អ្នកស្រី រ៉ូណា ស្មីត បារម្ភយ៉ាងខ្លាំងពីការជំនុំជម្រះក្ដីទ្រង់ទ្រាយធំលើសកម្មជនបក្សប្រឆាំង និងតំណាងសង្គមស៊ីវិល
2020.11.25
លោក កឹម សុខា ប្រធានគណបក្សសង្គ្រោះជាតិ ដែលកំពុងជាប់ឃុំក្នុងផ្ទះ និងអ្នកស្រី រ៉ូណា ស្មីត (Rhona Smith) អ្នករាយការណ៍ពិសេស របស់អង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា។
រូប៖ ហ្វេសប៊ុក Kem Sokha និង United Nations Human Rights in Cambodia
អ្នករាយការណ៍ពិសេសអង្គការសហប្រជាជាតិទទួលបន្ទុកផ្នែកសិទ្ធិមនុស្សប្រចាំនៅកម្ពុជា អ្នកស្រី រ៉ូណា ស្មីត បានចេញសេចក្ដីថ្លែងការណ៍ចាត់ទុកការជំនុំជម្រះក្ដី ទ្រង់ទ្រាយធំទៅលើសកម្មជនគណបក្សសង្គ្រោះជាតិ នៅថ្ងៃទី២៦ វិច្ឆិកា ទំនងជាកើតចេញពីហេតុផលនយោបាយ ខ្វះមូលដ្ឋានច្បាប់ច្បាស់លាស់ និងជាការរំលោភយ៉ាងធ្ងន់ធ្ងរទៅលើសិទ្ធិទទួលបាននីតិវិធីត្រឹមត្រូវ ដែលបានបង្កើតឡើងយ៉ាងរឹងមាំដោយច្បាប់សិទ្ធិមនុស្សអន្តរជាតិ។ លោកស្រីបានបន្ថែមទៀតថា ដំណើរក្ដីរបស់តុលាការ ទំនងជាផ្នែកមួយនៃយុទ្ធសាស្ត្រ បំភិតបំភ័យ និងបំបាក់មុខគូប្រជែងរបស់រដ្ឋាភិបាល។ អ្នកស្រី សំដែងក្ដីកង្វល់យ៉ាងខ្លាំងអំពីការជំនុំជម្រះក្ដីទ្រង់ទ្រាយធំមួយ ដែលនឹងកើតមានទៅលើបុគ្គលមួយចំនួន ដែលជាប់ពាក់ព័ន្ធនឹងគណបក្សសង្គ្រោះជាតិកម្ពុជា (CNRP។
អ្នកស្រីបន្ថែមថា “នេះមិនមែនជាភាគមួយដាច់ដោយឡែកទេ។ លំហប្រជាពលរដ្ឋ និងប្រជាធិបតេយ្យនៅកម្ពុជា បានបន្តធ្លាក់ចុះហើយមានភស្តុតាងតិចតួច ដែលបង្ហាញពីការបង្រួបបង្រួម និងការផ្សះផ្សានយោបាយ។” អ្នកស្រី រ៉ូណា ស្មីត បានបន្ថែមថា ក្នុងរយៈពេលប៉ុន្មានខែចុងក្រោយនេះ អាជ្ញាធរបានចាត់វិធានការបង្ក្រាបអ្នកទាំងឡាយណា ដែលមានទំនាក់ទំនងជាមួយគណបក្សសង្គ្រោះជាតិ។ ចាប់តាំងពីខែមិថុនា ឆ្នាំ២០១៩ មក មានមនុស្សជាង ១៥០នាក់ ដែលមានទំនាក់ទំនងជាមួយគណបក្សសង្គ្រោះជាតិ ត្រូវបានចាប់ខ្លួន និងឃុំខ្លួន ដែលអ្នកទាំងនោះភាគច្រើនប្រឈមនឹងការចោទប្រកាន់ពីបទរៀបចំផែនការផ្ដួលរំលំរដ្ឋាភិបាល និងញុះញង់។
អ្នកស្រី រ៉ូណាស្មីត បានមានប្រសាសន៍ថា “ខ្ញុំសូមអំពាវនាវឲ្យអាជ្ញាធរបើកឲ្យមានលំហពលរដ្ឋ ការពារ និងលើកស្ទួយសេរីភាពមូលដ្ឋាន រួមទាំងសិទ្ធិក្នុងការជួបប្រជុំ និងការបញ្ចេញមតិ និងដើម្បីធានាសិទ្ធិទទួលបានការជំនុំជម្រះប្រកបដោយយុត្តិធម៌ សម្រាប់មនុស្សគ្រប់រូប ដូចដែលបានធានាការពារដោយបទដ្ឋានសិទ្ធិមនុស្សអន្តរជាតិ និងច្បាប់កម្ពុជា។
អ្នកស្រីអះអាងថា “មនុស្សគ្រប់រូប ត្រូវមានសិទ្ធិមានពេលវេលា និងមធ្យោបាយគ្រប់គ្រាន់ ដើម្បីរៀបចំរឿងក្ដីរបស់ខ្លួន ហើយបុគ្គលមួយចំនួន ដែលត្រូវបានតុលាការកោះហៅ កំពុងរស់នៅក្រៅប្រទេសកម្ពុជា មានមូលដ្ឋានសមហេតុផល ដែលអាចជឿថា ជនជាប់ចោទមិនមានលទ្ធភាពទទួលបានឯកសារពាក់ព័ន្ធ រួមទាំងសម្ភារៈភស្តុតាងដោះបន្ទុក ដើម្បីត្រៀមរៀបចំការពារខ្លួនឡើយ”។
តុលាការរបបលោក ហ៊ុន សែន បានកោះហៅមន្ត្រី សកម្មជន និងមន្ត្រីសង្គមស៊ីវិលជាង ១២០នាក់ ឲ្យចូលខ្លួនជំនុំជម្រះក្ដីក្នុងថ្ងៃតែមួយលើសំណុំរឿង ចោទប្រកាន់ពីបទ រួមគំនិតក្បត់ និងញុះញង់បង្កឲ្យមានភាពវឹកវរដល់សន្តិសុខសង្គម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
អត្ថបទពេញនិយម
សិទ្ធិមនុស្ស
