ថ្ងៃទី៤ នៃយុទ្ធនាការជិះកង់ប្រវែងជាង ៣០០គីឡូម៉ែត្រពីខេត្តសៀមរាប ទៅកាន់រាជធានីភ្នំពេញ របស់ក្រុមសកម្មជនសិទ្ធិមនុស្ស បានធ្វើដំណើរដល់ ជាយរាជធានីភ្នំពេញហើយនៅល្ងាច ថ្ងៃទី ០៩ ខែ ធ្នូ ក្រោមការឃ្លាំមើល និងសួរនាំពីសមត្ថកិច្ចតាមដងផ្លូវជាហូរហែ។
ប្រធានកម្មវិធីផ្នែកស្រាវជ្រាវ និងតស៊ូមតិនៃសមាគមបណ្ដាញយុវជនកម្ពុជា (CYN) លោក ហេង គឹមហុង ប្រាប់វិទ្យុអាស៊ីសេរីថា មកទល់ពេលនេះ ក្រុមយុវជន ៣០នាក់ ហាក់អស់កម្លាំងទន់ជង្គង់ជាងសព្វមួយដង ប៉ុន្តែទឹកចិត្តនៅរឹងមាំនៅឡើយ ដើម្បីតស៊ូជំរុញឱ្យមានយុត្តិធម៌សង្គម។
លោកថា បើទោះបីជាមានសមត្ថកិច្ចសួរនាំ ថតរូប និង ឃ្លាំមើលតាមដងផ្លូវជាហូរហែក្តី ក៏ពួកលោកមិនភ័យខ្លាចដែរ។ លោកបន្ថែមថា ពួកលោកនឹងសម្រាក ក្នុងវត្តអារាមមួយ នៅជាយក្រុងភ្នំពេញនៅយប់នេះ ហើយនឹងគ្រោងបន្តយុទ្ធនាការ ជិះកង់បោះពួយទៅកាន់ទីលានប្រជាធិបតេយ្យកណ្តាលរាជធានីភ្នំពេញ នៅព្រឹកស្អែក៖
«ពួកគាត់សប្បាយចិត្តនៅពេលជិះដល់ទីលានប្រជាធិបតេយ្យគាត់មានអនុសាសន៍ សំខាន់ៗ មួយចំនួន គាត់ជិតបានយកអនុសាសន៍សំខាន់ៗថ្លែងសាធារណៈចំនួនមនុស្ស ១ ពាន់ ៥ រយនាក់។ គាត់រំពឹងថា អាជ្ញាធរបន្ទាប់ពីឃើញភាពមោះមុតរបស់យុវជនរដ្ឋាភិបាលនឹងព្រមទទួលយកអនុសាន៍របស់ក្រុមយុវជនបានលើកឡើងកន្លងមក»។
យុទ្ធនាការជិះកង់ទាំងនេះ ក្រុមយុវជនសិទ្ធិមនុស្ស ព្យាយាមតស៊ូជិះកង់រយះ ៥ ថ្ងៃ ជាប់ៗគ្នា ដើម្បីទាមទារយុត្តិធម៌សង្គម ក្រោមអាកាសធាតុក្តៅ និងជិះបញ្ច្រាសខ្យល់ចាប់ពីចំណុចប្រាសាទអង្គរវត្ត ខេត្តសៀមរាប ឆ្ពោះទៅកាន់ក្រុងភ្នំពេញ។
ពួកគាត់ជិះកង់ពាក់ឯកសណ្ឋានអាវយឺតពណ៌ផ្ទៃមេឃ និងពណ៌សរ ភ្ជាប់ពាក្យស្លោកថាការគោរពសិទ្ធិមនុស្សនាំមកនូវយុត្តិធម៌សង្គម។ ពួកគាត់គ្រោង នឹងទៅឱ្យដល់ ទីលានប្រជាធិបតេយ្យ ក្នុងក្រុងភ្នំពេញ នៅព្រឹកថ្ងៃទី១០ ខែធ្នូ ប៉ះចំថ្ងៃទិវាសិទ្ធិមនុស្សអន្តរជាតិ១០ ធ្នូ លើកទី៧៤ ហើយបន្តប្រារព្ធព្រឹត្តិការណ៍ជិះកង់ ចម្ងាយ ៣០គីឡូម៉ែត្រ បន្ថែមទៀតនៅថ្ងៃដដែលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។