លោក រ៉ុង ឈុន ព្រម​វះកាត់​ភ្នែក​ម្ខាង តែ​ស្នើ​សុំ​សម្រាក​នៅ​មន្ទីរពេទ្យ​ឲ្យ​បាន​ត្រឹមត្រូវ

ដោយ ម៉ៅ សុធានី
2021-09-11
Share
លោក រ៉ុង ឈុន ព្រម​វះកាត់​ភ្នែក​ម្ខាង តែ​ស្នើ​សុំ​សម្រាក​នៅ​មន្ទីរពេទ្យ​ឲ្យ​បាន​ត្រឹមត្រូវ ប្រធាន​សហភាព​សហជីព​កម្ពុជា និង​ជា​តំណាង​ក្រុមប្រឹក្សា​ឃ្លាំមើល​កម្ពុជា​លោក រ៉ុង ឈុន (រូប​កណ្ដាល) នៅ​មុខ​សាលាដំបូង​រាជធានី នា​ពេល​កន្លង​ទៅ។
Photo Courtesy

សាច់ញាតិ​កំពុង​ពឹងពាក់​មេធាវី​ដាក់ពាក្យ​ស្នើសុំ​ទៅ​តុលាការ​ដើម្បី​អនុញ្ញាត​ឲ្យ​ប្រធាន​សហភាព​សហជីព​កម្ពុជា និង​ជា​តំណាង​ក្រុមប្រឹក្សា​ឃ្លាំមើល​កម្ពុជា​លោក រ៉ុង ឈុន ទទួល​បាន​ការ​សម្រាក​ព្យាបាល​នៅ​មន្ទីរពេទ្យ​ត្រឹមត្រូវ​។ អាជ្ញាធរ​ពន្ធនាគារ​បញ្ជាក់​ថា រយៈពេល​នៃ​ការវះកាត់ និង​ការ​ព្យាបាល​នៅ​មន្ទីរពេទ្យ​គឺ​អាស្រ័យ​ខាង​គ្រូពេទ្យ​ជា​អ្នក​វិនិច្ឆ័យ។

ភ្នែក​ម្ខាង​ស្ដាំ របស់ លោក រ៉ុង ឈុន អាច​នឹង​វិវត្ត​ពី​ព្រិល​ទៅ​ងងឹត​ក្នុងករណី​ការ​ព្យាបាល​មិនទាន់​ពេល​។ ជាង​នេះ​ទៅ​ទៀត​ស្ថានភាព​ឈាមកក​ក្នុង​ភ្នែក​នេះ ក៏​នឹង​អាច​រាលដាល​ទៅ​ភ្នែក​ម្ខាង​ឆ្វេង​ទៀត​ដែរ។

ក្មួយប្រុស​លោក រ៉ុង ឈុន គឺ​លោក រ៉ុង វិជ្ជា ឲ្យ​ដឹង​ថា សាច់ញាតិ និង​ក្រុមការងារ​របស់​លោក រ៉ុង ឈុន កំពុង​ជជែក​គ្នា​ដើម្បី​រក​វិធី​ឲ្យ​គាត់​ទទួល​បាន​ការ​សម្រាក​ព្យាបាល​ដិត​ដល់​ក្នុង​មន្ទីរពេទ្យ​តាមរយៈ​ការ​ពឹង​ពាក់​មេធាវី​ដើម្បី​ស្នើសុំ​ផ្នែក​ច្បាប់​ទៅ​ខាង​តុលាការ៖ «យើង​កំពុងតែ​សិក្សា​បន្ថែម​ទាក់ទង​នឹង​នីតិវិធី​ផ្លូវច្បាប់​ថា ត្រូវ​ស្នើសុំ​អន្តរាគមន៍​សម្រួល​ឲ្យ​គាត់​បាន​ព្យាបាល​នៅ​ខាងក្រៅ​ឲ្យ​សមាជិកគ្រួសារ​អ្វី​ឲ្យ​បាន​មើលថែ​គាត់​ដិតដល់​។​យើង​កំពុងតែ​ជជែក​គ្នា​លើ​បញ្ហា​ហ្នឹង»

កាលពី​ថ្ងៃទី​០៧ កញ្ញា លោក រ៉ុង ឈុន បាន​បដិសេធ​ទទួលយក​ការវះកាត់​ដុំ​ឈាមកក​ក្នុង​ភ្នែក​ម្ខាង​ស្ដាំ ភ្លាមៗ​នៅ​ទៅ​មន្ទីរពេទ្យ​មិត្តភាព​ខ្មែរ​សូវៀត ឬ​ពេទ្យ​រុស្សី។ លោក​គ្រាន់តែ​សំណូមពរ​សុំ​ថ្នាំ​បន្តក់​ភ្នែក​ពី​គ្រូពេទ្យ​ប៉ុណ្ណោះ ដោយសារ​លោក​ចង់​ពិភាក្សា​ជាមួយ​សាច់ញាតិ និង​ក្រុមការងារ​របស់​លោក​សិន។

ប្រធាន​សមាគម​គ្រូបង្រៀន​កម្ពុជា​ឯករាជ្យ អ្នកស្រី អ៊ុក ឆាយាវី ឲ្យ​ដឹង​ថា​ការ​បដិសេធ​ភ្លាមៗ​នេះ​គឺ​ដោយសារ​លោក រ៉ុង ឈុន ព្រួយ​បារម្ភ​ពី​ប្រសិទ្ធភាព​នៃ​ការវះកាត់ និង​ការ​ព្យាបាល​មិន​បាន​ត្រឹមត្រូវ​ក្រោយ​ការ​វះកាត់​។ ប៉ុន្តែ​អ្នកស្រី​អះអាង​ថា ពេលនេះ​លោក រ៉ុង ឈុន បាន​យល់ព្រម​ទទួលយក​ការវះកាត់​ដុំ​ឈាមកក​ក្នុង​ភ្នែក​ហើយ ក្រោយ​បាន​ពិភាក្សា និង​មានការ​ជំរុញ​ពី​សាច់ញាតិ និង​ក្រុមការងារ។

អ្នកស្រី អ៊ុក ឆាយាវី បញ្ជាក់​ថា មូលហេតុ​បណ្ដាល​ឲ្យ​លោក រ៉ុង ឈុន មាន​ឈាមកក​ក្នុង​ភ្នែក​ច្រើន​ឆ្នាំ​មកនេះ​គឺ​បណ្ដាល​មក​ពី​ក្រុម​សន្តិសុខ​សាលា​រាជធានី​ភ្នំពេញ​បាន​គ្រវាស​ដៃ​ត្រូវ​ភ្នែក​លោក ក្នុង​ពេល​តវ៉ា​កាលពី​ប៉ុន្មាន​ឆ្នាំមុន។ លោក រ៉ុង ឈុន តែងតែ​ទៅ​ជួប​គ្រូពេទ្យ​តាម​ការ​ណាត់​ដើម្បី​ព្យាបាល​តាម​ដំណាក់កាលវិវត្ត​នៃ​ដុំ​ឈាម​នោះ ប៉ុន្តែ​ក្រោយ​ពេល​អាជ្ញាធរ​ចាប់​លោក​ឃុំខ្លួន​ជាង​មួយឆ្នាំ​មកនេះ​លោក​បាន​ខកខាន​ការ​ព្យាបាល​ទើប​បណ្ដាល​ឲ្យ​ដុំ​ឈាមកក​ក្នុង​ភ្នែក​វិវត្តន៍​ទៅជា​ធ្ងន់ធ្ងរ។

អ្នកស្រី អ៊ុក ឆាយាវី ស្នើសុំ​តុលាការ ឬ​គ្រូពេទ្យ​អនុញ្ញាត​ឲ្យ​លោក រ៉ុង ឈុន បាន​សម្រាក​ព្យាបាល​នៅក្នុង​មន្ទីរពេទ្យ​ត្រឹមត្រូវ​រហូត​ដល់​ជាសះស្បើយ​ទាំងស្រុង​ដូច​ជន​ជាប់ឃុំ​ដែល​ជា​ឧកញ៉ា​រកស៊ី​លក់​គ្រឿងញៀន ឬ​ឧកញ៉ា​ជាប់ចោទ​ពី​បទ​សម្លាប់​មនុស្ស​ជាដើម​។ អ្នកស្រី​ក៏​ទាមទារ​ឲ្យ​សមត្ថកិច្ច​អនុញ្ញាត​ឲ្យ​សាច់ញាតិ​របស់​លោក រ៉ុង ឈុន បាន​ចូល​ទៅ​មើលថែ​អ្នកជំងឺ​នៅក្នុង​មន្ទីរពេទ្យ​ផង​ដែរ៖ «ពួកគាត់​បានដឹង​ច្បាស់​ហើយ​ថា​លោក រ៉ុង ឈុន មិនមែន​ឈឺ​ពុត​ដូច​អស់លោក​មួយចំនួន​ទៀត​។ បើសិនជា​បាន​ដូច​ឧកញ៉ា​ហ្នឹង ខ្ញុំ​គិតថា​នេះ​ជា​ការ​អរគុណ​ដល់​ក្រសួង​មហាផ្ទៃ ក៏ដូចជា​ពន្ធនាគារ ដែល​បាន​បើក​សិទ្ធិ​ជូន លោក រ៉ុង ឈុន ដែល​កំពុងតែ​ជួប​ប្រទះ​ជំងឺ»

ឆ្លើយតប​បញ្ហា​នេះ អ្នកនាំពាក្យ​អគ្គនាយកដ្ឋាន​ពន្ធនាគារ លោក នុត សវនា បញ្ជាក់​ថ ​ការសម្រេច​បែប​ណា​គឺជា​ការវិនិច្ឆ័យ​របស់​គ្រូពេទ្យ​។ លោក​បញ្ជាក់​ថា លោក​ក៏​មាន​បំណង​ចង់ទៅ​សួរនាំ លោក រ៉ុង ឈុន ផ្ទាល់​ដែរ ដើម្បី​កុំ​ឲ្យ​មានការ​ចោទ​ប្រកាន់​ថា ខាង​ពន្ធនាគារ​មិន​យកចិត្តទុកដាក់​ចំពោះ​ជន​ជាប់ឃុំ៖ «តែ​វះ​(​ភ្នែក​)​គេ​ឲ្យ​សម្រាក​ឲ្យ​ស្រួលបួល​ហើយ ហើយ​ការ​អនុញ្ញាត​ឲ្យ​ស្នាក់នៅ​មន្ទីរពេទ្យ​យ៉ាង​ម្ដេចៗ​អាហ្នឹង​វា​អាស្រ័យ​ទៅ​លើ​ខាង​បច្ចេកទេស​លើ​ខាង​ពេទ្យ​នោះ។ ខ្ញុំ​ម្ដេច​ដឹង​? តែ​ករណី​គាត់​បើសិនជា​វះ​អាច​ចំណាយពេល​ប្រហែលជា​កន្លះ​ថ្ងៃ​អ្វី​ដែរ។ ទាល់តែ​ពេទ្យ​គេ​អ្នក​វះ​នោះ​។ គេ​ណែនាំ​អ្វី​ណែនាំ​សុខភាព​អ្វី​យ៉ាង​ម្ដេចៗ​ហ្នឹង​ទៅលើ​ជំនាញ​វេជ្ជសាស្ត្រ​ទេ»

ក្រុម​អង្គការ​សង្គម​ស៊ីវិល និង​សកម្មជន ក៏បាន​ទាមទារ​ឲ្យ​សមត្ថកិច្ច​អនុញ្ញាត​ឲ្យ​លោក រ៉ុង ឈុន ទទួល​បាន​សិទ្ធិ​ព្យាបាល​ក្នុង​មន្ទីរពេទ្យ​ឲ្យ​បាន​ត្រឹមត្រូវ​ដែរ។ ក្រុម​អ្នកឃ្លាំមើល​និង​ពលរដ្ឋ​ព្រួយបារម្ភ​ថា ប្រសិនបើ​សមត្ថកិច្ច​រឹតត្បិត​លោក រ៉ុង ឈុន មិន​ឲ្យ​ទទួល​បានការ​សម្រាក​ព្យាបាល​ត្រឹមត្រូវ​ទេ រដ្ឋាភិបាល និង​សមត្ថកិច្ច​នឹង​រង​ការ​រិះគន់​ពី​ការអនុវត្ត​ច្បាប់​មាន​ស្តង់ដារ​២ ព្រោះ​ជន​ជាប់ឃុំ​ដែល​មាន​ឥទ្ធិពល មានទ្រព្យ​សម្បត្តិ ឬ​មានអំណាច អាច​សម្រាក​ព្យាបាល​ជំងឺ​នៅ​បន្ទប់​ពិសេស​ក្នុង​មន្ទីរ​ពេទ្យ​រាប់​ខែ ខ្លះទៀត​រាប់​ឆ្នាំ​ក្រោម​ហេតុផល​ព្យាបាល​ជំងឺ។

អាជ្ញាធរ​របប​ក្រុងភ្នំពេញ​បាន​ចាប់​លោក រ៉ុង ឈុន ដាក់​ពន្ធនាគារ​ជាង​មួយឆ្នាំ​មក​ហើយ ដោយសារតែ​លោក​បាន​បញ្ចេញមតិ​អំពី​បញ្ហា​ព្រំដែន​កម្ពុជា​-​វៀតណាម ដែល​ជា​រឿង​ដ៏​រសើប​សម្រាប់​របប​លោក ហ៊ុន សែន​។ តុលាការ​ក្រុង​ភ្នំពេញ​បាន​កាត់ទោស​លោក​ឱ្យ​ជាប់ពន្ធនាគារ​២​ឆ្នាំ​ដែល​ជា​កម្រិត​ខ្ពស់​បំផុត​នៃ​ទោស​ក្នុង​បទ​ចោទ «ញុះញង់​ឱ្យ​ប្រព្រឹត្ត​អំពើ​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម»។ ទន្ទឹម​នឹង​នេះ តុលាការ​បាន​បង្គាប់​ឱ្យ​លោក​បង់​សំណង​ជា​ទឹកប្រាក់​រួមគ្នា​ជាមួយ​សកម្មជន​ពីរ​នាក់​ទៀត​ចំនួន ១​សែន​ដុល្លារ​អាមេរិក ដល់​គណៈកម្មាធិការ​ចម្រុះ​កិច្ចការ​ព្រំដែន​។ សហគមន៍​ជាតិ និង​អន្តរជាតិ​ថ្កោលទោស​សាលក្រម​នេះ​ថា អយុត្តិធម៌ និង​ជា​ការ​ដាក់​ទោស​លើ​សេរីភាព​បញ្ចេញមតិ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល