ពលរដ្ឋជាង ៣០​នាក់​ហើយ​ត្រូវ​អាជ្ញាធរ​ចាប់ខ្លួន​ពី​បទ​ញុះញង់ ក្រោយ​ផ្ទុះ​ជំងឺ​កូវីដ ក្នុង​សហគមន៍​២០​កុម្ភៈ

ដោយ មាន ឫទ្ធិ
2021-04-16
Share
ពលរដ្ឋជាង ៣០​នាក់​ហើយ​ត្រូវ​អាជ្ញាធរ​ចាប់ខ្លួន​ពី​បទ​ញុះញង់ ក្រោយ​ផ្ទុះ​ជំងឺ​កូវីដ ក្នុង​សហគមន៍​២០​កុម្ភៈ អគ្គស្នងការ​រង និង​ជា​អ្នកនាំពាក្យ​អគ្គស្នងការដ្ឋាន​នគរបាល​ជាតិ លោក ឆាយ គឹមខឿន (រូប​អង្គុយ​កណ្ដាល)។
រូប​៖ អគ្គស្នងការដ្ឋាន​នគរបាលជាតិ

មន្ត្រីជាន់ខ្ពស់​នគរបាល​ជាតិ​និយាយ​ថា យ៉ាងហោចណាស់​មនុស្ស​៣០​នាក់​ត្រូវ​បាន​អាជ្ញាធរ​ចាប់ខ្លួន​និង​បញ្ជូន​ទៅ​តុលាការ​ដោយ​ប្រកាន់​ពី​បទ​ញុះញង់​ដែល​រិះគន់​រឿង​ចាក់​វ៉ាក់សាំង​។ ក្រុម​មន្ត្រី​សង្គម​ស៊ីវិល​ស្នើ​ទៅ​អាជ្ញាធរ​គួរ​ប្រើ​វិធានការ​អប់រំ​ជាជាង​វិធានការ​ផ្លូវច្បាប់ និង​ត្រូវ​ផ្សព្វផ្សាយ​ច្បាប់​កូវីដ​១៩​ឱ្យ​បាន​ទូលំទូលាយ​ដើម្បី​ពលរដ្ឋ​បានដឹង។

អ្នកនាំពាក្យ​នគរបាល​ជាតិ​លោក ឆាយ គឹមខឿន អះអាង​ថា ការ​ចាប់​ខ្លួន​នេះ ជា​ជម្រើស​ចុងក្រោយ​ដែល​សមត្ថកិច្ច​ត្រូវធ្វើ​លើ​អ្នក​ញុះញង់​ការ​ចាក់​វ៉ាក់សាំង​។ អ្នកនាំពាក្យ​នគរបាល​រូប​នេះ​ប្រាប់ អាស៊ីសេរី​ថា ពលរដ្ឋ​ដែល​ត្រូវ​ចាប់ខ្លួន​នោះ​មិន​បាន​យកចិត្តទុកដាក់​អនុវត្ត​ច្បាប់ និង​មាន​ចេតនា​រាំងស្ទះ​ដល់​ការ​ការពារ​សុខភាព​សាធារណៈ​។ លោក​បន្ត​ថា មុន​ឈាន​ដល់​ការ​អនុវត្ត​ច្បាប់​នេះ គឺ​សមត្ថកិច្ច​បាន​អប់រំ​វិធានការ​រដ្ឋបាល ឬ​ពិន័យ​ជា​ប្រាក់៖ «បើ​និយាយ​ពី​អប់រំ​មិនដឹង​ជា​អប់រំ​ប៉ុន្មាន​ម៉ឺន​ឆ្នាំ​ទៀត​ទេ មុន​រដ្ឋាភិបាល​ចេញ​ច្បាប់​ក៏​អប់រំ​ឱ្យ​អស់​ចិត្ត​ដែរ»

សមត្ថកិច្ច​បាន​ចាប់ខ្លួន​ពលរដ្ឋ​ជា​បន្តបន្ទាប់​បែបនេះ ខណៈ​លោកនាយក​រដ្ឋមន្ត្រី ហ៊ុន សែន នៅ​ថ្ងៃទី ១៦​មេសា​នេះ ស្វាគមន៍​វិធានការ​របស់​សមត្ថកិច្ច និង​ព្រមាន​ចាប់​ពលរដ្ឋ​ញាត់​គុក​ឱ្យ​តែ​រក​ឃើញ​ថា​ផ្សព្វផ្សាយ ឬ​ញុះញង់​មិន​ឱ្យ​មានការ​ចូលរួម​ចាក់​វ៉ាក់សាំង​ប្រឆាំង​នឹង​ជំងឺ​កូវីដ-១៩៖ «យើង​មិន​អាច​ឱ្យ​មានការ​ស៊ីផឹក​នាំគ្នា​ប្រមូលផ្ដុំ​ហើយ​មិន​អនុវត្ត​ច្បាប់​នោះ​ទេ ។ ខ្ញុំ​រីករាយ​ជាមួយ​ព័ត៌មាន​ដែល​ថា មាន​អ្នក​បំពាន​ច្បាប់​ត្រូវ​បញ្ជូន​តុលាការ ខ្ញុំ​លើកទឹកចិត្ត​ឱ្យ​មាន​ការអនុវត្ត​ច្បាប់​ដោយ​បញ្ជូន​ទៅ​តុលាការ​ដោយ​គ្មាន​ការលើកលែង​សម្រាប់​មនុស្ស​ណាក៏ដោយ​ដែល​បំពាន​លើ​បម្រាម»

ទោះ​យ៉ាងណា ក្រុម​អ្នកឃ្លាំមើល​សិទ្ធិមនុស្ស​លើកឡើង​ថា ករណី​ពលរដ្ឋ​រិះគន់​រឿង​ចាក់​វ៉ាក់សាំង​ព្រោះ​ពួកគេ​មិនទាន់​ដឹង​ច្បាស់​ពី​ប្រសិទ្ធភាព​នៃ​វ៉ាក់សាំង ដូច្នេះ​ពលរដ្ឋ​មាន​សិទ្ធិ​រិះគន់។ ក្រុម​ឃ្លាំ​មើល​ថា អាជ្ញាធរ​មិន​គួរ​ប្រើ​វិធានការ​ច្បាប់ ឬ​ចាប់ចង​ចោទប្រកាន់​ពលរដ្ឋ​នោះ​ទេ។

ប្រធាន​អង្គការ​សម្ព័ន្ធភាព​ការពារ​សិទ្ធិមនុស្ស​កម្ពុជា ហៅ​កាត់​ថា ច្រាក់ (CHRAC) លោក រស់ សុដ្ឋា សង្កេត​ឃើញ​ថា វ៉ាក់សាំង​ឱ្យ​ពលរដ្ឋ​ភាគច្រើន​គឺ​វ៉ាក់សាំង​ចិន ប៉ុន្តែ​ប្រសិទ្ធភាព​នៃ​វ៉ាក់សាំង​នេះ​ត្រូវ​បាន​រាយការណ៍​ថា ប្រសិទ្ធភាព​ខ្សោយ​ជាង​វ៉ាក់សាំង​ផ្សេងៗ​ទៀត​ដូច្នេះ​ពលរដ្ឋ​មាន​សិទ្ធិ​រិះគន់​វ៉ាក់សាំង​នេះ​។ លោក​បន្ត​ទៀត​ថា ពលរដ្ឋ​មួយចំនួន​មិនបាន​ដឹង​ថា ការ​បញ្ចេញមតិ​របស់​ពួកគេ​តាម​បណ្ដាញ​សង្គម​ជា​ទង្វើ​ខុសច្បាប់​ទេ៖ «សូម្បីតែ​ខ្ញុំ​ធ្វើការ​ក៏​មាន​កន្លែង​ខ្លះ​ខ្វះ​ចម្លោះ​ដែរ​ពាក់ព័ន្ធ​ឯកទេស​ដែល​ខ្ញុំ​ធ្វើការ ដូច្នេះហើយ​ទម្រាំ​ពលរដ្ឋ​ដែល​គ្នា​មិនមែន​ជា​អ្នកច្បាប់​មិនមែន​ជា​អ្នក​ទម្លាប់​ហើយ​មិនមែន​ជា​វិស័យ​របស់​ពួកគេ ដូច្នេះ​ការ​ចាប់​ពួកគេ​ដូច​ថា ពេល​ខ្លះទៅ​គ្នា​ធ្វើ​ដោយ​មិន​បាន​ដឹង​ថា អ្វី​គាត់​ធ្វើ​ដោយ​មិន​បានដឹង​ជា​ការ​ខុសច្បាប់»

ស្រដៀង​គ្នា​នេះ​ដែរ ប្រធាន​ផ្នែក​សិទ្ធិមនុស្ស​នៃ​សមាគម​ការពារ​សិទ្ធិមនុស្ស​អាដហុក (Adhoc) លោក នី សុខា ស្នើ​ទៅ​អាជ្ញាធរ​គួរ​ណែនាំ ឬ​ព្រមាន​មុន​សិន ហើយ​បើ​ពលរដ្ឋ​នៅតែ​មិន​ស្ដាប់​ទៀត​ទើប​ប្រើ​វិធានការ​ផ្លូវច្បាប់​ក៏​មិនទាន់​ហួសពេល​នោះ​ដែរ​។ លោក​ថា ការ​ចាប់​ពលរដ្ឋ​ដាក់​ពន្ធនាគារ​មិន​បាន​ចំណេញ​អ្វី​ដល់​សង្គមជាតិ​ទេ៖ «បណ្ដាញ​របស់​រដ្ឋាភិបាល​អាច​ផ្សព្វផ្សាយ​ព័ត៌មាន​បាន​ទូលំទូលាយ​ជាង​បុគ្គល​ម្នាក់​ពីរ​នាក់​ហ្នឹង​ឆ្ងាយ​ណាស់​ដូច្នេះ​ខ្ញុំ​គិតថា អ្វី​ដែល​ខ្ញុំ​លើកឡើង​បុគ្គល​ម្នាក់​ពីរ​នាក់​មិន​ប៉ះពាល់​ធ្ងន់ធ្ងរ​ដល់​សង្គម​ហ្នឹង​ប៉ុន្មាន​ដែរ​ទេ​បាទ»

នៅ​រយៈពេល​ចុងក្រោយ​នេះ គេ​សង្កេតឃើញ​រដ្ឋាភិបាល​ប្រើ​គ្រប់​វិធី​ដើម្បី​ឱ្យ​ពលរដ្ឋ​ចូលរួម​ចាក់​វ៉ាក់សាំង​ដែល​វ៉ាក់សាំង​ភាគច្រើន​ជា​វ៉ាក់សាំង​ចិន​ស្របពេល​រដ្ឋាភិបាល​កំពុង​អនុវត្ត​ផែនការ​ចាក់​វ៉ាក់សាំង​បង្ការ​ជំងឺ​កូ​វីដ​១៩ ទូទាំង​ប្រទេស។

នាយករង​ទទួលបន្ទុក​ផ្នែក​ឃ្លាំមើល​នៃ​សិទ្ធិមនុស្ស លីកាដូ លោក អំ សំអាត សង្កេត​ឃើញ​ថា ការ​ទទួល​ព័ត៌មាន​ស្ដីពី​ការ​ចាក់​វ៉ាក់សាំង និង​ច្បាប់​កូវីដ​មិនទាន់​ជ្រួតជ្រាប ឬ​ទូលំទូលាយ​ដល់​ពលរដ្ឋ​នោះ​ទេ​។ មន្ត្រី​សិទ្ធិមនុស្ស​រូប​នេះ ជំរុញ​ទៅ​អាជ្ញាធរ​គួរ​ផ្សព្វផ្សាយ​ច្បាប់​កូវីដ​ឱ្យ​បាន​ទូលំទូលាយ​ជាង​នេះ​ដើម្បី​ឱ្យ​ពលរដ្ឋ​បាន​យល់ដឹង៖ «អំឡុង​ពេលនេះ​គួរតែ​មាន​ព័ត៌មាន​ឱ្យ​បាន​ច្បាស់លាស់​សម្រាប់​ពល​រដ្ឋ​កុំឱ្យ​មានការ​ភាន់ច្រឡំ​ទៅលើ​បញ្ហា​ទាំងអស់​ហ្នឹងហើយ​បង្ក​ឱ្យ​មាន​ភាព​រងគ្រោះ​សំខាន់​ការ​ចាប់ខ្លួន​ដោយសារ​ការ​បញ្ចេញ​មតិ»

រដ្ឋាភិបាល​លោក ហ៊ុន សែន បាន​បង្កើត​ច្បាប់​ស្ដី​អំពី​ការទប់ស្កាត់​ការ​រាលដាល​ជំងឺ​កូវីដ​-១៩ យ៉ាង​ប្រញាប់​ដោយ​គ្មាន​ការពិគ្រោះ​យោបល់​ជាមួយ​ភាគី​ពាក់ព័ន្ធ ដូចជា​ក្រុម​អង្គការ​សង្គម​ស៊ីវិល​ជាដើម​និង​ដាក់​ឱ្យ​ប្រើប្រាស់​ភ្លាមៗ​កាលពី​ថ្ងៃទី​១១ ខែមីនា។

ក្រុម​អ្នកជំនាញ​សិទ្ធិមនុស្ស​អន្តរជាតិ​ក៏​បាន​សម្ដែង​ការ​ព្រួយបារម្ភ​ជាថ្មី​ពី​ការប្រើប្រាស់​វិធានការ​ច្បាប់​ក្នុង​អំឡុង​កូវីដ​១៩​នៅពេល​នេះ​ដែរ​។ អ្នកជំនាញ​សិទ្ធិមនុស្ស​របស់​អង្គការសហប្រជាជាតិ ៣​នាក់​និយាយ​កាល​ពី​ពេល​ថ្មីៗ​នេះ​ថា ការប្រើ​ច្បាប់​ស្ដីពី​វិធានការ​ទប់ស្កាត់​ការ​ឆ្លង​រាលដាល​នៃ​ជំងឺ​កូវីដ​-១៩​ដែល​មាន​ទាំង​ការ​ដាក់ទោស​រហូត ២០​ឆ្នាំ និង​ពិន័យ​ជា​ប្រាក់​ផង​នោះ​ជា​ការ​រឹតត្បិត​លើ​សេរីភាព​និង​សិទ្ធិ​មូលដ្ឋាន​ពលរដ្ឋ។ អ្នកជំនាញ​របស់​អង្គការសហប្រជាជាតិ​ជំរុញ​ឱ្យ​រដ្ឋាភិបាល​ពិនិត្យ​និង​កែប្រែ​ច្បាប់​ស្ដីពី​ការទប់ស្កាត់​ជំងឺ​កូ​វីដ​-១៩ ឡើងវិញ​ដើម្បី​ឱ្យ​ស្របតាម​បទដ្ឋាន​សិទ្ធិមនុស្ស​អន្តរជាតិ​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល