ប្រជា​ពលរដ្ឋ​នៅ​ខេត្ត​កំពត ព្រួយ​រឿង​ជួសជុល​ផ្លូវ​ប៉ះ​លំនៅឋាន

ផ្លូវ​កាត់​តាម​ខេត្ត​កំពត និង​ខេត្ត​កែប ឆ្ពោះ​ទៅ​កាន់​ព្រំដែន​កម្ពុជា វៀតណាម​ជា​ច្រើន​ខ្សែ និង​មាន​ប្រវែង​ជាង ១០០ គីឡូម៉ែត្រ នឹង​ត្រូវ​ជួសជុល​ដោយ​អន្លើ។
ដោយ អ៊ុក សាវបូរី
2011.10.13
Share on WhatsApp
Share on WhatsApp

ប្រជា​ពលរដ្ឋ​រស់​តាម​ដង​ផ្លូវ​នោះ ព្រួយ​បារម្ភ​ថា ការ​ជួសជុល​ផ្លូវ​នោះ នឹង​ប៉ះពាល់​ដី​លំនៅឋាន និង​ដី​ចម្ការ​ដំណាំ​របស់​គាត់។

ប្រធាន​មន្ទីរ​សាធារណការ និង​ដឹក​ជញ្ជូន​ខេត្ត​កំពត​ថ្លែង​ថា ផ្លូវ​ជាតិ និង​ផ្លូវ​ក្នុង​ខេត្ត​កំពត​ឆ្ពោះ​ទៅ​កាន់​ព្រំដែន​កម្ពុជា​វៀតណាម នឹង​ត្រូវ​នាយក​រដ្ឋមន្ត្រី ហ៊ុន សែន សម្ពោធ​បើក​ការដ្ឋាន​ជួសជុល​នៅ​ខែ​វិច្ឆិកា​ខាង​មុខ។

លោក លឹម សំបូរ ប្រធាន​មន្ទីរ​សាធារណការ និង​ដឹក​ជញ្ជូន​ខេត្ត​កំពត បាន​ឲ្យ​ដឹង​ថា នៅ​ថ្ងៃ​ទី ១៤ ខែ​វិច្ឆិកា​ខាង​មុខ លោក ហ៊ុន សែន នឹង​សម្ពោធ​ដាក់​ឲ្យ​ប្រើប្រាស់​ផ្លូវ​ជាតិ​លេខ ៣។ នៅ​ពេល​ជាមួយ​គ្នា​នោះ លោក ហ៊ុន សែន នឹង​ប្រកាស​ឲ្យ​ជួសជុល​ពង្រីក​ផ្លូវ​ជាតិ​លេខ ៣១ លេខ ៣៣ ផ្លូវ ១១៧ និង​ផ្លូវ​ក្នុង​ខេត្ត។ លោក​ថា ផ្លូវ​ជាតិ​នឹង​ត្រូវ​ពង្រីក​ពី ៣០ ម៉ែត្រ​ទៅ ៤០ ម៉ែត្រ គឺ​ពង្រីក​ឲ្យ​ទទឹង​ថ្នល់​បាន​ទំហំ ១១ ម៉ែត្រ។

លោក លឹម សំបូរ៖ «ហើយ​ការ​ពង្រីក​ឲ្យ​វា​ទាក់ទង​នឹង​ទី​ប្រជុំ​ជន ហើយ​នឹង​កន្លែង​វាល​ជា​ទូទៅ​គឺ ១១ ម៉ែត្រ​នឹង​ទទឹង​ថ្នល់​គិត​ពី​អ័ក្ស​ទៅ ២០ ម៉ែត្រ។  អ៊ីចឹង​បូក​ទៅ វា ២០ ម៉ែត្រ​សង​ខាង វា ៤០ ម៉ែត្រ»។

ពលរដ្ឋ​រស់នៅ​តាម​ដង​ផ្លូវជាតិ​លេខ ៣៣ ស្រុក​កំពង់ត្រាច សុំ​មិន​ប្រាប់​ឈ្មោះ បាន​ឲ្យ​ដឹង​ថា គាត់​បារម្ភ​ពី​សំណង​នៃ​ការ​ពង្រីក​ទទឹង​ផ្លូវ​នោះ។ លោក​ថា ផ្ទះ​គាត់​បាន​សង់​តាំង​ពី​ឆ្នាំ ២០០៦ មាន​ច្បាប់​ពី​មន្ត្រី​សុរិយោដី និង​មាន​ការ​យល់​ព្រម​ពី​អភិបាល​ខេត្ត ឲ្យ​គាត់​សង់​ផ្ទះ​គិត​ពី​អ័ក្ស​ថ្នល់​ជាតិ​លេខ ៣៣ ចម្ងាយ ១៥ ម៉ែត្រ។ សំណង់​សង់​រួច ហើយ​បាន​រស់នៅ និង​ប្រកប​អាជីវកម្ម។ កាល​ពី​មុន​ភ្ជុំបិណ្ឌ មន្ត្រី​ក្រសួង​នានា មក​វាស់​ពង្រីក​ថ្នល់​ពី ៣០ ម៉ែត្រ​ទៅ ៤០ ម៉ែត្រ ដែល​ធ្វើ​ឲ្យ​ផ្ទះ​គាត់​ប៉ះ​ចំណី​ផ្លូវ ៥ ម៉ែត្រ។

គាត់​មិន​ទាន់​ដឹង​ថា សំណង​រដ្ឋ​សង​ក្នុង​ការ​ប៉ះពាល់​ផ្លូវ មាន​តម្លៃ​ប៉ុន្មាន​ទេ៖ «ព្រោះ​ថា សង​ត្រូវ​សង​ទាំង​សំណង់​សង​ទាំង​ដី ពីព្រោះ​អី ពេល​ដែល​ចេញ​ច្បាប់​ឲ្យ​ខ្ញុំ​ធ្វើ ពី​អ័ក្ស​ថ្នល់ ១៥ ម៉ែត្រ»។

បុគ្គលិក​ស៊ើបអង្កេត​អង្គការ លីកាដូ ខេត្ត​កំពត លោក ឌឿ សុខុម ថ្លែង​ថា ផ្លូវជាតិ​និង​ផ្លូវ​ក្នុង​ខេត្ត​កំពត ដែល​នឹង​ត្រូវ​ជួសជុល មាន​ផ្លូវ​ចំនួន ៤ ខ្សែ ប្រវែង ១០៦.៩ គីឡូម៉ែត្រ កាត់​តាម​ស្រុក​ចំនួន ៤ គឺ​ស្រុក​អង្គរជ័យ ស្រុក​បន្ទាយមាស ស្រុក​កំពង់ត្រាច និង​ស្រុក​ទឹកឈូ។ ផ្លូវ​ទាំង ៤ ខ្សែ​នោះ ជា​ផ្លូវ​ឆ្ពោះ​ទៅ​កាន់​ព្រំដែន​ច្រក​តន់ហន់ ជាប់​ព្រំប្រទល់​កម្ពុជា វៀតណាម។

នៅ​ខេត្ត​កែប គឺ​ប៉ះ​ចំ​ស្រុក​ដំណាក់​ចង្អើរ ដែល​ជា​ផ្លូវ​ឆ្ពោះ​ទៅ​កាន់​ព្រែក​ចាក ព្រំដែន​កម្ពុជា វៀតណាម​ដែរ។ ផ្លូវជាតិលេខ៣១ ត្រូវ​ជួសជុល​ពង្រីក​ប្រវែង ៥៥.១ គីឡូម៉ែត្រ ចាប់​ពី​ថ្នល់​បំបែក​គូស ស្រុក​អង្គរជ័យ ព្រំប្រទល់​ខេត្ត​តាកែវ ទៅ​ដល់​ឃុំ​កន្ថោរ​ខាង​លិច ស្រុក​កំពង់ត្រាច។ ផ្លូវ​ជាតិ​លេខ ៣៣ ចាប់​ពី​ស្រុក​កំពង់ត្រាច​ទៅ​ទី​រួម​ខេត្ត​កំពត ប្រវែង ៣៦.២ គីឡូម៉ែត្រ។ ផ្លូវ​លេខ ១១៧ ចាប់​ពី​ផ្លូវ​បំបែក​ឃុំ​កន្ថោរ​ខាង​លិច​ឆ្ពោះ​ទៅ​ច្រក តន់ហន់ ព្រំដែន​កម្ពុជា ជាប់​ហាទៀង ប្រទេស​វៀតណាម នឹង​ត្រូវ​ពង្រីក ១១.៣ គីឡូម៉ែត្រ និង​ផ្លូវ​បញ្ចៀស​ក្នុង​ខេត្ត​កំពត នៅ​ស្រុក​ទឹកឈូ ប្រវែង​៤.៣ គីឡូម៉ែត្រ។

លោក​ថា ការ​ពង្រីក​ផ្លូវ​ទាំង ៤ ខ្សែ​នោះ មាន​ពលរដ្ឋ ១២៤ គ្រួសារ​ដែល​តវ៉ា​ខ្លាំង ព្រោះ​ខ្លាច​សំណង​ពី​រដ្ឋ​មិន​សមរម្យ ដោយសារ​សំណង់​របស់​គេ​រឹងមាំ។ ក្រៅ​ពី​នោះ គឺ​ជា​ដី​វាល​ស្រែ ដែល​ពលរដ្ឋ​ម្ចាស់​ដី​មិន​សូវ​បារម្ភ ទើប​មិន​មាន​ការ​តវ៉ា៖ «គម្រោង​ពង្រីក​ផ្លូវ​ហ្នឹង គឺ​ប៉ះពាល់​ទៅ​លើ​ដី​លំនៅឋាន​ពួក​គាត់។ មាន​ប្រជា​ពលរដ្ឋ​ខ្លះ​ប៉ះពាល់​ទាំង​ស្រុង។ ប្រជា​ពលរដ្ឋ​ខ្លះ បាត់បង់​ពាក់​កណ្ដាល ឬ​ក៏​ស្ទើរ​តែ​ទាំង​អស់»។

លោក ភ តេង ប្រជាពលរដ្ឋ​នៅ​ស្រុក​កំពង់ត្រាច ដែល​រស់​នៅ​លើ​ផ្លូវ​ជាតិ​លេខ ៣១ ជា​តំណាង​អ្នក​តវ៉ា​ម្នាក់ ក្នុង​ចំណោម​ពលរដ្ឋ ១២៤ គ្រួសារ អះអាង​ថា មន្ត្រី​សិក្សា​ពី​ផល​ប៉ះពាល់​ពី​ការ​ពង្រីក​ផ្លូវ​ជាតិ បាន​សន្យា​នៅ​ថ្ងៃ​ពុធ ទី​១២ ខែ​តុលា​ថា រដ្ឋ​នឹង​ផ្ដល់​សំណង​សមរម្យ​ដល់​ប្រជា​ពលរដ្ឋ។

ប្រធាន​មន្ទីរ​សាធារណការ និង​ដឹកជញ្ជូន ខេត្ត​កំពត លោក លឹម សំបូរ ឲ្យ​ដឹង​ថា មក​ដល់​ពេល​នេះ ការ​កំណត់​តម្លៃ​សំណង​ផល​ប៉ះពាល់​ពី​ការ​ពង្រីក​ផ្លូវ​នោះ មិន​ទាន់​បាន​កំណត់​នៅ​ឡើយ​ទេ ពី​ព្រោះ​ការ​សិក្សា​អនុវត្តន៍​នៅ​មិន​ទាន់​ចប់។ នៅ​ពេល​ណា​ការ​សិក្សា​ពី​ផល​ប៉ះពាល់​នោះ​បញ្ចប់ នឹង​មាន​ការ​ពិភាក្សា​ពី​ការ​វាយ​តម្លៃ​លើ​សំណង។

មន្ត្រី​អង្គការ លីកាដូ ឲ្យ​ដឹង​ថា គម្រោង​ពង្រីក​ផ្លូវ​នេះ រដ្ឋាភិបាល​កម្ពុជា​បាន​ខ្ចី​ថវិកា​ជួសជុល​ផ្លូវ​ពី​ប្រទេស​កូរ៉េ​ខាង​ត្បូង​ប្រមាណ ២៨ លាន​ដុល្លារ៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។