អាជ្ញាធរ​ខេត្ត​ព្រះវិហារ​គំរាម​ប្រជា​សហគមន៍​ម្នាក់​ឱ្យធ្វើ​កិច្ចសន្យា​ឈប់​ផ្តល់​បទ​សម្ភាស​ដល់​វិទ្យុ​អាស៊ីសេរី

ដោយ សេក បណ្ឌិត
2024.03.01
អាជ្ញាធរ​ខេត្ត​ព្រះវិហារ​គំរាម​ប្រជា​សហគមន៍​ម្នាក់​ឱ្យធ្វើ​កិច្ចសន្យា​ឈប់​ផ្តល់​បទ​សម្ភាស​ដល់​វិទ្យុ​អាស៊ីសេរី សមាជិក​បណ្ដាញ​សហគមន៍​ការពារ​ព្រៃព្រះរកា លោក ហៀម គីមហុង ផ្តល់​បទសម្ភាស​កាល​ពី​ថ្ងៃ​ទី១៩ ខែ​កុម្ភៈ ​ឆ្នាំ​២០២៤។
រូប​៖ ពលរដ្ឋ​ផ្តល់ឱ្យ

អាជ្ញាធរ​ខេត្ត​ព្រះវិហារ​បាន​បង្គាប់​ឱ្យ​ប្រជា​សហគមន៍​ការពារ​ព្រៃ​ព្រះ​រកា គឺ​លោក ហៀម គីមហុង ធ្វើ​កិច្ចសន្យា​ឈប់​ផ្តល់​បទសម្ភាស​ឱ្យ​វិទ្យុ​អាស៊ីសេរី ដោយ​ចោទ​ថា ធ្វើ​ឱ្យ​ប៉ះពាល់​កិត្តិយស​ថ្នាក់ដឹកនាំ។

មន្ត្រី​សង្គម​ស៊ីវិល​ចាត់ទុក ទង្វើ​របស់​អាជ្ញាធរ​ថា បំពាន​ក្រមសីលធម៌​មន្ត្រីរាជការ និង​រំលោភ​រដ្ឋធម្មនុញ្ញ​កម្ពុជា។

សមាជិក​បណ្ដាញ​សហគមន៍​ការពារ​ព្រៃ​ព្រះ​រកា លោក ហៀម គីមហុង ប្រាប់​វិទ្យុ​អាស៊ីសេរី នៅ​ថ្ងៃទី ២៩ កុម្ភៈ​ថា អាជ្ញាធរ​ខេត្ត​ព្រះវិហារ បាន​ដាក់​សម្ពាធ​លោក​ឱ្យ​ឈប់​ឈឺឆ្អាល​រឿង​ដីធ្លី និង​ព្រៃឈើ ដែល​កំពុង​កើត​មាន​ច្រើន​នៅ​ខេត្ត​ព្រះវិហារ។

លោក​បញ្ជាក់​ថា លោក​បាន​ប្រើ​សិទ្ធិ​ជា​ពលរដ្ឋ​និយាយ​ការពិត​នូវ​បញ្ហា​ដីធ្លី​របស់​ពលរដ្ឋ​ដែល​កំពុង​មាន​វិវាទ​ជាមួយ​ក្រុមហ៊ុន​ឯកជន ក៏ប៉ុន្តែ​អាជ្ញាធរ​បែរ​រាវរក​កំហុស​របស់​លោក ដើម្បី​គំរាម​ស្មារតី​ឱ្យ​លោក​ឈប់​ផ្តល់​បទសម្ភាសន៍​ឱ្យ​អ្នក​សារព័ត៌មាន។

លោក ហៀម គីមហុង៖ «ដូចជា​ការ​ដាក់​សម្ពាធ​មក​លើក​ខ្ញុំ និយាយ​ទៅ​ខ្ញុំ​សម្ភាស​សារព័ត៌មាន ពលរដ្ឋ​ស្រែក​ថា ប៉ះពាល់​ដំណាំ​ពួកគាត់ តើ​មាន​អាជ្ញាធរ​ណា​ហ៊ាន​ចូលរួម​ដោះស្រាយ ស្ងាត់​ឱ្យ​ឈឹង​។ ខ្ញុំ​តាមដាន​អាជ្ញាធរ បើ​អាជ្ញាធរ​មិន​ដោះស្រាយ​ទៅមុខ​ទៀត បើ​ពលរដ្ឋ​ស្រែក​ខ្ញុំ​ក៏​ស្រែក​។ ខ្ញុំ​មិន​ខ្លាច​ទេ»

កាលពី​ថ្ងៃ​ទី២៧ កុម្ភៈ មន្ត្រី​រដ្ឋបាល​សាលាស្រុក​ឆែប លោក ឡាច ឡិះ មន្ត្រី​ការិយាល័យ​មន្ទីរ​កសិកម្ម​ស្រុក​ឆែប លោក លិញ ស៊ីមឡូត នាយ​ផ្នែក​រដ្ឋបាល​ព្រៃឈើ លោក សេង លាង និង មេឃុំ​សង្កែ​មួយ​លោក លេវ សុផល រួម​ទាំង​សមត្ថកិច្ច បាន​បង្គាប់​ឱ្យ​លោក ហៀម គឹមហុង ធ្វើ​កិច្ចសន្យា ក្នុង​ប៉ុស្តិ៍​នគរបាល​សង្កែ​មួយ។

កិច្ចសន្យា​ដែល​វិទ្យុ​អាស៊ីសេរី​ទទួល​បាន លោក ហៀម គីមហុង បាន​ផ្តិត​មេដៃ​សន្យា​ឈប់​ផ្តល់​បទ​សម្ភាស​ដល់​វិទ្យុ​អាស៊ីសេរី និង​បញ្ឈប់​សកម្មភាព​ទាំងឡាយ​ណា ធ្វើ​ឱ្យ​ខូច​កិត្តិយស​ថ្នាក់​ដឹកនាំ។ ប្រសិនបើ​ពលរដ្ឋ​រូប​នេះ មិន​គោរព​កិច្ចសន្យា​ទេ នឹង​ទទួលខុសត្រូវ​ចំពោះមុខ​ច្បាប់។

វិទ្យុ​អាស៊ីសេរី​មិន​ទាន់​អាច​ទាក់ទង អភិបាល​ខេត្ត​ព្រះវិហារ លោក គីម រិទ្ធី ដើម្បី​សុំ​ការ​អធិប្បាយ​បញ្ហា​នេះ​បាន​នៅ​ឡើយ​ទេ នៅ​ថ្ងៃ​ទី២៩ កុម្ភៈ។ រីឯ​អាជ្ញាធរ​ខេត្ត​ព្រះវិហា​រដែល​ទៅ​បង្គាប់​ឱ្យ​ពលរដ្ឋ​ធ្វើ​កិច្ច​សន្យា ក៏​មិន​ទាន់​អាច​ទាក់ទង​បាន​ដែរ។

ក៏ប៉ុន្តែ នាយ​ផ្នែក​រដ្ឋបាល​ព្រៃឈើ លោក សេង លាង និង​មន្ត្រី​សាលាស្រុក​ឆែប លោក ឡាច ឡិះ បាន​ប្រាប់​ប្រជា​សហគមន៍​ថា លោក ហៀម គីមហុង បាន​ផ្តល់​បទ​សម្ភាស​ឱ្យ​អ្នកសារព័ត៌មាន​ខុសពី​ការ​ពិត ធ្វើ​ឱ្យ​ប៉ះពាល់​មុខមាត់​ថ្នាក់​ដឹកនាំ និង​បំផុស​ចលនា​តស៊ូ​ពលរដ្ឋ ស្រប​ពេល​ដែល​អាជ្ញាធរ​កំពុង​ដោះស្រាយ​បញ្ហា​ដីធ្លី។

ថ្មីៗ​នេះ ប្រជា​សហគមន៍​ការពារ​ព្រៃព្រះរកា ហៀម គីមហុង បាន​ផ្តល់​បទ​សម្ភាស​ឱ្យ​វិទ្យុ​អាស៊ីសេរី រៀបរាប់​ពី​សកម្មភាព ក្រុមហ៊ុន គ្លូប៊ល ហ្គ្រីន (ខេមបូឌា) (GLOBAL GREEN (CAMBODIA) ENERGY DEVELOPMENT CO., LTD កំពុង​ធ្វើ​អាជីវកម្ម​រ៉ែ​ដែក​ប៉ះពាល់​បរិស្ថាន និង​ដីស្រែ​ចម្ការ​របស់​អ្នកភូមិ​ជាច្រើន​កន្លែង​ក្នុង​ខេត្តព្រះវិហារ និង​ខេត្តស្ទឹងត្រែង។

ជុំវិញ​រឿង​នេះ នាយក​ប្រតិបត្តិ​អង្គការ​ពន្លក​ខ្មែរ លោក ប៉ឹក សោភ័ណ យល់​ថា ទង្វើ​របស់​អាជ្ញាធរ​ជា​គំរូ​អាក្រក់​មួយ គំរាម​បំបាក់​ស្មារតី​ពលរដ្ឋ បំពាន​គោលការណ៍​ច្បាប់​ជាតិ និង​អន្តរជាតិ។

លោក ប៉ឹក សោភ័ណ៖ «អាជ្ញាធរ​និង​មន្ត្រី​ជំនាញ​កំពុង​ប្រព្រឹត្ត​បទល្មើស រូបភាព​រំលោភសិទ្ធិ​សេរីភាព​ពលរដ្ឋ​ធ្ងន់ធ្ងរ ស្រប​ពេល​កម្ពុជា​គោរព​លទ្ធិប្រជាធិបតេយ្យ​។ ពលរដ្ឋ​បញ្ចេញ​យោបល់ នាំគ្នា​មក​សម្លុត​គំរាម​បែប​ហ្នឹង ជា​រូបភាព​មួយ​អាក្រក់​អត់​ល្អ​មើល​ទេ»

រដ្ឋធម្មនុញ្ញ​មាត្រា ៣៥ ចែងថា ពលរដ្ឋ​ខ្មែរ​ទាំង​ពីរ​ភេទ មាន​សិទ្ធិ​ចូលរួម​យ៉ាងសកម្ម​ក្នុង​ជីវភាព​នយោបាយ សេដ្ឋកិច្ច សង្គម និង​វប្បធម៌​របស់​ប្រទេសជាតិ​។ សេចក្តី​ស្នើ​ទាំងឡាយ​របស់​ពលរដ្ឋ ត្រូវ​បាន​ទទួល​ការ​ពិនិត្យ និង​ដោះស្រាយ​យ៉ាង​ហ្មត់ចត់​ពី​អង្គការ​រដ្ឋ។

លោក ហៀម គីមហុង បន្ថែម​ថា ប្រសិនបើ​អាជ្ញាធរ​គោរព​សិទ្ធិ​ពលរដ្ឋ និង​ដោះស្រាយ​បញ្ហា​ដីធ្លី​ជូន​ពលរដ្ឋ​ក្នុងស្រុក​ឆែប ដោយ​យុត្តិធម៌ លោក​នឹង​ផ្អាក​ផ្តល់​សម្ភាស​ដល់​អ្នកសារព័ត៌មាន ក៏ប៉ុន្តែ​បើ​អាជ្ញាធរ​មិន​ធ្វើ​ដូច្នេះ​ទេ លោក​នឹង​មិន​នៅ​ស្ងៀម​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។