ក្រុមកូដករណាហ្គាវើលដ៍ដាក់ពាក្យពន្យារចូលបំភ្លឺនៅតុលាការតាមបណ្ដឹងក្រុមហ៊ុន
2022.10.17
កូដករក្រុមហ៊ុនបនល្បែងកាស៊ីណូ ណាហ្គាវើលដ៍ (NAGAWORLD) ៤រូប ទៅដាក់ពាក្យសុំពន្យារពេលចូលបំភ្លឺនៅសាលាដំបូងរាជធានីភ្នំពេញ នៅថ្ងៃទី១៧ ខែតុលា ឆ្នាំ២០២២ តាមបណ្ដឹងរបស់ក្រុមហ៊ុន ដែលប្ដឹងពួកគាត់ថា បានរំលោភលំនៅឋាន និងបង្ខាំងដោយខុសច្បាប់។
រូបភាពពីពលរដ្ឋ
ក្រុមកូដករក្រុមហ៊ុនបនល្បែងកាស៊ីណូណាហ្គាវើលដ៍ (NAGAWORLD) នៅថ្ងៃទី១៧ តុលា ដាក់ពាក្យសុំពន្យារពេលចូលបំភ្លឺនៅសាលាដំបូងរាជធានីភ្នំពេញ តាមបណ្ដឹងរបស់ក្រុមហ៊ុន ដែលបានប្ដឹងពួកគាត់ថា បានរំលោភលំនៅឋាន និងបង្ខាំងដោយខុសច្បាប់។
កូដករម្នាក់ក្នុងចំណោម ៤នាក់ ដែលក្រុមហ៊ុនប្ដឹង គឺកញ្ញា សុខ ថាវុធ ប្រាប់វិទ្យុអាស៊ីសេរីថា មូលហេតុដែលក្រុមកូដករដាក់ពាក្យពន្យារពេលចូលខ្លួនបំភ្លឺនៅតុលាការនេះ ដោយសារតែព្រះរាជអាជ្ញារង ចេញដីកាកោះហៅពួកគាត់ទាំងតក់ក្រហល់ ដែលធ្វើឱ្យក្រុមកូដករមិនទាន់បានត្រៀមខ្លួន និងស្វែងរកមេធាវី ដើម្បីការពារតាមផ្លូវច្បាប់បាននៅឡើយ។ ទោះយ៉ាងណាក្ដី កញ្ញាបញ្ជាក់ថា កញ្ញា និងកូដករ ៣នាក់ផ្សេងទៀត នឹងចូលបំភ្លឺនៅតុលាការក្នុងពេលឆាប់ៗ នេះ។
កញ្ញា សុខ ថាវុធ ហួសចិត្តនឹងការចោទប្រកាន់របស់ក្រុមហ៊ុន ព្រោះពួកកញ្ញាមិនបានរំលោភលំនៅឋាន ឬបំពានច្បាប់ណាមួយដូចជាការចោទប្រកាន់របស់ក្រុមហ៊ុនឡើយ៖ «តាមខ្ញុំគិតមើលប្រហែលជាគេចង់បំបាក់ស្មារតីកូដករអត់ចង់ឱ្យទៅ [ធ្វើកូដកម្ម] ទេ។ គេយកប្រព័ន្ធតុលាការយកមកចោទយើង ទាំងយើងមានច្បាប់ធ្វើកូដកម្ម ហើយច្បាប់ធ្វើកូដកម្ម បើមានវិវាទជាមួយថៅកែ យើងត្រូវទៅមុខក្រុមហ៊ុន។ វាមិនដែលមានវិវាទជាមួយក្រុមហ៊ុន ណាហ្គាវើលដ៍ ទៅធ្វើកូដកម្មនៅកន្លែងផ្សេង ហើយមកចោទពីបទអ៊ីចឹង វាអត់ត្រូវ។ ខ្ញុំសង្ឃឹមថា ខាងតុលាការនឹងស្រាវជ្រាវឱ្យច្បាស់ថា តើវិវាទហ្នឹងជាវិវាទយ៉ាងម៉េច ខ្ញុំសង្ឃឹមថា គាត់នឹងឯករាជ្យ»។
ដីកាកោះហៅរបស់ព្រះរាជអាជ្ញារង លោក ឆាយ ហុង កាលពីថ្ងៃទី១៦ កញ្ញា ឱ្យដឹងថា ក្រុមហ៊ុនបនល្បែងកាស៊ីណូណាហ្គាវើលដ៍បានដាក់ពាក្យប្ដឹងកូដករចំនួន ៤នាក់ ក្នុងនោះរួមមាន កញ្ញា សៀក បញ្ញា កញ្ញា ជួប សោភណ្ឌ កញ្ញា សុខ ថាវុធ និងលោកស្រី នេត ចរិយា ពីបទរំលោភលើលំនៅឋាន និងចាប់ឃុំឃាំង និងបង្ខាំងមនុស្សដោយខុសច្បាប់។ ការប្ដឹងរបស់ក្រុមហ៊ុនបនល្បែងមួយនេះ ធ្វើឡើងក្រោយពីក្រុមកូដករបានបន្តធ្វើកូដកម្មដោយមានការបោះតង់ ធ្វើម្ហូបអាហារ និងសម្ដែងមតិនៅខាងមុខអគារក្រុមហ៊ុន ដើម្បីដាក់សម្ពាធឱ្យថៅកែចេញមុខដោះស្រាយវិវាទការងារឱ្យបានត្រឹមត្រូវតាមច្បាប់។
មន្ត្រីសង្គមស៊ីវិលមើលឃើញថា ការប្ដឹងរបស់ក្រុមហ៊ុនមកលើក្រុមកូដករនេះ គឺជាការគំរាមកំហែងបំបាក់ស្មារតី ដើម្បីកុំឱ្យពួកគេបន្តប្រមូលផ្ដុំគ្នាធ្វើកូដកម្មតទៅទៀត។ សង្គមស៊ីវិល និងសហជីព ជំរុញភាគីពាក់ព័ន្ធ ឱ្យដោះស្រាយវិវាទការងារនេះដោយសន្តិវិធីដោយផ្អែកតាមច្បាប់ស្ដីពីការងារ ជាជាងយកប្រព័ន្ធតុលាការ ដើម្បីគំរាមកំហែង និងដាក់សម្ពាធលើក្រុមកូដករបន្ថែម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- ពិធីមង្គលការរបស់ពលករខ្មែរនៅប្រទេសថៃ
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- អ្នកឃ្លាំមើល ថា លោក ហ៊ុន សែន ទំនងលែងទុកចិត្តអ្នកណាក្រៅពីកូនរបស់ខ្លួនហើយ
- លោក ស ខេង ចង់ឱ្យមានការធ្វើតេស្ដរកគ្រឿងញៀនលើពលរដ្ឋចាប់ពីអាយុ១៣ឆ្នាំដល់ក្រោម៤៥ឆ្នាំ
អត្ថបទពេញនិយម
សិទ្ធិមនុស្ស
