មេដឹកនាំសហជីពក្រុមហ៊ុន ណាហ្គា វើលដ៍ កញ្ញា ឈឹម ស៊ីថរ ឈ្នះពានរង្វាន់អន្តរជាតិ ឌឹ ភើ អេងងើ (The Per Anger Prize) ឆ្នាំ២០២៤ ពីរដ្ឋាភិបាលស៊ុយអែត (Sweden) បើទោះបីជា កញ្ញា កំពុងជាប់ឃុំក្នុងពន្ធនាគារ ពាក់ព័ន្ធនឹងការចោទប្រកាន់ពីបទ''ញុះញង់''ដោយសារការតវ៉ាទាមទាររកដំណោះស្រាយវិវាទការងារជាមួយក្រុមហ៊ុនណាហ្គាវើលដ៍។ ក្រុមកូដករណាហ្គាវើលដ៍ ចាត់ទុកថា ការផ្តល់ពានរង្វាន់ដល់មេដឹកនាំសហជីពរបស់ពួកគាត់នេះ គឺជាការលើកទឹកចិត្ត និងបង្ហាញពីភាពស្អាតស្អំរបស់កញ្ញា ឈឹម ស៊ីថរ។
រដ្ឋាភិបាលស៊ុយអែត កាលពីថ្ងៃទី១៨ ខែមេសា បានប្រកាសប្រគល់ពានរង្វាន់អន្តរជាតិ ឌឹ ភើ អេងងើ ឆ្នាំ២០២៤ ដល់ថ្នាក់ដឹកនាំសហជីពក្រុមហ៊ុន ណាហ្គាវើលដ៍ គឺកញ្ញា ឈឹម ស៊ីថរ ចំពោះវីរភាពកញ្ញាដែលបានការពារសិទ្ធិការងារ និងការរងទុក្ខបុកម្នេញពីសំណាក់រដ្ឋាភិបាល និងក្រុមហ៊ុនបទល្បែងណាហ្គាវើលដ៍។
គណៈវិនិច្ឆ័យ នៃពានរង្វាន់អន្តរជាតិ ឌឹ ភើ អេងងើ លើកឡើងថា ការផ្ដល់ពាន់រង្វាន់ដល់ កញ្ញា ឈឹម ស៊ីថរ នេះដោយសារតែនាងការធ្វើការដោយមិនចេះនឿយហត់ និងការប្ដេជ្ញាចិត្តរបស់នាង ក្នុងការលើកកម្ពស់លទ្ធិប្រជាធិបតេយ្យ និងការគោរពសិទ្ធិមនុស្សនៅកម្ពុជា។ គណៈវិនិច្ឆ័យ នៃពានរង្វាន់នេះ បន្តថា ការរស់នៅក្រោមរបបនៃមេដឹកនាំផ្ដាច់ការ គឺកញ្ញា ឈឹម ស៊ីថរ តែងរងទុក្ខបុកម្នេញ ដោយសារតែកញ្ញា ទាមទារឱ្យក្រុមហ៊ុនគោរពច្បាប់ ប៉ុន្តែរដ្ឋាភិបាលបែរជាកាត់ទោសឱ្យកញ្ញាជាប់ពន្ធនាគារទៅវិញ។
គណៈវិនិច្ឆ័យ នៃពានរង្វាន់នេះឱ្យដឹងទៀតថា កញ្ញា ឈឹម ស៊ីថរ គឺជាបុគ្គលដ៏សំខាន់ដែលបានគាំទ្រដល់ស្ត្រីខ្មែរផ្សេងទៀតដែលត្រូវបង្ខំឱ្យធ្វើការក្នុងលក្ខខណ្ឌមិនត្រឹមត្រូវ ហើយពួកគេកំពុងទាមទារឱ្យមានការគោរពសិទ្ធិការងារ។ បន្ថែមពីនេះ កញ្ញា ឈឹម ស៊ីថរ បានស៊ូទ្រាំនឹងការយាយី ការគំរាមកំហែង និងរងអំពើហិង្សា ជាច្រើនឆ្នាំក្ដី ក៏កញ្ញាតស៊ូដើម្បីយុត្តិធម៌រហូតមកដល់សព្វថ្ងៃនេះ។ ចំណុចពិសេសមួយទៀត កញ្ញា ឈឹម ស៊ីថរ មិនព្រមចុះចាញ់ដោយសារការកាត់ទោសឱ្យជាប់ពន្ធនាគារនោះទេ ហើយកញ្ញានៅតែលើកទឹកចិត្ត និងគាំទ្រដល់កូដករផ្សេងទៀតដែលកំពុងធ្វើកូដកម្ម។
ដូច្នេះ គណៈវិនិច្ឆ័យ នៃពានរង្វាន់យល់ថា ភាពក្លាហាន និងការលះបង់ដ៏មហិមារបស់ កញ្ញា ឈឹម ស៊ីថរ គឺជាការជំរុញទឹកចិត្តក្នុងនាមកញ្ញាជាអ្នកដឹកនាំស្ត្រីវ័យក្មេងម្នាក់ និងជាគំរូភាពសម្រាប់មនុស្សទាំងអស់គ្នា។
ពានរង្វាន់អន្តរជាតិ ឌឹ ភើ អេងងើ (The Per Anger Prize) ត្រូវបានបង្កើតឡើងក្នុងឆ្នាំ២០០៤ ហើយមានបុគ្គលចំនួន១៧ រួមទាំង កញ្ញា ឈឹម ស៊ីថរ ប៉ុណ្ណោះដែលឈ្នះពានរង្វាន់នេះ។ នេះគឺជាពានរង្វាន់ទី២ហើយ។ កាលពីថ្ងៃទី០១ ខែកុម្ភៈ ឆ្នាំ២០២២ ក្រសួងការបរទេសអាមេរិក ក៏បានផ្តល់ពានរង្វាន់អ្នកការពារសិទ្ធិមនុស្សប្រចាំឆ្នាំ២០២២ ជូនមេដឹកនាំសហជីពរូបនេះដែរ ក្នុងចំណោមបុគ្គល ១០រូបមកពីជុំវិញពិភពលោក។
កូដករណាហ្គាវើលដ៍ អ្នកនាង ម៉ម សុវឌ្ឍិន ដែលនឹងទៅទទួលពាន់រង្វាន់ជំនួស កញ្ញា ឈឹម ស៊ីថរ ថ្លែងថា ការផ្ដល់ពានរង្វាន់នេះគឺជាការបញ្ជាក់ពីគុណតម្លៃ និងភាពគ្មានទោសរបស់ កញ្ញា ឈឹម ស៊ីថរ ដែលបានការពារសិទ្ធិកម្មករនេះ។ អ្នកនាង ម៉ម សុវឌ្ឍិន ថារដ្ឋាភិបាលកម្ពុជាគួរទទួលស្គាល់ការពិតថា កញ្ញា ឈឹម ស៊ីថរ មិនបានប្រព្រឹត្តកំហុស និងដោះលែងកញ្ញាឱ្យមានសេរីភាពវិញ និងបញ្ចប់វិវាទនេះដោយអនុវត្តតាមច្បាប់ការងារ។
អ្នកនាង ម៉ម សុវឌ្ឍិន៖ «គេចង់បញ្ជាក់យ៉ាងច្បាស់ៗ ហើយថា ស្រុកខ្មែរមិនទាន់មានការអនុវត្តសិទ្ធិដូចប្រទេសដែលគោរពលទ្ធិប្រជាធិបតេយ្យនៅឡើយទេ ព្រោះគ្រាន់តែអ្នកការពារសិទ្ធិ គ្រាន់តែអ្នករកអត្ថប្រយោជន៍ជូនកម្មករត្រូវបានជាប់គុកដោយអយុត្តិធម៌ដោយមិនបានយកច្បាប់មកប្រើអត់បានត្រឹមត្រូវ មិនបានយកច្បាប់មកអនុវត្តឱ្យបានប្រសិទ្ធភាព ដូចថា ថៅកែមានសិទ្ធិរំលោភកម្មកររំលោភមិចរំលោភទៅដល់កម្មកររងគ្រោះទៅសុំអន្តរាគមន៍បែរជាទៅចាប់ដាក់គុក»។
វិទ្យុអាស៊ីសេរីព្យាយាមសុំការឆ្លើយតបរឿងនេះ អ្នកនាំពាក្យក្រសួងយុត្តិធម៌លោក ជិន ម៉ាលីន នៅថ្ងៃទី១៩ ខែមេសា ប៉ុន្តែលោកចុចបិទទូរស័ព្ទ។
នាយកទទួលបន្ទុកកិច្ចការទូទៅនៃអង្គការឃ្លាំមើលសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា ការផ្ដល់ពានរង្វាន់ដល់ កញ្ញា ឈឹម ស៊ីថរ ពីបណ្ដាប្រទេសប្រជាធិបតេយ្យម្ដងហើយម្ដងទៀតនេះ គឺជាការលើកទឹកចិត្តដល់កញ្ញាដែលបានការពារសិទ្ធិកូដករ និងជាគំរូភាពដល់សកម្មជនផ្សេងទៀតដែលកំពុងតស៊ូមតិការពារសិទ្ធិការងារនៅកន្លែងធ្វើការ។
លោក អំ សំអាត៖ «ខាងសាធារណមតិជាតិមួយចំនួនដូចជាអន្តរជាតិគេយល់ឃើញថា សកម្មភាពកញ្ញា ឈឹម ស៊ីថរ កន្លងមកនេះ គ្រាន់តែការចូលរួមចំណែកលើកកម្ពស់ទៅលើបញ្ហាសិទ្ធិមនុស្ស សិទ្ធិការងារ សិទ្ធិសហជីពដូចជាការពារកម្មករកម្មការិនីតែប៉ុណ្ណោះ វាហាក់បីដូចជាមិនត្រូវបានចោទប្រកាន់ និងធ្វើការឃុំខ្លួន ឬកាត់ទោសលើ កញ្ញា ឈឹម ស៊ីថរ នោះទេ»។
កញ្ញា ឈឹម ស៊ីថរ ត្រូវបានសមត្ថកិច្ចឃាត់ខ្លួនលើកទីមួយ ទាំងកម្រោលក្រោយពីកញ្ញាចុះពីលើរថយន្តមកដល់កន្លែងធ្វើកូដកម្ម ក្បែររដ្ឋសភា កាលពីដើមខែមករា ឆ្នាំ២០២២ និងត្រូវបានសមត្ថកិច្ចចាប់ខ្លួន ជាលើកទីពីរ កាលពីខែវិច្ឆិកា ឆ្នាំ២០២២ បញ្ជូនទៅពន្ធនាគារព្រៃសវិញ ក្រោយពីកញ្ញា វិលត្រឡប់មកពីចូលរួមកិច្ចប្រជុំនៅប្រទេសអូស្ត្រាលី (Australia)។
កាលពីខែឧសភា ឆ្នាំ២០២៣ សាលាដំបូងរាជធានីភ្នំពេញ បានសម្រេចកាត់ទោសឱ្យកញ្ញាជាប់ពន្ធនាគារ២ ឆ្នាំ ពីបទញុះញង់បង្កភាពវឹកវរក្នុងសង្គម ពាក់ព័ន្ធនឹងការចូលរួមធ្វើកូដកម្មជាមួយក្រុមបុគ្គលិកណាហ្គាវើលដ៍ ដើម្បីទាមទារដំណោះស្រាយវិវាទការងារជាមួយក្រុមហ៊ុនបនល្បែងដ៏ធំកណ្ដាលទីក្រុងភ្នំពេញមួយនេះ។ មកទល់ពេលនេះ កញ្ញា ឈឹម ស៊ីថរ កំពុងជាប់ឃុំក្នុងពន្ធនាគារជិតមួយឆ្នាំកន្លះហើយ។
កន្លងមក ក្រុមអង្គការសិទ្ធិមនុស្ស និងសហជីពជាតិ-អន្តរជាតិ ព្រមទាំងប្រទេសប្រជាធិបតេយ្យធំៗ ដូចជា សហរដ្ឋអាមេរិក (United State) និងប្រទេសអូស្ត្រាលី (Australia) ជាដើម បានទាមទារឱ្យរដ្ឋាភិបាលកម្ពុជា ដោះលែង កញ្ញា ឈឹម ស៊ីថរ ជាបន្ទាន់ ព្រោះនាងពុំបានប្រព្រឹត្តកំហុសឡើយ ហើយរដ្ឋាភិបាល ត្រូវចាត់វិធានការច្បាប់ទៅលើថៅកែណាហ្គាវើលដ៍ ដើម្បីលើកកម្ពស់ការគោរពសិទ្ធិការងារវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។