ៉ាវី កញ្ញា ភួន កែវរស្មី កញ្ញា ឡុង គន្ធា ជាដើម ដោយអនុរក្សពន្ធនាគារមិនអនុញ្ញាតឲ្យពួកគេបាននៅជជែកគ្នា ឬជុំគ្នានោះទេ។
កញ្ញាបញ្ជាក់ថា កញ្ញាបារម្ភពីសុវត្ថិភាព និងសុខភាពបងស្រីរបស់ខ្លួនជាខ្លាំង និងស្នើសុំអាជ្ញាធរផ្លាស់បងស្រីទៅបន្ទប់ផ្សេងដែលល្អជាងនេះ៖ « ពួកហ្នឹងគឺជក់បារីរាល់ថ្ងៃបង។ ជក់បារីបង្ហុយពេញហ្នឹងរាល់ថ្ងៃ។ អ៊ីចឹងបងខ្ញុំកើតជំងឺសើស្បែកផង ស្ត្រេសផង ក្លិនផ្សែងបារីហ្នឹងធ្វើឲ្យសុខភាពគាត់កាន់តែទ្រុឌទ្រោមជាងហ្នឹង។ អញ្ចឹងបានខ្ញុំបារម្ភពីសុខភាពគាត់ខ្លាំងមែនទែន។ គាត់និយាយបណ្ដើរ រៀបរាប់ទាំងទឹកភ្នែកបណ្ដើរបង។ ខ្ញុំគួរឲ្យអាណិតគាត់ ខ្ញុំស្ទើរទប់អត់បានដែរបង។ គាត់រៀបរាប់រាយរ៉ាប់ពាក្យដែលគាត់រស់នៅក្នុងហ្នឹង គឺខ្ញុំខ្លោចផ្សារមែនទែន បងស្រីខ្ញុំទាំងមូលមិនគួរណាមានបញ្ហាកើតលើគាត់បែបហ្នឹង » ។
ឆ្លើយតបរឿងនេះ អ្នកនាំពាក្យអគ្គនាយកដ្ឋានពន្ធនាគារ លោក នុត សាវនា ទទួលស្គាល់ថា ពន្ធនាគារពិតជាមានសភាពចង្អៀតណែនមែន ហើយអាជ្ញាធរកំពុងរិះរកមធ្យោបាយដោះស្រាយរឿងនេះ ដូចជាការផ្ទេរអ្នកកាត់ទោសរួចឲ្យទៅពន្ធនាគារដទៃទៀតជាដើម។ ចំពោះ ការជក់បារីក្នុងបន្ទប់ឃុំឃាំង លោកថា អាជ្ញាធរនឹងស្រាវជ្រាវករណីនេះ។ រីឯ បញ្ហាខ្វះទឹកវិញ លោក នុត សវនា បញ្ជាក់ថា លទ្ធភាពនៃការផ្គត់ផ្គង់ទឹកគឺមានកាំម្រឹត ដោយខាងពន្ធនាគារត្រូវបែងចែក៖ « នៅ ម២ ហ្នឹងវាមានជនជាប់ឃុំហ្នឹងច្រើន ទាំងអនីតិជន ទាំងស្ត្រី។ ខ្ញុំយល់ហើយថា តម្រូវការចាំបាច់គឺច្រើនអញ្ចឹង។ ប៉ុន្តែលទ្ធភាពក្នុងការផ្គត់ផ្គង់ក៏មានកម្រិតដែរដោយសារយើងត្រូវបែងចែក គិតគូរអំពីអ្វីដែលមាននៅក្នុងដៃ ហើយនឹងលទ្ធភាពជាក់ស្ដែងរបស់យើង ហើយនៅក្បែរ ម២ហ្នឹង គឺ ម១ ដែលមានជនជាប់ឃុំរហូតដល់ជិត ៨ពាន់នាក់។ អញ្ចឹងបើម្នាក់ៗទាមទារម៉ាគ្រប់គ្រាន់តើយើងត្រូវរកមួយថ្ងៃហ្នឹងផ្គត់ផ្គង់ទឹកប៉ុន្មានលីត្រជូនគាត់ ? ប៉ុន្មានម៉ែត្រគីបជូនគាត់ ? សុំថាបញ្ជាក់ឲ្យច្បាស់ថា ខ្វះខាតយ៉ាងម៉េចចង់ប្រើប្រាស់តម្រូវការហ្នឹងយ៉ាងម៉េច ? ចង់អង្គុយត្រាំទឹកឲ្យគ្រប់កន្លះម៉ោងអីចឹងឬយ៉ាងម៉េច ?»
អ្នកនាំពាក្យសមាគមការពារសិទ្ធមនុស្សអាដហុក (Adhoc) លោក ស៊ឹង សែនករុណា មានប្រសាសន៍ថា ការដាក់អ្នកទោសលាយឡំគ្នានេះ អាចធ្វើឲ្យមានផលប៉ះពាល់សុខភាពដល់អ្នកទោសមនសិការ ហើយបណ្ដាលឲ្យខូចខាតនូវធនធានមនុស្សដែលសង្គមជាតិត្រូវការ។ លោកស្នើឲ្យខាងមន្ត្រីពន្ធនាគារគួរគិតគូរពីបញ្ហានេះឡើងវិញ ដោយមិនគួរដាក់អ្នកទោសមនសិការឲ្យនៅលាយឡំនឹងអ្នកទោសឧក្រិដ្ឋនោះទេ៖ « ពួកគាត់បាត់បង់តែសេរីភាពទេ មិនមែនបាត់បង់ទាំងសិទ្ធិសុខុមាលភាពទេ។ អញ្ចឹងគួរតែមានការគិតគូរ ត្រួតពិនិត្យឡើងវិញ និងកែសម្រួលឲ្យពួកគេទទួលបាននូវផាសុកភាព និងបរិយាកាសល្អនៅក្នុងពន្ធនាគារហ្នឹងផង » ។
កញ្ញា សូ មេត្តា ដែលមានឈ្មោះពិតថា អេង ម៉ាឡៃ ត្រូវបានអាជ្ញាធរចាប់ខ្លួន កាលពីថ្ងៃទី៧ កញ្ញា នៅខណ្ឌច្បារអំពៅ ហើយបញ្ជូនទៅតុលាការ ដោយចោទប្រកាន់ពីបទញុះញង់បង្កភាពវឹកវរធ្ងន់ធ្ងរ ដល់សន្តិសុខសង្គម។ ការចាប់ខ្លួននេះ ក្រោយពេលកញ្ញា សូ មេត្តា និងយុវជនដទៃទៀត ព្យាយាមប្រមូលផ្ដុំគ្នាតវ៉ាសម្ដែងមតិ នៅទីលានប្រជាធិបតេយ្យថ្មី នៅខណ្ឌឫស្សីកែវ។ ប៉ុន្តែគម្រោងនេះបានបរាជ័យ ដោយសារការរារាំងពីអាជ្ញាធរ។ គិតពីចុងខែកក្កដា រហូតដល់ចុងខែកញ្ញា របបលោក ហ៊ុន សែន បានចាប់ខ្លួនសកម្មជន អ្នកនយោបាយ និងយុវជនដាក់ពន្ធនាគារចំនួន ១៩នាក់ ហើយ ពាក់ព័ន្ធនឹងករណីញុះញង់ ចំណែកមន្ត្រីបក្សសង្គ្រោះជាតិម្នាក់នៅខេត្តកំពត ត្រូវតុលាការខេត្តនេះកាត់ទោសឱ្យជាប់ពន្ធនាគារ ៥ឆ្នាំ និងចាប់ដាក់ពន្ធនាគារជាថ្មីទៀត ពីបទរួមគំនិតក្បត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។