សកម្មជន​គ្រោង​ប្ដឹង​ទៅ​អ.ស.ប​អំពី​ការរំលោភ​សិទ្ធិមនុស្ស​ពី​សំណាក់​អាជ្ញាធរ​វៀតណាម

ដោយ យន់ សាមៀន
2023.10.07
សកម្មជន​គ្រោង​ប្ដឹង​ទៅ​អ.ស.ប​អំពី​ការរំលោភ​សិទ្ធិមនុស្ស​ពី​សំណាក់​អាជ្ញាធរ​វៀតណាម អាជ្ញាធរវៀតណាមចាប់ស្ទាក់ពលរដ្ឋខ្មែរ ដែល​ធ្វើដំណើរទៅទឹកដីខ្មែរក្រោមកម្ពុជាក្រោម ដើម្បីចូលរួមបុណ្យ​កាន់​បិណ្ឌ កាលពីថ្ងៃទី៦ តុលា ២០២៣។
រូប៖ ហ្វេសប៊ុក​ជីវិត​ខ្មែរក្រោម

សកម្មជន​កិច្ចព្រមព្រៀង​ទីក្រុង​ប៉ារីស​គ្រោង​ដាក់​បណ្ដឹង​ទៅ​អង្គការ​សហប្រជាជាតិ អំពី​ការ​រំលោភ​សិទ្ធិមនុស្ស​ពី​សំណាក​អាជ្ញាធរ​វៀតណាម ដែល​បាន​ហាមឃាត់​ដំណើរ​របស់​សកម្មជន​សិទ្ធិមនុស្ស និង​ពលរដ្ឋ​ខ្មែរ​ទៅ​ឲ្យ​ធ្វើ​បុណ្យ​នៅ​ទឹកដី​កម្ពុជា​ក្រោម។

ពាក់ព័ន្ធ​នឹង​រឿង​នេះ មន្ត្រី​សមាគម​ខ្មែរ​កម្ពុជា​ក្រោម​លើកឡើង​ថា អាជ្ញាធរ​វៀតណាម​គួរតែ​បង្ក​ភាព​ងាយស្រួល​ដល់​ពលរដ្ឋ​ខ្មែរ បាន​ទៅ​ធ្វើ​បុណ្យ​នៅ​ទឹកដី​កម្ពុជា​ក្រោម។

អាជ្ញាធរ​វៀតណាម បាន​ឃាត់​រថយន្តក្រុង​៣​គ្រឿង របស់​ពុទ្ធបរិស័ទ និង​ព្រះសង្ឃ​ខ្មែរ ដែល​មាន​បំណង​ប្រារព្ធ​ពិធី​កាន់បិណ្ឌ​នៅ​វត្ត​ផ្នោកំបុត ក្នុង​ខេត្ត​ព្រះ​ត្រពាំង។

សកម្មជន​សន្ធិសញ្ញា​ទីក្រុង​ប៉ារីស​លោក ស្រ៊ុន ស្រ៊ន ថ្លែង​ក្នុង​វីដេអូ​មួយ​នៅ​ថ្ងៃទី​៧ តុលា​ថា គោលបំណង នៃ​ការ​ចូល​ទៅ​ក្នុង​វត្ត​នៅ​ខេត្ត​ព្រះ​ត្រពាំង ដើម្បី​ផ្លាស់ប្ដូរ​គំនិត​យោបល់ នៃ​ពិធី​សែនដូនតា ឬ​បុណ្យកាន់បិណ្ឌ​របស់​ខ្មែរ​កម្ពុជា​ក្រោម។

លោក ស្រ៊ុន ស្រ៊ន៖ «យួន​កាន់តែ​ធ្វើ យួន​កំពុងតែ​រុញ​ឲ្យ​ពួក​ខ្ញុំ​នេះ ទៅ​ប្ដឹង​តុលាការ​អន្តរជាតិ កំពុងតែ​ជំរុញ​ឲ្យ​ពួក​ខ្ញុំ​នេះ​ទៅ​ប្ដឹង​ម្ចាស់​ហត្ថលេខី ឥឡូវនេះ​ឯកសារ ដែល​យួន​ចេញ​ឲ្យ​ខ្ញុំ​នេះ ឯកសារ​នេះ​ខ្ញុំ​ប្ដឹង​ទៅ​ស្ថានទូត​យួន នៅ​ភ្នំពេញ ហើយនឹង​ប្ដឹង​ទៅ​អង្គការសហប្រជាជាតិ​នៅ​កម្ពុជា ហើយ​និង​ចាប់ផ្ដើម​យក​ឯកសារ​នេះ ទៅ​ប្ដឹង​បណ្ដា​ស្ថានទូត​នានា អំពី​អ្វី ដែល​ពួក​ខ្ញុំ​ធ្វើ​ហើយ​យួន​មិន​សុខចិត្ត​។ តើ​អាមេរិក​រកស៊ី​ជាមួយ​យួន​យ៉ាងម៉េច អឺរ៉ុប​រកស៊ី​ជាមួយ​យួន​យ៉ាងម៉េច បើ​សូម្បី​តែ​ពួក​យើង​ផ្សាយ​ច្បាប់ ពួក​យើង​ផ្សព្វផ្សាយ​ច្បាប់​ក៏​យួន​មិន​ឲ្យ​ផ្សព្វផ្សាយ​ផង»

ពុទ្ធបរិស័ទ ប្រមាណ​១៣០​នាក់ និង​ព្រះសង្ឃ​បី​អង្គ​កាលពី​ថ្ងៃទី​៦ តុលា គ្រោង​ធ្វើដំណើរ​ទៅ​វត្ត​ផ្នោកំបុត ប៉ុន្តែ​អាជ្ញាធរ​វៀតណាម​បាន​ហាមឃាត់​លោក ស្រ៊ុន ស្រ៊ន និង​សកម្មជន​ម្នាក់ទៀត គឺ កញ្ញា ភឹង សោភា មិន​ឲ្យ​ចូល​ទឹកដី​ខ្មែរ​កម្ពុជា​ក្រោម។ លោក ស្រ៊ុន ស្រ៊ន ត្រូវ​បាន​អាជ្ញាធរ​វៀតណាម ប្រចាំ​នៅ​ច្រកទ្វារ​ព្រំដែន ក្រុង​បាវិត ខេត្តស្វាយរៀង ហាមឃាត់​មិន​ឲ្យ​ចូល​ទឹកដី​វៀតណាម ដោយ​អះអាង​ថា មាន​បម្រាម​ពី​ក្រសួង​មហាផ្ទៃ​វៀតណាម។

លោក ស្រ៊ុន ស្រ៊ន៖ «ពួក​យើង​ជួបគ្នា ផ្លាស់ប្ដូរ​បទពិសោធន៍​អំពី​របៀប​រៀបចំ​ប្រពៃណី​ទំនៀមទម្លាប់​ខ្មែរក្រោម​គេ​ធ្វើ​យ៉ាងម៉េច ខ្មែរ​កណ្ដាល​គេ​ធ្វើ​យ៉ាងម៉េច​យើង​គ្រាន់តែ​ផ្លាស់ប្ដូរ​បទពិសោធន៍​ការរៀបចំ​បុណ្យ​សែនដូនតា បុណ្យ​ភ្ជុំ​តែប៉ុណ្ណោះ ហើយ​លោក​អ្នកឯង​ក៏​ចង្អៀតចង្អល់​ម្ល៉េះ​ហើយ​ជា​យួន​នឹង​គេ​ដែរ ជា​គិញ​យួន អ្នកឯង​រាយការណ៍​ខុស​ប្រយ័ត្ន​ងាប់ ប្រយ័ត្ន​ពួក​យើង​ប្ដឹង​ដល់​តុលាការ​អន្តរជាតិ ប្ដឹង​ដល់​បណ្ដាល​ហត្ថលេខី អា​គិញ​ហ្នឹង​ងាប់​មុនគេ»

ទោះបី​អាជ្ញាធរ​វៀតណាម​ឲ្យ​ពលរដ្ឋ​ខ្មែរ​ផ្សេងទៀត​បន្តដំណើរ​ក្តី ប៉ុន្តែ​អាជ្ញាធរ​វៀតណាម​បន្ត​ស្ទាក់ និង​ផ្អាក​ដំណើរ​ពលរដ្ឋ​ខ្មែរ​រហូត​ដល់​ពីរ​លើក បណ្ដាល​ឲ្យ​ខាតបង់​ពេល​វេលា​ច្រើន​ម៉ោង។

វិទ្យុ​អាស៊ីសេរី​នៅ​ពុំ​ទាន់​អាច​ទាក់ទង​មន្ត្រី​ស្ថានទូត​វៀតណាម​ប្រចាំ​នៅ​កម្ពុជា ដើម្បី​សាកសួរ​ពី​បញ្ហា​នេះ បាន​នៅ​ឡើយ​ទេ កាល​ពី​ថ្ងៃទី៧ តុលា។

អគ្គលេខាធិការ​សមាគម​ខ្មែរ​កម្ពុជា​ក្រោម​ដើម្បី​សិទ្ធិមនុស្ស និង​អភិវឌ្ឍន៍ លោក​បណ្ឌិត សឺន ជុំជួន មាន​ប្រសាសន៍​ថា លោក​សង្កេត​ឃើញ​ថា ពលរដ្ឋ​ខ្មែរ​សុទ្ធ​តែ​មាន​លិខិត និង​ឯកសារ​ផ្សេងៗ ស្របតាម​ច្បាប់។

លោក សឺន ជុំជួន៖ «រដ្ឋអំណាច​វៀតណាម​គួរតែ​មាន​ការ​ការពារ​សុវត្ថិភាព​សម្រាប់​សន្តិសុខ សម្រាប់​ពួកគាត់​ជា​អ្នក​ទេសចរណ៍ អាហ្នឹង​គឺជា​រឿង​ល្អ​ទៅវិញ​។ ប៉ុន្តែ​ដល់​គាត់​ហាមឃាត់ រារាំង​ដំណើរ ហើយ​សួរនាំ​អ្វី​ផ្សេងៗ អាហ្នឹង​វា​គឺជា​ការ​ផ្ទុយ​ហើយ អត់​មានច្បាប់​ណា​គេ​អនុវត្តន៍​ធ្វើ​បែប​ហ្នឹង​ទេ វា​ជា​ការ​យល់ឃើញ​របស់ខ្ញុំ​ណា»

សមាគម​ចាត់ទុក​សកម្មភាព​រារាំង​របស់​វៀតណាម ជា​អំពើ​ផ្ទុយ​ពី​ច្បាប់ និង​ស្នើ​ដល់​អាជ្ញាធរ​វៀតណាម សម្រួល​ដល់​ការ​ធ្វើ​ដំណើរ​របស់​ពលរដ្ឋ​ខ្មែរ​នៅ​លើ​ទឹកដី​កម្ពុជា​ក្រោម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។