មន្ត្រីអង្គការសង្គមស៊ីវិលនៅក្នុងស្រុក អំពាវនាវឲ្យរដ្ឋាភិបាល បើកចិត្តបើកបេះដូងធ្វើការជាមួយអ្នករាយការណ៍ពិសេសថ្មីរបស់អង្គការសហប្រជាជាតិដោយស្មោះត្រង់ ដើម្បីផលប្រយោជន៍ប្រទេសជាតិ។ ការស្នើសុំនេះ គឺបន្ទាប់ពីពួកគេ មើលឃើញថា រដ្ឋាភិបាល លោក ហ៊ុន សែន តែងតែមានជំហរផ្ទុយ និងបង្កភាពតានតឹងជាមួយអ្នករាយការណ៍ពិសេសរបស់អង្គការសហប្រជាជាតិជាច្រើនអាណត្តិមកហើយ។ មន្ត្រីរដ្ឋាភិបាល ចោទថា ភាពមិនចុះសម្រុងគ្នាកន្លងមកដោយសារអ្នកជំនាញរបស់អង្គការសហប្រជាជាតិ ធ្វើរបាយការណ៍មិនគ្រប់ជ្រុងជ្រោយ និងហាក់មានចេតនាប្រឆាំងរដ្ឋាភិបាលកម្ពុជា។
រដ្ឋាភិបាល លោក ហ៊ុន សែន តែងតែបង្កភាពតានតឹងជាមួយអ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា ពីមួយជំនាន់ទៅមួយជំនាន់ ដោយសារតែអ្នកជំនាញរបស់អង្គការសហប្រជាជាតិទាំងនោះ ផ្តល់អនុសាសន៍ឲ្យរដ្ឋាភិបាល ស្ដារលទ្ធិប្រជាធិបតេយ្យ និងការគោរពសិទ្ធិមនុស្សនៅកម្ពុជា។ ថ្មីៗ នេះ របបលោក ហ៊ុន សែន មិនត្រឹមតែមិនបង្ហាញឆន្ទៈស្ដារស្ថានភាពសិទ្ធិមនុស្សនោះទេ ប៉ុន្តែថែមទាំងចេញសេចក្ដីណែនាំរួចជាស្រេចដល់អ្នករាយការណ៍ពិសេសថ្មីរបស់អង្គការសហប្រជាជាតិ អំពីរបៀបធ្វើការនៅក្នុងប្រទេសកម្ពុជាក្រោមដឹកនាំបែបផ្ដាច់ការរបស់លោក ហ៊ុន សែន។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី ថ្លែងថា ភាគីរដ្ឋាភិបាលកម្ពុជា គួរតែបើកចិត្តបើកបេះដូងផ្តល់កិច្ចសហការដោយស្មោះត្រង់ជាមួយអ្នករាយការណ៍ពិសេសថ្មីរបស់អង្គការសហប្រជាជាតិ និងទទួលយកអនុសាសន៍របស់គាត់ ដើម្បីធ្វើឲ្យស្ថានភាពសិទ្ធិមនុស្ស ឬការដឹកនាំបែបប្រជាធិបតេយ្យមានភាពល្អប្រសើរឡើងវិញ។ លោកបន្តថា អ្នករាយការណ៍ពិសេសរបស់អង្គការសហប្រជាជាតិគ្រប់រូប សុទ្ធតែធ្វើការដោយឯករាជ្យ ឥតលម្អៀង និងមានវិជ្ជាជីវៈច្បាស់លាស់ ដូច្នេះរដ្ឋាភិបាល មិនគួរព្រួយបារម្ភ និងមិនចាំបាច់ណែនាំពួកគាត់អំពីរបៀបធ្វើការនោះទេ៖«គេ ( អ្នករាយការណ៍ពិសេស ) ផ្តល់ការសិក្សាក្តី ផ្តល់របាយការណ៍ក្តីគេប្រយ័ត្នណាស់ គេត្រួតពិនិត្យគ្រប់ជ្រុងជ្រោយជាមួយអ្នកពាក់ព័ន្ធផង ជាមួយនឹងព័ត៌មានដែលគេទទួលបានផង មុននឹងគេសន្និដ្ឋាន ដូច្នេះភាពជឿជាក់នៃរបាយការណ៍គេខ្ពស់មែនទែន។ គេលើកឡើងគេមានគោលដៅកែលម្អ ស្ថានការណ៍សិទ្ធិមនុស្សនៅកម្ពុជា និងមានគោលដៅជួយដល់រដ្ឋាភិបាលឲ្យត្រួតពិនិត្យទៅលើចំណុចខ្វះខាតដូច្នេះរបាយការណ៍គេមានវិជ្ជាជីវៈ ហើយរឿងយើងយកមកប្រើដើម្បី ចំណេញសម្រាប់ស្រុកទេសយើង គឺជារឿងរបស់យើង » ។
ស្រដៀងគ្នានេះ អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា លើកឡើងថា អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជាមុនៗ សុទ្ធតែបានបំពេញការងាររបស់ខ្លួនយ៉ាងត្រឹមត្រូវ។លោកបន្តថា រដ្ឋាភិបាលកម្ពុជាទៅវិញទេ ដែលមិនបានបំពេញកាតព្វកិច្ចរបស់ខ្លួនក្នុងការកែលម្អស្ថានភាពសិទ្ធិមនុស្សតាមអនុសាសន៍របស់អ្នកជំនាញអង្គការសហប្រជាជាតិ ប៉ុន្តែថែមទាំងប្រឹងធ្វើទុក្ខបុកម្នេញគណបក្សប្រឆាំង និងក្រុមសង្គមស៊ីវិលកាន់តែខ្លាំង៖ «របាយការណ៍របស់អ្នករាយការណ៍ពិសេសកន្លងមកនេះ គឺឆ្លុះបញ្ចាំងពីការពិតដែលកំពុងកើតឡើងនៅក្នុងប្រទេសកម្ពុជា ប៉ុន្តែរដ្ឋាភិបាលទៅវិញទេ ដែលអត់ទទួលស្គាល់ការពិត ហើយអត់រកដំណោះស្រាយដូច្នេះហើយទើបបញ្ហាទាំងអស់នេះ បន្តពីអ្នករាយការណ៍មួយទៅអ្នករាយការណ៍ម្នាក់ទៀត នៅតែមើលឃើញថា បញ្ហាសិទ្ធិមនុស្សនៅកម្ពុជាស្ថិតនៅក្នុងស្ថានភាពដដែលៗ » ។
ការលើកឡើងនេះ ធ្វើឡើងបន្ទាប់ពីតំណាងកម្ពុជាប្រចាំអង្គការសហប្រជាជាតិនៅទីក្រុងហ្សឺណែវ(Geneva) លោក អាន សុខខឿន បានណែនាំបន្តបន្ទាប់ដល់អ្នករាយការណ៍ពិសេសថ្មីរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា គឺ លោកសាស្ត្រាចារ្យ វិធិត ម៉ាន់តាផន (Vitit Muntarbhorn) អំពីរបៀបធ្វើការងាររបស់គាត់នៅក្នុងប្រទេសកម្ពុជា។ លោក អាន សុខខឿន ណែនាំអ្នករាយការណ៍ពិសេសថ្មី ត្រូវបំពេញការងារស្របតាមក្រមសីលធម៌ និងសៀវភៅណែនាំប្រតិបត្តិការសម្រាប់នីតិវិធីពិសេស ត្រូវគោរពតាមច្បាប់កម្ពុជា និងធម្មនុញ្ញរបស់អង្គការសហប្រជាជាតិ។ មន្ត្រីតំណាងកម្ពុជារូបនេះ ក៏ព្រមានទុកជាមុនទៅអ្នករាយការណ៍ពិសេសថ្មីឲ្យបំពេញការងារមិនលម្អៀង មិនជ្រើសតែមួយជ្រុង និងមិនធ្វើនយោបាយលើបញ្ហាសិទ្ធិមនុស្សនៅកម្ពុជាជាដើម ដើម្បីទទួលបានទំនុកចិត្តពីរដ្ឋាភិបាលកម្ពុជា។
ការណែនាំនេះ ធ្វើឡើងស្របពេលអ្នករាយការណ៍ពិសេសថ្មី លោកសាស្ត្រាចារ្យ វិធិត ម៉ាន់តាផន (Vitit Muntarbhorn) នឹងចាប់ផ្ដើមបំពេញការងារផ្លូវការបន្តពីអ្នកស្រី រ៉ូណា ស្មីត (Rhona Smith) ចាប់ពីថ្ងៃទី១ ខែឧសភាខាងមុខ។ លោក វិធិត ម៉ាន់តាផន គឺជាជនជាតិថៃ ហើយជាសាស្ត្រាចារ្យផ្នែកច្បាប់អន្តរជាតិ និងមានបទពិសោធន៍ការងារជាច្រើនផ្នែកសិទ្ធិមនុស្សនៅក្នុងអង្គការសហប្រជាជាតិ។
ជាការកត់សម្គាល់ភាពតានតឹង និងជំហរផ្ទុយគ្នារវាងរដ្ឋាភិបាលកម្ពុជា និងអ្នករាយការណ៍ពិសេសរបស់អង្គការសហប្រជាជាតិ បានកើតឡើងសឹងតែគ្រប់ជំនាន់។ ទោះជាយ៉ាងណា ក្នុងអាណត្តិការងាររបស់អ្នកស្រីរ៉ូណា ស្មីត (Rhona Smith) ភាពតានតឹងបានកើតឡើងជាញឹកញាប់ ជាពិសេសចាប់តាំងពីរបបក្រុងភ្នំពេញ ចាប់ខ្លួនប្រធានគណបក្សសង្គ្រោះជាតិលោក កឹម សុខា ដោយចោទពីបទក្បត់ជាតិ និងរំលាយគណបក្សដ៏ធំមួយនេះ កាលពីចុងឆ្នាំ២០១៧ មក។ ចំណាត់ការរំលាយគណបក្សសង្គ្រោះជាតិ កើតឡើងក្រោយរបបលោក ហ៊ុន សែន បើកយុទ្ធនាការបង្ក្រាបអ្នកនយោបាយប្រឆាំង អង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យ ដែលបានត្រួសត្រាយឲ្យគណបក្សប្រជាជនកម្ពុជា ដែលកំពុងបាត់បង់សំឡេងឆ្នោតគាំទ្រយ៉ាងគំហុកនោះ មានឱកាសឈ្នះឆ្នោតដឹកនាំរដ្ឋាភិបាលបែបឯកបក្ស តាមរយៈការបោះឆ្នោតជាតិឆ្នាំ២០១៨ ដែលរងការរិះគន់ថា ជាការរៀបចំបែបបង្គ្រប់កិច្ច។
ក្នុងតួនាទីជាអ្នករាយការណ៍ពិសេសអ្នកស្រី រ៉ូណា ស្មីត បានចេញរបាយការណ៍ជាបន្តបន្ទាប់ស្ដីពីការធ្លាក់ចុះដុនដាបនៃលទ្ធិប្រជាធិបតេយ្យ និងការគោរពសិទ្ធិមនុស្ស ហើយអ្នកស្រី តែងផ្តល់អនុសាសន៍ផ្លូវការដល់រដ្ឋាភិបាលឲ្យកែលម្អឡើងវិញ។ ប៉ុន្តែរដ្ឋាភិបាលលោក ហ៊ុន សែន តែងបដិសេធ ហើយនៅតែបន្តយុទ្ធនាការធ្វើទុក្ខបុកម្នេញគណបក្សប្រឆាំង និងក្រុមអ្នករិះគន់កាន់តែខ្លាំងរហូតមកទល់ពេលនេះ។ ជាក់ស្ដែងតុលាការដែលស្ថិតក្រោមឥទ្ធិពលបក្សកាន់អំណាច បានសវនាការកាត់ក្ដីថ្នាក់ដឹកនាំ និងសកម្មជនគណបក្សសង្គ្រោះជាតិទ្រង់ទ្រាយធំជាបន្តបន្ទាប់ចាប់តាំងពីចុងឆ្នាំ២០២០ មកដោយចោទពីបទ ''រួមគំនិតក្បត់ និងញុះញង់'' ដែលប្រឈមជាប់ពន្ធនាគាររាប់សិបឆ្នាំ។ ក្រៅពីនេះ មានសកម្មជននយោបាយ និងសកម្មជនសង្គម យ៉ាងហោចណាស់ ៨០នាក់ហើយ កំពុងជាប់ឃុំក្នុងពន្ធនាគារដោយការអនុវត្តសិទ្ធិជាមូលដ្ឋានរបស់ខ្លួន។ ជុំវិញដំណើរការជំនុំជម្រះក្ដីទ្រង់ទ្រាយធំនេះ បានជំរុញឲ្យអ្នកស្រី រ៉ូណា ស្មីត ចេញសេចក្ដីថ្លែងការណ៍ព្រួយបារម្ភកាន់តែខ្លាំង និងលើកឡើងថា ចំណាត់ការនេះ ធ្វើឡើងក្រោមហេតុផលនយោបាយ ខ្វះមូលដ្ឋានច្បាប់ច្បាស់លាស់ និងរំលោភយ៉ាងធ្ងន់ធ្ងរទៅលើសិទ្ធិទទួលបាននីតិវិធីត្រឹមត្រូវ ដែលបានបង្កើតឡើងយ៉ាងរឹងមាំដោយច្បាប់សិទ្ធិមនុស្សអន្តរជាតិ។
កន្លងមក អ្នករាយការណ៍ពិសេសអង្គការសហប្រជាជាតិ អ្នកស្រី រ៉ូណា ស្មីត ធ្លាប់លើកឡើងក្នុងរបាយការណ៍របស់ខ្លួនដែរថា សូម្បីតែអ្នកស្រី ក៏ធ្លាប់ត្រូវបានអាជ្ញាធររដ្ឋាភិបាល បំភិតបំភ័យ និងរារាំងការបំពេញការងាររបស់អ្នកស្រីជាច្រើនលើកផងដែរ ដូចជារារាំងមិនឲ្យអ្នកស្រីជួបជាមួយលោក កឹម សុខា ជាដើម។ ធ្ងន់ធ្ងរជាងនេះ រដ្ឋាភិបាលលោក ហ៊ុន សែន កាលពីឆ្នាំ២០១៦ ថែមទាំងព្រមានបិទការិយាល័យឧត្ដមស្នងការអង្គការសហប្រជាជាតិប្រចាំនៅកម្ពុជាទៀតផង ដោយចោទថា ជ្រៀតជ្រែកចូលកិច្ចការផ្ទៃក្នុងរបស់កម្ពុជា ពាក់ព័ន្ធនឹងការចោទសួរមូលហេតុនៃការរារាំងលោក សម រង្ស៊ី មិនឲ្យចូលមកប្រទេសកម្ពុជា។
ដោយឡែក ក្នុងអាណត្តិការងារជាអ្នករាយការណ៍ពិសេសនៃអង្គការសហប្រជាជាតិ លោក សុរិយា ស៊ូប៊ែឌី (Surya Subedi) វិញ លោក បានទទួលរងនូវការប្រមាថធ្ងន់ៗ ពីលោកនាយករដ្ឋមន្ត្រី ហ៊ុន សែន ផ្ទាល់តែម្តង។ ប្រតិកម្មពេលនោះ គឺបន្ទាប់ពីលោក សុរិយា ស៊ូប៊ែឌី ចេញរបាយការណ៍ និងផ្តល់អនុសាសន៍ឲ្យរដ្ឋាភិបាលធ្វើកំណែទម្រង់គណៈកម្មាធិការជាតិរៀបចំការបោះឆ្នោត ដើម្បីធានាការបោះឆ្នោតក្នុងឆ្នាំ២០១៣ ប្រកបដោយសេរី និងយុត្តិធម៌ត្រឹមត្រូវ និងការគោរពសិទ្ធិមនុស្ស រួមទាំងការរៀបចំដីសម្បទានសេដ្ឋកិច្ចឡើងវិញ ដើម្បីកុំឲ្យពលរដ្ឋបន្តរងគ្រោះបាត់បង់ដីធ្លីនិងផ្ទះសម្បែង៖ «អានេះអនុសាសន៍របស់អង្គការសហប្រជាជាតិ មនុស្សម្នាក់ហ្នឹង អាហ្នឹងអង្គការសហប្រជាជាតិនឹងគេដែរ ហើយដើរតឹកឡិកៗ មកអ៊ីចឹងទៅជួបនេះជួប ណោះ ហើយទៅធ្វើរបាយការណ៍ រួចហើយឲ្យគេមកទទួលយក។ រដ្ឋអធិបតេយ្យមួយមិនអាចទទួលយកនូវអ្វីដែលជារបស់អ្នកដទៃបានទេ ត្រូវសួរប្រជាពលរដ្ឋសិន ឥឡូវឆ្នាំ២០១៣ សួរប្រជាពលរដ្ឋទៅបើប្រជាពលរដ្ឋលែងត្រូវការគណបក្សប្រជាជនហើយគេបោះឆ្នោតទម្លាក់ហើយ។ បើបោះឆ្នោតទម្លាក់ហើយអ្នកឯងធ្វើទៅតាមលោកឯងហ្នឹងទៅ អាហ្នឹងខ្ញុំគ្រាន់តែថា និយាយឲ្យសិស្សចេះទេ ប៉ុន្តែក៏វាមានចំណែកមួយឲ្យអ្នកដទៃចេះដែរ កុំល្ងង់ពេកតែខ្ញុំសូមប្រាប់សុំប្រដៅសូមពន្យល់ »។
មិនតែប៉ុណ្ណោះ មានបាតុកម្មពីរលើកបានកើតឡើងប្រឆាំងនឹងវត្តមានរបស់លោក លោក សុរិយា ស៊ូប៊ែឌី នៅកម្ពុជា ដែលមតិសាធារណៈលើកឡើងថា ជាការរៀបចំរបស់គណបក្សកាន់អំណាច។
កាលពីឆ្នាំ២០០៨ លោកនាយករដ្ឋមន្ត្រី ហ៊ុន សែន ក៏ធ្លាប់វាយប្រហារដោយពាក្យសម្ដីធ្ងន់ៗ ទៅលើតំណាងពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា គឺលោក យ៉ាស ហ្កាយ (Yash Ghai) ផងដែរ។ លោក ហ៊ុន សែន បានហៅលោក យ៉ាស ហ្កាយ ដែលកើតនៅប្រទេសខេនយ៉ា (Kenya) ថា ជាប្រភេទអ្នកទេសចររយៈពេលយូរ បន្ទាប់ពីលោក យ៉ាស ហ្កាយ បានសរសេររបាយការណ៍លាតត្រដាងអំពីបញ្ហារំលោភសិទ្ធិមនុស្សនៅកម្ពុជា និងស្នើអោយធ្វើកំណែទម្រង់ ដើម្បីលើកកម្ពស់ការគោរពសិទ្ធិមនុស្ស។
ទាក់ទងករណីនេះ សមាជិក និងជាអ្នកនាំពាក្យគណៈកម្មាធិការសិទ្ធិមនុស្សរបស់រដ្ឋាភិបាល លោក កត្តា អ៊ន មានប្រសាសន៍ថា ភាពមិនចុះសម្រុងគ្នារវាងរដ្ឋាភិបាល និងអ្នករាយការណ៍ពិសេសរបស់អង្គការសហប្រជាជាតិកន្លងមក គឺភាគច្រើនពាក់ព័ន្ធនឹងការធ្វើរបាយការណ៍។ លោកចោទថា របាយការណ៍របស់អ្នករាយការណ៍ពិសេសមុនៗ គឺហាក់ដូចជាធ្វើឡើង ដើម្បីប្រឆាំងនឹងរដ្ឋាភិបាលកម្ពុជា មិនមែនធ្វើឡើងដោយឯករាជ្យ និងមានគោលដៅលើកកម្ពស់សិទ្ធិមនុស្សនោះទេ។ ទោះជាយ៉ាងណាក្ដី លោកអះអាងថា រដ្ឋាភិបាលកម្ពុជានៅតែស្វាគមន៍រាល់កិច្ចសហប្រតិបត្តិការជាមួយអ្នករាយការណ៍ពិសេសថ្មីរបស់អង្គការសហប្រជាជាតិ៖ « បញ្ហាដែលកើតឡើងនៅក្នុងបរិបទនៃប្រទេសកម្ពុជា រវាងអ្នករាយការណ៍ពិសេសពីទី១ ដល់ទី៦ យើងឃើញថា ជំហររបស់អ្នករាយការណ៍ពិសេស គឺភាគច្រើននៃរបាយការណ៍របស់គាត់ គឺពឹងផ្អែកទៅលើរបាយការណ៍ដែលបណ្ដាញរបស់គាត់ប្រគល់ឲ្យ។ បណ្ដាញរបស់គាត់ប្រគល់ឲ្យគឺ ទី១ ក្រុមអង្គការសង្គមស៊ីវិល ទី២ គណបក្សនយោបាយ ប៉ុន្តែទំនាក់ទំនងនិងកិច្ចសហប្រតិបត្តិការរវាងអ្នករាយ ការពិសេស និងរដ្ឋាភិបាលមិនត្រូវបានបញ្ចូលក្នុងរបាយការណ៍អ្នករាយការណ៍ពិសេសទេ ដែលហាក់បីដូចអ្នករាយការណ៍ពិសេស ធ្វើរបាយការណ៍ប្រឆាំងរដ្ឋាភិបាលទៅវិញ » ។
ផ្ទុយពីការលើកឡើងនេះ អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា កត់សម្គាល់ឃើញថា មុនចេញរបាយការណ៍ម្តងៗ អ្នករាយការណ៍ពិសេសរបស់អង្គការសហប្រជាជាតិ តែងជួបក្រុមមនុស្សចម្រុះនិងស្រាវជ្រាវព័ត៌មានច្បាស់លាស់ពីគ្រប់ប្រភព រាប់តាំងពីជនរងគ្រោះ មន្ត្រីសង្គមស៊ីវិល គណបក្សប្រឆាំង និងមន្ត្រីរដ្ឋាភិបាលជាដើម ។ ប៉ុន្តែលោកថា ជារឿយៗ មន្ត្រីរដ្ឋាភិបាលទៅវិញ ដែលបដិសេធក្នុងការជួប និងមិនផ្តល់ព័ត៌មានតាមការស្នើសុំ។ លោកយល់ថា រដ្ឋាភិបាលមិនត្រូវបដិសេធរបាយការណ៍នោះទេ និងគួរតែប្រឹងកែលម្អស្ថានភាពសិទ្ធិមនុស្សតាមអនុសាសន៍របស់អ្នកជំនាញអង្គការសហប្រជាជាតិ ដើម្បីបញ្ចៀសទណ្ឌកម្មផ្សេងៗ ពីសហគមន៍អន្តរជាតិ៖ « ជាធម្មតាទេ រដ្ឋដែលមានការរំលោភសិទ្ធិមនុស្ស តែងតែ ច្រានចោល និងមិនទទួលយកអីចឹងហើយ ប៉ុន្តែមន្ត្រីជំនាញដែលគេមានទំនុកចិត្តផ្តល់ អភ័យឯកសិទ្ធិ ឬតួនាទីមកបំពេញការងារក្នុងប្រទេសនីមួយៗ គឺគេឲ្យតម្លៃណាស់ហើយ គេមានការជឿជាក់ដោយសារតែអ្នកទាំងអស់នោះ មានមន្ត្រីជំនាញនិងមន្ត្រីរបស់ខ្លួន ប្រចាំប្រទេសអស់ហ្នឹង ដោយគេមានការប្រមូល និងស្រាវជ្រាវព័ត៌មាន និងការវាស់វែងផ្ទៀងផ្ទាត់ព័ត៌មានច្បាស់លាស់ណាស់ មុនគេធ្វើសេចក្ដីរាយការណ៍នៅលើឆាកអន្តរជាតិ ម្តងៗ » ។
ចំពោះការណែនាំរបស់តំណាងកម្ពុជាដល់អ្នករាយការណ៍ពិសេសថ្មីនោះ អ្នកវិភាគនយោបាយ បណ្ឌិត ឡៅ ម៉ុងហៃ ចាត់ទុកថា ជាការណែនាំដែលមិនចាំបាច់ មិនសមស្រប និងអត់ប្រយោជន៍។ បណ្ឌិត ឡៅ ម៉ុងហៃ បន្តថា លោកសាស្ត្រាចារ្យ វិធិត ម៉ាន់តាផន ដែលជាអ្នករាយការណ៍ពិសេសថ្មី គឺជាអ្នកជំនាញល្បីឈ្មោះនៅលើពិភពលោកដែលមានបទពិសោធន៍និងស្នាដៃច្រើនលើសលុបក្នុងវិស័យសិទ្ធិមនុស្ស ដូច្នេះលោកស្គាល់បេសកកម្មរបស់លោក និងចេះបំពេញបេសកកម្មនេះយ៉ាងច្បាស់លាស់បំផុត។ អ្នកវិភាគចាស់វស្សារូបនេះ យល់ថា អ្នកមានគតិបណ្ឌិត និងគោរពសិទ្ធិមនុស្ស គេត្រៀមសហការជាមួយបេសកជននៃអង្គការសហប្រជាជាតិថ្មីនេះ និងត្រៀមស្វាគមន៍អនុសាសន៍និងការណែនាំពីបេសកជននេះ ដើម្បីកែប្រែស្ថានភាពសិទ្ធិមនុស្សនៅកម្ពុជាឲ្យបានកាន់តែប្រសើរឡើង៕