តុលាការ​វៀតណាម​បន្ត​ផ្ដន្ទាទោស​សកម្មជន​ខ្មែរក្រោម​២​នាក់​ឱ្យ​ជាប់​ពន្ធនាគារ

ដោយ យន់ សាមៀន
2024.05.29
តុលាការ​វៀតណាម​បន្ត​ផ្ដន្ទាទោស​សកម្មជន​ខ្មែរក្រោម​២​នាក់​ឱ្យ​ជាប់​ពន្ធនាគារ សកម្មជន​សិទ្ធិមនុស្ស​ខ្មែរ​កម្ពុជា​ក្រោមលោក តោ ហ្វាងចឿង (ឆ្វេង) និងលោក ថាច់ កឿង នៅ​ក្នុង​សវនាការ​តុលាការ​ប្រទេស​វៀតណាម។
រូប៖ សារព័ត៌មាន​ត្រាវិញ (Tra Vinh)

សាលាឧទ្ធរណ៍​វៀតណាម​សម្រេច​តម្កល់​សាលក្រម​លើ​បណ្ដឹងសាទុក្ខ​របស់​សកម្មជន​ខ្មែរក្រោម​ពីរ​នាក់​ឲ្យ​បន្ត​ជាប់​ពន្ធនាគារ។ ទោះបីជា​យ៉ាងណាក្ដី ​សហព័ន្ធ​ខ្មែរ​កម្ពុជា​ក្រោម ​ដែល​មាន​មូលដ្ឋាន​នៅ​សហរដ្ឋ​អាមេរិក​​ថ្កោលទោស​សាលក្រម​តុលាការ​វៀតណាម ហើយ​លើកឡើង​ថា សកម្មជន​ខ្មែរក្រោម ជា​សកម្ម​ទាមទារ​សិទ្ធិ​ជនជាតិ​ដើម និង​សាសនា។

សាលាឧទ្ធរណ៍​វៀតណាម​នៅ​ខេត្ត​ព្រះត្រពាំង បាន​តម្កល់​សាលក្រម​សាលាដំបូង​ផ្ដន្ទាទោស​សកម្មជន​ខ្មែរក្រោម​ពីរ​នាក់​ឲ្យ​ជាប់ពន្ធនាគារ​ពី ៣​ឆ្នាំ ៦​ខែ​ ដល់ ៤​ឆ្នាំ ​ដោយ​យក​លេស​ថា ពួកគេ​បាន «កេង​ចំណេញ​លើ​សិទ្ធិ​សេរីភាព និង​លទ្ធិ​ប្រជាធិបតេយ្យ បំពាន​លើ​ផលប្រយោជន៍​របស់​រដ្ឋ និង​សិទ្ធិ​សេរីភាព​ស្របច្បាប់​នៃ​អង្គការ​ចាត់តាំង និង​បុគ្គល»

សារព័ត៌មាន​វៀតណាម ឈ្មោះ​ត្រាវិញ (Tra Vinh) ផ្សាយ​ថា សាលាឧទ្ធរណ៍​វៀតណាម​ កាលពី​ថ្ងៃទី​២៣ ឧសភា​ តម្កល់​សាលក្រម​ឲ្យ​សកម្មជន​សិទ្ធិមនុស្ស​ខ្មែរ​កម្ពុជា​ក្រោម​ពីរ​នាក់ គឺ​លោក ថាច់ កឿង ជាប់​ពន្ធនាគារ ៤​ឆ្នាំ និង​លោក តោ ហ្វាងចឿង ៣​ឆ្នាំ ៦​ខែ ក្រោម​ការ​ចោទប្រកាន់​ពី​បទ «​កេង​ចំណេញ​លើ​សិទ្ធិ​សេរីភាព និង​លទ្ធិប្រជាធិបតេយ្យ បំពាន​លើ​ផលប្រយោជន៍​របស់​រដ្ឋ និង​សិទ្ធិ​សេរីភាព​ស្របច្បាប់​នៃ​អង្គការ​ចាត់តាំង និង​បុគ្គល»

ជុំវិញ​រឿង​នេះ ប្រធាន​នាយកដ្ឋាន​ព័ត៌មាន​សហព័ន្ធ​ខ្មែរ​កម្ពុជា​ក្រោម ព្រះភិក្ខុ សឺង យ៉ឹងរតនា មាន​ថេរ​ដីកា​ថា សហព័ន្ធ​ខ្មែរ​កម្ពុជា​ក្រោម​បាន​បដិសេធ​មិន​ទទួល​យក​សាលក្រម​តុលាការ​វៀតណាម​នោះ​ទេ ដោយ​ចាត់​ទុក្ខ​ថា តុលាការ​វៀតណាម​មិន​បាន​ផ្ដល់​យុត្តិធម៌​ដល់​សកម្មជន​ខ្មែរ​ក្រោម​នោះ​ទេ។

ព្រះភិក្ខុ សឺង យ៉ឹងរតនា៖ «សហព័ន្ធ​ខ្មែរ​កម្ពុជា​ក្រោម​សូម​បដិសេធ​ទាំងស្រុង​ និង​ថ្កោលទោស​តុលាការ​កុម្មុយនីស្ត​វៀតណាម ​ដែល​បាន​កាត់ទោស​សកម្មជន​ខ្មែរ​កម្ពុជា​ក្រោម​ទាំង​អយុត្តិធម៌ គ្មាន​មេធាវី ជាពិសេស ​ត្រូវ​ដោះលែង​សកម្មជន​សិទ្ធិមនុស្ស​ខ្មែរក្រោម​ទាំងអស់​ដោយ​ឥត​លក្ខខណ្ឌ»

សកម្មជន​ខ្មែរ​ក្រោម​ទាំង​ពីរ​នាក់ ត្រូវ​បាន​វៀតណាម​ចាប់​ខ្លួន ​ក្រោយ​ពី​ពួក​គេ​បាន​ដឹកនាំ​សកម្មជន​ខ្មែរ​ក្រោម​ផ្សេង​ទៀត​ឲ្យ​ចេះ​ដឹង​ពី​សិទ្ធិស្វ័យសម្រេច​ប្រវត្តិសាស្ត្រ​ខ្មែរ ការ​បង្រៀន​អក្សរខ្មែរ និង​សិទ្ធិ​សាសនា​នៅ​លើ​ទឹក​ដី​កំណើត។ មក​ទល់​ពេល​បច្ចុប្បន្ន​នេះ មាន​ព្រះសង្ឃ ៥អង្គ និង​សកម្មជន​ខ្មែរ​ក្រោម ៨នាក់ កំពុង​ជាប់​ពន្ធនាគារ ដោយសារ​តែ​អាជ្ញាធរ​វៀតណាម​ចោទ​ប្រកាន់​ពី​បទ​ចោទ​ស្រដៀង​គ្នា គឺ «កេង​ចំណេញ​លើ​សិទ្ធិ​សេរីភាព និង​លទ្ធិ​ប្រជាធិបតេយ្យ បំពាន​លើ​ផល​ប្រយោជន៍​របស់​រដ្ឋ និង​សិទ្ធិ​សេរីភាព​ស្រប​ច្បាប់​នៃ​អង្គការ​ចាត់តាំង និង​បុគ្គល»

សហព័ន្ធ​ខ្មែរ​កម្ពុជា​ក្រោម​បដិសេធ​ការ​ចោទប្រកាន់​ទាំងនេះ ដោយ​ចាត់​ទុកថា វៀតណាម​ប្រឌិត​រឿង​ឡើង ​ដើម្បី​ធ្វើទុក្ខបុកម្នេញ និង​គាបសង្កត់​សិទ្ធិ​ជនជាតិ​ដើម​ខ្មែរក្រោម​បន្ថែម​ទៀត។ បច្ចុប្បន្ន សហព័ន្ធ​ខ្មែរ​កម្ពុជា​ក្រោម​នៅ​ជុំវិញ​ពិភពលោក​កំពុង​ធ្វើ​យុទ្ធនាការ​ទាមទារ​ឲ្យ​អាជ្ញាធរ​វៀតណាម​ដោះលែង​ព្រះសង្ឃ និង​សកម្មជន​ខ្មែរក្រោម​ជា​បន្ទាន់ និង​ឥត​លក្ខខណ្ឌ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។